Search form

Luk 7

Yaghheans Kethwas Penn-kangour

Mat 8:5-13; Yow 4:43-54

1Wosa gorfenna oll y lavarow yn klewans an bobel, ev eth yn Kapernaum. 2Hag yth esa kethwas dhe benn-kangour, drudh dhodho, neb o klav hag yn eneworres 3Ytho pan glewas a-dro dhe Yesu, ev a dhannvonas dhodho henavogyon a'n Yedhewon ow pysi orto a dhos ha sawya y gethwas. 4Ha wosa dos dhe Yesu i a elwi warnodho yn ter, ow leverel, ‘Ev yw wordhi may hwredh hemma ragdho, 5rag ev a gar agan kenedhel hag ev a dhrehevis ragon an synaga.’ 6Ytho Yesu eth gansa. Mes pan nag esa nep-pell dhiworth an chi, an penn-kangour a dhannvonas dhodho kowetha, ow leverel dhodho, ‘Arloedh, na borth ahwer, rag nyns ov vy gwiw ty dhe dhos yn-dann ow tho; 7rakhenna ny omsynsis gwiw dhe dhos dhis, mes lavar an ger, ha'm gwas a vydh sawyes.+ 8Rag my ynwedh yw den yn-dann awtorita, ha dhymm soudoryon yn-dannov, ha my a lever dhe hemma, “Ke”, ha mos a wra, ha dhe dhen arall, “Deus”, ha dos a wra, ha dhe'm kethwas, “Gwra hemma”, hag ev a'n gwra.’ 9Ha Yesu pan glewas hemma, marth a'n jeva anodho, hag ow treylya dhe'n routh a'n sywya yn-medh ev, ‘My a lever dhywgh, ny gevis vy kemmys fydh, na hwath yn Ysrael.’ 10Ha'n re a veu dannvenys a dhehwelis dhe'n chi ha kavoes an kethwas yagh neb re bia klav.+

Drehevel Mab an Wedhwes yn Nayn

11Nebes a-wosa, ev eth yn sita henwys Nayn, hag yth esa y dhyskyblon+ ha routh veur ow mos ganso. 12Ha pan dheuth nes dhe yet an sita, awotta den re varwsa neb eses orth y dhoen yn-mes, an unn vab a'y vamm, ha hi gwedhwes, hag yth esa routh veur a'n sita gensi. 13Ha pan y's gwelas, an Arloedh a'n jeva truedh anedhi, hag a leveris dhedhi, ‘Na wra oela.’ 14Hag ev a dheuth yn-rag ha tochya an eler, ha'n dhegoryon a hedhis; hag ev a leveris, ‘Den yowynk, my a lever dhis, sav yn-bann!’ 15Ha'n marow a sevis dh'y esedh ha dalleth kewsel; hag ev a'n ros dh'y vamm. 16Hag own a's kemmeras oll, hag yth esens ow kormel Duw, ow leverel, ‘Profoes meur re sevis yn agan mysk’, ha ‘Duw re wrug vri a'y bobel.’ 17Ha'n lavar ma yn y gever eth yn-mes dres oll Yudi hag oll an pow a-dro.

Kannasow dhiworth Yowann Besydhyer

Mat 11:2-19

18Ha dyskyblon Yowann a dherivis dhodho a-dro dhe oll an taklow ma. Ytho Yowann a elwis dhodho dew a'y dhyskyblon 19ha'ga dannvon dhe Yesu ow leverel, ‘Yw ty an den a dal dos, po ken onan a wortyn?’ 20Wosa an wer dhe dhos dhodho, i a leveris, ‘Yowann Besydhyer re'gan dannvonas dhis, ow leverel, “Yw ty an den a dal dos, po ken arall a wortyn?” ’ 21Y'n eur na poran, ev re wrussa sawya lies den a glevesow ha plagys ha tebel spyrysyon, ha dhe lies dall ev re rosa golok. 22Hag ev a worthybis ha leverel dhedha, ‘Kewgh dhe dherivas dhe Yowann an taklow a welsowgh hag a glewsowgh: dellyon a wel arta, evredhyon a gerdh, klavorogyon yw glanhes ha'n vodharogyon a glew, an re varow yw drehevys, dhe'n voghosogyon an aweyl yw pregewthys; 23ha gwynnvys neb na vo sklandrys ahanav.’

24Wosa kannasow Yowann dhe omdenna, ev a dhallathas kewsel a-dro dhe Yowann dhe'n routhow, ‘Pandra ethewgh dhe-ves dhe'n gwylvos dh'y weles? Korsenn kryghyllys gans an gwyns? 25Mes pandra ethewgh dhe-ves dh'y weles? Den gwiskys yn dillas medhel? Otta, tus gwiskys yn dillas splann hag ow pywa attes, ymons yn chiow myghternedh. 26Mes pandra ethewgh dhe-ves dh'y weles? Profoes? Ya, my a lever dhywgh, ha moy ages profoes. 27Hemm yw neb may feu skrifys anodho,

“Awotta, my a dhannvon ow hannas a-rag dha fas,

neb a dharbar dha fordh a-dheragos.”

28Rag my a lever dhywgh, yn mysk an re genys a venynes nyns eus nagonan brassa ages Yowann Besydhyer;+ mes neb yw lyha yn gwlaskor Duw yw brassa agesso ev.’ 29Hag oll an dus, hag ynwedh an dolloryon, pan y'n klewsons a aswonnis ewnder Duw, hag i besydhys gans besydh Yowann. 30Mes an Fariseow ha'n laghysi a skonyas towl Duw ragdha, hag i heb bos besydhys ganso.

31‘Rag dhe bana dra y hwrav vy hevelebi tus an henedh ma, ha dhe bana dra yns i haval? 32Haval yns i dhe fleghes a'ga esedh y'n varghasva ow kelwel an eyl dh'y gila ha leverel,

“Ni a bibas dhywgh ha ny wrussowgh donsya,

ni a ganas galargan+ ha ny wrussowgh oela.”

33Rag Yowann Besydhyer a dheuth heb dybri bara nag eva gwin, ha hwi a lever, “Yma dyowl ganso.” 34Mab an den a dheuth ow tybri hag owth eva, ha hwi a lever, “Gargasenn ha penn-medhow yw, kar tolloryon ha peghadoryon.” 35Mes furneth yw prevys ewn gans oll hy fleghes.’

Peghadores yw Gevys

36Yth esa onan a'n Fariseow ow kovynn orto dybri ganso, ytho ev eth yn chi an Farise, hag esedha dhe dhybri. 37Hag otta, yth esa unn venyn neb esa y'n sita, peghadores. Ha pan wodhva ev dhe vos esedhys yn chi an Farise, hi a dhros fiol alabaster a unyent; 38hi a sevis a-dryv dhodho ryb y dreys, owth oela, ha dalleth glybya y dreys gans hy dagrow ha'ga sygha gans hy gols; ha hi a amma dh'y dreys ha'ga ura gans an unyent. 39Ytho pan y'n gwelas an Farise neb a'n galwsa, ev a gewsis dhodho y honan ow leverel, ‘Mar pe hemma profoes, ev a wodhvia piw ha py par benyn yw hi neb a wra y dochya, rag peghadores yw hi.’ 40Ha Yesu a worthybis ha leverel dhodho, ‘Simon, yma dhymm neppyth dhe leverel dhis.’ Yn-medh ev, ‘Mester, lavar.’ 41‘Yth esa dhe unn kresysor dew gendoner; yth esa dhe'n eyl kendon a bymp kans diner, ha dh'y gila hanter-kans. 42Pan na yllens pe, ev a avas dh'aga dew. Ytho pyneyl anedha a'n kar moy?’ 43Simon a worthybis ow leverel, ‘Dell dybav, ev dhe neb ev a avas moy.’ Yn-medh ev dhodho, ‘Ewn re vreussys.’ 44Ena ev a dreylyas dhe'n venyn ha leverel dhe Simon, ‘A welydh an venyn ma? My a dheuth y'th chi; ny resys dhymm dowr dhe'm treys, mes hi re beu ow kolghi ow threys gans hy dagrow ha'ga sygha gans hy blew. 45Ny resys dhymm bay, mes a-ban dheuth vy a-ji ny hedhi hi amma dhe'm treys. 46Ny wrussys ura ow fenn gans oyl, mes hi a uras ow threys gans unyent. 47Rakhenna y lavarav dhis, yma gevys dhedhi hy feghosow pals, rag hi dhe gara meur; mes dhe neb yma boghes gevys, boghes ev a gar.’ 48Ena ev a leveris dhedhi, ‘Yma gevys dhis dha beghosow.’ 49Ha'n re o esedhys ganso a dhallathas leverel an eyl dh'y gila, ‘Piw yw hemma neb a av ynwedh peghosow?’ 50Hag ev a leveris dhe'n venyn, ‘Dha fydh re'th sawyas; ke yn kres.’

An Bibel Kernewek 2018

© Kesva an Taves Kernewek 2004, 2018

© Cornish Language Board 2004, 2018

More Info | Version Index