Search form

Romanyon 3

1Ytho py les eus dhe'n Yedhow? Pyth yw dader an trodreghyans? 2Meur war bub fordh. Wostalleth an Yedhewon a's teves gwitha lavarow Duw. 3Pandra, mars o nebes anedha dislel? A dhomhwel aga dislelder lelder Duw? 4Kammenn vyth! Bedhes Duw gwir kyn fo pub den fals, dell yw skrifys,

‘Rag may fi prevys gwir y'th heryow

ha tryghi pan vi breusys.’

5Mes mar tiskwa agan droktra ewnder Duw, pandr'a wren leverel? Duw dhe vos anewn pan y'gan kessydh yn sorr? (Avel den y kowsav.) 6Kammenn vyth! Poken fatell allsa Duw breusi an bys? 7Mes mar palsha gwirder Duw dh'y wolewder der ow falsuri, prag yth esov hwath ow pos kuhudhys avel peghador? 8Ha prag na wrer drog rag may teffo da? – dell y'gan kuhudh nebes ni dhe leverel yn unn sklandra. Aga dampnya yw teg.

Nyns yw Nagonan Vyth Gwiryon

9Pandra ytho? On ni an Yedhewon byth dhe well? Nag on kammenn; rag my re guhudhas bos pub den, keffrys an Yedhewon ha'n Grekys, yn-dann alloes pegh, 10dell yw skrifys,

‘Nyns yw onan vyth gwiryon, na, nagonan vyth;

11ny gonvedh denvyth,

ny hwila denvyth Duw.

12Peub re dreylyas dhe denewen,

war-barth galsons i kamm;

ny wra da, nagonan vyth.

13Aga bryansenn yw bedh igor.

I a doell gans aga thaves.

Yma venim serf yn-dann aga diwweus.

14Leun yw aga ganow a vollothow ha hwerowder.

15Skav yw aga threys dhe skoellya goes,

16yn aga hynsyow yma terroes ha galar,

17ha'n hyns a gres ny aswonnsons.

18Nyns eus own a Dhuw a-rag aga dewlagas.’

19Lemmyn ni a woer, pypynag a lavarro an lagha kewsys yw dhe'n re usi yn-dann an lagha, rag may fo pub ganow degeys, ha rag may fo an bys oll yn-dann vreus Duw. 20Rag ny vydh denvyth kevys ewn der oberow an lagha, a-ban dheu aswonnvos pegh der an lagha.

Ewnder dre Fydh

21Mes lemmyn ewnder Duw re beu diskwedhys a-der gans an lagha, kyn hwrug an lagha ha'n brofoesi doen dustuni anodho, 22ewnder Duw dre fydh yn Yesu Krist rag oll hag a grys.+ Rag nyns eus dibarth; 23rag oll re beghas, hag i a fyll a hedhes dhe wordhyans Duw, 24kevys ewn yns gans y ras yn ro, dre dhaspren usi yn Krist Yesu, 25neb a worras Duw yn-rag avel tregeredhva+ drehedhys dre fydh yn y woes, dhe dhiskwedhes y ewnder, ow kasa heb kessydhyans an peghosow re bia gwrys kyns; 26henn o dhe brevi y'n eur ma ev y honan dhe vos ewn hag ev dh'y gavoes ewn neb a'n jeves fydh yn Yesu.

27Ytho pandr'a hwer dh'agan bostya? Nyns eus le ragdho. Py rewl yw hemma gwrys warnodho? War rewl oberow? Na, mes war rewl fydh. 28Rag+ ni a syns y kevir den ewn dre fydh a-der oberow a lagha. 29Po unnsel dhe'n Yedhewon yw ev Duw? A nyns yw ev Duw an kenedhlow ynwedh? Yw, a'n kenedhlow ynwedh, 30drefenn Duw dhe vos onan; hag ev a gyv ewn an re a's teves trodreghyans war sel aga fydh ha'n re antrodreghys der aga fydh. 31A dhomhwelyn an lagha gans fydh? Kammenn vyth! Yn konter, ni a venten an lagha.

An Bibel Kernewek 2018

© Kesva an Taves Kernewek 2004, 2018

© Cornish Language Board 2004, 2018

More Info | Version Index