Search form

Romanyon 7

Ensampel Kemmerys dhiworth Demmedhyans

1A ny wodhowgh, a vreder – rag yth esov ow kewsel dhe re a woer an lagha – bos dhe'n lagha maystri war dhen unnsel hedre vo byw? 2Yndella an wreg re beu kelmys dre lagha dhe'n gour hag ev yn fyw; mes mar merow hy gour rydh yw hi dhiworth lagha an gour. 3Yndella gelwys avoutres y fydh hi mar pyw hi gans gour arall ha'y gour hwath yn fyw. Mes mar merow hy gour rydh yw hi dhiworth an lagha ha mar temmedh gans den arall nyns yw hi avoutres.

4Y'n keth fordh, ow breder, ledhys re bewgh dhe'n lagha dre gorf Krist rag may fowgh dhe onan arall, dhodho ev neb re beu drehevys a'n re varow rag may tykkyn frut rag Duw. 5Ha ni hwath ow pywa y'n kig, agan drokhwansow a begh drehevys gans an lagha, a oberi yn agan eseli dhe dhoen frut rag mernans. 6Mes lemmyn yth on digelmys dhiworth an lagha, marow dhe'n pyth a'gan synsi, bys may serfyn yn fordh nowydh an Spyrys, a-der yn fordh goth an skrif.

Kudynn an Pegh Usi War-ji

7Pandr'a wren y leverel ytho? An lagha dhe vos pegh? Bynner re bo! Mes na ve an lagha, ny wodhvien pegh. Ny wodhvien hwans mar ny lavarra an lagha, ‘Na wra hwansa.’ 8Mes pegh ow kavoes prys y'n gorhemmynn, a wre ynnov vy drokhwans a bub eghenn, rag a-der an lagha marow yw pegh. 9Ow pywa yth esen a-der an lagha, mes pan dheuth an gorhemmynn, dasserghi a wrug pegh, 10hag y ferwis vy; an keth gorhemmynn o bywnans dhymm a dheuth ha bos mernans dhymmo vy. 11Rag pegh, ow kavoes spas y'n gorhemmynn a'm toellas ha dredho y'm ladhas. 12Rag an lagha yw sans, ha'n gorhemmynn yw ha sans ha teg ha da.

13Ytho a dheuth an da ha bos mernans dhymm? Bynner re bo! Pegh o hag ynnov owth oberi der an pyth yw da, rag may fe pegh diskwedhys avel pegh, ha der an gorhemmynn may teffa peghus dres eghenn.

14Rag ni a woer an lagha dhe vos a'n spyrys; mes a'n kig ov, gwerthys yn keth dhe begh. 15Rag an pyth a wrav ny'n konvedhav; rag an pyth na vynnav y wul henna a wrav, mes an pyth a gasav hemma a wrav. 16Mes mar kwrav an pyth na vynnav y wul, unnver ov an lagha dhe vos da. 17Ytho nyns yw my a'n gwra na fella mes an pegh hag a drig ynnov. 18Rag y hwonn na drig ynnov travyth da, henn yw y'm kig. Yma parys genev an mynnas, mes kowlwul an da – ny allav. 19Rag ny wrav an pyth a vynnav y wul, mes an drog na vynnav y wul henna a wrav. 20Mes mar kwrav an pyth na vynnav y wul, nyns yw na fella my a'n gwra, mes pegh hag a drig ynnov.

21Ytho y kavav avel lagha bos genev droktra pan vynnav gul da. 22Rag y lowenhav yn lagha Duw y'm kowses usi ynnov ow honan, 23mes y hwelav y'm eseli ken lagha ow kwerrya orth lagha ow brys hag orth ow gul prisner dhe lagha pegh hag a drig y'm eseli. 24Truan dell ov! Piw a'm delirv dhiworth korf an mernans ma? 25Grass e+ dhe Dhuw dre Yesu Krist agan Arloedh!

Yndella genev vy ow honan y servyav lagha Duw gans ow brys, mes gans ow hig y servyav lagha pegh.

An Bibel Kernewek 2018

© Kesva an Taves Kernewek 2004, 2018

© Cornish Language Board 2004, 2018

More Info | Version Index