Search form

James 3

kitēyihtamok ē‑isi-pīkiskwēyēk

1hāw, nitōtēmitik, ātiht piko kita-kī-okiskinohamākēwiyēk. kikiskēyihtēnāwāw niyanān kā‑kiskinohamākēyāhk nawac sōhki nika-wiyasiwātikonān kisē-manitow ispīhci kotakak ayisiyiniwak. 2kahkiyaw kiyānaw mihcētwāw kiwanitōtēnānaw. kīspin awiyak tāpitawi kitēyihtam ē‑isi-pīkiskwēt, ēkosi mitoni takahkiyinīwiw, ē‑kaskihtāt kita-kitēyimisot. 3ispī ē‑tāpitonēhpitāyahkok misatimwak kika-kī-mīnoskwēpitānawak itē ē‑itēyihtamahk kita-itohtēcik. 4ahpō māmitonēyihtamok nāpihkwāna, āta ē‑misāki, sipwēyāstanwa māna kā‑misi-yōtik. āta ē‑apisāsiniyik, takwahikan ohci kaskihtāw ana kā‑paminahk ta‑mīnopitahk itē ē‑itēyihtahk isi. 5pēyakwan ēkosi mitōn, āta ē‑apisāsik mistahi mamihcimonāniwiw.

māmitonēyihtamok sakāwaskiy ē‑misāk kita-kī-pasitēw iskocēs ohci. 6mitōn tāpiskōc kā‑pasitēk; mitōn tāpiskōc maci-askiy miyawihk, ēkota ohci macātisiwin ē‑āsōpayik. mitōn ohci ayisiyiniw kahkiyaw opimātisiwinihk kā‑pasitēk, iskotēw kā‑ohcipayik maci-iskotēhk. 7ayisiyiniwak kaskihtāwak kita-yōspisīhācik ēkwa kī‑yōspisīhēwak nanātohk pisiskiwa ēkwa piyēsīsa ēkwa kinēpikwa ēkwa kinosēwa. 8māka namōya awiyak kaskihtāw kita-yōspisīhtāt mitōn. maci-kīkway mīna ēkāya ka‑kī-mamīnonamihk ēkwa ē‑sākaskinē-piscipōniwik. 9mitōn ohci kinanāskomānaw kā‑tipēyihcikēt māmawi-ohtāwīmāw, ēkwa mīna ē‑maci-akimāyahkok ayisiyiniwak ē‑kī-osīhihcik kita-naspitawācik kisē-manitowa. 10otōnihk ohci ayisiyiniw nanāskomow mīna maci-akimow. nitōtēmitik, namōya ēkosi kita-kī-ispayik! 11mōhkiciwanipēkohk ohci namōya ohticiwan pēyakwanohk ē‑miywāsik nipiy mīna ē‑wīsakākamik nipiy. 12nitōtēmitik, namōya ohpikinwa pimīmina misi-sōmināhtikohk ohci, ēkwa sōmināhtikohk ohci namōya ohpikinwa misi-sōmina. pēyakwan namōya ē‑miywāsik nipiy kita-kī-ohcīmakan mōhkiciwanipēkohk ē‑wīsakākamik.

iyinīsiwin kihci-kīsikohk ohci

13awīna ōta kiyawāw kā‑iyinīsit mīna nisitohtamowin kā‑ayāt? kiyām kita-wāpahtihiwēw otiyinīsiwin kā‑isi-miyo-pimātisit mīna kā‑isi-miyo-tōtahk, ē‑tapahtēyimisot ēkwa ē‑iyinīsit. 14māka kīspin kitohtēyihtaskin mīna kitayiwākēyimon kitēhiwāhk, ēkāya mamihcimiso, ē‑kiyāskīkātaman tāpwēwin. 15ēkotowahk iyinīsiwin namwāc ohcīmakan kihci-kīsikohk; ōta askīhk tipēyihtākwan, namōya kisē-manitōnāhk ohcīmakan māka maci-manitōnāhk. 16ayisk itē ē‑ihtakocik ayisiyiniwak ē‑ohtēyihtaskicik mīna ē‑pēyakwēyimisocik, ēkota mīna māyi-wīcēhtowin ēkwa nanātohk macātisiwin. 17māka iyinīsiwin kihci-kīsikohk ohci kanātan; ēkwa mīna pēyāhtakēyihtākwan, yōskātisihtākwan mīna miyo-wīcēhtākwan, mitoni kitimākēyihtākwan, ēkwa tāpitawi miyokihtāw miyo-tōtamākēwina. namōya ihtakonwa ayahtēyimiwēwin mīna namōya miywātisihkāsowin. 18miywātisiwin otinikahtēw kā‑kistikēhk ohci kiscikānisihk kā‑sīhkiskahkik pēyāhtakēyimowin kā‑kī-kistikēcik pēyāhtakēyimowin.

Plains Cree Scripture Portions

Plains Cree Scripture Portions © 2014 Canadian Bible Society

More Info | Version Index