Search form

James 4

pakitēyimisok wiya ohci kisē-manitow

1tānēhki kā‑kīhkāhtoyēk mīna kā‑māyi-wīcēhtoyēk? akāwātamowina anihi kā‑nōtinikoyēk kita-tipēyimikoyēk ohci. 2kinitawēyihtēnāwāw anihi kīkwaya ēkāya kā‑ayāyēk, ēkosi kinohtē-nipahtākānāwāw; ē‑kīhkāhtoyēk mīna ē‑nōtinitoyēk iyikohk ē‑akāwātamēk. namōya kitayānāwāw wiya namōya ē‑natotamawāyēk kisē-manitow. 3ispī kinatotamawāwāw kīkway, namōya kimiyikowāw, ayisk ē‑wani-kākīsimototawāyēk kā‑pēyako-māmitonēyimisoyēk. 4kiyawāw ēkāya kā‑tāpwēwakēyimāyēk kisē-manitow! ēkāya cī ē‑kiskēyihtamēk, kīspin kisākihtānāwāw kā‑isi-pimātisihk ōta askīhk, kinōtināwāw kisē-manitow? kīspin kiwī-wīcēhtēnāwāw kīkwaya ōta askīhk ēkosi isi, kinōtināwāw kisē-manitow. 5ēkāya konita itēyihtamok ōma kā‑itastēk kihci-masinahikanihk, “kisē-manitow kikī-miyikonaw ahcāhkwa kiyawināhk; ēwako piko wiya ē‑akāwātamāsot.” 6māka kimiyikonaw kisēwātisiwin ayiwāk ē‑sōhkaniyik; ēkosi itastēw kihci-masinahikanihk, “kisē-manitow ātawēyimēw kā‑kihcēyimisoyit, māka kisēwātotawēw anihi kā‑tapahtēyimisoyit.”

7ēkosi pakitēyimisok ta‑nanahihtawāyēk kisē-manitow. nōtinihk macāyis, ēkosi kita-sipwēyāmow. 8pimitisahohk kisē-manitow, ēkosi kika-pē-wīcēkowāw. macātisak, kwēskātisik, kāsīcihcēk! kanācihtāk kitēhiwāwa, kiyawāw āhkītāp kā‑kihci-tōtamēk. 9mihtātamok kā‑kī-maci-tōtamēk ēkwa mātok. pōni-pāhpik, ēkwa māci-mātok; pōni-mōcikēyihtamok, ēkwa māci-kakwātakēyimok. 10pakitēyimisok ta‑tapahtēyimisoyēk wiya ohci kā‑tipēyihcikēt. ēkosi kika-kistēyimikowāw.

ēkāya maci-āyimōmitok

11ēkāya maci-āyimōmitok, nitōtēmitik. kīspin awiyak kitāyimōmāw ahpō kipīwēyimāw, kitāyimōtēn ēkwa kipīwēyihtēn kisē-manitow owiyasiwēwin.+ ēkwa kīspin ē‑pīwēyihtaman wiyasiwēwin, namōya ayiwāk ē‑nanahihtaman, māka kipīwēyihtēn. 12wiya piko kisē-manitow wiyasiwēwin kā‑mēkit, mīna wiyasiwēwikimāwiw. wiya piko kita-kī-pimācihāt ayisiyiniwa ahpō kita-misiwanācihāt. awīna ōma ē‑itēyimisoyan awiyak kita-wiyasiwātat?

ēkāya mamihcimisok

13natohtawik, kiyawāw ōmisi māna kā‑itwēyēk, “anohc ahpō wāpahki, ka‑itohtānānaw nānitaw kihci-ōtēnāhk, ēkotē pēyak askiy kika-ayānānaw. kika-sōniyāhkānānaw ēkotē ta‑miyo-kaskihcikānānaw.” 14namōya ahpō kikiskēyihtēnāwāw tānisi kita-ispayihikoyēk wāpahki. kiyawāw ōma tāpiskōc kā‑kaskāpahtēpayik māna aciyaw, ēkwa sēmāk ēkāya kā‑nōkwahk. 15ōmisi kita-kī-itwēyēk, “kīspin kā‑tipēyihcikēt tēpēyimow, kika-pimātisinānaw ēkwa ēkosi isi kika-tōtēnānaw.” 16māka ēkwa kikihcēyimisonāwāw ēkwa kimamihcimisonāwāw. mitoni namōya kwayask ēwako.

17ēkosi māka kīspin awiyak kiskēyihtam miyo-tōtamowin, ēkwa namōya tōtam, ē‑maci-tōtahk anima.

Plains Cree Scripture Portions

Plains Cree Scripture Portions © 2014 Canadian Bible Society

More Info | Version Index