Search form

Matthew 14

John osīkahāhtākēw nipahāw

1ēkospīhk kihci-okimāw Herod Galilee askīhk ohci kī‑pēhtam Jesusa ē‑itācimimiht. 2ēkwa ōmisi itēw otatoskēyākana, “ēwako awa John osīkahāhtākēw, kā‑kī-āpisisihk; ēwako ohci mamāhtāwi-kīkway kā‑ta-tōtahk, ēkota ē‑ohtinahk mamāhtāwisiwin.”

3wiya Herod kī‑itasiwēw Johna ka‑otinimiht, ēkwa ka‑mamāhcikwahpitimiht ēkwa ka‑kipahomiht. Herodiasa ohci ōma kā‑tōtahk, wīcisāna Philipa kā‑kī-wīwiyit. 4Herod ōmisi ēsa kī‑ay‑itik Johna, “namōya kipimitisahēn wiyasiwēwin kā‑owīkimākaniyan Herodias!” 5Herod kī‑nōhtē-nipahēw Johna, māka kī‑kostēw Jewa+ wiya okiskiwēhikēwa ē‑itēyimāyit Johna.

6ispīhk ē‑tipiskāk Herod, Herodias otānisa kī‑nīmihitōstamākēyiwa ēkwa mistahi ēsa kī‑nahēyihtamihik Herod. 7ēkosi ē‑kihci-itwēt asotamawēw kita-miyāt piko kīkway natotamākoci.

8okāwiya awa oskinīkiskwēw sīhkimik ka‑wīhtamawāt, “miyin sēmāk ōta ostikwān John osīkahāhtākēw napakiyākanihk.”

9kihci-okimāw mistahi mihtātam, māka ayisk kī‑kihci-itwēw, ēkwa ēkota onatomākana ē‑apiyit, ēkosi itasiwēw osimākanisīma ka‑tōtamiyit. 10ēkosi kipahotowikamikohk nitawi-kīskistikwānētahwēwak Johna. 11ēkwa ostikwān pētāyiwa napakiyākanihk ēkwa ana oskinīkiskwēw miyāw, ati-miyēw ēsa okāwiya. 12okiskinohamawākana John kī‑pē-nātamiyiwa wiyaw ēkwa kī‑nahastāyiwa, ēkwa ēsa kī‑nitawi-ācimostawēwak Jesusa.

Jesus asamēw niyānanwāw kihci-mitātahtomitanaw ayisiyiniwa

(Mark 6.30-44; Luke 9.10-17; John 6.1-14)

13ispīhk Jesus ē‑pēhtahk ōma, kī‑sipwēhtēw ōsihk pakwacāyanohk isi kita-pēyakot. ēkwa ispīhk ē‑pēhtahkik ayisiyiniwak, kī‑pimitisahwēwak ōtēnawa ohci ē‑mostohtēcik wāsakām. 14ē‑kī-kapāt, kā‑wāpamāt mitoni ē‑mihcētiyit ayisiyiniwa, ēkosi kī‑kitimākinawēw mīna kī‑iyinīhkahēw anihi kā‑āhkosiyit.

15ēkwa ē‑ati-otākosik, okiskinohamawākana kī‑pē-nātik ē‑itikot, “mitoni ōma pakwāci-ayihk ōta kā‑ayāyahk ēkwa mīna ati-otākosin. kīwētisahok ōki ayisiyiniwak ta‑āh-itohtēcik ōcēnāsihk nanānis, ēkwa kita-atāwēstamāsocik mīciwin.”

16Jesus ōmisi itēw, “namōya katāc kita-kīwēcik; kiyawāw asamihkok.”

17ōmisi itik, “niyānan ōma piko pahkwēsikanak nitayāwānānak mīna nīso kinosēwak.”

18“pētamawik,” Jesus itēw. 19mīna itasiwātēw ayisiyiniwa kita-apiyit maskosīskāhk; ēkwa otinēw anihi niyānan pahkwēsikana mīna anihi nīso kinosēwa, kī‑itāpiw kīsikohk isi, kī‑nanāskomēw kisē-manitowa. kī‑pahkwēnēw ēkwa miyēw okiskinohamawākana, ēkwa kī‑miyēyiwa ayisiyiniwa. 20ēkosi kahkiyaw kī‑mīcisowak mīna kī‑tēpiskōyowak. ēkwa kiskinohamawākanak kī‑sākaskinahtāwak nīsosāp wīkopīwatihk iskwascikana. 21aniki kā‑kī-mīcisocik nānitaw niyānanwāw kihci-mitātahtomitanaw kī‑ihtasiwak nāpēwak, māka iskwēwak mīna awāsisak namwāc ohci-akimāwak.

Jesus pimohtēw waskic nipiy

(Mark 6.45-52; John 6.15-21)

22ēkosi ēsa Jesus kī‑isitisahwēw okiskinohamawākana ōsihk kita-nīkāni-āsowahamiyit kwēskakām isi, ēkwa wiya ispīhci ē‑sipwēhtisahwāt ayisiyiniwa. 23ēkwa ē‑kī-sipwēhtisahwāt kī‑āmaciwēw pēyak ispatināw, ē‑nitawi-pēyako-ayamihāt. ēkwa ē‑otākosiniyik ēkotē kī‑pēyakow. 24māka anima ōsi āsay wāhyaw sisonēkām ohci kī‑ayāyiw, ēkwa iyikohk ē‑misi-yōtik kī‑mamahkāskāyāw.

25ē‑ati-pētāpaniyik kī‑nātēw okiskinohamawākana ē‑pimohtēt waskic nipīhk. 26māka ispīhk kiskinohamawākanak ē‑wāpamācik nipīhk ē‑pimohtēyit, “cīpay ana!” ē‑isi-tēpwēcik wiya iyikohk ē‑nanami-sēkisicik.

27māka sēmāk kī‑pīkiskwātēw ē‑itāt, “sōhkēyimok, niya ōma. ēkāya sēkisik.”

28Peter ēsa itēw, “kā‑tipēyihcikēyan, kīspin tāpwē kiya, natomin kita-nātitān nipīhk.”

29“āstam,” itik ēsa. ēkosi Peter kā‑kapāt ōsihk ohci mīna kā‑pimohtēt waskitipēhk ē‑ati-nātāt Jesusa. 30māka ispīhk ē‑kiskēyihtahk iyikohk ē‑yōtiniyik kī‑sēkisiw, ēkwa ē‑māci-kosāpēt kī‑tēpwātēw, “kā‑tipēyihcikēyan, pimācihin!”

31Jesus sēmāk kī‑sakicihcēnēw ē‑ocipitāt, ēkwa itēw, “tāpwē ēsa apisīs kitaspēyimon! tānēhki ēkāya kā‑tāpwēhtaman?”

32ē‑kī-pōsicik ōsihk, kī‑āstē-yōtiniyiw. 33ēkwa aniki ōsihk kā‑apicik kī‑mamihcimēwak ē‑itācik, “tāpwē ōma kiya manitowikosisān.”

Jesus iyinīhkahēw otāhkosiwa Gennesaretihk

(Mark 6.53-56)

34ē‑kī-āsowahahkik ēkwa, kī‑takosinwak Gennesaretihk. 35ēkwa ēkota kā‑ayācik ayisiyiniwak kī‑nisitawēyimēwak Jesusa, ēkosi ōma ācimowin kī‑sipwēhtisahamwak wāsakām askīhk isi, ēkwa ayisiyiniwak kī‑pētamawēwak Jesusa kahkiyaw otāhkosiwa. 36ēkwa natotamawēwak Jesusa kanakē kita-sāminamwācik oskotākāyiw; ēkosi kī‑iyinīhkahāwak kahkiyaw kā‑kī-sāminamwācik oskotākāyiw.

Plains Cree Scripture Portions

Plains Cree Scripture Portions © 2014 Canadian Bible Society

More Info | Version Index