Search form

Matthew 19

kiskinohamākēw Jesus wēpinitowin

(Mark 10.1-12)

1ispīhk Jesus ē‑kī-kīsi-pīkiskwātahk ōhi, kī‑sipwēhtēw Galileehk ohci ēkwa itohtēw Judea askīhk isi, akāmihk Jordan sīpīhk. 2mihcēt ayisiyiniwa kī‑pimitisahok ēkwa ēkota kī‑iyinīhkahēw.

3ēkwa Phariseewak kī‑pē-nātēwak ē‑kakwē-cīsimācik ōmisi ē‑itācik, “wiyasiwēwinihk cī pakitinikātēw nāpēw kita-wēpināt owīkimākana pikonita kīkway ohci?”

4ōmisi itēw Jesus, “ēkāya cī ē‑kī-ayamihtāyēk kihci-masinahikanihk kā‑itastēk nistam ana kā‑kī-osīhtāt kahkiyaw kīkway kī‑osīhēw nāpēwa mīna iskwēwa? 5ēkwa kisē-manitow itwēw ēsa, ‘ēwako ohci nāpēw nakatēw ohtāwiya mīna okāwiya ēkwa wīkimēw wīwa, ēkwa pēyak ayisiyiniw kita-ispayiwak ōki nīso.’+ 6ēkosi ēkota ohci namōya wiyawāw nīso ayisiyiniwak, māka pēyak ayisiyiniw. namōya awiyak kita-kī-paskēnēw, wiya kisē-manitow pēyak ē‑isīhāt.”

7ōmisi itēwak ēsa, “tānēhki kā‑kī-miyāt Moses nāpēwa kita-masinahamiyit wēpinitowasinahikan ēkwa kita-miyāyit owīkimākaniyiwa ēkwa kita-ati-wayawītisahwāyit wīkihk ohci?”

8ōmisi itēw Jesus, “ē‑maskawitēhēyēk ohci Moses kā‑kī-pakitinahk kita-wēpiniskwēwēyēk, māka nistam ohci namōya ēkosi ohci-ispayin. 9ēkosi kiwīhtamātināwāw, ana nāpēw kā‑wēpiniskwēwēt namōya pisikwātisiwin ohci, māka konita kīkway ohci, kakēpātisiw kīspin kotaka iskwēwa ati-wīwiw.”

10okiskinohamawākana itik, “kīspin ōma ēkosi ihkin kā‑wīkihtocik nāpēw ēkwa iskwēw, nawac ēsa miywāsin ēkāya kita-wīkihtohk.”

11Jesus naskwēwasimēw ē‑itāt, “namōya kahkiyaw nāpēwak kita-kī-otinam, aniki piko kā‑miyikowisicik. 12ātiht ēkosi isi nihtāwikiwak ēkwa kotakak ēkosi ē‑kī-isīhihcik, mīna kotakak nawasōnamwak kihci-kīsikowi-tipēyihcikēwin ohci ēkāya ē‑wī-wīkihtocik. mahti kita-tōtam ōma ana kā‑kaskihtāt.”

apisci-awāsisa Jesus sawēyimēw

(Mark 10.13-16; Luke 18.15-17)

13ātiht ayisiyiniwak kī‑pēsiwēwak awāsisa Jesusa kita-sāmināyit oscikwānisiyihk ēkwa kita-ayamihēstamawāyit, māka ēsa kitahamawēwak kiskinohamawākanak. 14māka Jesus ōmisi itēw, “pakitinihkok awāsisak kita-pē-nāsicik, ēkāya kitahamāhkok, wiya ēwakonik ōki itowahk kā‑ayācik kihci-kīsikowi-tipēyihcikēwinihk.”

15ispīhk ē‑kī-sawēyimāt, ēkota kī‑ati-sipwēhtēw.

oskinīkiw kā‑wēyōtisit

(Mark 10.17-31; Luke 18.18-30)

16pēyak ēsa ēkwa nāpēw pē‑nātēw Jesusa ē‑kakwēcimāt, “okiskinohamākēw, kīkway miyo-tōtamowin ka‑tōtamān kita-kaskihtamāsoyān kākikē pimātisiwin?”

17“tānēhki kā‑kakwēcimiyan kīkway anima miyo-tōtamowin?” itēw ēsa Jesus, “wiya piko kisē-manitow kā‑miywātisit. tipitōta itasiwēwina kīspin kākikē kinōhtē-pimātisin.”

18“tānānihi itasiwēwina?” itwēyiwa.

ēkwa Jesus itēw ēsa, “ēkāya nipahtākē; ēkāya pisikwātisi; ēkāya kimoti; ēkāya kiyāskīwācim awiyak kā‑wiyasiwātiht; 19kika-manācihāwak kohtāwiy mīna kikāwiy ēkwa kika-sākihāw kīci-ayisiyiniw kā‑isi-sākihisoyan.”

20“kahkiyaw ōhi ē‑kī-pē-tōtamān itasiwēwina,” itik ōhi oskinīkiwa. “tānisi ayiwāk ka‑tōtamān?”

21ōmisi itēw Jesus, “kīspin misakāmē kwayask kinōhtē-ayisiyinīwin, nitawi-atāwākē kahkiyaw kīkway kā‑ayāyan ēkwa kika-miyāwak okitimākisiwak, ēkosi kika-ayān wēyōtisiwina kihci-kīsikohk; ēkwa kika-pē-pimitisahon.”

22ē‑pēhtahk ōma ē‑itikot awa oskinīkiw, ē‑kitimākēyimot kī‑sipwēhtēw wiya ē‑wēyōtisit ēsa.

23ōmisi ēkwa itēw Jesus okiskinohamawākana, “ē‑tāpwēyān ōma, mistahi āyiman ē‑wēyōtisit nāpēw kita-pīhtikwēt kihci-kīsikowi-tipēyihcikēwin. 24mīna kiwīhtamātināwāw nawac āyiman ē‑wēyōtisit nāpēw kita-pīhtikwēt otipēyihcikēwinihk kisē-manitow ispīhci piskwākanēwatim kita-pīhtikwēt anima kā‑pakonēyāyik sāponikanihk.”

25ē‑pēhtahkik ōma ē‑itwēyit mitoni māmaskātamwak, ē‑itwēcik, “awīna māka ka‑kī-pimācihiht?”

26ē‑kitāpamāt Jesus ōmisi itēw, “ayisiyiniwak namwāc kita-kī-kaskihtāwak, māka wiya kisē-manitow, kahkiyaw kīkway wēhtaniyiw.”

27ēkwa Peter ōmisi itēw, “kā‑tipēyihcikēyan, kahkiyaw kīkway ōma ē‑nakatamāhk kita-wīcētāhk. kīkway māka niyanān ka‑ohtisiyāhk?”

28Jesus itēw, “ē‑tāpwēyān ōma kā‑ititakok, ispīhk kahkiyaw kīkway oskāyiwiki, ayisiyinīwikosisān kita-apiw kistēyihtākosiwinihk kihci-okimāwi-tēhtapiwinihk. ēkospīhk kiyawāw kā‑pimitisahoyēk kika-apināwāw nīsosāp kihci-okimāwi-tēhtapiwinihk, kita-wiyasiwātāyēkok aniki nīsosāp kā‑piskihtaskānēsicik Israelīwiyiniwak. 29ēkwa tahto niya ohci kā‑nakatahkik wīkiwāwa ahpō okistikān-askīwāwa mīna kā‑nakatācik wīcisāniwāwa ahpō ohtāwīwāwa, ahpō okāwīwāwa, ahpō ocawāsimisiwāwa kita-miyikowisiwak mitātahtomitanaw tahtwāw ayiwāk anihi kā‑nakatahkik, ēkwa kita-ayāwak kākikē pimātisiwin. 30māka mihcēt ayisiyiniwak kā‑nīkānakisocik mēkwāc, iskwēyānihk kita-akisowak, ēkwa aniki iskwēyānihk kā‑itakisocik kita-nīkānakisowak.

Plains Cree Scripture Portions

Plains Cree Scripture Portions © 2014 Canadian Bible Society

More Info | Version Index