Search form

Matthew 3

John osīkahāhtākēw kakēskimiwēw

(Mark 1.1-8; Luke 3.1-18; John 1.19-28)

1ēkospīhk John osīkahāhtākēw kī‑pē-itohtēw pakwataskīhk, Judea askīhk ēkwa kī‑māci-kakēskihkēmow. 2“mihtātamok mīna kwēskātisik kā‑kī-maci-tōtamēk,” itwēw ēsa, “ayisk wīpac kita-otihcipayiw kihci-kīsikowi-tipēyihcikēwin.” 3ēwakoni ōhi Johna kā‑kī-āyimōmāt Isaiah ispīhk ōmisi kā‑itwēt,

“awiyak matwē-tēpwēw pakwataskīhk,

‘kwayācih mēskanāhkēk kā‑tipēyihcikēt ohci,

kwayaskwamohtāk mēskanaw ita kita-pimohtēhot!’”+

4John kī‑kikiskam miskotākay piskwākanēwatimwa opīwayiwa ohci ēkwa pahkēkin pakwahcēhonis. ēkwa okwāskōcisīsa mīna pakwaci-āmōmēy kī‑mīciw. 5ayisiyiniwa kī‑pē-nātik Jerusalemihk ohci ēkwa misiwē Judea askīhk ohci, ēkwa nanānis wāsakām ohci Jordan sīpīhk. 6kī‑ācimisowak kahkiyaw omāyi-tōtamowiniwāwa, ēkwa kī‑sīkahāhtawēw Jordan sīpīhk.

7John ēsa wāpamēw mihcēt Phariseewa mīna Sadduceewa ē‑pē-nātikot kita-sīkahāhtawāt, ōmisi itēw, “piscipowi-kinēpikwak kiyawāw! awīna ē‑itikoyēk kita-paspīyēk kisē-manitow ohci onipahiyawēsiwin kā‑wī-pē-itisahahk? 8wāpahtihiwēk kwayask ē‑kī-kwēskātisiyēk. 9ēkwa ēkāya itēyihtamok ē‑wī-paspīyēk kakwātakihtāwin tēpiyāhk itwēyēko, ‘Abraham nimosōminān.’ kiwīhtamātināwāw, kisē-manitow ka‑kī-otinēw ōhi asiniya kita-āniskotāpānēhāt Abrahamwa!” 10ēkota āsay astēw cīkahikan kita-kīskatahoht mistik ēkāya ē‑takahki-mīnisiwit, ēkwa kita-mēstihkasoht. 11nitāpacihtān nipiy ē‑sīkahāhtātakok wiya ē‑kīsēyihtamēk kita-kwēskātisiyēk, māka ana kā‑wī-takohtēt kita-sīkahāhtākēw ē‑āpacihāt kā‑kanātisiyit ahcāhkwa mīna iskotēw. nawac ayiwāk itēyihtākosiw ispīhci niya, namwāc ahpō niya nitēpakēyimison kita-tahkonamwak omaskisina. 12ayāw cīstāskwahikan kita-ohci-wēpāstimāt kistikāna kita-māwasakonāt ēkwa pawascikana kita-mēstihkasamohk iskotēhk ita ēkāya wīhkāc kā‑pōni-kwāhkotēk.

Jesus ē‑sīkahāhtāht

(Mark 1.9-11; Luke 3.21,22)

13ēkwa Jesus kī‑ohtohtēw Galileehk, ē‑pē-takohtēt Jordan sīpīhk. kī‑nātēw Johna kita-sīkahāhtākot. 14John māka kakwē-nakinēw ē‑itāt, “tānēhki kā‑kakwēcimiyan? niya ōma kita-kī-sīkahāhtawiyan.”

15ōmisi itēw ēsa Jesus, “mahti ēkosi kita-ihkin. ēkosi kika-tōtēnānaw kisē-manitow kahkiyaw kīkway ē‑isi-nitawēyihtahk.” John ēsa tāpwēhtawēw.

16mayaw Jesus ē‑sīkahāhtāht kī‑pīkopēw sīpīhk ohci, ēkwa kī‑wāpahtam kīsik ē‑yōhtēpayiyik, mīna wāpamēw otahcāhkoyiwa kisē-manitowa ē‑pētakociniyit tāpiskōc omīmīwa ē‑isinākosiyit ē‑twēhototākot. 17pēhtākwaniyiw ē‑matwē-pīkiskwēhk kīsikohk, ē‑itwēwiht, “ēwako awa kā‑sākihak nikosis, ēwako mistahi kā‑miywēyihtamihit.”

Plains Cree Scripture Portions

Plains Cree Scripture Portions © 2014 Canadian Bible Society

More Info | Version Index