Search form

ᓂᔥᑕᒻ ᑌᓴᓗᓂᔭᓇ 3

1ᐁᐗᑯ ᐅᒋ, ᐃᔅᐱ ᐁᑳ ᑫᔥᑭᑖᔮᒃ ᑫᔮᐸᒡ ᑭᒋ ᑭᐱᒋᔮᒃ, ᑲᑕ ᒥᓨᔑᓐ ᓂ ᑮ ᐃᑌᓕᑌᓈᓐ ᑭᒋ ᐯᔭᑯ ᓇᑲᑎᑲᐎᔮᒃ ᐊᓐᑕ ᐋᑎᓐᓯᒃ; 2ᓀᔥᑕ ᒫᑲ ᓂ ᑮ ᐃᔑᑎᔕᐙᓈᓐ ᑎᒧᑎ, ᓂᒋᔖᓂᓈᓐ, ᓀᔥᑕ ᐅᑦ ᐋᔭᒥᐋᐎ ᐊᑑᔅᑫᓛᑲᓂᒪ ᑭᒋᒪᓂᑐ, ᓀᔥᑕ ᓂᒋᐊᑑᔅᑫᓛᑲᓂᓈᓐ ᐅ ᒥᓗᐋᒋᒧᐎᓂᒃ ᙭, ᑭᒋ ᐊᔨᒋᐃᑖᒃ ᓀᔥᑕ ᑭᒋ ᑳᑭᒋᐃᑖᒃ ᑭ ᑖᐺᔦᓕᑕᒧᐎᓂᐗᐤ ᐅᒋ: 3ᐁᑳᐎᓚ ᐊᐌᓇ ᐃᓕᓕᐤ ᑭᒋ ᒥᑯᔥᑳᑎᔥᑳᑯᑦ ᐅᐅ ᑲᒀᑕᑭᓯᐎᓇ: ᐌᓴ ᑭᓚᐗᐤ ᑭ ᑭᔅᑫᓕᑌᓇᐗᐤ ᐁᑯᑕ ᐁ ᐸᑭᑌᓕᑖᑯᓯᔭᒃ᙮ 4ᐌᓴ ᑖᐺ, ᐃᔅᐱ ᒣᒀᒡ ᐁ ᐎᒉᐎᑖᑭᐸᓐ, ᑭ ᑮ ᐎᑕᒫᑎᓈᓐ ᐁ ᐃᑌᓕᑖᑯᓯᔭᒃ ᑭᒋ ᑲᒀᑕᑭᐃᑲᐎᔭᒃ; ᑖᐱᔅᑯᒡ ᑳ ᐃᑭᑯᐸᓐ, ᓀᔥᑕ ᑳ ᑭᔅᑫᓕᑕᒣᒃ᙮ 5ᐌᐗᑯ ᐅᒋ, ᐃᔅᐱ ᐁᑳ ᑫᔮᐸᒡ ᐁ ᑮ ᑭᐱᒋᔮᓐ, ᓂ ᑮ ᐃᔑᑎᔕᐅᐙᓐ ᑭᒋ ᑭᔅᑫᓕᑕᒫᓐ ᑭ ᑖᐺᔦᓕᑕᒧᐎᓂᐗᐤ, ᒫᔅᑯᒡ ᓈᓐᑕᐤ ᐃᔑ ᑳ ᑲᑴᒋᐃᑖᑴ ᐅᑲᑴᒋᐃᐌᐤ, ᓀᔥᑕ ᐸᑾᓐᑕᐤ ᑭᒋ ᐊᑑᔅᑫᔮᒃ᙮

6ᒫᑲ ᐁᑯ ᐃᔅᐱ ᑳ ᐯᒋ ᑖᑯᔑᒃ ᑎᒧᑎ ᑭᓚᐗᐤ ᐅᒋ, ᓀᔥᑕ ᐁ ᑮ ᒥᓗ ᐋᓕᒧᑕᒪᐎᔭᒥᑦ ᑭ ᑖᐺᔦᓕᑕᒧᐎᓂᐗᐤ ᓀᔥᑕ ᑭ ᓵᑭᐃᐌᐎᓂᐗᐤ, ᓀᔥᑕ ᒧᔕᒃ ᐁ ᒥᓗ ᑭᔅᑭᓯᑐᑕᐎᔭᒥᑦ, ᓈᔅᐱᒡ ᐁ ᐎ ᐙᐸᒥᔭᒥᑦ, ᑖᐱᔅᑯᒡ ᓂᓚᓈᓐ ᓀᔥᑕ ᑭᒋ ᐙᐸᒥᑖᒃ; 7ᐁᐗᑯ ᐅᒋ, ᓂᒋᔖᓂᑐᒃ, ᑭ ᑮ ᑳᑭᒋᐃᓈᓐ, ᒥᓯᐌ ᓂ ᑲᒀᑕᑭᓯᐎᓂᓈᒃ ᓀᔥᑕ ᓂᑦ ᐊᓕᒥᓯᐎᓂᓈᒃ, ᑭ ᑖᐺᔦᓕᑕᒧᐎᓂᐗᐤ ᐅᒋ: 8ᐌᓴ ᐊᓄᒡ ᓂ ᐱᒫᑎᓯᓈᓐ, ᑮᔥᐱᓐ ᐋᔨᑭᑳᐸᐎᔅᑕᐌᑴ ᐅᑎᐯᓕᒋᑫᐤ᙮ 9ᐌᓴ ᑫᑯ ᓇᓈᔅᑯᒧᐎᓇ ᒥᓇ ᑫ ᒥᓚᑭᑦ ᑭᒋᒪᓂᑐ ᑭᓚᐗᐤ ᐅᒋ, ᒥᓯᐌ ᐊᓂᒪ ᒥᓚᐙᑕᒧᐎᓐ ᐅᒋ ᐁ ᐃᔑ ᒥᓚᐙᑕᒧᔅᑕᐗᑭᑦ ᑭ ᑭᒋᒪᓂᑐᒥᓇᐤ ᑭᓚᐗᐤ ᐅᒋ; 10ᐁ ᑎᐱᔅᑳᒃ ᓀᔥᑕ ᐁ ᑭᔑᑳᒃ ᓈᔅᐱᒡ ᓱᑲ ᐁ ᐋᔭᒥᐋᔮᒃ, ᑭᒋ ᑮ ᐙᐸᑕᒫᒃ ᑭᑖᔅᑕᒥᑯᐗᐤ ᓀᔥᑕ ᑭᒋ ᒥᑐᓂᐸᓕᔮᒃ ᐊᓂᒪ ᑳ ᓄᑌᐸᓕᒃ ᑭ ᑖᐺᔦᓕᑕᒧᐎᓂᐗᐤ?

11ᐁᑯ ᓇᑕᒫᑕ ᑭᒋᒪᓂᑐ ᑫᒋᐙᒃ ᑯᑖᐎᓇᐤ, ᓀᔥᑕ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑭᔅᑭᓄᑕᐃᔭᒥᑦ ᑭᒋ ᓈᑎᑖᒃ᙮ 12ᑌᐯᓕᒋᑫᑦ ᓀᔥᑕ ᑭ ᑳ ᐎ ᑐᑖᑯᐗᐤ ᑭᒋ ᓚᑭᐋᔮᔦᒃ ᓀᔥᑕ ᑭᒋ ᐌᓗᑎᓯᔦᒃ ᓵᑭᐃᐌᐎᓐ ᐁ ᐃᔑ ᓴᑭᐃᑐᔦᒃ, ᓀᔥᑕ ᒥᓯᐌ ᐃᓕᓕᐗᒃ, ᑖᐱᔅᑯᒡ ᓂᓚᓈᓐ ᑳ ᐋᔨᑐᑖᑖᒃ: 13ᑭᒋ ᐋᔨᒋᑖᑦ ᑭᑌᐃᐙᐗ ᐁᑳ ᑭᒋ ᐊᑕᒣᓕᑖᑯᓯᔦᒃ ᐸᓕᑭᓯᐎᓂᒃ, ᐅᑎᔥᑲᐤ ᑭᒋᒪᓂᑐ, ᑯᑖᐎᓇᐤ ᐅᑎ, ᐯᒋ ᑕᑯᔑᑫ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᐊᓯᒋ ᒥᓯᐌ ᐅ ᐸᓓᑭᓯᒪ᙮