Search form

ᓂᔥᑕᒻ ᑎᒧᑎ 5

ᑫ ᐃᔑ ᓇᑲᑕᐌᓕᒥᒋᒃ ᐅᑖᐺᑕᒧᐗᒃ

1ᐁᑳᐎᓚ ᑭᑐᔥ ᑳ ᓂᑳᓀᓕᑖᑯᓯᑦ, ᒫᑲ ᓇᑐᑕᒪᐤ ᑖᐱᔅᑯᒡ ᑯᑖᐎ, ᓀᔥᑕ ᐅᔥᑭᓂᑭᐗᒃ ᑖᐱᔅᑯᒡ ᑭᒋᔖᓇᒃ; 2ᑭᔐ ᐃᔅᑴᐗᒃ ᑖᐱᔅᑯᒡ ᑭᑳᐎᔭᒃ; ᐅᔥᑭᓂᑭᔅᑴᐗᒃ ᑖᐱᔅᑯᒡ ᑭᒋᔖᓂᔅᑴᒪᒃ, ᒥᓯᐌ ᐸᓓᑭᓯᐎᓂᒃ ᐃᔑ᙮

3ᑭᔅᑌᓕᒥᒃ ᑭᑎᒫᑭᔅᑴᐗᒃ ᑖᐺ ᑳ ᑭᑎᒫᑭᑴᐎᒋᒃ᙮ 4ᒫᑲ ᑮᔥᐱᓐ ᐊᐌᓇ ᑭᑎᒫᑭᔅᑴᐤ ᐅᑕᐙᔑᒥᔑᒋ ᓀᔥᑕᐱᑯ ᐅᑐᔑᒥᒋ, ᐁᑯᔑ ᓂᔥᑕᒻ ᑲᑕ ᐎ ᑲᑴ ᑭᔅᑫᓕᑕᒶᒃ ᑭᒋ ᐙᐸᑎᓕᐌᒋᒃ ᑭᔐᐙᑎᓯᐎᓂᓕᐤ ᐎᑭᐙᒃ ᓀᔥᑕ ᑭᒋ ᓇᐃᓚᐌᐋᒋᒃ ᐅᓂᑭᐃᑯᐙᐗ: ᐌᓴ ᐁᐗᑯ ᒥᓨᔑᓐ ᓀᔥᑕ ᒥᓗᑲᓇᐙᐸᑕᒻ ᑭᒋᒪᓂᑐ᙮ 5ᐊᓇ ᒫᑲ ᑖᐺ ᑳ ᑭᑎᒪᑭᔅᑴᐎᑦ ᓀᔥᑕ ᑳ ᓂᓯᑫᐎᓯᑦ, ᐊᔅᐯᓕᒧᑐᑕᐌᐤ ᑭᒋᒪᓂᑐᐗ, ᓀᔥᑕ ᒧᔕᒃ ᓇᑐᑕᒫᑫᐤ ᓀᔥᑕ ᐋᔭᒥᐊᐤ, ᐁ ᑎᐱᔅᑳᓕᒃ ᓀᔥᑕ ᐁ ᑭᔑᑳᓕᒃ᙮ 6ᒫᑲ ᐊᓇ ᑳ ᐱᒫᑎᓰᑦ ᒥᓚᐙᑎᑾᑲᒥᑭᓯᐎᓕᒃ ᓂᐱᐤ ᒣᒀᒡ ᐁ ᐱᒫᑎᓰᑦ᙮ 7ᐅᐅ ᑫᒀᓇ ᒫᑲ ᐃᑕᔓᐌ ᑭᒋ ᒥᓗᐃᑌᓕᑖᑯᓯᒋᒃ᙮ 8ᒫᑲ ᑮᔥᐱᓐ ᐊᐌᓇ ᐁᑳ ᐅᒋᔅᑕᒪᐙᑦ ᐊᓂᐃ ᑳ ᑎᐱᓚᐌᐎᓰᑦ, ᐅᓵᒻ ᐊᓂᐃ ᑎᐱᓚᐌ ᐎᑭᒃ ᑳ ᐃᑖᓕᒋ, ᑮ ᐋᓉᑕᒻ ᑖᐺᔦᓕᑕᒧᐎᓂᓕᐤ, ᓀᔥᑕ ᐊᐙᓯᑌ ᒪᒋᑡᐤ ᐃᔥᐱᔥ ᐊᐌᓇ ᐁᑳ ᑳ ᐋᔭᒥᐋᑦ᙮

9ᐁᑳᐎᓚ ᑭᑎᒫᑭᔅᑴᐤ ᑲᑕ ᐙᐌᓛᐸᒪᐤ ᐁᑳ ᑳ ᓂᑯᑣᓱᒥᑕᓇᐤ ᑕᑐ ᐱᐴᓀᓯᑦ, ᐁ ᑮ ᐎᑭᒥᑯᑦ ᐯᔭᒃ ᓈᐯᐗ; 10ᐁ ᒥᓗᐃᑖᒋᒫᑲᓂᐎᑦ ᒥᓗ ᐊᑑᔅᑫᐎᓇ ᐅᒋ; ᑮᔥᐱᓐ ᑳ ᐅᐱᑭᐋᑴ ᐊᐙᔑᔕ, ᑮᔥᐱᓐ ᑳ ᐱᑐᑲᐋᑴ ᒫᓐᑌᐗ, ᑮᔥᐱᓐ ᑳ ᑭᓯᐯᑭᓇᒧᑴ ᐅᐸᓓᑭᓴ ᐅᓯᑎᓕᐗ, ᑮᔥᐱᓐ ᑳ ᓂᔕᑲᒪᐙᑴ ᑳ ᑲᒀᑕᑭᓯᓕᒋ, ᑮᔥᐱᓐ ᑳ ᑭᓯᓴᐎᓯᐎ ᐱᒥᑎᔕᐊᒧᑴ ᒥᓯᐌ ᑕᑐ ᒥᓗ ᐊᑖᔅᑫᐎᓂᓕᐤ᙮

11ᒫᑲ ᐎᓚ ᐅᔥᑭᓂᑭᐎ ᑭᑎᒫᑭᔅᑴᐗᒃ ᐁᑳᐎᓚ ᐅᑎᓂᒃ: ᐌᓴ ᐃᔅᐱ ᑮ ᒫᒋ ᐙᓂᑐᑕᐙᑡᐌ ᙭ᑕ ᑲᑕ ᐅᓈᐯᒥᐗᒃ; 12ᐁ ᐋᔮᒋᒃ ᓂᔑᐗᓈᒋᒥᑯᓯᐎᓂᓕᐤ, ᐁ ᑮ ᐌᐱᓇᑭᒃ ᓃᔥᑕᒻ ᐅ ᑖᐺᔦᓕᑕᒧᐎᓂᐗᐤ᙮ 13ᐊᓯᒋ ᓀᔥᑕ ᑲᑕ ᐎ ᑭᑎᒥᐗᒃ, ᐹᐱᑐᔥ ᐙᔅᑲᔨᑲᓂᒃ ᐁ ᐸᐹᐃᑐᑌᒋᒃ; ᓇᒪᐎᓚ ᓀᔥᑕ ᐁ ᑭᑎᒥᒋᒃ ᐱᑯ, ᒫᑲ ᐁ ᐅᓵᒥᑐᓂᒋᒃ ᐊᓯᒋ, ᓀᔥᑕ ᐁ ᑭᐅᑫᔅᑭᒋᒃ, ᐁ ᐋᓕᒧᑕᑭᒃ ᐊᓂᐃ ᑫᒀᓇ ᐁᑳ ᑫ ᑮ ᐋᓕᒧᑕᒧᐙᔅᐸᓐ᙮ 14ᐁᐗᑯ ᐅᒋ ᒫᑲ ᓇᑐᐌᓕᑕᒫᓐ ᐅᔥᑭᓂᑭᔅᑴᐗᒃ ᑭᒋ ᐅᓈᐯᒥᒋᒃ, ᑭᒋ ᓂᑕᐎᑭᐋᒋᒃ ᐊᐙᔑᔕ, ᑭᒋ ᑲᓇᐎᐙᔅᑳᔨᑲᓂᒋᒃ, ᐁᑳ ᐁ ᐃᓕᓇᐙᒋᒃ ᐅᐹᑾᔑᐃᐌᐗ ᐙᔦᔥ ᑭᒋ ᒪᒋ ᐃᑗᓕᒋ: 15ᐌᓴ ᐋᑎᑦ ᐋᔕᔾ ᐁ ᑮ ᐸᔅᑫᒋᒃ ᓄᔅᐱᓇᑌᐗᒃ ᓭᑕᓇ᙮ 16ᑮᔥᐱᓐ ᐊᐌᓇ ᓈᐯᐤ ᓀᔥᑕᐱᑯ ᐃᔅᑴᐤ ᑳ ᑖᐺᔦᓕᑕᒃ ᐃᐋᔭᐙᑴ ᑭᑎᒫᑭᔅᑴᐗ, ᐁᑯᔑ ᑲᑕ ᐅᒋᔅᑕᒪᐌᐗᒃ, ᒫᒪᐎᐋᔭᒥᐋᐗᒃ ᐁᑳ ᑭᒋ ᓇᑕᐌᓕᒫᒋᒃ ᑭᒋ ᐅᑎᓇᒪᐙᒋᒃ; ᑭᒋ ᑮ ᐅᒋᔅᑕᒪᐙᒋᒃ ᐊᓂᐃ ᑖᐺ ᑳ ᑭᑎᒪᑭᔅᑴᐎᓕᒋ᙮

17ᐁᑯᔑ ᐊᓂᑭ ᐅᓂᑳᓀᓕᑖᑯᓯᐗᒃ ᑳ ᒥᓗ ᑎᐯᓕᒋᑫᒋᒃ ᓂᔡᐤ ᐃᓕᑯᒃ ᑲᑕ ᐃᔑ ᑭᔅᑌᓕᒪᐗᒃ, ᐅᓵᒻ ᐊᓂᑭ ᑳ ᐊᑑᔅᑫᒋᒃ ᐋᔭᒥᐎᓂᒃ ᓀᔥᑕ ᑭᔅᑭᓄᐊᒫᑫᐎᓂᒃ᙮ 18ᐌᓴ ᒪᓯᓇᐃᑫᐎᓐ ᐃᑗᒪᑲᓐ, ᐁᑳᐎᓚ ᑭ ᑳ ᑭᐳᑐᓀᐱᑕᐤ ᒥᔅᑐᔅ ᑳ ᒫᒫᑕᑯᔥᑲᐙᑦ ᒪᑖᒥᓇ; ᓀᔥᑕ ᐅᑕᑐᔅᑫᐤ ᑌᐸᑫᓕᑖᑯᓯᐤ ᑭᒋ ᐋᔮᑦ ᐅ ᑎᐸᐊᒫᑯᓯᐎᓐ᙮ 19ᐅᓂᑳᓀᓕᑖᑯᓯᐤ ᐁᑳᐎᓚ ᐅᑎᓇᒻ ᐅ ᒫᒥᔑᒥᑯᓯᐎᓐ, ᐱᑯ ᐁ ᐎᒉᐅᔅᑭᒃ ᓂᔓ ᓀᔥᑕᐱᑯ ᓂᔅᑐ ᐅᑎᐹᒋᒧᐗᒃ᙮ 20ᐊᓂᑭ ᑳ ᒪᒋᑐᑕᑭᒃ ᑭᑕᐊᒪᐎᒃ ᒥᓯᐌ ᐁ ᐙᐸᑕᑭᒃ, ᑯᑕᑭᔭᒃ ᓀᔥᑕ ᑭᒋ ᓭᑭᓯᒋᒃ᙮

21ᑭ ᔮᒀᒥᒥᑎᓐ ᐅᑎᔥᑲᐤ ᑭᒋᒪᓂᑐ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭, ᓀᔥᑕ ᑳ ᐙᐌᓛᐸ ᒫᑲᓂᐎᒋᒃ ᐁᓐᒐᓚᒃ, ᑭᒋ ᓈᑲᑕᐌᓕᑕᒪᓐ ᐅᐅ, ᐁᑳ ᐊᐙᓯᑌ ᐁ ᑭᔅᑌᓕᒪᑦ ᐯᔭᒃ ᐊᐌᓇ ᐃᔥᐱᔥ ᑯᑕᒃ, ᐁᑳ ᑫᒀᓐ ᐁ ᑐᑕᒪᓐ ᐁᑳ ᐁ ᐃᔑ ᒀᔭᔉ ᑎᐹᔅᑯᓀᓕᒋᑳᑌᒃ᙮ 22ᐁᑳᐎᓚ ᑫᑕᑕᐌ ᓵᒥᓂᔅᑎᒀᓇᐤ ᐊᐌᓇ ᐃᓕᓕᐤ, ᐁᑳᐎᓚ ᓀᔥᑕ ᐅᑎᓇᒸᒃ ᑯᑕᑭᔭᒃ ᐃᓕᓕᐗᒃ ᐅ ᒪᒋᑐᑕᒧᐎᓂᐗᐗ: ᑲᓇᐌᓕᒥᑎᓱ ᐸᓓᑭᓯᐎᓂᒃ᙮

23ᐁᑳᐎᓚ ᑫᔮᐸᒡ ᒥᓂᑴ ᓂᐱ, ᒫᑲ ᐋᐱᔑᔥ ᔓᒥᓈᐳ ᐋᐸᒋᑕ ᑭᑖᔾ ᐅᒋ, ᓀᔥᑕ ᒥᒉᑣᑦ ᐁ ᐋᑯᓯᔭᓐ᙮

24ᐋᑎᑦ ᐃᓕᓕᐗᒃ ᐅ ᒪᒋᑐᑕᒧᐎᓂᐙᐗ ᓂᑳᓐ ᓄᑾᓂᓕᐗ ᐁ ᓂᑳᓂᐸᓖᔅᑖᑯᒋᒃ ᑭᒋ ᑎᐹᔅᑯᓂᑳᑌᓕᑭ; ᑯᑕᑭᔭᒃ ᐃᓕᓕᐗᒃ ᒫᑲ ᓄᔅᐱᓈᑎᑯᐗᒃ᙮ 25ᑖᐱᔅᑯᒡ ᓀᔥᑕ ᐅ ᒥᓗ ᐊᑑᔅᑫᐎᓂᐙᐗ ᐋᑎᑦ ᐃᓕᓕᐗᒃ ᓂᑳᓐ ᓄᑾᓂᓕᐗ, ᓀᔥᑕ ᐊᓂᐃ ᐱᑐᔥ ᑳ ᐃᔑᑡᒪᑲᑭ ᓇᒪᐎᓚ ᑲᑕ ᑮ ᑳᒋᑳᑌᐗ᙮