Search form

ᓂᔓ ᐱᑕᕐ 3

ᐊᓂᒪ ᐊᔓᑕᒫᑫᐎᓐ ᐅᑎᐯᓕᒋᑫᐤ ᒋ ᑕᑯᔑᒃ

1ᐅᒪ ᓂᔓ ᒪᓯᓇᐊᒫᑫᐎᓐ, ᓯᐋᑭᐃᑕᑾᒃ, ᐊᓄᒡ ᑭ ᒪᓯᓇᐊᒫᑎᓇᐗᐤ; ᐁᑯᑕ ᐁ ᔑᑭᑕᒫᓐ ᑭ ᐹᓓᑭ ᒥᑐᓀᓕᒋᑲᓂᐗᐗ ᑭᒋ ᐅᒋ ᑭᔅᑭᓯᔦᒃ: 2ᑭᒋ ᒥᑐᓀᓕᑕᒣᒃ ᐊᓂᐃ ᐋᔭᒥᐎᓇ ᐌᔅᑳᒡ ᑳ ᑮ ᐃᑗᒋᒃ ᐊᓂᑭ ᐸᓓᑭ ᐅᑭᔅᑭᐙᐃᑫᐗᒃ, ᓀᔥᑕ ᐊᓂᐃ ᑳ ᑮ ᐃᑕᔓᐌᔮᒃ ᓂᓚᓈᓐ ᐅᑦ ᐊᐸᔅᑕᓕᒪ ᐅᑎᐯᓕᒋᑫᐤ ᐯᒫᒋᐃᐌᑦ; 3ᐅᒪ ᓃᔥᑕᒻ ᐁ ᑭᔅᑫᓕᑕᒣᒃ, ᑭᒋ ᑕᑯᔑᑭᒃ ᐁ ᐊᑎ ᑳᒋᒡ ᑭᔑᑳᑭ ᐅᐹᐱᓄᑕᑫᔅᑲᒃ, ᐁ ᐱᒧᑖᑕᑭᒃ ᑎᐱᓚᐌ ᐅ ᒪᒋ ᓇᑕᐌᓕᑕᒧᐎᓂᐙᐗ, 4ᐁ ᐃᑗᒋᒃ ᒫᑲ, ᑖᓐᑌ ᐊᓂᒪ ᐊᔓᑕᒫᑫᐎᓐ ᑭᒋ ᑕᑯᔑᒃ? ᐌᓴ ᐊᔅᐱᓐ ᐅᑖᐎᒪᐗᒃ ᑳ ᑮ ᓂᐹᒋᒃ, ᒥᓯᐌ ᑫᒀᓇ ᐃᑕᑾᓋ ᑳ ᐃᔑ ᐃᑕᑾᑭᐸᓐ ᐊᔅᐱᓐ ᑳ ᒫᒋ ᐅᔑᑖᓂᐗᒃ ᐅᒋ᙮ 5ᐌᓴ ᐅᒣᓕᐤ ᐅᒋᑕᐤ ᓇᒪᐎᓚ ᐎ ᑭᔅᑫᓕᑕᒶᒃ, ᑭᒋᒪᓂᑐ ᐅᑦ ᐋᔭᒥᐎᓐ ᐁ ᑮ ᐅᒋ ᐃᑕᑾᑭ ᑭᔑᑾ ᐌᔅᑲᒡ, ᓀᔥᑕ ᐊᔅᑭ ᐗᑭᑎᐯᒃ ᐁ ᓂᐸᐎᒪᑲᒃ ᓀᔥᑕ ᓂᐲᒃ: 6ᐁᐗᑯ ᐅᒋ ᐊᔅᑭ ᐁᑯᔅᐱ ᑳ ᑮ ᐃᑕᑾᒃ, ᓂᐱ ᐁ ᑮ ᐅᒋ ᓕᔅᑭᐯᒃ ᑮ ᓂᔑᐗᓈᑕᓐ: 7ᒫᑲ ᐊᓂᐃ ᑭᔑᑾ ᓀᔥᑕ ᐊᔅᑭ ᐊᓄᒡ ᑳ ᐃᑕᑾᑭ, ᐁᐗᑯ ᑫᔮᐸᒡ ᐋᔭᒥᐎᓐ ᐅᒋ ᑲᓇᐌᓕᒋᑳᑌᐗ ᑭᒋ ᐃᔅᒀᓯᑳᑌᑭ, ᐹᑎᒫ ᑎᐹᔅᑯᓂᑫᐎ ᑭᔑᑳᑫ, ᓀᔥᑕ ᓂᔑᐗᓈᑎᓯᑡᐌ ᑳ ᒪᒑᑎᓯᒋᒃ ᐃᓕᓕᐗᒃ᙮

8ᒫᑲ, ᓯᐋᑭᐃᑕᑾᒃ, ᑭᔅᑫᓕᑕᒧᒃ ᐅᒪ ᐯᔭᒃ ᑫᒀᓐ, ᐯᔭᑾᐤ ᐁ ᑭᔑᑳᓕᒃ ᐃᑕᑭᑕᒻ ᐅᑎᐯᓕᒋᑫᐤ ᑖᐱᔅᑯᒡ ᑭᒋᒥᑖᑐᒥᑕᓇᐤ ᐱᐴᓋ, ᓀᔥᑕ ᑭᒋᒥᑖᑐᒥᑕᓇᐤ ᐱᐴᓋ ᑖᐱᔅᑯᒡ ᐯᔭᑯ ᑭᔑᑲᐤ᙮ 9ᐅᑎᐯᓕᒋᑫᐤ ᓇᒪᐎᓚ ᑆᔅᑕᐎᐤ ᑭᒋ ᑐᑕᒃ ᐅᑦ ᐊᔓᑕᒫᑫᐎᓐ, ᑖᐱᔅᑯᒡ ᐋᑎᑦ ᐃᓕᓕᐗᒃ ᑆᔅᑕᐎᐎᓐ ᑳ ᐃᑕᑭᒃ; ᒫᑲ ᑭ ᔑᐱᓚᐌᓯᔅᑖᑯᓇᐤ, ᐁᑳ ᐁ ᓇᑕᐌᓕᑕᒃ ᐊᐌᓕᐗ ᑭᒋ ᓂᔑᐗᓈᑎᓯᓕᒋ, ᒫᑲ ᒥᓯᐌ ᑭᒋ ᐊᑎ ᒥᒋᓚᐌᔦᓕᑕᒥᓕᒋ᙮

10ᒫᑲ ᐅᑎᐯᓕᒋᑫᐤ ᐅ ᑭᔑᑳᒻ ᑲᑕ ᐹᐸᓕᓕᐤ ᑖᐱᔅᑯᒡ ᑭᒧᑎᔉ ᐁ ᑎᐱᔅᑳᓕᒃ; ᐁᑯᔅᐱ ᑭᔑᑾ ᑫ ᐌᐱᐸᓕᑭ ᐁ ᑭᒋ ᓄᑖᑾᒃ, ᓀᔥᑕ ᑭᔑᑯᒃ ᑳ ᐊᑯᑎᑭ ᑲᑕ ᑎᑭᑌᐗ ᐁ ᐃᔅᐱᒋ ᑭᔑᑌᒃ; ᐊᔅᑭ ᓀᔥᑕ ᓀᔥᑕ ᒥᓯᐌ ᐊᑐᔅᑫᐎᓇ ᐁᑯᑕ ᑳ ᐃᑕᑾᑭ ᑲᑕ ᒑᑳᔅᑭᑌᐗ᙮ 11ᐁ ᐙᐸᑕᒪᒃ ᒫᑲ ᒥᓯᐌ ᐅᐅ ᑭᒋ ᓂᔑᐗᓈᑕᑭ, ᑫᑯ ᑐᐎ ᐃᓕᓕᐗᒃ ᑫ ᐃᔑᓈᑯᓯᔦᑯᐸᓐ ᒥᓯᐌ ᐸᓓᑭ ᐃᔑᐱᒫᑎᓯᐎᓂᒃ ᓀᔥᑕ ᒪᓂᑐᐙᑎᓯᐎᓂᒃ, 12ᐁ ᐊᔕᐙᐸᑕᒬᒃ ᓀᔥᑕ ᐁ ᐯᒋ ᑭᔑᐸᓕᑕᐌᒃ ᑭᒋᒪᓂᑐ ᐅ ᑭᔑᑳᒻ, ᐁᑯᔅᐱ ᑭᔑᑾ ᐁ ᐃᔅᒀᓯᑳᑌᑭ ᑲᑕ ᓂᔑᐗᓇᑕᓋ, ᓀᔥᑕ ᑭᔑᑯᒃ ᑳ ᐊᑯᑎᑭ ᑲᑕ ᑎᑭᑌᐗ ᑫ ᐃᔅᐱᑭ ᑭᔑᑌᒃ᙮ 13ᐁᓕᐌᒃ ᒫᑲ ᑭᓚᓈᓇᐤ, ᑳ ᐃᑕᔅᑌᓕᒃ ᐅᑦ ᐊᔓᑕᒫᑫᐎᓐ, ᑭᑦ ᐊᔕᐙᐸᑌᓈᓇᐤ ᐅᔥᑭ ᑭᔑᑾ ᓀᔥᑕ ᐅᔥᑭ ᐊᔅᑭ, ᐁᑯᑕ ᑫ ᐃᔑ ᐎᑭᒪᑲᒃ ᒀᔭᔅᑭᑖᑎᓯᐎᓐ᙮

14ᐁᐗᑯ ᐅᒋ, ᓯᐋᑭᐃᑕᑾᒃ, ᐁ ᓄᑾᒃ ᐁ ᐊᔕᐙᐸᑕᒣᒃ ᐅᐅ ᑫᒀᓇ, ᑭᓯᓴᐎᓯᒃ ᑳᔮᒣᓕᑕᒧᐎᓂᒃ ᑭᒋ ᒥᔅᑳᑖᒃ, ᐁᑳ ᐁ ᒪᓯᓈᓱᔦᒃ ᓀᔥᑕ ᐁ ᒥᓗᐃᑌᓕᑖᑯᓯᔦᒃ: 15ᓀᔥᑕ ᐃᑕᑭᑕᒸᒃ ᐅ ᔑᐱᓚᐌᓯᐎᓐ ᑭ ᑎᐯᓕᒋᑫᒥᓇᐤ ᐁ ᐱᒫᒋᐃᐌᐎᓂᐗᒃ: ᑖᐱᔅᑯᒡ ᓀᔥᑕ ᓯᐊᑭᐋᑲᓂᐎᑦ ᑭᒋᔖᓂᓇᐤ ᐹᓪ, ᐃᔥᐱᔥ ᑲᑫᑕᐌᓕᑕᒧᐎᓂᓕᐤ ᐁ ᑮ ᒥᓛᑲᓂᐎᑦ, ᐁ ᑮ ᒪᓯᓇᐊᒫᑖᒃ: 16ᑖᐱᔅᑯᒡ ᓀᔥᑕ ᒥᓯᐌ ᐅ ᒪᓯᓇᐊᒫᑫᐎᓂᒃ, ᐁᑯᑕ ᐁ ᐋᓕᒧᑕᒃ ᐅᐅ ᑫᒀᓇ; ᐁᑯᑕ ᐁᑕᑾᑭ ᐋᑎᑦ ᑫᒀᓇ ᑳ ᐋᓕᒪᑭ ᑭᒋ ᓂᓯᑐᒋᑳᑌᑭ, ᐊᓂᑭ ᐁᑳ ᑳ ᐅ ᑭᔅᑫᓕᑕᒧᐎᓂᒋᒃ ᓀᔥᑕ ᐁᑳ ᑳ ᐋᔨᒋᑳᐸᐎᒋᒃ ᑳ ᐙᑭᓇᑭᒃ, ᑖᐱᔅᑯᒡ ᓀᔥᑕ ᐁ ᐃᑐᑕᑭᒃ ᑯᑕᑭᔭ ᑭᒋ ᒪᓯᓇᐃᑫᐎᓇ ᑎᐱᓚᐌ ᐅ ᓂᔑᐗᓈᑎᓯᐎᓂᐙᒃ ᐃᔑ᙮

17ᑭᓚᐗᐤ ᒫᑲ, ᓯᐋᑭᐃᑕᑾᒃ, ᓂᑳᓐ ᐁ ᑭᔅᑫᓕᑕᒣᒃ ᐅᐅ ᑫᒀᓇ, ᔮᒀᒡ ᑭᓚᐗᐤ ᓀᔥᑕ, ᐁᑳ ᑭᒋ ᑭᒋᐎᓕᑲᐎᔦᒃ ᐅᒪᒋᑖᐗᒃ ᐅ ᐗᓀᓕᑕᒧᐎᓂᐗᐤ ᐅᒋ, ᑭᒋ ᐸᑭᔑᓂᔦᒃ ᑎᐱᓚᐌ ᑭ ᒪᔥᑲᐌᓕᑕᒧᐎᓂᐙᒃ ᐅᒋ᙮ 18ᒫᑲ ᓂᑕᐎᑭᒃ ᔕᐌᓕᒋᑫᐎᓂᒃ, ᓀᔥᑕ ᐅ ᑭᔅᑫᓕᒥᑯᓯᐎᓂᒃ ᑭ ᑎᐯᓕᒋᑫᒥᓇᐤ ᓀᔥᑕ ᑭ ᐱᒫᒋᐃᐌᒥᓇᐤ ᒋᓴ ᙭᙮ ᐎᓚ ᒫᑲ ᑲᑕ ᐎ ᒫᒥᒋᒫᑲᓂᐎᐤ ᐊᓄᒡ ᓀᔥᑕ ᑳᑭᑫ᙮ ᐁᒣᓐ᙮