Search form

ᓂᔓ ᑎᒧᑎ 3

ᐊᓂᐃ ᒫᒋᒡ ᑭᔑᑳᐗ

1ᐅᒪ ᓀᔥᑕ ᑭᔅᑫᓕᑕ, ᒫᒋᒡ ᐁ ᑭᔑᑳᑭ ᑳ ᐋᓕᒪᑭ ᑭᔑᑳᐗ ᑭᒋ ᐅᑎᒋᐸᓕᑭ᙮ 2ᐌᓴ ᐃᓕᓕᐗᒃ ᐎᓚᐗᐤ ᑫᒋᐙᒃ ᑲᑕ ᓵᑭᐃᑎᓱᐗᒃ, ᐁ ᒧᔅᑌᓇᒫᑫᒋᒃ, ᐁ ᒫᒪᑖᑯᒧᒋᒃ ᐁ ᑭᔅᑌᓕᒧᒋᒃ, ᐁ ᐹᔅᑖᒧᔅᑭᒋᒃ, ᐁ ᐋᓉᑕᐙᒋᒃ ᐅᓂᑭᐃᑯᐗᐗ, ᐁᑳ ᐁ ᓇᓈᔅᑯᒧᒋᒃ, ᐁᑳ ᐁ ᐸᓓᑭᓯᒋᒃ, 3ᐁᑳ ᐁ ᐃᓕᓕᐎ ᓵᑭᐃᐌᒋᒃ, ᐁ ᐸᒀᔑᐃᐌᔅᑭᒋᒃ ᐁ ᑭᓛᔅᑭᐎ ᒪᒥᔑᒥᐌᒋᒃ, ᐁ ᐎᓂᓯᒋᒃ, ᐁ ᐊᒀᑎᓯᒋᒃ, ᐁ ᐋᑕᐌᓕᒫᒋᒃ ᐊᓂᓂ ᑳ ᒥᓨᑎᓯᓕᒋ, 4ᐁ ᑭᓛᔅᑭᑌᐁᔅᑭᒋᒃ, ᐁ ᒪᔥᑲᐎᔅᑎᒀᓂᒋᒃ, ᐁ ᑭᔅᑌᓕᒥᑎᓱᑭᒋᒃ, ᐊᐙᓯᑌ ᐁ ᓵᑭᑖᒋᒃ ᒥᓚᐙᑎᑯᓯᐎᓐ ᐃᔥᐱᔥ ᐁ ᓵᑭᐋᒋᒃ ᑭᒋᒪᓂᑐᐗ: 5ᐁ ᐋᔮᒋᒃ ᐁ ᐃᑌᓕᑖᑾᓂᓕᒃ ᒪᓂᑐᐙᑎᓯᐎᓂᓕᐤ, ᒫᑲ ᐁ ᐋᓉᑕᑭᒃ ᐁ ᐃᔑ ᑲᔥᑭᐅᒪᑲᓂᓕᒃ: ᐅᑯ ᑐᐎ ᒫᑲ ᓇᑲᔑᒃ᙮ 6ᐌᓴ ᐅᒪ ᑐᐎᑳᓇᒃ ᐁᐗᑾᓂᑭ ᑳ ᐹᐱᑐᑫᑖᒋᒧᒋᒃ ᐙᔅᑳᔨᑲᓂᒃ, ᓀᔥᑕ ᑳ ᐊᐗᑳᓂᐋᒋᒃ ᑲᑫᐹᑎᔅᑴᐗ ᐁ ᓇᔭᑕᒥᓕᒋ ᒪᒋᑣᐎᓂᓕᐤ ᐁ ᐋᐃᔑᐎᓕᑯᒋᒃ ᓇᓈᑲᐤ ᒪᒋ ᓇᑕᐌᓕᑕᒧᐎᓇ, 7ᒧᔕᒃ ᐁ ᐎ ᑲᑴ ᑭᔅᑫᓕᑕᑭᒃ, ᓇᒪᐎᔅᑳᑦ ᒫᑲ ᐁ ᑲᔥᑭᑖᒋᒃ ᑭᒋ ᐅᑎᑕᑭᒃ ᑫ ᐃᔑ ᑭᔅᑫᓕᑕᑭᒃ ᑖᐺᐎᓂᓕᐤ᙮ 8ᑖᐱᔅᑯᒡ ᒫᑲ ᒑᓃᔅ ᓀᔥᑕ ᒑᒻᑉᕇᔅ ᑳ ᑮ ᐃᔑ ᓇᔅᑯᔅᑕᐙᒋᒃ ᒧᓯᓴ, ᐁᑯ ᑖᐱᔅᑯᒡ ᐅᑯ ᐁ ᐃᔑ ᓇᔅᑯᔅᑕᑭᒃ ᑖᐺᐎᓂᓕᐤ; ᐃᓕᓕᐗᒃ ᐁ ᒪᒋ ᒥᑐᓀᓕᒋᑲᓂᒋᒃ, ᐁᑳ ᐙᔦᔥ ᐁ ᐃᑖᐸᑎᓯᒋᒃ ᐊᓂᒪ ᑖᐺᔦᓕᑕᒧᐎᓐ ᐅᒋ᙮ 9ᒫᑲ ᓇᒪᐎᓚ ᐊᐙᓯᑌ ᑲᑕ ᐃᑐᑌᐗᒃ; ᐌᓴ ᐅ ᑲᑫᐹᑎᓯᐎᓂᐗᐤ ᑲᑕ ᐙᐸᑕᒥᓕᐗ ᒥᓯᐌ ᐃᓕᓕᐗ, ᑖᐱᔅᑯᒡ ᐎᓚᐗᐤ ᐁ ᑮ ᐃᑭᓂᓕᒃ᙮

ᒫᒋᒡ ᑭᔅᑯᓄᐊᒫᑫᐎᓇ

10ᒫᑲ ᑭᓚ ᓱᑳ ᑭ ᑮ ᓄᔅᐱᓇᑌᓐ ᓂ ᑭᔅᑭᓄᐊᒫᑫᐎᓐ, ᐁ ᐃᔑ ᐱᒫᑎᓯᔮᓐ, ᓂ ᐃᑌᓕᑕᒧᐎᓐ, ᓂ ᑖᐺᔦᓕᑕᒧᐎᓐ, ᓂ ᔑᐯᓕᑕᒧᐎᓐ, ᓂ ᓵᑭᐃᐌᐎᓐ, ᓂ ᔑᐱᓚᐌᓯᐎᓐ, 11ᓂ ᑲᒀᑕᑭᐃᑯᓯᐎᓇ, ᓂᑦ ᐊᓕᒥᓯᐎᓇ ᑳ ᑮ ᐅᑎᑎᑯᔮᓐ ᐊᓐᑕ ᐋᓐᑎᐊᑭᒃ, ᓀᔥᑕ ᐋᐃᑯᓂᔭᒥᒃ, ᓀᔥᑕ ᓕᔅᑦᕋᐃᒃ: ᑫᑯ ᑲᒀᑕᑭᐃᑯᓯᐎᓇ ᐁ ᑮ ᓇᔭᑕᒫᓐ: ᒫᑲ ᒥᓯᐌ ᐁᐗᒀᓂᐃ ᐅᒋ ᐅᑎᐯᓕᒋᑫᐤ ᓂ ᑮ ᐎᑾᒋᐃᒃ᙮ 12ᐁᐁ, ᒥᓯᐌ ᐊᓂᑭ ᑫ ᐎ ᒪᓂᑐᐙᑎᓯᒋᒃ ᙭ ᒋᓴᓯᒃ ᑲᑕ ᑲᒀᑕᑭᐋᑲᓂᐎᐗᒃ᙮ 13ᒫᑲ ᒪᒋ ᐃᓕᓕᐗᒃ ᓀᔥᑕ ᐅᐙᔦᔑᐃᐌᐗᒃ ᐋᒋᐱᑯ ᐋᒋᐱᑯ ᑲᑕ ᒪᒋᑣᐗᒃ, ᐁ ᐙᔦᔑᐃᐌᒋᒃ ᓀᔥᑕ ᐁ ᐙᔦᔑᐋᑲᓂᐎᒋᒃ᙮ 14ᒫᑲ ᑭᓚ ᑕᔑᑫ ᐊᓂᐃ ᐃᔑ ᑳ ᑮ ᑭᔅᑫᓕᑕᒥᐃᑲᐎᔭᓐ, ᓀᔥᑕ ᑳ ᑮ ᑫᒋᓀᓕᑕᒪᓐ, ᐁ ᑭᔅᑫᓕᑕᒪᓐ ᐊᐌᓇ ᑳ ᑮ ᑭᔅᑭᓄᐊᒫᔉ; 15ᓀᔥᑕ ᐁ ᐊᐙᔑᔑᐎᔭᓐ ᐁ ᑮ ᐯᒋ ᑭᔅᑫᓕᑕᒪᓐ ᐸᓓᑭ ᒪᓯᓇᐃᑫᐎᓇ, ᑫ ᑮ ᑲᑫᑕᐌᓕᑕᒥᐃᑯᔭᓐ ᐱᒫᒋᐃᐌᐎᓂᒃ ᐃᔑ, ᑖᐺᔦᓕᑕᒧᐎᓐ ᐅᒋ ᙭ ᒋᓴᓯᒃ ᑳ ᐃᑕᑾᒃ᙮ 16ᒥᓯᐌ ᒪᓯᓇᐃᑫᐎᓐ ᒥᓕᐙᓂᐗᓐ ᑭᒋᒪᓂᑐ ᐅ ᓓᓓᑐᑖᑫᐎᓂᒃ ᐅᒋ, ᐃᑖᐸᑕᓐ ᒫᑲ ᑲᑫᔅᑭᒥᐌᐎᓂᒃ, ᓇᑭᒥᐌᐎᓂᒃ, ᒫᒥᓗᒥᐌᐎᓂᒃ, ᓀᔥᑕ ᑭᔅᑭᓄᐊᒫᑫᐎᓂᒃ ᒀᔭᔅᑭᑖᑎᓯᐎᓂᒃ ᐃᔑ: 17ᐊᓇ ᑭᒋᒪᓂᑐ ᐅᑦ ᐃᓕᓕᒪ ᑭᒋ ᑮ ᐅᒋ ᑐᓂᐎᓯᑦ, ᒥᑐᓂ ᐁ ᐋᔦᔅᑲᐎᐋᑲᓂᐎᑦ ᒥᓯᐌ ᒥᓗ ᐊᑑᔅᑫᐎᓇ ᐃᔑ᙮