Search form

ᑯᓚᔑᔭᓇ 3

1ᑮᔥᐱᓐ ᒫᑲ ᑮ ᐎᒋᐗᓂᔥᑳᒣᒃ ᙭, ᓈᓇᑕᐌᓕᑕᒧᒃ ᐊᓂᐃ ᐃᔥᐱᒥᒃ ᑳ ᐃᑕᑾᑭ, ᐃᑕ ᙭ ᐁ ᐊᐱᐙᑦ ᑭᒋᒪᓂᑐᐗ ᐅ ᑭᒋᓂᔅᑭᓕᒃ᙮ 2ᒫᒥᑐᓀᓕᑕᒧᒃ ᐊᓂᐃ ᑫᒀᓇ ᐃᔥᐱᒥᒃ ᑳ ᐃᑕᑾᑭ, ᐁᑳ ᑫᒀᓇ ᐊᔅᑮᒃ᙮ 3ᐌᓴ ᑭ ᓂᐱᓇᐗᐤ, ᓀᔥᑕ ᑭ ᐱᒫᑎᓯᐎᓂᐗᐤ ᑳᑖᓂᐗᓐ ᐊᓯᒋ ᙭ ᑭᒋᒪᓂᑐᓈᒃ᙮ 4ᐃᔅᐱ ᙭, ᐁᐗᑯ ᑭ ᐱᒫᑎᓯᐎᓂᓇᐤ ᓄᑯᓯᑌ, ᐁᑯ ᓀᔥᑕ ᑭᓚᐗᐤ ᑫ ᐎᒋᓄᑯᓯᒣᒃ ᒪᓂᑐᐙᔅᑌᐎᓂᒃ᙮

ᐸᑭᑎᓇ ᑲᔭᔥ ᐱᒫᑎᓯᐎᓐ, ᐳᒋᔥᑲ ᐊᓂᒪ ᐅᔥᑭ ᐱᒫᑎᓯᐎᓐ

5ᐁᐗᑯ ᐌᒋ ᓂᔑᐗᓈᒋᑖᒃ ᑭᑦ ᐊᔅᑭᐎ ᓇᑕᐌᓕᑕᒧᐎᓂᐗᐗ; ᐱᔑᒀᑎᓯᐎᓐ, ᐎᓂᓯᐎᓐ, ᐱᔑᒀᑎᓯᐎ ᐃᑌᓕᑕᒧᐎᓐ, ᒪᒋ ᓇᑕᐌᓕᑕᒧᐎᓐ, ᓀᔥᑕ ᒧᔅᑌᓇᒫᑫᐎᓐ, ᐁᐗᑯ ᐁ ᓇᐗᑭᔅᑕᐙᑲᓂᐎᑦ ᒪᓂᑐᑳᓐ: 6ᐁᐗᒀᓂᐃ ᐌᒋ ᐅᑎᑎᑯᐙᒋᒃ ᑭᒋᒪᓂᑐᐗ ᐅᑦ ᐋᑯᓚᐌᓯᐎᓂᓕᐤ ᐊᓂᑭ ᐌᑕᐙᔑᒥᔑᒥᑯᒋᒃ ᐋᓉᔦᓕᑕᒧᐎᓂᓕᐤ; 7ᐁᐗᒀᓂᐃ ᐌᔅᑲᒡ ᑳ ᑮ ᐱᒧᑖᑕᒣᒃ, ᒣᒀᒡ ᐁ ᑮ ᐱᒫᑎᓰᔅᑕᒣᒃ᙮

8ᒫᑲ ᐊᓄᒡ ᐅᐅ ᓀᔥᑕ ᑭ ᑫᒋᑾᓀᓇᐗᐤ; ᑭᓯᐙᓯᐎᓐ, ᐊᑯᓚᐌᓯᐎᓐ, ᑭᒧᒋᐸᒀᑎᑐᐎᓐ, ᐹᔅᑕᒧᐎᓐ, ᒪᒋ ᐋᔭᒥᐎᓐ ᑭᑐᓂᐙᒃ ᐅᒋ᙮ 9ᐁᑳᐎᓚ ᑭᓛᔅᑭᒥᑐᒃ, ᐁ ᐙᐸᑕᒣᒃ ᐁ ᑮ ᑫᒋᑾᓀᒃ ᑭᔐᓕᓕᐤ ᓀᔥᑕ ᐅᑦ ᐃᓯᒋᑫᐎᓇ; 10ᓀᔥᑕ ᐁ ᑮ ᐳᔅᑎᔥᑲᐌᒃ ᐅᔥᑭ ᐃᓕᓕᐤ, ᑳ ᐅᔥᑭᐋᑲᓂᐎᑦ ᑭᔅᑫᓕᑕᒧᐎᓂᒃ, ᐅᑦ ᐃᔑᓈᑯᓯᐎᓂᓕᒃ ᐊᓂᐃ ᑳ ᑮ ᐅᔑᐃᑯᑦ; 11ᐃᑕ ᐁᑳ ᐁ ᐃᑖᑦ ᒃᕆᒃ, ᐁᑳ ᓀᔥᑕ ᒎ, ᑭᔅᑭᓄᐙᒋᔓᐎᓐ, ᓇᒪ ᓀᔥᑕ ᓇᒪᑭᔅᑭᓄᐗᒋᔓᐎᓐ, ᐹᕐᐯᕆᔭᓐ, ᓯᑎᔭᓐ, ᐊᐗᑳᓐ, ᓇᒪ ᓀᔥᑕ ᑳ ᑎᐯᓕᒥᑎᓱᑦ: ᒫᑲ ᙭ ᒥᓯᐌ ᐁ ᑎᐯᓕᒫᑦ, ᓀᔥᑕ ᒥᓯᐌ ᐁ ᐱᒋᔅᑲᐙᑦ᙮

12ᐁᐗᑯ ᐌᒋ ᐳᔅᑎᔥᑲᒧᒃ, ᑖᐱᔅᑯᒡ ᐅ ᐙᐌᓛᐸᒫᑲᓇ ᑭᒋᒪᓂᑐ, ᐯᓓᑭᓯᔦᒃ ᓀᔥᑕ ᓯᐋᑭᐃᑲᐎᔦᒃ, ᔕᐌᓕᒋᑫᐎ ᒥᑌᐃ, ᑭᔐᐙᑎᓯᐎᓐ, ᑕᐸᑌᓕᒧᐎᓐ, ᓗᔅᐱᓯᐎᓐ, ᔑᐱᓚᐌᓯᐎᓐ; 13ᐁ ᔑᐱᓚᐌᓯᔅᑖᑐᔦᒃ, ᓀᔥᑕ ᐁ ᐌᐯᓕᑕᒫᑐᔦᒃ, ᑮᔥᐱᓐ ᐊᐌᓇ ᐃᑌᓕᑕᒃ ᐁ ᒪᒋᑐᑖᑯᑦ ᐊᐌᓕᐗ: ᑖᐱᔅᑯᒡ ᐁ ᑮ ᐌᐯᓕᑕᒫᑖᒃ ᙭, ᐁᑯ ᑖᐱᔅᑯᒡ ᑐᑕᒧᒃ᙮ 14ᐗᔅᑭᒡ ᒫᑲ ᒥᓯᐌ ᐅᐅ ᐳᔅᑎᔥᑲᒧᒃ ᓵᑭᐃᐌᐎᓐ, ᑳ ᒫᒪᐗᐱᑕᒧᒪᑲᒃ ᒥᑐᓂ ᐎᓯᐎᓐ᙮ 15ᐁᑯᔑ ᒫᑲ ᑭᒋᒪᓂᑐ ᐅ ᑳᔮᒣᓕᑕᒧᐎᓐ ᑭ ᑳ ᑎᐯᓕᒥᑯᐙᓇᐗᐤ ᑭᑌᐃᐙᒃ, ᐁᐗᑯ ᓀᔥᑕ ᑳ ᐃᔑ ᓇᑐᒥᑲᐎᔦᒃ ᐯᔭᒃ ᒥᔭᐎᒃ; ᓇᓈᔅᑯᒧᒃ ᒫᑲ᙮ 16ᐁᑯᔑ ᙭ ᐅᑦ ᐋᔭᒥᐎᓐ ᑭ ᑳ ᐌᓗᒋ ᐱᒋᔅᑳᑯᐙᓇᐗᐤ ᒥᓯᐌ ᑲᑫᑕᐌᓕᑕᒧᐎᓂᒃ; ᐁ ᑭᔅᑭᓄᐊᒫᑐᔦᒃ ᓀᔥᑕ ᑲᑫᔅᑭᒥᑐᔦᒃ ᓵᓪᒥᒃ, ᓀᔥᑕ ᐋᔭᒥᐋᐎ ᓂᑲᒧᐎᓂᒃ, ᓀᔥᑕ ᐊᒑᑯᐎ ᓂᑲᒧᐎᓂᒃ, ᐁ ᓂᑲᒧᔅᑕᐌᒃ ᐅᑎᐯᓕᒋᑫᐤ ᐁ ᐃᑕᑾᒃ ᓇᓈᔅᑯᒧᐎᓐ ᑭᑌᐃᐙᒃ᙮ 17ᑫᒀᓐ ᒫᑲ ᑳ ᑐᑕᒣᒃ ᐋᔭᒥᐎᓂᒃ ᓀᔥᑕᐱᑯ ᐋᔨᑎᐎᓂᒃ, ᒥᓯᐌ ᑐᑕᒧᒃ ᐅᑎᐯᓕᒋᑫᐤ ᒋᓴᔅ ᐅᑦ ᐃᔑᓂᑳᓱᐎᓂᒃ, ᐁ ᓇᓈᔅᑯᒣᒃ ᑭᒋᒪᓂᑐ ᐌᐅᑖᐎᒪᐎᑦ ᐎᓚ ᐅᒋ᙮

ᑯᒋᐎᒋᐃᑐᒃ ᐅᔥᑭ ᐱᒫᑎᓯᐎᓂᒃ

18ᐃᔅᑴᑐᒃ, ᓇᓇᐃᑖᑯᒃ ᑎᐱᓚᐌ ᑭ ᓈᐯᒥᐗᐗ, ᐁ ᐃᔑ ᐃᑌᓕᒥᑖᒃ ᐅᑎᐯᓕᒋᑫᐤ᙮

19ᓇᐯᑐᒃ, ᓵᑭᐃᑯᒃ ᑭᐎᐙᐗᒃ, ᐁᑳᐎᓚ ᓀᔥᑕ ᒪᒋᑐᑖᑯᒃ᙮

20ᐊᐙᔑᔑᑐᒃ, ᓇᓇᐃᑖᑯᒃ ᑭ ᓂᑭᐃᑯᐗᐗᒃ ᒥᓯᐌ ᐃᔑ, ᐌᓴ ᐁᐗᑴᓕᐤ ᓈᔅᐱᒡ ᒥᓜᓕᑕᒻ ᐅᑎᐯᓕᒋᑫᐤ᙮

21ᐅᑖᐎᒫᑐᒃ, ᐁᑳᐎᓚ ᑭᔑᐙᐃᑯᒃ ᑭᑦ ᐊᐙᔑᒥᐊᐗᐗᒃ, ᐁᑳ ᑭᒋ ᓈᔦᑕᐌᓕᑕᑭᒃ᙮

22ᐊᑑᔅᑫᓛᑲᓂᑐᒃ, ᒥᓯᐌ ᐃᔑ ᓇᓇᐃᑖᑯᒃ ᑭᑦ ᐅᑭᒫᒥᐗᐗᒃ ᐎᔮᓯᐎᓂᒃ ᐃᔑ; ᓇᒪᐎᓚ ᐁ ᑲᓇᐗᐸᒥᑲᐎᔦᒃ ᐱᑯ, ᑖᐱᔅᑯᒡ ᐊᓂᑭ ᑳ ᓇᐃᓚᐌᐋᒋᒃ ᐃᓕᓕᐗ; ᒫᑲ ᐸᓓᑭ ᒥᑌᐃᒃ, ᐁ ᓂᓇᒋᔅᑕᐌᒃ ᑭᒋᒪᓂᑐ: 23ᑫᒀᓐ ᒫᑲ ᑫ ᑐᑕᒣᑴ, ᑭᑌᐃᐙᒃ ᐅᒋ ᑐᑕᒧᒃ, ᑖᐱᔅᑯᒡ ᐅᑎᐯᓕᒋᑫᐤ ᐁ ᑐᑕᒪᐌᒃ, ᓇᒪᐎᓚ ᒫᑲ ᐃᓕᓕᐗᒃ ᐱᑯ; 24ᐁ ᑭᔅᑫᓕᑕᒣᒃ ᐅᑎᐯᓕᒋᑫᐤ ᑭᒋ ᒥᓕᑖᒃ ᑭᒋ ᐋᔮᔦᒃ ᐊᓂᒪ ᑎᐱᓚᐌᐎᓯᐎᓐ: ᐌᓴ ᑭᑦ ᐊᑐᔅᑫᔅᑕᐗᐗᐤ ᐅᑎᐯᓕᒋᑫᐤ ᙭᙮ 25ᒫᑲ ᐊᓇ ᑳ ᓈᔦᑕᐎᑐᑕᒃ ᑲᑕ ᑎᐸᐊᒪᐗᐤ ᑳ ᐃᔑ ᓈᔦᑕᐎᑐᑕᒧᑯᐸᓀ: ᓇᒪ ᓀᔥᑕ ᐹᐱᑐᔥ ᐃᑌᓕᒪᐗᒃ ᐃᓕᓕᐗᒃ᙮