Search form

ᐦᐃᑉᕉᐗ 5

1ᐌᓴ ᒥᓯᐌ ᑕᑐ ᑭᒋ ᓵᓵᑭᐎᓕᐌᐎᓕᓕᐤ ᐃᓕᓕᓈᒃ ᐁ ᐅᒋ ᐅᑎᓈᑲᓂᐎᑦ, ᐸᑳᓄᐊᑦ ᑭᒋ ᒫᑎᓇᒪᐙᑦ ᐃᓕᓕᐗ ᐊᓂᐃ ᑳ ᐊᔮᓕᒋ ᑭᒋᒪᓂᑐᐗ, ᑭᒋ ᐸᑭᑎᓂᑫᑦ ᒥᓕᐌᐎᓇ ᓀᔥᑕ ᓵᓵᑭᐎᓕᐌᐎᓇ ᒪᒋᑐᑕᒧᐎᓇ ᐅᒋ: 2ᐊᐌᓇ ᑳ ᑲᔥᑭᑖᑦ ᑭᒋ ᑭᑎᒫᑫᓕᒫᑦ ᐊᓂᐃ ᑳ ᑲᑫᐹᑎᓯᓕᒋ, ᐊᓂᐃ ᓀᔥᑕ ᑳ ᐸᔅᑫᐊᒣᓕᒋ; ᐌᓴ ᐎᓚ ᑫᒋᐙᒃ ᐁ ᐙᔅᑳᔅᑳᑯᑦ ᓂᓚᒥᓯᐎᓂᓂᐤ᙮ 3ᐁᐗᑯ ᐅᒋ ᒫᑲ ᑲᑕ ᑐᑕᒧᐸᓐ, ᑖᐱᔅᑯᒡ ᐁ ᐃᔑ ᑐᑕᒪᐙᑦ ᐃᓕᓕᐗ, ᐁᑯ ᑖᐱᔅᑯᒡ ᑭᒋ ᑐᑕᒫᓱᑦ, ᑭᒋ ᐸᑭᑎᓂᑫᑦ ᒪᒋᑐᑕᒧᐎᓇ ᐅᒋ᙮ 4ᓇᒪᐎᓚ ᐊᐌᓇ ᐃᓕᓕᐤ ᒫᑲ ᐅᑎᓇᒫᓱ ᐅᒪ ᑭᔅᑎᓯᐎᓐ, ᐊᓇ ᐱᑯ ᑳ ᑮ ᓇᑐᒥᑯᑦ ᑭᒋᒪᓂᑐᐗ, ᑖᐱᔅᑯᒡ ᐁᕋᓐ᙮

5ᐁᑯ ᑖᐱᔅᑯᒡ ᓀᔥᑕ ᙭ ᓇᒪᐎᓚ ᑮ ᐅᒋ ᑭᔅᑌᓕᑖᑯᐃᑎᓱ ᑭᒋ ᑭᒋ ᓵᓴᑮᐎᓕᐌᐎᓕᓕᐋᑲᓂᐎᑦ; ᒫᑲ ᐊᓂᐃ ᑳ ᑮ ᐃᑎᑯᑦ, ᑭᓚ ᓂᑯᓯᔅ, ᐊᓄᒡ ᐁ ᑭᔑᑳᒃ ᑭᑐᑯᓯᓯᒥᑎᓐ᙮ 6ᑖᐱᔅᑯᒡ ᓀᔥᑕ ᐁ ᐃᑗᑦ ᐱᑐᔥ ᐃᑕ, ᑭᓚ ᑳᑭᑫ ᑭ ᓵᓴᑭᐎᓕᐌᐎᓕᓕᐎᓐ, ᑖᐱᔅᑯᒡ ᑳ ᐃᑎᔅᐸᓐ ᒣᓪᑭᓯᑌᒃ᙮

7ᐊᓇ ᒣᒀᒡ ᑳ ᐎᔭᓯᐎᑦ, ᐃᔅᐱ ᑳ ᑮ ᐋᔭᒥᐁᔅᑕᐙᑦ ᓀᔥᑕ ᓇᑐᑕᒫᑫᔅᑕᐙᑦ, ᐊᓯᒋ ᓀᔥᑕ ᒪᐎᒧᔅᑕᐙᑦ ᓀᔥᑕ ᐅᒋᑲᐙᐱᔅᑕᐙᑦ ᐊᓂᐃ ᑳ ᑲᔥᑭᑖᓕᑭ ᑭᒋ ᐱᒫᒋᐃᑯᑦ ᓂᐱᐎᓂᒃ ᐅᒋ, ᓀᔥᑕ ᐁ ᑮ ᐯᑕᐙᑲᓂᐎᑦ ᐁ ᑮ ᓇᓂᒌᑦ; 8ᐋᑕ ᐁ ᑮ ᐅᑯᓯᓯᒪᐎᑦ, ᐁᓕᐌᒃ ᒫᑲ ᑮ ᑭᔅᑫᓕᑕᒻ ᐅ ᓇᓇᐃᑌᒧᐎᓐ ᐊᓂᐃ ᑫᒀᓇ ᐅᒋ ᑳ ᑮ ᐙᐎᓴᑫᓕᑕᒃ᙮ 9ᓀᔥᑕ ᒫᑲ ᐁ ᑮ ᒥᑐᓂᐎᐋᑲᓂᐎᑦ, ᑮ ᐊᑎ ᑎᐯᓕᑕᒪᐌᐤ ᐱᒫᒋᐃᐌᐎᓂᓕᐤ ᒥᓯᐌ ᐊᓂᐃ ᑳ ᓇᓇᐃᑖᑯᑦ; 10ᐁ ᓇᑐᒥᑯᑦ ᑭᒋᒪᓂᑐᐗ ᑭᒋ ᑭᒋ ᓵᓵᑭᐎᓕᐌᐎᓕᓕᐎᑦ ᑖᐱᔅᑯᒡ ᑳ ᐃᑎᔅᐸᓐ ᒣᓪᑭᓯᑌᒃ᙮

ᔭᑾᒥᒥᐌᐎᓐ ᐁᑳ ᑭᑕ ᐌᐱᓂᑳᑌᒃ ᑖᐺᔦᓕᑕᒧᐎᓐ

11ᐊᓇ ᒥᒉᑦ ᑫᒀᓇ ᑳ ᐋᔮᔭᒃ ᑭᒋ ᐋᓕᒧᒪᒃ, ᑳ ᐋᓕᒪᑭ ᓀᔥᑕ ᑭᒋ ᐃᑣᓂᐗᑭ; ᐁᑳ ᐁ ᐹᔭᑌ ᐯᑕᒣᒃ᙮ 12ᐌᓴ ᐃᔅᐱ ᐌᑎᒋᐸᓕᒃ ᑭᒋ ᑭᔅᑭᓄᐊᒫᑫᔦᒃ, ᑭ ᓇᑕᐌᓕᑖᑯᓯᓇᐗᐤ ᐊᐌᓇ ᒥᓇ ᑭᒋ ᑭᔅᑭᓄᐊᒫᑖᒃ, ᐊᓂᐃ ᑳ ᓂᑳᓀᓕᑖᑾᑭ ᐅᑦ ᐃᑕᔓᐌᐎᓇ ᑭᒋᒪᓂᑐ; ᓀᔥᑕ ᑭ ᓇᔅᐱᑕᐗᐗᐗᒃ ᐊᓂᑭ ᑳ ᓇᑕᐌᓕᑕᑭᒃ ᒍᒍᔑᒫᐳᓕᐤ, ᓇᒪ ᒫᑲ ᑳ ᒪᔥᑲᐙᓕᒃ ᒥᒋᒥᓕᐤ᙮ 13ᐌᓴ ᒥᓯᐌ ᑕᑐ ᐊᐌᓇ ᑳ ᐋᐸᒋᑖᑦ ᒍᒍᔑᒫᐳᓕᐤ ᓇᒪᐎᓚ ᒀᔭᔉ ᑭᔅᑫᓕᑕᒻ ᑾᔭᔅᑭᑖᑎᓯᐎᓂ ᐋᔭᒥᐎᓂᓕᐤ: ᐌᓴ ᐊᐱᔅᑕᐙᔑᔑᐎᐤ᙮ 14ᒫᑲ ᑳ ᒪᔥᑲᐙᓕᒃ ᒥᒋᒥᓕᐤ ᐋᐸᒋᑕᐗᒃ ᐊᓂᑭ ᑳ ᑭᔑᓂᑕᐎᑭᒋᒃ, ᐊᓂᑭ ᐅᑎ, ᒧᔕᒃ ᐁ ᑐᑕᑭᒃ, ᐋᐸᒋᑕᐗᒃ ᐅ ᒥᑐᓀᓕᒋᑲᓂᐗᐗ ᑭᒋ ᓂᓯᑕᐌᓕᑕᑭᒃ ᑳ ᒥᓨᔑᓂᓕᒃ ᓀᔥᑕ ᑳ ᒫᓛᑕᓂᓕᒃ᙮