Search form

ᐦᐃᑉᕉᐗ 6

1ᐁᐗᑯ ᐅᒋ ᐁ ᓇᑲᑕᒪᒃ ᑳ ᓂᑳᓀᓕᑖᑾᓂᓕᒃ ᐅ ᑭᔅᑭᓄᐊᒫᑫᐎᓐ ᙭, ᐁᑯᔑ ᐋᒋᐱᑯ ᓈᑖᑕᐤ ᒥᑐᓂᐎᓯᐎᓐ; ᐁᑳ ᒥᓇ ᐁ ᐅᓚᔅᑕᔭᒃ ᐌᒋᐸᓕᒃ ᒥᒋᓚᐌᔦᓕᑕᒧᐎᓐ ᓂᐱᐎᓂ ᐊᑑᔅᑫᐎᓂᒃ ᐅᒋ, ᓀᔥᑕ ᐁ ᑖᐺᔦᓕᒫᑲᓂᐎᑦ ᑭᒋᒪᓂᑐ; 2ᓯᑲᐋᑖᑫᐎᓂ ᑭᔅᑭᓄᐊᒫᑫᐎᓐ, ᓀᔥᑕ ᐁ ᓵᓵᒥᓂᐙᓂᐗᒃ, ᓀᔥᑕ ᐅ ᐗᓂᔥᑳᐎᓂᐗᐤ ᑳ ᓂᐱᒋᒃ, ᓀᔥᑕ ᑳᑭᑫ ᑎᐹᔅᑯᓂᑫᐎᓐ᙮ 3ᐅᒪ ᒫᑲ ᑭ ᑳ ᑐᑌᓈᓇᐤ, ᑮᔥᐱᓐ ᐃᑌᓕᑕᑫ ᑭᒋᒪᓂᑐ᙮

4ᐌᓴ ᓈᔦᑖᐗᓐ ᐊᓂᑭ ᐯᔭᑾᐤ ᑳ ᑮ ᐙᔅᑌᓇᒪᐙᑲᓂᐎᒋᒃ, ᓀᔥᑕ ᑳ ᑮ ᑯᒋᔅᑕᑭᒃ ᑭᒋᑭᔑᑳᐎ ᒥᓕᐌᐎᓂᓕᐤ, ᓀᔥᑕ ᑳ ᑮ ᒥᓛᑲᓂᐎᒋᒃ ᐸᓓᑭ ᐊᒑᑾ, 5ᓀᔥᑕ ᑳ ᑮ ᑯᒋᔅᑕᒸᒋᒃ ᐅ ᒥᓗ ᐋᔭᒥᐎᓂᓂᐤ ᑭᒋᒪᓂᑐᐗ, ᓀᔥᑕ ᐁ ᐃᔑ ᓱᑳᑎᓯᒪᑲᒃ ᐊᓂᒪ ᐊᔅᑭ ᑫ ᐹᐸᓕᓕᒃ, 6ᑮᔥᐱᓐ ᑫ ᐸᑭᔑᓄᐙᑴ, ᒥᓇ ᑭᒋ ᐅᔥᑭᐋᑲᓂᐎᒋᒃ ᒥᒋᓚᐌᔦᓕᑕᒧᐎᓂᒃ; ᐁ ᓄᑾᐤ ᒥᓇ ᐁ ᒌᔅᑖᔅᑾᑕᒫᓱᒋᒃ ᑭᒋᒪᓂᑐ ᐅᑯᓯᓴ, ᓀᔥᑕ ᒧᔐ ᐁ ᓇᓀᐯᐎᐋᒋᒃ᙮

7ᐌᓴ ᐊᔅᑭ ᑳ ᒥᓂᑴᒪᑲᒃ ᑭᒥᐗᓇᐳ ᒥᒉᑡᐤ ᐁᑯᑕ ᑳ ᐸᑭᑎᒃ, ᓀᔥᑕ ᑳ ᓂᑕᐎᑭᑕᒫᑯᒋᒃ ᓂᑕᐎᑭᑖᑲᓂᔕ ᐊᓂᑭ ᑳ ᓄᒋᑖᒋᒃ, ᒥᓦᑭᑕᒻ ᑭᒋᒪᓂᑐ: 8ᒫᑲ ᐊᓂᒪ ᑳ ᓂᑕᐎᑭᑖᒪᑲᒃ ᒪᓵᓇᔅᑾ ᓀᔥᑕ ᒥᔑᑲᐎᒥᓇᑯᔑᔭ ᐋᑕᐌᓕᑖᑾᓐ, ᓀᔥᑕ ᑫᑳᑦ ᐃᔅᐸᓕᐤ ᑭᒋ ᒪᒐᑭᒋᑳᑌᒃ; ᑳ ᐃᑌᓕᑖᑾᒃ ᑭᒋ ᐃᔅᒀᓯᑳᑌᒃ᙮

9ᒫᑲ, ᓯᐋᑭᐃᑕᑾᒃ, ᓇᐗᒡ ᒥᓗ ᑫᒀᓇ ᑭ ᐸᑯᓭᓕᑕᒫᑎᓈᓐ, ᐊᓂᐃ ᑫᒀᓇ ᓀᔥᑕ ᑳ ᐎᒋᐃᐌᐸᓕᑭ ᐱᒫᒋᐃᐌᐎᓂᒃ, ᐋᑕ ᐅᒪ ᐁ ᐃᔑ ᐋᔭᒥᔮᒃ᙮ 10ᐌᓴ ᑭᒋᒪᓂᑐ ᓇᒪᐎᓚ ᒪᒑᑎᓯᐤ ᑭᒋ ᐗᓂᑭᔅᑭᓯᑐᑕᒃ ᑭᑦ ᐊᑑᔅᑫᐎᓂᐗᐤ ᓀᔥᑕ ᑭ ᓵᑭᐃᐌᐎ ᐋᐸᑎᓯᐎᓂᐗᐤ, ᑳ ᑮ ᐙᐸᑎᓕᐌᔦᒃ ᐅᑦ ᐃᔑᓂᑳᓱᐎᓂᒃ, ᐁ ᑮ ᐅᒋᔅᑕᒪᐌᑾᒃ ᐅᐸᓓᑭᓴᒃ, ᑫᔮᐸᒡ ᓀᔥᑕ ᐁ ᐅᒋᔅᑕᒪᐌᑾᒃ᙮ 11ᓂ ᐸᑯᓭᓕᑌᓈᓐ ᒫᑲ ᒥᓯᐌ ᐁ ᐃᑕᔑᔦᒃ ᑭᑭ ᐃᔑ ᐙᐸᑎᓕᐌᔦᒃ ᐊᓂᒪ ᐃᔑ ᑭᓯᓴᐎᓯᐎᓐ, ᒥᑐᓂ ᐁ ᑫᒋᓇᐅᔦᒃ ᐊᔅᐯᓕᒧᐎᓂᒃ ᐱᓕᔥ ᑫ ᐃᔥᒀᐸᓕᒃ: 12ᐁᑳ ᑭᒋ ᑭᑎᒥᔦᒃ, ᒫᑲ ᐁ ᓄᔅᐱᓇᑌᑾᒃ ᐊᓂᑭ, ᑖᐺᔦᓕᑕᒧᐎᓐ ᐅᒋ ᓀᔥᑕ ᔑᐱᓚᐌᓯᐎᓐ ᑳ ᐊᑎ ᐋᔮᒋᒃ ᐊᓂᐃ ᐊᔓᑕᒫᑫᐎᓇ᙮

ᑭᒋᒪᓂᑐ ᐅᑕᔓᑕᒫᑫᐎᓐ ᑳ ᑫᒋᓇᐅᒪᑲᒃ

13ᐌᓴ ᐃᔅᐱ ᑭᒋᒪᓂᑐ ᑳ ᑮ ᐊᔓᑕᒪᐙᑦ ᐁᑉᕃᐊᒪ, ᐁᑳ ᐁ ᑲᔥᑭᑖᑦ ᐊᐌᓕᐗ ᐊᐙᓯᑌ ᑳ ᑭᔅᑎᓯᓕᒋ ᑭᒋ ᐅᒋ ᑭᒋᐃᑗᑦ, ᐎᓚ ᑫᒋᐙᒃ ᑮ ᐅᒋ ᑭᒋᐃᑗᐤ, 14ᐁ ᐃᑗᑦ, ᑫᒋᓈᔥ ᐁ ᒥᓦᑭᒥᐌᔮᓐ ᑭ ᑳ ᒥᓦᑭᒥᑎᓐ, ᓀᔥᑕ ᐁ ᒥᒉᑐᐃᐌᔮᓐ ᑭ ᑳ ᒥᒉᑐᐃᑎᓐ᙮ 15ᐁᑯᔑ ᒫᑲ, ᐃᔅᐱ ᑳ ᑮ ᔑᐱᓚᐌᓯᐎ ᔑᐯᓕᑕᒃ, ᑮ ᒥᓚᐤ ᐊᔓᑕᒫᑫᐎᓂᓕᐤ᙮ 16ᐌᓴ ᐃᓕᓕᐗᒃ ᑖᐺ ᑭᒋᐃᑗᐗᒃ ᐊᓂᐃ ᐅᒋ ᓇᐗᒡ ᑳ ᑭᔅᑎᓯᓕᒋ: ᓀᔥᑕ ᑭᒋᐃᑗᐎᓐ ᑭᒋ ᒪᔥᑲᐗᔅᑕᒫᑯᒋᒃ ᐌᒋ ᐳᓂᐸᓕᒃ ᒥᓯᐌ ᒀᓗᑐᑖᑐᐎᓐ᙮ 17ᐃᑕ ᑭᒋᒪᓂᑐ, ᐁ ᓇᑕᐌᓕᑕᒃ ᐊᐙᓯᑌ ᑭᒋ ᐙᐸᑎᓛᑦ ᐊᓂᐃ ᑳ ᐊᑎ ᐋᔮᓕᒋ ᐊᓂᐁᓕᐤ ᐊᔓᑕᒫᑫᐎᓂᓕᐤ ᐁᑳ ᑭᒋ ᑴᔅᑭᐸᓕᓕᒃ ᐅᑦ ᐃᑌᓕᑕᒧᐎᓐ, ᑭᒋᐃᑗᐎᓂᒃ ᑮ ᐅᒋ ᐊᔨᒋᑕᐤ; 18ᑳ ᓂᔑᑭ ᑫᒀᓇ ᐁᑳ ᑫ ᑴᔅᑭᐸᓕᑭ ᐅᒋ, ᐃᑕ ᐁᑳ ᑫ ᑮ ᐃᑭᒃ ᑭᒋᒪᓂᑐ ᑭᒋ ᑭᓛᔅᑭᑦ, ᑭᒋ ᐋᔮᔭᒃ ᒪᔥᑲᐎ ᑳᑭᒋᐃᑯᓯᐎᓐ, ᑳ ᑮ ᓈᑕᒧᔅᑕᒪᒃ ᓈᑕᒫᑫᐎᓐ ᑭᒋ ᒥᒋᒥᓇᒪᒃ ᐊᓂᒪ ᐊᔅᐯᓕᒧᐎᓐ ᑳ ᓂᑳᓇᔅᑕᒫᑲᐎᔭᒃ: 19ᐁᐗᑯ ᐊᔅᐯᓕᒧᐎᓐ ᑳ ᐋᔮᔭᒃ ᐁ ᐅ ᒋᔅᑖᐸᓱᓂᔭᒃ ᑭᑦ ᐊᒑᑯᓈᒃ, ᐁ ᑫᒋᓇᐅᒪᑲᒃ ᓀᔥᑕ ᐁ ᒪᔥᑲᐗᔅᑌᒃ, ᓀᔥᑕ ᑳ ᐱᑐᑫᒪᑲᒃ ᐱᒋ ᐊᑯᐃᑲᓂᒃ; 20ᐃᑌ ᓀᑳᓄᑌᑦ ᑳ ᐃᔑ ᐱᑐᑫᑦ ᑭᓚᓈᓇᐤ ᐅᒋ, ᒋᓴᔅ ᐅᑎ, ᐁ ᑮ ᑭᒋ ᓵᓵᑭᐎᓕᐌᐎᓕᓕᐎᐋᑲᓂᐎᑦ ᑖᐱᔅᑯᒡ ᑳ ᐃᑎᔅᐸᓐ ᒣᓪᑭᓯᑌᒃ᙮