Search form

ᐦᐃᑉᕉᐗ 8

ᒋᓴᔅ ᑭ ᑭᒋ ᓵᓵᑭᐎᓕᐌᐎᓕᓖᒥᓇᐤ

1ᐊᓂᐃ ᑫᒀᓇ ᒫᑲ ᑳ ᑮ ᐋᓕᒧᑕᒪᒃ ᐁᐗᑯ ᐅᒪ ᑳ ᒥᓯᐌᔮᒃ: ᑭᑦ ᐋᔭᐙᓇᐤ ᐁᑯ ᑐᐎ ᑭᒋ ᓵᓵᑭᐎᓕᐌᐎᓕᓕᐤ, ᑳ ᐊᐱᑦ ᑭᒋᓂᔅᑮᒃ ᐃᑌᑫ ᐅᑦ ᐅᑭᒪᐗᐱᐎᓂᒃ ᑳ ᑭᒋᐅᑭᒪᐌᓕᑖᑯᓯᑦ ᑭᒋᑭᔑᑯᒃ; 2ᑳ ᐋᔭᒥᐋᐎ ᓄᒋᑖᑦ ᑳ ᐸᓓᑲᓂᓕᑭ, ᓀᔥᑕ ᑖᐺ ᐋᔭᒥᐋᐎ ᒥᑭᐙᒥᓕᐤ, ᑳ ᑮ ᒋᒪᑖᑦ ᐅᑎᐯᓕᒋᑫᐤ, ᓇᒪ ᒫᑲ ᐃᓕᓕᐤ᙮

3ᐌᓴ ᒥᓯᐌ ᑕᑐ ᑭᒋ ᓵᓵᑭᐎᓕᐌᐎᓕᓕᐤ ᐸᑳᓂᐊᐤ ᑭᒋ ᐸᑭᑎᓂᑫᑦ ᒥᓕᐌᐎᓇ ᓀᔥᑕ ᓵᓵᑭᐎᓕᐌᐎᓇ: ᐁᐗᑯ ᐅᒋ ᐅᒋᑕᐤ ᓇᑕᐌᓕᑖᑾᓐ ᐊᐗ ᐃᓕᓕᐤ ᑫᒀᓕᐤ ᑭᒋ ᐋᔮᑦ ᑭᒋ ᐸᑭᑎᓂᑫᑦ᙮ 4ᐌᓴ ᑮᔥᐱᓐ ᐊᔅᑮᒃ ᑮ ᐃᑖᑯᐸᓀ, ᓇᒪᐎᓚ ᑲᑕ ᓵᓵᑭᐎᓕᐌᐎᓕᓕᐎᐸᓐ, ᐁ ᓄᑾᒃ ᐁ ᐃᑖᒋᒃ ᓵᓵᑭᐎᓕᐌᐎᓕᓕᐗᒃ ᑳ ᐸᑭᑎᓂᑫᒋᒃ ᒥᓕᐌᐎᓇ ᐁ ᐃᑕᔅᑌᒃ ᐅᓚᔓᐌᐎᓐ: 5ᐊᓂᑭ ᑳ ᐊᑐᔅᑫᔅᑕᑭᒃ ᐁ ᐃᔑ ᑭᔅᑭᓄᐙᐸᒋᑳᑌᑭ ᓀᔥᑕ ᐁᑎᑳᔅᑌᑎᑭ ᑭᒋᑭᔑᑳᐎ ᑫᒀᓇ, ᑖᐱᔅᑯᒡ ᒧᓯᔅ ᑳ ᑮ ᐃᔑ ᑭᔅᑭᓄᐊᒫᑯᑦ ᑭᒋᒪᓂᑐᐗ ᐃᔅᐱ ᐁ ᐎ ᐅᔑᑖᑦ ᐋᔭᒥᐋᐎ ᒥᑭᐙᒥᓕᐤ; ᐌᓴ, ᐙᐸᑕ, ᐃᑗᐤ, ᑭᒋ ᐅᔑᑖᔭᓐ ᒥᓯᐌ ᑫᒀᓇ ᑭᒋ ᐃᔑᓈᑾᑭ ᑖᐱᔅᑯᒡ ᐊᓂᐃ ᑳ ᑮ ᑭᔅᑭᓄᐙᐸᑕᒪᓐ ᐊᓐᑕ ᐗᒌᒃ᙮ 6ᐊᓄᒡ ᒫᑲ ᐋᔭᐤ ᐊᐙᓯᑌ ᑫᔅᑌᓕᑖᑾᓂᓕᒃ ᐊᑑᔅᑫᐎᓂᓕᐤ, ᑖᐱᔅᑯᒡ ᓀᔥᑕ ᐁ ᐋᔭᒥᐁᔅᑕᒫᑫᑦ ᐊᐙᓯᑌ ᑳ ᒥᓨᔑᒃ ᓇᔅᑯᒥᑐᐎᓂᒃ, ᑳ ᑮ ᒪᔥᑲᐗᔅᑖᓂᐗᒃ ᐊᐙᓯᑌ ᑳ ᒥᓨᔑᑭ ᐊᔓᑕᒫᑫᐎᓂᒃ᙮

7ᐌᓴ ᑮᔥᐱᓐ ᐊᓂᒪ ᓇᔅᑯᒥᑐᐎᓐ ᒥᑐᓂ ᑮ ᒥᓨᔑᓄᑯᐸᓀ, ᓇᒪᐎᓚ ᑲᑕ ᑮ ᓇᑕᐌᓕᒋᑲᑌᐸᓐ ᐊᓂᒪ ᑯᑕᒃ᙮ 8ᐌᓴ ᐁ ᓈᔦᑕᐌᓕᒫᑦ, ᐃᑗᐤ, ᒫᑎᑲ, ᑲᑕ ᐅᑎᒋᐸᓕᐗ ᑭᔑᑳᐗ, ᐃᑗᐤ ᐅᑎᐯᓕᒋᑫᐤ, ᐃᔅᐱ ᑫ ᐅᔑᑕᒪᐗᑭᒃ ᐅᔥᑭ ᓇᔅᑯᒥᑐᐎᓂᓕᐤ ᑳ ᐃᑕᔑᑦ ᐃᔅᕃᐃᓪ, ᓀᔥᑕ ᑳ ᐃᑕᔑᑦ ᒎᑕ; 9ᓇᒪᐎᓚ ᑖᐱᔅᑯᒡ ᐊᓂᐁᓕᐤ ᓇᔅᑯᒥᑐᐎᓂᓕᐤ ᑳ ᑮ ᐅᔑᑕᒧᒪᑭᒃ ᐅᑖᐎᐙᐗ, ᐊᓂᒪ ᐁ ᑭᔑᑳᒃ ᐃᔅᐱ ᐁ ᑮ ᓴᑭᓂᔅᑫᓇᑭᒃ, ᑭᒋ ᐗᓚᐎᑕᐊᑭᒃ ᐃᒋᑉᑦ ᐊᔅᑮᒃ ᐅᒋ; ᐌᓴ ᓇᒪᐎᓚ ᑮ ᑲᓇᐌᓕᑕᒶᒃ ᓂ ᓇᔅᑯᒥᑐᐎᓂᓕᐤ, ᓇᒪ ᒫᑲ ᓂ ᑮ ᐱᓯᔅᑫᓕᒪᐗᒃ, ᐃᑗᐤ ᐅᑎᐯᓕᒋᑫᐤ᙮ 10ᐌᓴ ᐁᐗᑯ ᐅᒪ ᓇᔅᑯᒥᑐᐎᓐ ᑫ ᐅᔑᑕᒪᐗᑭᒃ ᑳ ᐃᑕᔑᑦ ᐃᔅᕃᐃᓪ ᑮ ᐳᓂᐸᓕᑾᐌ ᐅᐅ ᑭᔑᑳᐗ, ᐃᑗᐤ ᐅᑎᐯᓕᒋᑫᐤ; ᓂ ᑳ ᐸᑭᑎᓀᓐ ᓂᑦ ᐅᓚᔓᐌᐎᓇ ᐅ ᒥᑐᓀᓕᒋᑲᓂᐙᒃ, ᓀᔥᑕ ᓂ ᑳ ᒪᓯᓇᐁᓐ ᐅᑌᐃᐙᒃ; ᓂ ᑳ ᐅ ᑭᒋᒪᓂᑐᒥᒥᑾᒃ ᒫᑲ, ᓀᔥᑕ ᓂ ᑳ ᐅᑦ ᐃᓕᓕᒥᒫᐗᒃ; 11ᓇᒪᐎᓚ ᓀᔥᑕ ᒥᓯᐌ ᑕᑐ ᐃᓕᓕᐤ ᑲᑕ ᑭᔅᑭᓄᐊᒪᐌᐤ ᐎᒋᐃᓕᓕᒪ, ᓀᔥᑕ ᒥᓯᐌ ᑕᑐ ᐃᓕᓕᐤ ᐎᒋᔖᓇ, ᐁ ᐃᑗᑦ, ᑭᔅᑫᓕᒻ ᐅᑎᐯᓕᒋᑫᐤ; ᐌᓴ ᒥᓯᐌ ᓂ ᑳ ᑭᔅᑫᓕᒥᑾᒃ, ᑳ ᐋᐱᔅᑌᓕᑖᑯᓯᑦ ᐅᒋ ᐃᔥᐱᔥ ᑳ ᑭᔅᑌᓕᑖᑯᓯᑦ᙮ 12ᐌᓴ ᓂ ᑳ ᑭᑎᒫᑫᓕᑕᒸᓐ ᐅ ᐗᓂᑐᑕᒧᐎᓂᐗᐗ, ᓀᔥᑕ ᐅ ᒪᒋᑐᑕᒧᐎᓂᐗᐗ ᓀᔥᑕ ᐅ ᒪᒑᑎᓯᐎᓂᐙᐗ ᓇᒪᐎᔅᑳᑦ ᒥᓇ ᓂ ᑳ ᑭᔅᑭᓯᑐᑕᒸᓐ᙮ 13ᐁ ᐃᑗᑦ ᒫᑲ, ᐅᔥᑭ ᓇᔅᑯᒥᑐᐎᓐ, ᐊᓂᒪ ᓃᔥᑕᒻ ᑮ ᑳᔮᔑᑕᐤ᙮ ᐁᑯ ᐊᓂᒪ ᑳ ᐊᑎ ᓂᔑᐗᓈᑕᒃ ᓀᔥᑕ ᑳ ᐊᑎ ᑳᔮᔑᐗᒃ ᐋᔕᔾ ᐃᑌᓕᑖᑾᓐ ᑭᒋ ᐹᔑᑯᓈᑾᒃ᙮