Search form

ᑭᔅᑫᓕᑖᑯᑖᑫᐎᓐ 10

ᐊᓇ ᐁᓐᒐᓪ ᓀᔥᑕ ᐊᓂᒪ ᑳ ᐋᐱᔖᔑᒃ ᑎᑎᐱᔦᑭᓂᑲᓐ

1ᓂ ᑮ ᐙᐸᒪᐤ ᒫᑲ ᑯᑕᒃ ᓯᔪᑳᑎᓯᑦ ᐁᓐᒐᓪ ᑭᒋᑭᔑᑯᒃ ᐁ ᐅᒋ ᐯᒋ ᓛᔑᑦ, ᐁ ᑭᑭᔥᑲᒃ ᐗᔅᑯᓕᐤ: ᑕᑯᒡ ᒫᑲ ᐅᔅᑎᒀᓂᒃ ᑮ ᐃᑕᑾᓂᓕᐤ ᐎᑯᐯᓵᑲᓐ, ᐅᑖᔅᑕᒥᑳ ᒫᑲ ᑮ ᐃᔑᓈᑾᓂᓕᐤ ᑖᐱᔅᑯᒡ ᐱᓯᒻ, ᓀᔥᑕ ᐅᓯᑕ ᑖᐱᔅᑯᒡ ᐃᔥᑯᑌᐎ ᓯᑣᔅᐱᔅᑯᐃᑲᓇ: 2ᑮ ᑕᑯᓇᒻ ᒫᑲ ᐅᒋᒋᒃ ᐁ ᐋᐱᔖᔑᓂᓕᒃ ᒪᓯᓇᐃᑲᓂᓕᐤ: ᑮ ᐊᔅᑕᐤ ᒫᑲ ᐅ ᑭᒋᓂᔅᑭᐎᓯᑦ ᑭᒋᑲᒦᒃ, ᓀᔥᑕ ᐅ ᓇᒪᑎᓂᔅᑭᓯᑦ ᐊᔅᑮᒃ, 3ᑮ ᑌᐺᐤ ᒫᑲ ᐁ ᑭᔗᐌᑦ, ᑖᐱᔅᑯᒡ ᒥᔑᐱᔑᐤ ᐁ ᐅᓗᑦ: ᐃᔅᐱ ᒫᑲ ᑳ ᑭ ᑌᐺᑦ, ᓂᔀᔅ ᐅ ᓂᒥᔅᑭᐗᒃ ᑮ ᑭᑐᐗᒃ᙮ 4ᐃᔅᐱ ᒫᑲ ᐊᓂᑭ ᓂᔂᔅ ᐅᓂᒥᔅᑭᐗᒃ ᑳ ᑭ ᑭᑐᒋᑳ, ᓂ ᐎ ᒪᓯᓇᐃᑳᑖᔾ: ᓂ ᑮ ᐯᑌᓐ ᒫᑲ ᐯᑖᑯᓯᐎᓐ ᑭᒋᑭᔑᑯᒃ ᐅᒋ, ᐁ ᐃᑎᑯᔮᓐ, ᐊᑯᔅᑭᐗᓴ ᐊᓂᐃ ᑫᒀᓇ ᑳ ᑮ ᐃᑗᒋᒃ ᐊᓂᑭ ᓂᔂᔅ ᐅᓂᒥᔅᑭᐗᒃ, ᐁᑳᐎᓚ ᒪᓯᓇᐊ᙮

5ᐊᓇ ᐁᓐᒐᓪ ᒫᑲ ᑳ ᐙᐸᒪᒃ ᐁ ᓂᐹᐎᑦ ᑭᒋᑲᒦᒃ ᓀᔥᑕ ᐊᔅᑮᒃ, ᑮ ᔓᐗᓂᔅᑫᓕᐤ ᑭᒋᑭᔑᑯᒃ ᐃᔑ, 6ᑮ ᑭᒋᐃᑗᐤ ᒫᑲ ᐊᓂᐃ ᐅᒋ ᑳ ᐱᒫᑎᓯᓕᒋ ᑳᑭᑫ ᓀᔥᑕ ᑳᑭᑫ, ᐊᓂᐃ ᑳ ᑮ ᐅᔑᑖᓕᒋ ᑭᒋᑭᔑᒃ ᓀᔥᑕ ᒥᓯᐌ ᐁᑯᑕ ᐁ ᐃᑕᑾᓂᓕᑭ, ᓀᔥᑕ ᐊᔅᑭ, ᓀᔥᑕ ᐊᓂᐃ ᑫᒀᓇ ᐁᑯᑕ ᐁ ᐃᑕᑾᓂᓕᑭ, ᓀᔥᑕ ᑭᒋᑲᒥ, ᓀᔥᑕ ᐊᓂᐃ ᑫᒀᓇ ᐁᑯᑕ ᐁ ᐃᑕᑾᓂᓕᑭ, ᒥᑐᓂ ᑭᒋ ᐳᓂᐸᓕᑭ ᐁ ᑭᔑᑳᑭ: 7ᒫᑲ ᒣᒀᒡ ᐊᓂᐃ ᐁ ᑭᔑᑳᑭ ᐁ ᐯᑖᑯᓯᑦ ᐊᓇ ᓃᔂᔅ ᐁᓐᒐᓪ, ᐃᔅᐱ ᒫᒋ ᑭᑐᑖᑦ ᐁᑯ ᑭᒋ ᑭᔑᑖᓂᐗᓂᓕᒃ ᑭᒋᒪᓂᑐ ᐅ ᒪᒪᔅᑳᑎᐎᓐ, ᒬᒋ ᑳ ᑭ ᐃᔑ ᐎᑕᒪᐙᑦ ᐅᑦ ᐊᑑᔅᑫᓛᑲᓇ ᐅᑭᔅᑭᐙᐃᑫᐗ᙮

8ᐊᓂᒪ ᐯᑖᑯᓯᐎᓐ ᒫᑲ ᑭᒋᑭᔑᑯᒃ ᑳ ᑮ ᐅᒋ ᐯᑕᒫᓐ ᒥᓇ ᓂ ᑮ ᐋᔭᒥᐃᑯᓐ, ᐁ ᐃᑎᑯᔮᓐ, ᒫᒑ ᐅᑎᓇ ᒫᑲ ᐊᓂᒪ ᑳ ᐋᐱᔖᔑᒃ ᒪᓯᓇᐃᑲᓐ, ᑳ ᐋᐸᐋᔅᑌᒃ ᐅᒋᒋᒃ ᐊᓇ ᐁᓐᒐᓪ ᑳ ᓂᐸᐎᑦ ᑭᒋᑲᒥᒃ ᓀᔥᑕ ᐗᑭᑕᔅᑲᒥᒃ᙮

9ᓂ ᑮ ᓈᑕᐤ ᒫᑲ ᐊᓇ ᐁᓐᒐᓪ, ᓂ ᑮ ᐃᑕᐤ ᒫᑲ, ᒥᓕᓐ ᑳ ᐋᐱᔖᔑᒃ ᒪᓯᓇᐃᑲᓐ᙮ ᐁᑯ ᐁᔑᑦ, ᐅᑎᓇ, ᒥᒋ ᒫᑲ; ᑭ ᑳ ᑭᔑᐗᑕᔦᔅᑳᑯᓐ ᑭᐗᑖᒃ ᒫᑲ, ᒫᑲ ᑭᑐᓂᒃ ᑲᑕ ᔑᐗᐤ ᑖᐱᔅᑯᒡ ᐋᒧᔔᑲᐤ᙮

10ᓂ ᑮ ᐅᑎᓀᓐ ᒫᑲ ᑳ ᐋᐱᔖᔑᒃ ᒪᓯᓇᐃᑲᓐ ᐊᓇ ᐁᓐᒐᓪ ᐅᒋᒋᒃ ᐅᒋ, ᓂ ᑮ ᒥᒋᓐ ᒫᑲ; ᓂᑐᓂᒃ ᒫᑲ ᑮ ᔑᐙᐤ ᑖᐱᔅᑯᒡ ᐋᒧᔔᑲᐤ; ᐃᔅᐱ ᒫᑲ ᑮ ᒥᒋᔮᓐ ᓂ ᑮ ᑭᔑᐗᔅᑲᑖᓐ᙮ 11ᓂ ᑮ ᐃᑎᒃ ᒫᑲ, ᒥᓇ ᑭ ᑳ ᑭᔅᑭᐙᐃᑫᔅᑕᐙᐗᒃ ᒥᒉᑦ ᑐᐎ ᐃᓕᓕᐗᒃ, ᓀᔥᑕ ᐹᐱᑐᔥ ᐁ ᐃᑕᔅᑳᓀᓯᒋᒃ ᐃᓕᓕᐗᒃ, ᓀᔥᑕ ᓇᓈᑲᐤ ᐁ ᐃᔑ ᑭᔗᒔᒃ, ᓀᔥᑕ ᑭᒋᐅᑭᒫᐗᒃ᙮