Search form

ᑭᔅᑫᓕᑖᑯᑖᑫᐎᓐ 13

ᐊᓂᑭ ᓂᔓ ᐊᐌᓯᓴᒃ

1ᓂ ᑮ ᓂᐸᐎᓐ ᒫᑲ ᓓᑳᒃ ᔑᔓᒡ ᑭᒋᑲᒦᒃ, ᓂ ᑮ ᐙᐸᒪᐤ ᒫᑲ ᐊᐌᓯᔅ ᑭᒋᑲᒥᒃ ᐁ ᐅᒋ ᐸᓯᑯᑦ, ᓂᔂᔅ ᐁ ᑕᑐᔅᑎᒀᓀᑦ ᓀᔥᑕ ᐁ ᒥᑖᑐᑌᔥᑲᓄᑦ, ᓀᔥᑕ ᑕᑯᒡ ᐅᑦ ᐁᔥᑲᓂᒃ ᒥᑖᑦ ᐅᑭᒪᐗᔅᑐᑎᓋ, ᓀᔥᑕ ᐅᔅᑎᒀᓂᒃ ᐹᔅᑖᒧᐎ ᐃᔑᓂᑳᓱᐎᓇ᙮ 2ᐊᓇ ᐊᐌᓯᔅ ᒫᑲ ᑳ ᐙᐸᒪᒃ ᑖᐱᔅᑯᒡ ᐹᐹᑌᐱᔑᐤ ᑮ ᐃᔑᓈᑯᓯᐤ, ᓀᔥᑕ ᐅᓯᑕ ᑖᐱᔅᑯᒡ ᒪᔅᑾ ᐅᓯᑕ ᑮ ᐃᔑᓈᑾᓂᓕᐗ, ᓀᔥᑕ ᐅᑐᓐ ᑖᐱᔅᑯᒡ ᒥᔑᐱᔑᐤ ᐅᑐᓐ: ᑮ ᒥᓕᑯ ᒫᑲ ᒥᔑᑭᓀᐱᑾ ᑲᔥᑭᐅᐎᓂᓕᐤ ᓀᔥᑕ ᐅ ᑌᑕᐱᐎᓐ, ᓀᔥᑕ ᑭᒋ ᑎᐯᓕᒋᑫᐎᓂᓕᐤ᙮ 3ᓂ ᑮ ᐙᐸᑕᒸᓐ ᒫᑲ ᐯᔭᒃ ᐅᔅᑎᒀᓐ ᑖᐱᔅᑯᒡ ᐁ ᓂᐸᑖᓂᐗᓂᓕᒃ ᓂᐱᐎᓂᒃ ᐃᔑ; ᐁ ᓂᐱᐎᓂ ᒥᔣᑲᓂᐎᑦ ᒫᑲ ᑮ ᒥᓇᐙᒋᑖᓂᐗᓂᓕᐤ: ᒥᓯᐌ ᒫᑲ ᐊᔅᑮᒃ ᑳ ᐃᑖᒋᒃ ᑮ ᒫᒪᔅᑳᑌᓕᒣᐗᒃ ᐊᓂᐃ ᐊᐌᓯᓴ᙮ 4ᑮ ᓇ ᐊᑮᔅᑕᐌᐗᒃ ᒫᑲ ᒥᔑᑭᓀᐱᑾ ᑲᔅᑭᐅᐎᓂᓕᐤ ᑳ ᑭ ᒥᓛᓕᒋ ᐊᓂᐃ ᐊᐌᓯᓴ: ᓀᔥᑕ ᒫᑲ ᑮ ᓇᐗᑮᔅᑕᐌᐗᒃ ᐊᓂᐃ ᐊᐌᓯᓴ, ᐁ ᐃᑗᒋᒃ, ᐊᐌᓇ ᓀᔅᐱᑕᐗᑦ ᐊᐌᓯᓴ? ᐊᐌᓇ ᑫᔥᑭᑖᑦ ᑭᒋ ᓇᑐᐸᓖᔅᑕᐙᑦ?

5ᑮ ᒥᓚᐤ ᒫᑲ ᒥᑐᓂᓕᐤ ᐁ ᐋᔭᒥᑦ ᑭᒋ ᑫᒀᓇ ᓀᔥᑕ ᐹᔅᑕᒧᐎᓇ; ᑲᔥᑭᐅᐎᓂᓕᐤ ᒫᑲ ᑮ ᒥᓚᐤ ᑭᒋ ᓇᑐᐸᓕᑦ ᐃᔥᐱᔥ ᓀᒥᑕᓇᐤ ᓀᔥᑕ ᓂᔓᔖᑉ ᐱᓯᒶ᙮ 6ᑮ ᐹᔅᑭᑐᓀᓕᐤ ᒫᑲ ᑭᒋ ᐹᔅᑕᒫᑦ ᑭᒋᒪᓂᑐᐗ, ᓀᔥᑕ ᑭᒋ ᐹᔅᑕᒧᑕᒸᑦ ᐅᑦ ᐃᔑᓂᑳᓱᐎᓂᓕᐤ, ᓀᔥᑕ ᐅᑦ ᐋᔭᒥᐋᐎ ᒥᑭᐙᒥᓕᐤ, ᓀᔥᑕ ᒥᓯᐌ ᑳ ᑕᔑᑫᓕᒋ ᑭᒋᑭᔑᑯᒃ᙮ 7ᑮ ᒥᓚᐤ ᒫᑲ ᑭᒋ ᓇᑐᐸᓖᔅᑕᐙᑦ ᐅᐸᓓᑭᓴ, ᓀᔥᑕ ᑭᒋ ᔖᑯᒋᐋᑦ: ᑲᔥᑭᐅᐎᓂᓕᐤ ᓀᔥᑕ ᑮ ᒥᓚᐤ ᑭᒋ ᑎᐯᓕᒫᑦ ᒥᓯᐌ ᑳ ᑕᑐᑌᐎᓯᓕᒋ ᐃᓕᓕᐗ, ᓀᔥᑕ ᐹᐱᑐᔥ ᐁ ᐃᔑᑭᔗᓕᒋ, ᓀᔥᑕ ᑳ ᑕᑐᔅᑳᓀᓯᓕᒋ ᐃᓕᓕᐗ᙮ 8ᒥᓯᐌ ᐊᓂᑭ ᑳ ᑕᔑᑫᒋᒃ ᐅᑕ ᐊᔅᑮᒃ ᑲᑕ ᓇᐗᑮᔅᑕᐌᐗᒃ, ᐊᓂᑭ ᐅᑦ ᐃᔑᓂᑳᓱᐎᓂᐙᐗ ᐁᑳ ᑳ ᒪᓯᓇᐃᑳᑌᓕᑭ ᐅ ᐱᒫᑎᓯᐎᓂ ᒪᓯᓇᐃᑲᓂᒃ ᒫᓂᔥᒑᓂᔑᔥ ᑳ ᑮ ᓂᐸᐋᑲᓂᐎᑦ ᐊᔅᐱᓐ ᑳ ᒫᒋ ᐊᔅᑭᐗᒃ᙮

9ᑮᔥᐱᓐ ᐊᐌᓇ ᐌᑖᐗᑳᑴ, ᐁᑯᔑ ᑲᑕ ᐯᑕᒻ᙮ 10ᐊᓇ ᐊᐗᑳᔑᐌᐎᓂᒃ ᑳ ᐃᑐᑕᐃᐌᑦ, ᐊᐗᑳᔑᐌᐎᓂᒃ ᑲᑕ ᐃᑐᑌᐤ; ᐊᓇ ᔑᒫᑲᓂᓕᐤ ᑳ ᐅᒋ ᓂᐹᔨᐌᑦ ᔑᒫᑳᓂᓕᐤ ᑲᑕ ᐅᒋ ᓂᐸᐋᐤ᙮ ᐅᑕ ᐃᑕᑾᓂᓕᐤ ᐅ ᔑᐱᓚᐌᓯᐎᓂᐗᐤ ᓀᔥᑕ ᐅ ᑖᐺᔦᓕᑕᒧᐎᓂᐗᐤ ᐅᐸᓓᑭᓴᒃ᙮

11ᓂ ᑮ ᐙᐸᒪᐤ ᒫᑲ ᑯᑕᒃ ᐊᐌᓯᔅ ᐊᔅᑮᒃ ᐁ ᐯᒋ ᐅᒋ ᐸᓯᑯᑦ: ᑮ ᓂᔓᑌᔅᑲᓄ ᒫᑲ ᑖᐱᔅᑯᒡ ᒫᓂᔥᒑᓂᔑᔥ, ᑖᐱᔅᑯᒡ ᒫᑲ ᒥᔑᑭᓀᐱᒃ ᑮ ᐃᔑ ᐋᔭᒥᐤ᙮ 12ᐋᐸᒋᑕᐌᐤ ᒫᑲ ᒥᓯᐌ ᐅ ᑲᔥᑭᐅᐎᓂᓕᐤ ᐊᓂᐃ ᓃᔥᑕᒻ ᐊᐌᓯᓴ ᐁ ᑳᓇᐙᐸᒥᑯᑦ, ᓀᔥᑕ ᐃᑐᑕᒻ ᐊᔅᑭ ᓀᔥᑕ ᒥᓯᐌ ᐁᑯᑕ ᑳ ᑕᔑᑫᓕᒋ, ᑭᒋ ᓇᐗᑮᔅᑕᐙᓕᒋ ᐊᓂᐃ ᓃᔥᑕᒻ ᐊᐌᓯᓴ, ᐊᓇ ᐁ ᓂᐱᐎᓂ ᒥᔣᑲᓂᐎᑦ ᑳ ᒥᓇᐙᒋᑖᓂᐗᓂᓕᒃ᙮ 13ᓈᔅᐱᒡ ᒫᒪᔅᑳᒋ ᐃᔑᒋᑫᐤ, ᐁ ᑐᑕᒃ ᐃᔥᑯᑌᓕᐤ ᑭᔑᑯᒃ ᐅᒋ ᑭᒋ ᓛᔑᐸᓕᓕᒃ ᐊᔅᑮᒃ ᐃᔑ ᐁ ᑲᓇᐙᐸᑕᒥᓕᒋ ᐃᓕᓕᐗ᙮ 14ᐙᔦᔑᐁᐤ ᒫᑲ ᐊᓂᐃ ᐊᔅᑮᒃ ᑳ ᑕᔑᑫᓕᒋ, ᐊᓂᐃ ᒫᒪᔅᑳᒋ ᐃᔑᒋᑫᐎᓇ ᐅᒋ ᑳ ᑲᔥᑭᑖᑦ ᑭᒋ ᑐᑕᒃ ᐁ ᑲᓇᐙᐸᒥᑯᑦ ᐊᓂᐃ ᐊᐌᓯᓴ; ᐁ ᐃᑖᑦ ᐊᓂᐃ ᐊᔅᑮᒃ ᑳ ᑕᔑᑫᓕᒋ, ᑭᒋ ᒪᓯᓕᓕᑲᐙᓕᒋ ᐊᐌᓯᓴ, ᐊᓇ ᑳ ᑭ ᒥᔣᑲᓂᐎᑦ ᔑᒫᑲᓂᓕᐤ ᐅᒋ, ᐁᓕᐌᒃ ᒫᑲ ᐁ ᑮ ᐱᒫᑎᓰᑦ᙮ 15ᐋᔭᐤ ᓀᔥᑕ ᑲᔥᑭᐅᐎᓂᓕᐤ ᑭᒋ ᒥᓛᑦ ᐱᒫᑎᓯᐎᓂᓕᐤ ᐅ ᒪᓯᓕᓕᒥᓕᐗ ᐊᓂᐃ ᐊᐌᓯᓴ, ᐅ ᒪᓯᓕᓕᒪ ᐊᓇ ᐊᐌᓯᔅ ᑭᒋ ᐋᔭᒥᓕᒋ, ᓀᔥᑕ ᑭᒋ ᐃᑐᑕᒥᓕᒋ ᒥᓯᐌ ᐊᓂᑭ ᐁᑳ ᑳ ᐎ ᓇᐗᑭᔅᑕᐅᒫᒋᒃ ᐅ ᒪᓯᓕᓕᒪ ᐊᐌᓯᔅ ᑭᒋ ᓂᐸᐋᑲᓂᐎᒋᒃ᙮ 16ᐃᑐᑕᐌᐤ ᓀᔥᑕ ᒥᓯᐌ, ᑳ ᐋᐱᔑᔑᓕᒋ ᓀᔥᑕ ᑳ ᒥᔑᑭᑎᓕᒋ, ᑳ ᒥᔕᑭᓯᓕᒋ ᓀᔥᑕ ᑳ ᑭᑎᒫᑭᓯᓕᒋ, ᑳ ᑎᐯᓕᒥᑎᓯᓕᒋ ᓀᔥᑕ ᑳ ᐊᐗᑳᓂᐎᓕᒋ, ᑭᒋ ᐅᑎᓇᒥᓕᒋ ᑭᔅᑭᓄᐙᒋᐅᐎᓂᓕᐤ ᐅ ᑭᒋᓂᔅᑭᓕᒃ ᓀᔥᑕᐱᑯ ᐅᔅᑲᑎᑯᓕᒃ: 17ᐁᑳᐎᓚ ᐊᐌᓇ ᓀᔥᑕ ᑭᒋ ᐊᑖᐌᑦ ᓀᔥᑕᐱᑯ ᑭᒋ ᐅᑎᓂᑫᑦ, ᐊᓇ ᐱᑯ ᑳ ᐋᔮᑦ ᑭᔅᑭᓄᐙᒋᐅᐎᓂᓕᐤ, ᓀᔥᑕᐱᑯ ᐅᑦ ᐃᔑᓂᑳᓱᐎᓂᓕᐤ ᐊᐌᓯᓴ, ᓀᔥᑕᐱᑯ ᐁ ᑕᑡᑭᒋᑳᑌᓕᒃ ᐅᑦ ᐃᔑᓂᑳᓱᐎᓐ᙮

18ᐅᑕ ᐃᑕᑾᓐ ᑲᑫᑕᐌᓕᑕᒧᐎᓐ᙮ ᐁᑯᔑ ᐊᓇ ᑳ ᐅ ᓂᓯᑐᑕᒧᐎᓂᑦ ᑲᑕ ᐊᑭᑕᒻ ᐁ ᑕᑡᔭᑭᓯᓕᒋ ᐊᐌᓯᓴ: ᐌᓴ ᐃᑕᑭᒋᑳᑌᓕᐤ ᐁ ᐃᑕᑭᑫᑦ ᐃᓕᓕᐤ: ᐁ ᐃᑕᑭᒥᑦ ᒫᑲ ᐁᐗᑯ ᐅᒪ ᓂᑯᑡᔀᐤ ᒥᑖᑐᒥᑕᓇᐤ, ᓂᑯᑡᓱᒥᑕᓇᐤ ᓀᔥᑕ ᓂᑯᑡᓱᔖᑉ᙮