Search form

ᑭᔅᑫᓕᑖᑯᑖᑫᐎᓐ 8

ᐊᓂᒪ ᓂᔂᔅ ᐸᓱᑯᐃᑲᓐ

1ᐃᔅᐱ ᒫᑲ ᑳ ᑭ ᐋᐸᐊᒃ ᓂᔂᔅ ᐊᑯᔅᑭᐗᓯᑲᓂᓕᐤ, ᑮ ᑭᐱᑐᐙᓂᐗᓐ ᑭᒋᑭᔑᑯᒃ ᓈᓐᑕᐤ ᐋᐱᑕᐤ ᑎᐹᔨᑲᓐ ᐱᓯᒧᑲᓂᒃ᙮ 2ᓂ ᑮ ᐙᐸᒪᐗᒃ ᒫᑲ ᐊᓂᑭ ᓂᔂᔅ ᐁᓐᒐᓚᒃ ᑳ ᐅᑎᔥᑲᐎᑳᐸᐎᔅᑕᐙᒋᒃ ᑭᒋᒪᓂᑐᐗ; ᑮ ᒥᓛᐗᒃ ᒫᑲ ᓂᔂᔅ ᐳᑖᒋᑲᓇ᙮

3ᑯᑕᒃ ᐁᓐᒐᓪ ᒫᑲ ᑮ ᐯᒋ ᐃᑐᑌᐤ ᑮ ᓂᐸᐎᐤ ᒫᑲ ᐸᑭᒋᑲᓈᐱᔅᑯᒃ, ᐁ ᐋᔮᑦ ᐅᓵᐎᔓᓕᐊᓈᐱᔉ ᐸᑭᒋᑫᐎᓛᑲᓐ; ᑮ ᒥᓚᐤ ᒫᑲ ᒥᔅᑕᐃ ᐎᑭᒫᓯᑲᓂᓕᐤ, ᑭᒋ ᐸᑭᑎᓂᑫᑦ ᐊᓯᒋ ᐅᑦ ᐋᔭᒥᐋᐎᓂᓕᐗ ᒥᓯᐌ ᐅᐸᓓᑭᓴ ᐅᓵᐎᔔᓕᐊᓈᐱᔉ ᐸᑭᒋᑲᓈᐱᔅᑯᒃ ᐅᑎᔥᑲᐤ ᐅᑭᒪᐗᐱᐎᓂᒃ ᑳ ᐎᑕᑾᒃ᙮ 4ᐊᓂᒪ ᒫᑲ ᐁ ᐱᐳᑌᒃ ᐎᑭᒫᓯᑲᓐ ᑳ ᐯᒋ ᐊᓯᒋᐸᓕᒃ ᐅᑦ ᐋᔭᒥᐋᐎᓂᐙᐗ ᐅᐸᓓᑭᓴᒃ, ᑮ ᐅᐱᐸᓕᐤ ᐅᑎᔥᑲᐤ ᑭᒋᒪᓂᑐᐗ ᐁᓐᒐᓪ ᐅᒋᒋᒃ ᐅᒋ᙮ 5ᐊᓇ ᐁᓐᒐᓪ ᒫᑲ ᑮ ᐅᑎᓇᒻ ᐸᑭᒋᑫᐎᓛᑲᓂᓕᐤ, ᑮ ᓵᑲᔅᑭᓇᑕᐤ ᒫᑲ ᐃᔥᑯᑌᓕᐤ ᐸᑭᒋᑲᓈᐱᔅᑯᒃ ᐅᒋ, ᐊᔅᑮᒃ ᒫᑲ ᑮ ᐃᔑ ᐌᐱᓇᒻ: ᑮ ᐯᑖᑯᓯᓈᓂᐗᓐ ᒫᑲ, ᓀᔥᑕ ᐅᓂᒥᔅᑭᐗᒃ, ᓀᔥᑕ ᐁ ᐙᐙᔅᑌᐸᓕᒃ, ᓀᔥᑕ ᑮ ᑶᑾᓐ᙮

ᐊᓂᐃ ᐳᑖᒋᑲᓇ

6ᐊᓂᑭ ᓂᔂᔅ ᐁᓐᒐᓚᒃ ᒫᑲ, ᑳ ᐋᔮᒋᒃ ᐊᓂᐃ ᓂᔂᔅ ᐳᑖᒋᑲᓇ, ᑮ ᐙᐌᓕᐗᒃ ᑭᒋ ᑭᑐᑖᒋᒃ᙮

7ᐊᓇ ᓃᔥᑕᒻ ᐁᓐᒐᓐ ᒫᑲ ᑮ ᑭᑐᑕᐤ, ᐁᑯ ᒫᑲ ᐱᐁᒋᐸᓕᒃ ᓭᓭᑲᓐ ᓀᔥᑕ ᐃᔥᑯᑌᐤ ᑭᓕᑲᐤ ᒥᑯᒃ, ᐊᔅᑮᒃ ᒫᑲ ᑮ ᐃᔑ ᐌᐱᓂᑳᑌᐗ: ᓂᔅᑡᐤ ᐃᓕᑯᒃ ᒫᑲ ᒥᔅᑎᑾᒃ ᑮ ᒑᑳᔅᑭᓱᐗᒃ, ᓀᔥᑕ ᒥᓯᐌ ᐅᓵᐗᔅᑯᔑᔭ ᑮ ᒑᑳᔅᑭᑌᐗ᙮

8ᐊᓇ ᓂᔓ ᐁᓐᒐᓪ ᒫᑲ ᑮ ᑭᑐᑕᐤ, ᐁᑯ ᒫᑲ ᑖᐱᔅᑯᒡ ᑭᒋ ᐗᒋ ᐁ ᐸᓯᑌᒃ ᐎᐁᐱᓂᑳᑌᒃ ᑭᒋᑲᒦᒃ; ᓂᔅᑡᐤ ᐃᓕᑯᒃ ᒫᑲ ᑭᒋᑲᒥ ᑮ ᐊᑎ ᒥᑯᐗᓐ᙮ 9ᓀᔥᑕ ᓂᔅᑡᐤ ᐃᓕᑯᒃ ᐊᓂᑭ ᐅᔑᐋᑲᓇᒃ ᑭᒋᑲᒥᒃ ᑳ ᐃᑖᒋᒃ, ᓀᔥᑕ ᑳ ᐱᒫᑎᓯᒋᐤ ᑮ ᓂᐱᐗᒃ; ᓂᔅᑡᐤ ᐃᓕᑯᒃ ᓀᔥᑕ ᓈᐱᒀᓇ ᑮ ᓂᔑᐗᓈᑕᓋ᙮

10ᐊᓇ ᓂᔅᑐ ᐁᓐᒐᓪ ᒫᑲ ᑮ ᑭᑐᑕᐤ, ᑭᒋ ᐊᒐᒃ ᒫᑲ ᑭᔑᑯᒃ ᑮ ᐅᒋ ᐸᑭᔑᓐ, ᐁ ᐸᓯᓱᑦ ᑖᐱᔅᑯᒡ ᐙᔅᑌᓇᒫᑲᓐ, ᑮ ᐸᑭᔑᓐ ᒫᑲ ᓂᔅᑡᐤ ᐃᓕᑯᒃ ᓯᐱᔭ, ᓀᔥᑕ ᐁ ᒫᒧᔅᑭᒋᐗᑭ ᓂᐱᔭ᙮ 11ᐊᓇ ᐊᒐᒃ ᒫᑲ ᒧᑌᐤ ᑮ ᐃᔑᓂᑳᓱ: ᓂᔅᑡᐤ ᐃᓕᑯᒃ ᒫᑲ ᓂᐱᔭ ᑮ ᐊᑎ ᒧᑌᐗᓋ ᒥᒉᑦ ᐃᓕᓕᐗᒃ ᒫᑲ ᓂᐱᔭ ᑮ ᐅᒋ ᓂᐱᐗᒃ, ᐁ ᐎᓴᑳᑲᒥᑭ᙮

12ᐊᓇ ᓀᐤ ᐁᓐᒐᓚ ᒫᑲ ᑮ ᑭᑐᑕᐤ, ᓂᔅᑡᐤ ᐃᓕᑯᒃ ᐱᓯᒻ ᒫᑲ ᑮ ᐸᑲᒪᐗᐤ, ᓀᔥᑕ ᓂᔅᑡᐤ ᐃᓕᑯᒃ ᑎᐱᔅᑭᐱᓯᒻ, ᓀᔥᑕ ᓂᔅᑡᐤ ᐃᓕᑯᒃ ᐁ ᐃᑕᓯᒋᒃ ᐊᒐᑯᔑᒃ; ᓂᔅᑡᐤ ᐃᓕᑯᒃ ᒫᑳ ᑮ ᐗᓂᑎᐱᔅᑭᓯᐗᒃ; ᐁ ᑭᔑᑳᒃ ᒫᑲ ᓂᔅᑡᐤ ᐃᓕᑯᒃ ᓇᒪᐎᓚ ᑮ ᐙᔅᑌᐤ, ᐁᑯ ᑖᐱᔅᑯᒡ ᓀᔥᑕ ᑳ ᐃᔑᓈᑾᒃ ᐁ ᑎᐱᔅᑳᒃ᙮

13ᓂ ᑮ ᐙᐸᑌᓐ ᒫᑲ, ᓂ ᑮ ᐯᑕᐗᐤ ᒫᑲ ᐯᔭᒃ ᐁᓐᒐᓪ ᐁ ᔖᐳᓛᑦ ᑭᔑᑯᒃ, ᐁ ᐃᑗᑦ, ᐁ ᑭᔗᐌᑦ, ᑲᒀᑕᑭᓯᐗᒃ, ᑲᒀᑕᑭᓯᐗᒃ, ᑲᒀᑕᑭᓯᐗᒃ ᐊᓂᑭ ᑳ ᑕᔑᑫᒋᒃ ᐊᔅᑮᒃ, ᐊᓂᐃ ᐅᒋ ᑫ ᐃᔑ ᓄᑖᑾᓂᓕᑭ ᐅ ᐳᑖᒋᑲᓂᐙᐗ ᐊᓂᑭ ᓂᔅᑐ ᐁᓐᒐᓚᒃ ᐁᔥᑾ ᑫ ᑭᑐᑖᒋᒃ!