Search form

ᕈᒪᓇ 11

ᑭᒋᒪᓂᑐ ᐁ ᔖᐌᓕᒫᑦ ᐃᔅᕃᐃᓚ

1ᓂᑦ ᐃᑣᓐ ᒫᑲ, ᑭᒋᒪᓂᑐ ᓈ ᑮ ᐌᐱᓀᐤ ᐅᑦ ᐃᓕᓕᒪ? ᓇᒪᐎᓚ ᑲᑕ ᐎ ᐃᑭᓐ᙮ ᐌᓴ ᓂᓚ ᓀᔥᑕ ᓂᑦ ᐃᔅᕃᐃᓪᑎᐎᓐ, ᐁᑉᕃᐋᒻ ᐅ ᓯᒥᓇ ᑳ ᐅᒋᔮᓐ, ᐁ ᐗᓂᔅᑫ ᐅᑦ ᐊᐙᔑᒥᔑᑦ ᐯᓐᒋᒥᓐ᙮ 2ᑭᒋᒪᓂᑐ ᓇᒪᐎᓚ ᑮ ᐌᐱᓀᐤ ᐅᑦ ᐃᓕᓕᒪ ᐊᓂᐃ ᑳ ᑮ ᓂᑳᓂᑭᔅᑫᓕᒫᑦ᙮ ᓇᒪ ᓈ ᑭ ᑭᔅᑫᓕᑌᓇᐗᐤ ᑖᓐ ᐁᑗᒪᑲᒃ ᐅᒪᓯᓇᐃᑫᐎᓂᒃ ᐃᓛᐃᒐ? ᐁ ᑮ ᐃᔑ ᐋᔭᒥᐁᔅᑕᐙᐧ ᑭᒋᒪᓂᑐᐗ ᐃᔅᕃᐃᓚ ᐁ ᒫᒥᔑᒫᑦ, ᐁ ᐃᑗᑦ, 3ᑌᐯᓕᒋᑫᔭᓐ, ᑮ ᓂᐸᐁᐗᒃ ᑭᑦ ᐅᑭᔅᑭᐙᐃᑫᒪ, ᓀᔥᑕ ᑮ ᓂᒋᐌᐸᐊᒶᒃ ᑭ ᐸᑭᒋᑲᓈᐱᔅᑯᒪ; ᓂᓚ ᒫᑲ ᐱᑯ ᓂᑦ ᐃᔥᑯᐸᓕᓐ, ᓀᔥᑕ ᓈᓇᑕᐌᓕᑕᒶᒃ ᓂ ᐱᒫᑎᓯᐎᓂᓕᐤ᙮ 4ᒫᑲ ᑫᒀᓐ ᐁᑎᑰᑦ ᑭᒋᒪᓂᑐᐗ ᐁ ᓇᔥᑴᐗᔑᐃᑯᑦ? ᓂ ᑮ ᐃᔥᑯᓇᒫᓱᓐ ᓂᔀᔀᐤ ᑭᒋᒥᑖᑐᒥᑕᓇᐤ ᐃᓕᓕᐗᒃ, ᐁᑳ ᑳ ᑮ ᐅᒋ ᐅᒋᒋᑾᓇᐱᔅᑕᐙᒋᒃ ᐁ ᒪᓯᓕᓕᑳᓯᓕᒋ ᐯᐊᓐ᙮ 5ᐁᑯ ᒬᒋ ᐊᓄᒡ ᐃᔅᐸᓕᐤ ᐁ ᐃᑖᒋᒃ ᐁ ᐃᔥᑯᐸᓕᒋᒃ ᐁ ᐃᑕᔅᑌᓕᒃ ᔕᐌᓕᒋᑫᐎᓂ ᐗᐌᓛᐸᒥᐌᐎᓐ᙮ 6ᑮᔥᐱᓐ ᒫᑲ ᔕᐌᓕᒋᑫᐎᓂᒃ ᐅᒋ, ᐁᑯ ᐁᑳ ᑫᔮᐸᒡ ᐊᑑᔅᑫᐎᓂᒃ ᐅᒋ; ᐹᑳᓐ ᐃᔑ ᔕᐌᓕᒋᑫᐎᓐ ᓇᒪᐎᓚ ᑫᔮᐸᒡ ᔕᐌᓕᒋᑫᐎᓂᐗᓐ᙮ ᒫᑲ ᑮᔥᐱᓐ ᐊᑑᔅᑫᐎᓂᒃ ᐅᒋ, ᐁᑯ ᐁᑳ ᑫᔮᐸᒡ ᔕᐌᓕᒋᑫᐎᓂᒃ ᐅᒋ; ᐸᑳᓐ ᐃᔑ ᐊᑑᔅᑫᐎᓐ ᓇᒪᐎᓚ ᑫᔮᐸᒡ ᐊᑑᔅᑫᐎᓂᐗᓐ᙮

7ᑫᒀᓐ ᒫᑲ? ᐃᔅᕃᐃᓪ ᓇᒪᐎᓚ ᑮ ᒥᓛᑲᓂᐎᐤ ᐊᓂᐁᓕᐤ ᑳ ᓈᓇᑕᐌᓕᑕᒃ: ᒫᑲ ᐊᓂᑭ ᑳ ᑮ ᐙᐌᓛᐸᒫᑲᓂᐎᒋᒃ ᑮ ᒥᓛᑲᓂᐎᐗᒃ, ᑯᑕᑭᔭᒃ ᒫᑲ ᓇᒪᐎᓚ ᑮ ᐋᐱᐗᒃ᙮ 8ᒬᒋ ᐁ ᐃᑕᓯᓇᐃᑳᑌᒃ, ᑭᒋᒪᓂᑐ ᑮ ᒥᓓᐤ ᓇᐹᐎ ᐊᒑᑾ, ᒥᔅᑭᔑᑾ ᐁᑳ ᑭᒋ ᐙᐱᓕᒋ, ᓀᔥᑕ ᒥᑕᐗᑳᔭ ᐁᑳ ᑭᒋ ᐯᑕᑭᒃ; ᐱᓕᔥ ᐊᓄᒡ ᑳ ᑭᔑᑳᒃ᙮ 9ᑌᐱᑦ ᓀᔥᑕ ᐃᑗᐤ, ᐁᑯᔑ ᐅ ᒥᒋᓯᓈᑎᑯᐗᐤ ᑲᑕ ᓇᒀᑲᓂᐗᓂᓕᐤ, ᓀᔥᑕ ᐗᓇᐃᑲᓂᐗᓂᓕᐤ, ᓀᔥᑕ ᐱᔓᓯᓄᐎᓂᓕᐤ, ᓀᔥᑕ ᑭᒋ ᑎᐸᐊᒫᑯᓯᐎᒋᒃ: 10ᐁᑯᔑ ᐅᔅᑭᔑᑯᐗᐗ ᑲᑕ ᐗᓂᑎᐱᔅᑳᓕᐗ, ᐁᑳ ᑭᒋ ᐙᐱᒋᒃ, ᓀᔥᑕ ᑳᑭᑫ ᑭᒋ ᐙᑭᐱᔅᑾᓀᒋᒃ᙮

11ᓂᑦ ᐃᑣᓐ ᒫᑲ, ᑮ ᐱᔓᓯᓋᒃ ᓈ ᑭᒋ ᐸᑭᔑᑭᒃ? ᓇᒪᐎᓚ ᑲᑕ ᐎ ᐃᑭᓐ: ᒫᑲ ᐊᐙᓯᑌ ᐅ ᐸᑭᔑᓂᐎᓂᐗᐤ ᐅᒋ ᐱᒫᒋᐃᐌᐎᓂᓕᐤ ᑮ ᐅᑎᑎᑯᐗᒃ ᒉᓐᑖᐃᓚᒃ, ᑭᒋ ᐅᒋ ᐅᑌᓕᑕᒥᐋᑲᓂᐎᒋᒃ᙮ 12ᑮᔥᐱᓐ ᒫᑲ ᐅ ᐸᑭᔑᓂᐎᓂᐗᐤ ᐅᒋ ᐌᓗᑕᒃ ᐊᔅᑭ, ᓀᔥᑕ ᐅ ᐗᓂᔑᓄᐎᓂᐗᐤ ᐅᒋ ᐁᓗᑎᓯᓕᒋ ᒉᓐᑖᐃᓚ; ᑖᓐ ᐃᔥᐱᔥ ᐊᐙᓯᑌ ᐅ ᐌᓗᑎᓯᐎᓂᐗᐤ?

ᐅᐱᒫᒋᐃᐌᐎᓂᐗᐤ ᒉᓐᑖᐃᓚᒃ

13ᐌᓴ ᑭᑦ ᐗᔭᒥᐃᑎᓇᐗᐤ ᑭᓚᐗᐤ ᒉᓐᑖᐃᓕᑐᒃ, ᐎᓚ ᓂᓚ ᐁ ᐅᑦ ᐊᐸᔅᑕᓕᒥᒥᒋᒃ ᒉᓐᑖᐃᓚᒃ, ᓂ ᑭᔅᑌᓕᑌᓐ ᓂᑦ ᐊᑑᔅᑫᐎᓐ: 14ᑮᔥᐱᓐ ᓈᓐᑕᐤ ᐃᔑ ᑭᒋ ᔑᑭᐊᑭᒃ ᑭᒋ ᐸᔅᑭᓛᑫᒋᒃ ᐊᓂᑭ ᐌᑐᑌᒥᔮᓐ, ᓀᔥᑕ ᐋᑎ ᑭᒋ ᐃᔑ ᐱᒫᒋᐊᑭᒃ᙮ 15ᐌᓴ ᑮᔥᐱᓐ ᐁ ᐌᐱᓈᑲᓂᐎᒋᒃ ᐅᒋ ᐙᑯᑖᓂᐗᒃ ᐊᔅᑭ, ᑫᒀᓐ ᑫ ᐃᑭᒃ ᐅᑎᓈᑲᓂᐎᑡᐎ, ᐱᑯ ᐱᒫᑎᓯᐎᓐ ᐅᓂᐱᐗ ᐅᒋ?

16ᐌᓴ ᑮᔥᐱᓐ ᑳ ᓂᔥᑕᒻ ᒥᓂᔑᐗᑭ ᐯᓓᑲᓄᑴ, ᒥᓯᐌ ᐳᓓᑲᓐ: ᑮᔥᐱᓐ ᒫᑲ ᐅᒉᐱᒃ ᐯᓓᑭᓯᑴ, ᐁᑯ ᓀᔥᑕ ᑖᐱᔅᑯᒡ ᐗᑎᑾᓇ᙮ 17ᑮᔥᐱᓐ ᒫᑲ ᐋᑎᑦ ᐗᑎᑾᓇ ᓈᑡᐸᓕᑾᐎ, ᑭᓚ ᒫᑲ ᐱᑾᒋ ᐊᓕᑉ ᒥᔅᑎᒃ, ᐁᑯᑕ ᑭ ᑮ ᑭᓕᑲᐎᐗᑯᑳᑎᑲᐎᔭᓐ, ᐊᓯᒋ ᒫᑲ ᐁᐗᑾᓂᐃ ᐅᑎᓇᒪᓐ ᐅᒉᐱᒃ ᓀᔥᑕ ᐁ ᐃᔑ ᐎᓕᓗᑦ ᐊᓇ ᐊᓕᑉ ᒥᔅᑎᒃ; 18ᐁᑳᐎᓚ ᑲᑭᒋᒧᑐᑕ ᐗᑎᑾᓇ᙮ ᒫᑲ ᑮᔥᐱᓐ ᑲᑭᒋᒧᔭᓀ, ᓇᒪᐎᓚ ᑭᓚ ᑳ ᐱᒥᑭᑖᔭᓐ ᐅᒉᐱᒃ, ᒫᑲ ᐅᒉᐱᒃ ᑭᓚ ᑭ ᐱᒥᑭᐃᑯᓐ᙮

19ᑭ ᑳ ᐃᑣᓐ ᒫᑲ, ᐗᑎᑾᓇ ᑮ ᓈᑣᐸᓕᑖᓂᐗᓋ, ᓂᓚ ᑭᒋ ᐊᑯᒧᐃᑳᐎᔮᓐ᙮ 20ᐁᐁ; ᐗᓉᔦᓕᑕᒧᐎᓐ ᑮ ᐅᒋ ᓈᑣᐸᓕᑖᓂᐗᓋ; ᑭᓚ ᒫᑲ ᑖᐺᔦᓕᑕᒧᐎᓐ ᑭᑦ ᐅᒋ ᓂᐸᐎᓐ᙮ ᐁᑳᐎᓚ ᐎ ᑭᔅᑌᓕᒥᑎᓱ, ᒫᑲ ᓇᓂᒋ: 21ᑮᔥᐱᓐ ᑭᒋᒪᓂᑐ ᐁᑳ ᑮ ᒪᓈᒋᑖᑦ ᐃᓚᑐ ᐗᑎᑾᓇ, ᔮᒀᒥᓯ ᒫᔅᑯᒡ ᑭᓚ ᓀᔥᑕ ᓇᒪᐎᓚ ᑭ ᑳ ᒪᓈᒋᐃᒃ᙮ 22ᑲᓇᐙᐸᑕᒻ ᒫᑲ ᐅ ᒥᓨᑎᓯᐎᓐ ᓀᔥᑕ ᐅᑦ ᐊᒀᑎᓯᐎᓐ ᑭᒋᒪᓂᑐ: ᐊᓂᐃ ᑳ ᑮ ᐸᑭᔑᓂᓕᒋ, ᐊᒀᑎᓯᐎᓂᓕᐤ; ᒫᑲ ᑭᓚ, ᒥᓨᑎᓯᐎᓐ, ᑮᔥᐱᓐ ᒧᔕᒃ ᐃᑕᐗᑌ ᐅ ᒥᓨᑎᓯᐎᓂᒃ; ᑮᔥᐱᓐ ᒫᑲ ᐁᑳ ᑭᓚ ᓀᔥᑕ ᑭ ᑳ ᑭᔥᑲᑕᐅᑲᐎᓐ᙮ 23ᐎᓚᐗᐤ ᓀᔥᑕ, ᑮᔥᐱᓐ ᐁᑳ ᑫᔮᐸᒡ ᐃᑖᑡᐌ ᐋᓉᔦᓕᑕᒧᐎᓂᒃ, ᑲᑕ ᑭᑲᒧᐋᐗᒃ; ᐌᓴ ᑭᒋᒪᓂᑐ ᑲᔥᑭᑕᐤ ᒥᓇ ᑭᒋ ᑭᑲᒧᐋᑦ᙮ 24ᐌᓴ ᑮᔥᐱᓐ ᑭᓚ ᐱᑾᒋ ᐊᓕᑉ ᒥᔅᑎᑯᒃ ᑭ ᑮ ᐅᒋ ᒪᓂᑲᐅᑲᐎᔭᓐ ᐊᓂᒪ ᐅᒋᑕᐤ ᑳ ᐱᑾᑕᑎᑯᐗᒃ, ᓀᔥᑕ ᑮ ᑭᑲᒧᐃᑲᐎᔭᓐ ᐁ ᐃᔑ ᐁᑳ ᓇᐃᐸᓕᒃ ᒥᓗ ᐊᓕᑉ ᒥᔅᑎᑯᒃ: ᑖᓐ ᐁᔅᐱᒋ ᐊᐙᓯᑌ ᐊᓂᐃ ᐃᓚᑐ ᐗᑎᑾᓇ ᑭᒋ ᐃᔑ ᓇᐃᑭᑲᒧᑖᓂᐗᑭ ᑎᐱᓚᐌ ᐊᓕᑉ ᒥᔅᑎᑯᒃ?

ᑭᒋᒪᓂᑐ ᑭᔐᐗᑐᑕᐌᐤ ᒥᓯᐌ ᐊᐌᓂᑳᓇ

25ᐌᓴ ᓇᒪᐎᓚ ᓂ ᓇᑕᐌᓕᑌᓐ, ᓂᒋᔖᓂᑐᒃ, ᐁᑳ ᑭᒋ ᑭᔅᑫᓕᑕᒣᒃ ᐅᒪ ᑳᒋ ᑫᒀᓐ, ᐁᑳ ᑭᒋ ᑲᑫᑕᐌᓕᑕᒣᒃ ᑎᐱᓚᐌ ᑭᑦ ᐃᑌᓕᑕᒧᐎᓂᐙᒃ; ᓇᒪᐙᐱᐎᓂᓕᐤ ᐸᔅᑭ ᐁ ᑮ ᐅᑎᑎᑯᑦ ᐃᔅᕃᐃᓪ, ᐹᑎᒫ ᐅᑎᒋᐸᓕᓕᑫ ᐅ ᐌᓗᑎᓯᐎᓂᐗᐤ ᒉᓐᑖᐃᓚᒃ᙮ 26ᐁᑯ ᒫᑲ ᒥᓯᐌ ᐃᔅᕃᐃᓪ ᑫ ᐱᒫᒋᐋᑲᓂᐎᒋᒃ: ᐁ ᐃᑕᓯᓇᐱᑳᑌᒃ, ᓴᐃᐊᓂᒃ ᑲᑕ ᐯᒋ ᐅᑐᑌᐤ ᐅᐱᒫᒋᐃᐌᐤ, ᓀᔥᑕ ᑲᑕ ᐃᑲᑌᓇᒻ ᒪᒑᑎᓯᐎᓂᓕᐤ ᒉᑲᐱᒃ ᐅᒋ: 27ᐌᓴ ᐁᐗᑯ ᓂ ᓇᔅᑯᒥᑐᐎᓐ ᑳ ᐃᔑ ᓇᔅᑯᒪᑭᒃ, ᐃᔅᐱ ᑫ ᐃᑲᑌᓇᒶᒃ ᐅ ᒪᒋᑐᑕᒧᐎᓂᐙᐗ᙮ 28ᐁ ᐃᑌᓕᑖᑾᒃ ᒥᓗᐋᒋᒧᐎᓐ, ᑭᓚᐗᐤ ᐅᒋ, ᐅᐸᒀᔑᐃᐌᐎᐗᒃ: ᒫᑲ ᐁ ᑎᐹᑐᒋᑳᑌᒃ ᐙᐌᓛᐸᒥᐌᐎᓐ, ᓵᑭᐋᑲᓂᐎᐗᒃ ᐅᑖᐎᐙᐗ ᐅᒋ᙮ 29ᐌᓴ ᐅ ᒥᓕᐌᐎᓇ ᓀᔥᑕ ᐅ ᓇᑐᒥᐌᐎᓐ ᑭᒋᒪᓂᑐ ᓇᒪᐎᓚ ᑴᔅᑭᐸᓕᓕᐤ᙮ 30ᐌᓴ ᑖᐱᔅᑯᒡ ᐅᑖᓈᒃ ᑳ ᑮ ᐃᔑ ᐁᑳ ᑖᐺᑕᐌᑯᐸᓐ ᑭᒋᒪᓂᑐ, ᐁᓕᐌᒃ ᒫᑲ ᐊᓄᒡ ᐁ ᑮ ᒥᓕᑳᐎᔦᒃ ᔕᐌᓕᒋᑫᐎᓐ ᐅᑦ ᐋᓉᔦᓕᑕᒧᐎᓂᐗᐤ ᐅᒋ: 31ᐁᑯ ᑖᐱᔅᑯᒡ ᐅᑯ ᓀᔥᑕ ᐁᑳ ᑳ ᐃᔑ ᑖᐺᑕᑭᒃ, ᑭᓚᐗᐤ ᑭ ᔕᐌᓕᒥᑯᓯᐎᓂᐗᐤ ᐅᒋ ᐎᓚᐗᐤ ᐊᓯᒋ ᑭᒋ ᒥᓛᑲᓂᐎᒋᒃ ᔕᐌᓕᒋᑫᐎᓂᓕᐤ᙮ 32ᐌᓴ ᑭᒋᒪᓂᑐ ᒥᓯᐌ ᐁ ᐃᑕᓯᓕᒋ ᑮ ᐃᑕᑭᒣᐤ ᐋᓉᔦᓕᑕᒧᐎᓂᒃ, ᑭᒋ ᑮ ᔕᐌᓕᒫᑦ ᒥᓯᐌ᙮

ᑭᒋᒪᓂᑐ ᒫᒥᒋᒫᑲᓂᐎᐤ

33ᐙ ᑎᐱᔮᓕᒃ ᐁ ᐃᔑ ᐌᓗᑕᓂᓕᒃ ᐅ ᑲᑫᑕᐌᓕᑕᒧᐎᓐ ᓀᔥᑕ ᐅ ᑭᔅᑫᓕᑕᒧᐎᐤ ᑭᒋᒪᓂᑐ! ᑖᐺ ᓇᒪᐎᓚ ᑲᑕ ᑮ ᓈᓇᑕᐙᐸᒋᑳᑌᓕᐤ ᐅ ᑎᐹᔅᑯᓂᑫᐎᓇ, ᓀᔥᑕ ᐅᑦ ᐃᔑᑣᐎᓇ ᓇᒪᐎᓚ ᑲᑕ ᑮ ᑌᐱ ᒥᔅᑲᐙᒋᑳᑌᓕᐤ! 34ᐌᓴ ᐊᐌᓇ ᑳ ᑮ ᑭᔅᑫᓕᑕᒸᑦ ᐅ ᒥᑐᓀᓕᒋᑲᓂᓕᐤ ᐅᑎᐯᓕᒋᑫᐗ? ᓀᔥᑕᐱᑯ ᐊᐌᓇ ᑳ ᑮ ᑲᑫᔅᑭᒫᑦ? 35ᓀᔥᑕᐱᑯ ᐊᐌᓇ ᓃᔥᑕᒻ ᑳ ᑮ ᒥᓛᑦ ᑫᒀᓕᐤ, ᐁᑯ ᒥᓇ ᑫ ᑎᐸᐊᒫᐙᑲᓂᐎᑦ? 36ᐌᓴ ᐎᓚ ᐅᒋᐸᓕᐗ, ᓀᔥᑕ ᐎᓚ ᐅᒋ, ᓀᔥᑕ ᐎᓚ ᑭᒋ ᐋᔮᑦ, ᐃᑕᒀᓋ ᒥᓯᐌ ᑫᒀᓇ: ᑲᑕ ᐎ ᐋᔭᐤ ᒫᑲ ᑭᔅᑖᒋᒥᑯᓯᐎᓂᓕᐤ ᑳᑭᑫ᙮ ᐁᒣᓐ᙮