Search form

ᕈᒪᓇ 14

ᐁᑳᐎᓚ ᑎᐹᔥᑯᓐ ᑮᒋ ᐃᓕᓕᐤ

1ᐊᓇ ᑳ ᓕᓚᒥᓰᑦ ᑖᐺᔦᓕᑕᒧᐎᓂᒃ ᐅᑎᓂᒃ, ᒫᑲ ᐁᑳ ᐁ ᑎᐹᔅᑯᓇᒬᒃ ᐅ ᑶᑕᐎ ᐃᑌᓕᑕᒧᐎᓇ᙮ 2ᐌᓴ ᐯᔭᒃ ᐊᐌᓇ ᑖᐺᑕᒻ ᑭᒋ ᑮ ᒥᒋᑦ ᒥᓯᐌ ᑫᒀᓇ; ᑯᑕᒃ ᐊᐌᓇ, ᑳ ᓕᓚᒥᓰᑦ, ᓂᑖᐎᑭᑖᑲᓂᔕ ᒥᒋᐤ᙮ 3ᐁᑯᔑ ᐁᑳᐎᓚ ᐊᓇ ᑳ ᒥᒋᑦ ᑲᑕ ᐋᑕᐌᓕᒣᐤ ᐊᓂᐃ ᐁᑳ ᑳ ᒥᒋᓕᒋ; ᐁᑯᔑ ᓀᔥᑕ ᐊᓇ ᐁᑳ ᑳ ᒥᒋᑦ ᑲᑕ ᑎᐹᔅᑯᓀᐤ ᐊᓂᐃ ᑳ ᒥᒋᓕᒋ: ᐌᓴ ᑮ ᐅᑎᓂᑯ ᑭᒋᒪᓂᑐᐗ᙮ 4ᐊᐌᓇ ᑭᓚ ᑳ ᑎᐹᔅᑯᓂᒪᑦ ᑯᑕᒃ ᐃᓕᓕᐤ ᐅᑦ ᐊᑑᔅᑫᓛᑲᓂᒪ? ᑎᐱᓚᐌ ᐅᑦ ᐅᑭᒫᒪ ᐅᒋ ᓂᐸᐎᐤ ᓀᔥᑕ ᐸᑭᔑᓐ, ᐁᐁ, ᑲᑕ ᓯᑐᓇᐤ: ᐌᓴ ᑭᒋᒪᓂᑐ ᑲᔥᑭᑕᐤ ᑭᒋ ᓂᐸᐎᐋᑦ᙮

5ᐯᔭᒃ ᐃᓕᓕᐤ ᐊᐙᓯᑌ ᑭᔅᑌᓕᑕᒻ ᐯᔭᒃ ᐁ ᑭᔑᑳᓕᒃ ᐃᔥᐱᔥ ᑯᑕᑭᓕᐤ: ᒫᑲ ᑯᑕᒃ ᒥᓯᐌ ᑕᑐ ᑭᔑᑳᓕᐤ ᑖᐱᔅᑯᒡ ᐃᔑ ᑭᔅᑌᓕᑕᒻ᙮ ᐁᑯᔑ ᒥᓯᐌ ᑕᑐ ᐃᓕᓕᐤ ᒥᑐᓂ ᑲᑕ ᑫᒋᓇᐅ ᑎᐱᓚᐌ ᐅ ᒥᑐᓀᓕᒋᑲᓇᒃ᙮ 6ᐊᓇ ᑳ ᐹᐱᔅᑫᓕᑕᒃ ᐁ ᑭᔑᑳᓕᒃ, ᐹᐱᔅᑫᓕᑕᒪᐌᐤ ᐅᑎᐯᓕᒋᑫᐗ; ᐊᓇ ᓀᔥᑕ ᐁᑳ ᑳ ᐹᐱᔅᑫᓕᑕᒃ ᐁ ᑭᔑᑳᓕᒃ, ᓇᒪᐎᓚ ᐹᐱᔅᑫᓕᑕᒪᐌᐤ ᐅᑎᐯᓕᒋᑫᐗ᙮ ᐊᓇ ᑳ ᒥᒋᓱᑦ, ᒥᒋᓱᔅᑕᐌᐤ ᐅᑎᐯᓕᒋᑫᐗ, ᐌᓴ ᓇᓈᔅᑯᒣᐤ ᑭᒋᒪᓂᑐᐗ; ᐊᓇ ᓀᔥᑕ ᐁᑳ ᑳ ᒥᒋᓱᑦ, ᓇᒪᐎᓚ ᒥᒋᓱᔅᑕᐌᐤ ᐅᑎᐯᓕᒋᑫᐗ, ᓀᔥᑕ ᓇᓈᔅᑯᒣᐤ ᑭᒋᒪᓂᑐᐗ᙮ 7ᐌᓴ ᓇᒪᐎᓚ ᐊᐌᓇ ᐁ ᐃᑕᔑᔭᒃ ᐱᒫᑎᓰᔅᑖᓱ, ᓇᒪ ᓀᔥᑕ ᐊᐌᓇ ᓂᐳᔅᑖᓱ᙮ 8ᐌᓴ ᑮᔥᐱᓐ ᐯᒫᑎᓯᐗᑴ, ᑭ ᐱᒫᑎᓰᔅᑕᐙᓈᓇᐧ ᐅᑎᐯᓕᒋᑫᐤ, ᓀᔥᑕ ᑮᔥᐱᓐ ᓀᐱᐗᑴ, ᑭ ᓂᐳᔅᑕᐙᓈᓇᐤ ᐅᑎᐯᓕᒋᑫᐤ: ᐁᐗᑯ ᐅᒋ, ᑮᔥᐱᓐ ᐯᒫᑎᓯᐗᑴ ᓀᔥᑕᐱᑯ ᓀᐱᐗᑴ, ᑭ ᑎᐯᓕᒥᑯᓇᐤ ᐅᑎᐯᓕᒋᑫᐤ᙮ 9ᐌᓴ ᐅᒪ ᐅᒋ ᙭ ᑮ ᓂᐱᐤ, ᓀᔥᑕ ᑮ ᐗᓂᔥᑲᐤ, ᓀᔥᑕ ᑮ ᑭᐌᐱᒫᑎᓯᐤ, ᑭᒋ ᐅ ᑎᐯᓕᒋᑫᒥᑯᑦ ᑳ ᓂᐱᓕᒋ ᓀᔥᑕ ᑳ ᐱᒫᑎᓯᓕᒋ᙮ 10ᒫᑲ ᑖᓀᑭ ᐌᒋ ᑎᐹᔅᑯᓇᑦ ᑭᒋᔖᓐ? ᓀᔥᑕ ᐱᑯ ᑖᓀᑭ ᐌᒋ ᐋᑕᐌᓕᒪᑦ ᑭᒋᔖᓐ? ᐌᓴ ᒥᓯᐌ ᐁ ᐃᑕᔑᔭᒃ ᑭ ᑳ ᐅᑎᔥᑲᐎᑳᐸᐎ ᑕᒸᓈᓇᐤ ᙭ ᐅ ᑎᐹᔅᑯᓂᑫᐎ ᐊᐱᐎᓐ᙮ 11ᐌᓴ ᐃᑕᓯᓇᐃᑳᑌᐤ, ᑖᐱᔅᑯᒡ ᐁ ᐱᒫᑎᓯᔮᓐ, ᐃᑗᐤ ᐅᑎᐯᓕᒋᑫᐤ, ᒥᓯᐌ ᑕᑐ ᒥᒋᑾᓐ ᓂ ᑳ ᐅᒋᒋᑾᓇᐱᔅᑖᑯᓐ, ᓀᔥᑕ ᒥᓯᐌ ᑕᑐ ᒥᑌᓚᓕᓕᐤ ᑲᑕ ᒫᒥᒋᒥᑯ ᑭᒋᒪᓂᑐ᙮ 12ᒥᓯᐌ ᑕᑐ ᐊᐌᓇ ᐁ ᐃᑕᔑᔭᒃ ᒫᑲ ᑲᑕ ᑎᐹᒋᒥᑎᓱᔅᑕᐌᐤ ᑭᒋᒪᓂᑐᐗ᙮

ᐁᑳᐎᓚ ᐃᑐᑕᐤ ᑮᒋ ᐃᓕᓕᐤ ᒋ ᐸᑭᔑᒃ

13ᐁᐗᑯ ᐅᒋ ᒫᑲ ᐁᑳ ᐎᓚ ᑫᔮᐸᒡ ᑎᐹᔅᑯᓂᑐᑕᐤ: ᒫᑲ ᐅᒪ ᐊᐙᓯᑌ ᑎᐹᔅᑯᓇᒧᒃ, ᐁᑳ ᐊᐌᓇ ᑭᒋ ᐊᔅᑖᑦ ᐱᔓᓯᐎᓂᓕᐤ, ᓀᔥᑕᐱᑯ ᑫᒀᓕᐤ ᑫ ᐅᒋ ᐸᑭᔑᓂᓕᒋ ᐎᒋᔖᓇ᙮ 14ᓂ ᑭᔅᑫᓕᑌᐤ, ᓀᔥᑕ ᓂ ᑫᒋᓇᐅᓐ ᐅᑎᐯᓕᒋᑫᐤ ᒋᓴᔅ ᐅᒋ, ᐁᑳ ᑫᒀᓐ ᐁ ᐃᑕᑾᒃ ᑎᐱᓚᐌ ᐁ ᒪᒉᓕᑖᑾᒃ; ᒫᑲ ᐊᓇ ᑫᒀᓕᐤ ᑳ ᒪᒉᓕᑕᒃ, ᐎᓚ ᐅᒋ ᒪᒉᓕᒀᓂᓕᐤ᙮ 15ᒫᑲ ᑮᔥᐱᓐ ᑭᒋᔖᓐ ᑲᔥᑫᓕᑕᒥᐃᑯᑦ ᑭ ᒥᒋᒥᓕᐤ, ᓇᒪᐎᓚ ᐁ ᐃᑕᔅᑌᒃ ᓵᑭᐃᑐᐎᓐ ᑭᑦ ᐃᔑ ᐱᒧᑖᓐ᙮ ᐁᑳᐎᓚ ᓂᔑᐗᓈᒋ ᑭ ᒥᒋᒻ ᐅᒋ, ᐊᓇ ᑳ ᑮ ᓂᐳᔅᑕᒫᑯᑦ ᙭ᑕ᙮ 16ᐁᑯᔑ ᒫᑲ ᐁᑳᐎᓚ ᑳ ᒥᓗᑐᑕᒣᒃ ᑲᑕ ᒪᒋ ᐋᓕᒧᒋᑳᑌᐤ; 17ᐌᓴ ᑭᒋᒪᓂᑐ ᐅᑦ ᐅᑭᒫᐎᐎᓐ ᓇᒪᐎᓚ ᒥᒋᒥᐗᓐ ᓀᔥᑕ ᒥᓂᑴᐎᓂᐗᓐ; ᒫᑲ ᑳᔭᔅᑭᑖᑎᓯᐎᓐ, ᓀᔥᑕ ᑳᔮᒣᓕᑕᒧᐎᓐ, ᓀᔥᑕ ᒥᓚᐙᑕᒧᐎᓐ ᐸᓓᑭ ᐊᒑᑯᒃ᙮ 18ᐌᓴ ᐊᓇ ᐅᐅ ᑫᒀᓇ ᑳ ᐅᒋ ᐊᑑᔅᑲᐙᑦ ᙭ᑕ, ᒥᓜᓕᒥᑯ ᑭᒋᒪᓂᑐᐗ, ᓀᔥᑕ ᓇᐁᓕᒥᑯ ᐃᓕᓕᐗ᙮

19ᐁᑯᔑ ᒫᑲ ᓄᔅᐱᓇᑖᑕᐤ ᐊᓂᐃ ᑫ ᐅᒋ ᐅᑕᑾᒃ ᑳᔮᒣᓕᑕᒧᐎᓐ, ᓀᔥᑕ ᐊᓂᐃ ᐊᐌᓇ ᑫ ᑮ ᐅᒋ ᑭᔅᑭᓄᐊᒪᐙᑦ ᑯᑕᑭᔭ᙮ 20ᐁᑳᐎᓚ ᒥᒋᒻ ᐅᒋ ᓂᔑᐗᓈᒋᑖᐙᒃ ᑭᒋᒪᓂᑐ ᐅᑕ ᐊᑑᔅᑫᐎᓐ᙮ ᒥᓯᐌ ᑫᒀᓇ ᑖᐺ ᐸᓓᑲᓋ; ᒫᑲ ᒫᓛᑕᓂᓕᐤ ᐊᓇ ᐃᓕᓕᐤ ᐁ ᓈᔦᑕᐌᓕᑕᒥᐃᐌᑦ ᐁ ᒥᒋᓱᑦ᙮ 21ᒥᓨᔑᓐ ᐁᑳ ᑭᒋ ᒥᒋᓈᓂᐗᒃ ᐎᔮᔅ, ᓀᔥᑕ ᐁᑳ ᑭᒋ ᒥᓂᒀᓂᐗᒃ ᔓᒥᓈᐳ, ᓀᔥᑕ ᓈᓐᑕᐤ ᑫᒀᓐ ᑫ ᐅᒋ ᐱᔓᓯᒃ ᑭᒋᔖᓐ, ᓀᔥᑕᐱᑯ ᑫ ᐅᒋ ᓈᔦᑕᐌᓕᑕᒃ, ᓀᔥᑕᐱᑯ ᑫ ᐅᒋ ᓕᓚᒥᐋᑲᓂᐎᑦ᙮ 22ᑭᑦ ᐊᔮᓐ ᓈ ᑖᐺᔦᓕᑕᒧᐎᓐ? ᐊᔮᔅᑕᒪᓱ ᐅᑎᔥᑲᐤ ᑭᒋᒪᓂᑐᐗ᙮ ᒥᓜᓕᑕᒻ ᐊᓇ ᐁᑳ ᑳ ᓂᔑᐗᓈᒋᒥᑎᓱᑦ ᐊᓂᐁᓕᐤ ᐅᒋ ᑳ ᐃᓕᓇᒃ᙮ 23ᐊᓇ ᒫᑲ ᑳ ᑶᑕᐎᐃᑌᓕᑕᒃ ᓂᔑᐗᓈᒋᒪᐤ ᑮᔥᐱᓐ ᒥᒋᓱᒋ, ᐌᓴ ᓇᒪᐎᓚ ᒥᒋᓱ ᑖᐺᔦᓕᑕᒧᐎᓂᒃ: ᐌᓴ ᑫᒀᓐ ᐁᑳ ᑖᐺᔦᓕᑕᒧᐎᓂᒃ ᑳ ᐅᒋᐸᓕᒃ ᒪᒋᑣᐎᓂᐗᓐ᙮