Search form

ᕈᒪᓇ 2

ᐅᑎᐹᔅᑯᓂᑫᐎᓐ

1ᐁᐗᑯ ᐅᒋ ᓇᒪᐎᓚ ᑭ ᑳ ᑮ ᑶᑕᐎᐃᑣᓐ, ᐅ ᐃᓕᓕᐤ, ᐊᐌᓇ ᐁᑐᑫ ᑳ ᑎᐹᔅᑯᓂᑫᔭᓐ: ᐌᓴ ᐃᑕ ᐌᒋ ᑎᐹᔅᑯᓇᑦ ᑯᑕᒃ, ᑭ ᓂᔑᐗᓈᒋᒥᑎᓯᓐ; ᐌᓴ ᑭᓚ ᑳ ᑎᐹᔅᑯᓂᑫᔭᓐ ᒣᒋ ᓀᔥᑕ ᐁ ᐃᔑ ᐊᔨᑐᑕᒪᓐ᙮ 2ᒫᑲ ᐎᓚ ᓂ ᑫᒋᓇᐅᓈᓐ ᐅ ᑎᐹᔅᑯᓂᑫᐎᓐ ᑭᒋᒪᓂᑐ ᐁ ᐃᔑ ᑖᐺᐎᓂᐗᓂᓕᒃ ᑭᒋ ᐃᔅᐸᓕᐃᑯᒋᒃ ᒥᓯᐌ ᕋᔅᓂᑭ ᑳ ᑐᑕᑭᒃ ᐅᐅ ᑐᐎ ᑫᒀᓇ᙮ 3ᑭᑦ ᐃᑌᓕᑌᓐ ᓈ ᐅᒪ ᒫᑲ, ᐅ ᐃᓕᓕᐤ, ᑳ ᑎᐹᔅᑯᓇᒋᒃ ᐊᓂᑭ ᐅᐅ ᑐᐎ ᑳ ᑐᑕᑭᒃ, ᑭᓚ ᓀᔥᑕ ᒬᒋ ᐁ ᐊᔨᑐᑕᒪᓐ, ᑭᒋ ᑮ ᐅᔑᑕᒶᑦ ᐅ ᑎᐹᔅᑯᓂᑫᐎᓐ ᑭᒋᒪᓂᑐ? 4ᓀᔥᑕᐱᑯ ᑭᑦ ᐋᑕᐌᓕᑕᒸᓐ ᓈ ᐁ ᐃᔑ ᐌᓗᑕᓂᓕᒃ ᐅ ᒥᓨᑎᓯᐎᓐ ᓀᔥᑕ ᐅ ᐯᑳᒑᑎᓯᐎᓐ ᓀᔥᑕ ᐅ ᔑᐱᓚᐌᓯᐎᓐ; ᐁᑳ ᐁ ᑭᔅᑫᓕᑕᒪᓐ ᑭᒋᒪᓂᑐ ᐅ ᒥᓨᑎᓯᐎᓐ ᐁ ᐃᑐᑕᐃᑯᐗᑦ ᑭᒋ ᒥᒋᓚᐌᔦᓕᑕᒪᓐ? 5ᒫᑲ ᐁ ᐃᔑ ᒪᔥᑲᐙᒃ ᓀᔥᑕ ᐁᑳ ᒥᒋᓚᐌᔦᓕᑌᐁᔭᓐ ᑭ ᒪᐗᒋᑣᓱᓐ ᐋᑯᓚᐌᓯᐎᓐ ᐱᓕᔥ ᐋᑯᓚᐌᓯᐎᓂ ᑭᔑᑳᒃ ᓀᔥᑕ ᐃᔅᐱ ᑫ ᓄᑯᑖᓂᐗᓂᓕᒃ ᑭᒋᒪᓂᑐ ᐅ ᒀᔭᔅᑯ ᑎᐹᔅᑯᓂᑫᐎᓐ; 6ᐊᓇ ᑫ ᐃᔑ ᑎᐸᐊᒪᐙᑦ ᒥᓯᐌ ᑕᑐ ᐃᓕᓕᐗ ᒬᒋ ᑳ ᐋᔨᑎᓕᒋ: 7ᐊᓂᐃ ᔑᐱᓚᐌᓯᐎᓂᒃ ᑕᑭ ᒥᓗᑐᑕᒥᓕᒋ ᐁ ᓈᓇᑕᐌᓕᑕᒥᓕᒋ ᑭᔅᑌᓕᑖᑯᓯᐎᓂᓕᐤ ᓀᔥᑕ ᑭᔅᑎᓯᐎᓂᓕᐤ ᓀᔥᑕ ᑭᒋᐱᒫᑎᓯᐎᓂᓕᐤ, ᒥᓓᐤ ᑳᑭᑫ ᐱᒫᑎᓯᐎᓂᓕᐤ: 8ᒫᑲ ᐊᓂᐃ ᑳ ᐗᑴᓕᑖᑯᓯᓕᒋ, ᐁᑳ ᓀᔥᑕ ᑳ ᓇᓇᐃᑕᒥᓕᒋ ᑖᐺᐎᓂᓕᐤ, ᒫᑲ ᑳ ᓇᓇᐃᑕᒥᓕᒋ ᒪᒑᑎᓯᐎᓂᓕᐤ, ᑎᐸᐊᒪᐌᐤ ᑭᒋᑭᓯᐙᓯᐎᓂᓕᐤ ᓀᔥᑕ ᐗᑯᓚᐌᓯᐎᓂᓕᐤ, 9ᐊᓕᒥᓯᐎᓂᓕᐤ ᓀᔥᑕ ᑲᒀᑕᑫᓕᒧᐎᓂᓕᐤ ᑲᑕ ᐅᑎᑎᑯ ᐅᑦ ᐊᒑᑯᒃ ᒥᓯᐌ ᑕᑐ ᐃᓕᓕᐤ ᑳ ᒪᒋᑐᑕᒃ, ᐊᓇ ᑳ ᒎᐎᑦ ᓃᔥᑕᒻ, ᐊᓯᒋ ᓀᔥᑕ ᐊᓇ ᑳ ᒉᓐᑖᐃᓕᐎᑦ; 10ᒫᑲ ᑭᔅᑌᓕᑖᑯᓯᐎᓂᓕᐤ, ᑭᔅᑎᓯᐎᓂᓕᐤ, ᓀᔥᑕ ᑳᔮᒣᓕᑕᒧᐎᓂᓕᐤ ᑲᑕ ᐅᑎᑎᑯ ᒥᓯᐌ ᑕᑐ ᐃᓕᓕᐤ ᑳ ᒥᓗᑐᑕᒃ, ᐊᓇ ᑳ ᒎᐎᑦ ᓃᔥᑕᒻ, ᐊᓯᒋ ᓀᔥᑕ ᐊᓇ ᑳ ᒉᓐᑖᐃᓕᐎᑦ: 11ᐌᓴ ᑭᒋᒪᓂᑐ ᓇᒪᐎᓚ ᐹᐱᑐᔥ ᐃᑕᒋᒣᐤ ᐊᐌᓕᐗ᙮

12ᐌᓴ ᑳ ᐃᑕᓯᒋᒃ ᑳ ᑮ ᒪᒋᑐᑕᑭᒃ ᐁᑳ ᐅᓚᔓᐌᐎᓂᓕᐤ ᐁ ᐋᔮᒋᒃ ᑲᑕ ᓂᔑᐗᓈᑎᓯᐗᒃ ᐁᑳ ᐅᓚᔓᐌᐎᓂᓕᐤ ᐁ ᐋᔮᒋᒃ: ᑳ ᐃᑕᓯᒋᒃ ᒫᑲ ᐅᓚᔓᐌᐎᓂᒃ ᑳ ᑮ ᒪᒋᑐᑕᑭᒃ ᑲᑕ ᑎᐹᔅᑯᓂᑯᐗᒃ ᐅᓚᔓᐌᐎᓂᓕᐤ; 13ᐌᓴ ᓇᒪᐎᓚ ᐊᓂᑭ ᑳ ᐯᑕᑭᒃ ᐅᓚᔓᐌᐎᓂᓕᐤ ᑳ ᒀᔭᔅᑭᑖᑎᓵᔅᑕᐙᒋᒃ ᑭᒋᒪᓂᑐᐗ, ᒫᑲ ᐊᓂᑭ ᑳ ᑐᑕᑭᒃ ᐅᓚᔓᐌᐎᓂᓕᐤ ᑫ ᒀᔭᔅᑭᑖᑎᓯᐋᑲᓂᐎᒋᒃ᙮ 14ᐌᓴ ᐃᔅᐱ ᒉᓐᑖᐃᓚᒃ, ᐁᑳ ᑳ ᐋᔮᒋᒃ ᐅᓚᔓᐌᐎᓂᓕᐤ, ᑎᐅᑕᑾᐎ ᐁ ᐃᑖᑎᓯᒋᒃ ᐊᓂᐃ ᐅᓚᔓᐌᐎᓂᒃ ᑳ ᐃᑕᑾᓂᓕᑭ, ᐅᑯ, ᐁᑳ ᐁ ᐋᔮᒋᒃ ᐅᓚᔓᐌᐎᓂᓕᐤ, ᐎᓚᐗᐤ ᑫᒋᐙᒃ ᐅᓚᔓᐌᐎᓂᑳᑖᓱᐗᒃ: 15ᑳ ᐙᐸᑎᓕᐌᒋᒃ ᐁ ᐃᑖᐸᑎᓯᒪᑲᓂᓕᒃ ᐅᓚᔓᐌᐎᓂᓕᐤ ᐁ ᒪᓯᓇᐃᑳᑌᓕᒃ ᐅᑌᐃᐙᒃ, ᐅ ᒥᑐᓀᓕᒋᑲᓂᐗᐤ ᐁ ᐃᑖᒋᒧᔅᑖᑯᒋᒃ, ᐅᑦ ᐃᑌᓕᑕᒧᐎᓂᐗᐗ ᒪᒦᔅᑯᒡ ᐁ ᒪᒥᔑᒥᑐᒪᑲᓂᓕᑭ ᓀᔥᑕᐱᑯ ᑳᔮᒣᓕᑕᒥᐃᑐᒪᑲᓂᓕᑭ; 16ᐊᓂᒪ ᑫ ᑭᔑᑳᒃ ᐃᔅᐱ ᑭᒋᒪᓂᑐ ᑫ ᑎᐹᔅᑯᓇᒸᑦ ᐃᓕᓕᐗ ᐅ ᑭᒧᑎᓯᐎᓂᓕᐗ ᐎᓚ ᐅᒋ ᒋᓴᔅ ᙭, ᐁ ᐃᑗᒪᑲᒃ ᓂ ᒥᓗᐋᒋᒧᐎᓐ᙮

ᒎᐗᒃ ᐊᓂᒪ ᒫᑲ ᐅᓚᔓᐌᐎᓐ

17ᒫᑎᑲ, ᒎ ᑭᑦ ᐃᔑᓂᑳᑎᑳᐎᓐ, ᓀᔥᑕ ᑭᑦ ᐊᔅᐯᓕᒧᑌᓐ ᐅᓚᔓᐌᐎᓐ, ᓀᔥᑕ ᑭᒋᒪᓂᑐ ᑭᑦ ᐅᒋ ᑲᑮᒋᒧᓐ, 18ᓀᔥᑕ ᑭ ᑭᔅᑫᓕᑕᒸᓐ ᐅᑦ ᐃᑌᓕᑕᒧᐎᓐ, ᓀᔥᑕ ᑭ ᒥᓜᓕᑌᓐ ᐊᓂᐃ ᐋᓕᐙᒃ ᑳ ᒥᓨᔑᑭ, ᐅᓚᔓᐌᐎᓂᒃ ᐁ ᑮ ᐅᒋ ᑭᔅᑭᓄᐊᒫᑲᐎᔭᓐ; 19ᓀᔥᑕ ᑭ ᑌᐱᐋᐱᔅᑌᓕᒧᓐ ᑭᓚ ᐁ ᑭᔅᑭᓄᑕᐊᒋᒃ ᐊᓂᑭ ᐁᑳ ᑳ ᐙᐱᒋᒃ, ᐁ ᐙᔅᑌᓇᒪᐗᒋᒃ ᐊᓂᑭ ᑳ ᐗᓀᑎᐱᔅᑭᓯᒋᒃ, 20ᐁ ᑭᔅᑭᓄᐊᒪᐗᒋᒃ ᐊᓂᑭ ᑳ ᑲᑫᐹᑎᓯᒋᒃ, ᐁ ᑮ ᑭᔅᑭᓄᐊᒪᐗᒋᒃ ᐅᔥᑲᐙᔑᔕᒃ, ᐁ ᐋᔮᔭᓐ ᐊᓂᒪ ᐁ ᐃᔑᓈᑾᒃ ᑭᔅᑫᓕᑕᒧᐎᓐ ᓀᔥᑕ ᑖᐺᐎᓐ ᐅᓚᔓᐌᐎᓂᒃ᙮ 21ᑭᓚ ᒫᑲ ᑳ ᑭᔅᑭᓄᐊᒪᐗᑦ ᑯᑕᒃ, ᓇᒪ ᓈ ᑭ ᑭᔅᑭᓄᐊᒪᓱᓐ? ᑭᓚ ᑳ ᑲᑫᔅᑭᒥᐌᔭᓐ ᐃᓕᓕᐤ ᐁᑳ ᑲᒋ ᑭᒧᑎᑦ, ᑭᓚ ᓈ ᑭ ᑭᒧᑎᓐ? 22ᑭᓚ ᑳ ᐃᑗᔭᓐ ᐃᓕᓕᐤ ᐁᑳ ᑭᒋ ᐱᔑᒀᑎᓰᑦ, ᑭᓚ ᓈ ᑭ ᐱᔑᒀᑎᓰᓐ? ᑭᓚ ᑳ ᐸᑳᑕᒋᒃ ᒪᓯᓕᓕᑳᓇᒃ, ᑭᓚ ᓈ ᑭ ᓂᔑᐗᓈᒋᑖᓐ ᐊᓂᒪ ᑳ ᐸᓓᑭᑖᓂᐗᒃ? 23ᑭᓚ ᐅᓚᔓᐌᐎᓐ ᑳ ᐅᒋ ᑲᑭᒋᒧᔭᓐ, ᐁ ᐱᑯᓇᒪᓐ ᓂ ᐅᓚᔓᐌᐎᓐ ᑭᑦ ᐅᒋ ᐋᑕᐌᓕᒪᐤ ᑭᒋᒪᓂᑐ? 24ᒫᓇ ᒫᑲ ᐅᑦ ᐃᔑᓂᑳᓯᐎᓐ ᑭᒋᒪᓂᑐ ᒫᒪᒋᐎᒋᑳᑌᓕᒃ ᑭᓚᐗᐤ ᐅᒋ ᒣᑴᔭᔥ ᒉᓐᑖᐃᓚ, ᐁ ᐃᑕᓯᓇᐃᑳᑌᒃ᙮

25ᐌᓴ ᑭᔅᑭᓄᐙᒋᔓᐎᓐ ᑖᐺ ᑭᑦ ᐗᐸᒋᐃᑯᓐ, ᑮᔥᐱᓐ ᑫᓇᐌᓕᑕᒪᓇ ᐅᓚᔓᐌᐎᓐ: ᒫᑲ ᑮᔥᐱᓐ ᐹᑯᓇᒪᓂ ᐅᓚᔓᐌᐎᓐ, ᑭ ᑭᔅᑭᓄᐋᒋᔓᐎᓐ ᑖᐱᔅᑯᒡ ᐁᑳ ᑭᔅᑭᓄᐙᒋᔓᐎᓐ ᐃᔑᑖᓂᐗᓐ᙮ 26ᐁᐗᑯ ᒫᑲ ᐅᒋ ᑮᔥᐱᓐ ᐊᓇ ᐁᑳ ᑳ ᑭᔅᑭᓄᐙᒋᔣᑲᓂᐎᑦ ᑫᓇᐌᓕᑕᑭ ᐁ ᐃᔑ ᒀᔭᔅᑭᑖᑎᓯᒪᑲᓂᓕᒃ ᐅᓚᔓᐌᐎᓂᓕᐤ, ᓇᒪ ᓈ ᐎᓚ ᐁᑳ ᐁ ᑭᔅᑭᓄᐙᒋᔣᑲᓂᐎᑦ ᑲᑕ ᐃᑕᑭᒪᐤ ᑖᐱᔅᑯᒡ ᐁ ᑭᔅᑭᓄᐙᒋᔣᑲᓂᐎᑦ? 27ᓇᒪ ᓈ ᓀᔥᑕ ᐊᓂᒪ ᓇᒪᑭᔅᑭᓄᐙᒋᔓᐎᓐ ᐅᒋᑕᐤ ᑳ ᐃᑭᒃ, ᑮᔥᐱᓐ ᑎᐱᑐᑕᒧᒪᑲᒃ ᐅᓚᔓᐌᐎᓐ, ᑭ ᑳ ᑎᐹᔅᑯᓂᑯᓐ, ᑭᓚ ᐁ ᐃᑕᓯᓇᐃᑳᑌᒃ ᓀᔥᑕ ᑭᔅᑭᓄᐙᒋᔓᐎᓐ ᐅᒋ, ᑳ ᐗᓉᑕᒪᓐ ᐅᓚᔓᐌᐎᓐ? 28ᐌᓴ ᓇᒪᐎᓚ ᒎᐎᐤ, ᐊᓇ ᐱᑯ ᐗᔅᑮᒡ ᑳ ᐋᐎᑦ; ᓇᒪ ᓀᔥᑕ ᑭᔅᑭᓄᐙᒋᔓᐎᓐ, ᐊᓂᒪ ᐱᑯ ᐗᔅᑮᒡ ᐎᔮᓯᒃ ᑳ ᐃᑐᒋᑳᑌᒃ: 29ᒫᑲ ᐁᐗᑯ ᑖᐺ ᒎᐎᐤ, ᐊᓇ ᐅᑎ ᐱᒋ ᐁ ᐃᔑᓈᑯᓯᑦ; ᓀᔥᑕ ᑭᔅᑭᓄᐙᒋᔓᐎᓐ ᐁᐗᑯ ᒥᑌᐃᒃ ᑳ ᐃᑐᒋᑳᑌᒃ, ᐊᒑᑯᒃ, ᓇᒪᐎᓚ ᒫᑲ ᐁ ᐃᑕᓯᓇᐃᑳᑌᒃ; ᐁᑳ ᑲ ᒫᒪᑖᑯᑕᑭᒃ ᐃᓕᓕᐗᒃ, ᒫᑲ ᐱᑯ ᑭᒋᒪᓂᑐ᙮