Search form

ᑕᐃᑕᔅ 1

1ᐹᓪ, ᐅᑦ ᐊᑑᔅᑫᓚᑲᓂᒪ ᑭᒋᒪᓂᑐ, ᓀᔥᑕ ᐅᑦ ᐊᐸᔅᑕᓕᒪ ᒋᓴᔅ ᙭, ᐁ ᐃᑕᔅᑌᓕᒃ ᐅ ᑖᐺᔦᓕᑕᒧᐎᓂᓕᐤ ᑭᒋᒪᓂᑐ ᐅ ᐙᐌᓛᐸᒫᑲᓇ, ᓀᔥᑕ ᐁ ᐎᒋᑳᑌᒃ ᐊᓂᒪ ᑖᐺᐎᓐ ᒪᓂᑐᐙᑎᓯᐎᓂᒃ ᑳ ᐃᑕᔅᑌᒃ; 2ᐁ ᐊᔅᐯᓕᒧᑐᒋᑳᑌᒃ ᑳᑭᑫ ᐱᒫᑎᓯᐎᓐ, ᐊᓂᒪ ᑭᒋᒪᓂᑐ, ᐁᑳ ᑳ ᑮ ᑭᓛᔅᑭᑦ, ᑳ ᑮ ᐊᔓᑕᒫᑫᑦ ᐸᒧᔑ ᑮ ᒫᒋ ᐊᔅᑭᐗᒃ: 3ᒫᑲ ᒣᒀᒡ ᐁ ᓇᐃᐸᓕᑭ ᐁ ᑭᔑᑳᑭ ᑳ ᑮ ᓄᑯᑖᑦ ᐅᑦ ᐋᔭᒥᐎᓐ ᑲᑫᔅᑭᒥᐌᐎᓐ ᐅᒋ, ᑳ ᐸᑭᑎᓇᒫᑲᐎᔮᓐ, ᐁ ᐃᑗᒪᑲᓂᓕᒃ ᐅ ᑲᑫᔅᑴᐎᓐ ᑭᒋᒪᓂᑐ ᑭ ᐱᒫᒋᐃᐌᒥᓇᐤ:

4ᐁ ᒪᓯᓇᐊᒪᐗᒃ ᑕᐃᑕᔅ, ᑎᐱᓚᐌ ᓂᑯᓯᔅ, ᒥᓯᐌ ᐃᔑ ᑖᐺᔦᓕᑕᒧᐎᓂᒃ: ᑭᔐᐙᑎᓯᐎᓐ ᔕᐌᓕᒋᑫᐎᓐ, ᓀᔥᑕ ᑳᔮᒣᓕᑕᒧᐎᓐ, ᑭᒋᒪᓂᑐ ᐌᐅᑕᐎᒪᐎᑦ ᐅᒋ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭ ᑭ ᐱᒫᒋᐃᐌᒥᓇᐤ᙮

ᑖᐃᑕᔅ ᐅᑕᑐᔅᑫᐎᓐ ᑲᕇᑎᒃ

5ᐁᐗᑯ ᒫᑲ ᐅᒋ ᑳ ᑮ ᓇᑲᑎᑖᓐ ᐊᓐᑕ ᒃᕆᑎᒃ, ᑭᒋ ᒀᔭᔉ ᐊᔅᑖᔭᓐ ᐊᓂᐃ ᐁᑳ ᑳ ᑮ ᑐᒋᑳᑌᑭ, ᓀᔥᑕ ᑭᒋ ᐹᑳᓂᐊᒋᒃ ᐅᓂᑳᓀᓕᑖᑯᓯᐗᒃ ᒥᓯᐌ ᑕᑐ ᐃᑖᐎᓂᒃ, ᑳ ᑮ ᐃᔑ ᐅᓚᑭᒥᑖᓐ; 6ᑮᔥᐱᓐ ᐊᐌᓇ ᐁᑳ ᒪᒋᐃᑌᓕᑖᑯᓯᑦ, ᐁ ᐅᓈᐯᒥᒥᑯᑦ ᐯᔭᒃ ᐃᔅᑴᐗ, ᐁ ᐋᔭᐙᑦ ᐁ ᒀᔭᔅᑭᑎᓕᒋ ᐊᐙᔑᔕ, ᐁᑳ ᑳ ᒪᒥᔑᒫᑲᓂᐎᓕᒋ ᐁ ᒪᒋᐋᔨᑎᓕᒋ, ᐁᑳ ᓀᔥᑕ ᐁ ᔑᐱᑕᒥᓕᒋ᙮ 7ᐌᓴ ᑭᒋᐋᔭᒥᐁᐎᑭᒪᐤ ᑲᑕ ᒥᓗᐃᑌᓕᑖᑯᓯᐤ, ᑖᐱᔅᑯᒡ ᐅ ᑲᓇᐌᓕᑎᓛᑲᓇ ᑭᒋᒪᓂᑐ: ᐁᑳ ᐁ ᐯᔭᑯᑴᓕᒥᑎᓱᑦ, ᐁᑳ ᐎᐸᒡ ᐁ ᑭᓯᐙᓯᑦ, ᐁᑳ ᐁ ᐅᓵᒥᓂᑴᑦ ᔓᒥᓈᐳ, ᐁᑳ ᐁ ᓄᑎᓂᑫᑦ, ᐁᑳ ᐁ ᓵᑭᐋᑦ ᔔᓕᐋᓇ; 8ᒫᑲ ᐁ ᑭᔐᐙᑐᑕᐙᑦ ᒫᓐᑌᐗ, ᐁ ᓵᑭᐋᑦ ᑳ ᒥᓗᑣᓕᒋ, ᐁ ᐯᑳᒡ ᐃᑖᑎᓰᑦ, ᐁ ᒀᔭᔅᑭᑎᑦ, ᐁ ᐸᓓᑭᓯᑦ, ᐁ ᑖᐱᑕᐙᑎᓰᑦ: 9ᐁ ᒥᒋᒥᓇᒃ ᑖᐺᔦᓕᑕᒧᐎ ᐋᔭᒥᐎᓂᓕᐤ ᑳ ᑮ ᐃᔑ ᑭᔅᑭᓄᐊᒪᐙᑲᓂᐎᑦ, ᑭᒋ ᑲᔥᑭᑖᑦ ᒀᔭᔉ ᑭᔅᑭᓄᐊᒫᑫᐎᓐ ᐅᒋ, ᑭᒋ ᔑᑭᒫᑦ ᓀᔥᑕ ᑭᒋ ᑲᔥᑭᒫᑦ ᐅᑖᓉᑕᒧᐗ᙮

10ᐌᓴ ᒥᒉᑎᐗᒃ ᑳ ᔑᐱᑕᑭᒃ ᓀᔥᑕ ᐸᑾᓐᑕᐤ ᑳ ᐋᔭᒥᒋᒃ, ᓀᔥᑕ ᑳ ᐙᔦᔑᐃᐌᒋᒃ, ᐅᓵᒻ ᐊᓂᑭ ᑭᔅᑭᓄᐙᒋᔓᐎᓂᒃ ᑳ ᑎᐯᓕᑖᑯᓯᒋᒃ: 11ᐅᑐᓂᐗᐗ ᑫ ᑭᐸᐃᑲᑌᓕᑭ, ᑳ ᑴᑎᐱᓇᑭᒃ ᑳ ᒥᓯᐌᔮᑭ ᐙᔅᑳᔨᑲᓇ, ᐁ ᑭᔅᑭᓄᐊᒫᑫᒋᒃ ᑫᒀᓇ ᐁᑳ ᑫ ᑮ ᑭᔅᑭᓄᐊᒫᑫᐙᔅᐸᓐ, ᒪᒋ ᐅᑎᓯᐎᓐ ᐅᒋ᙮ 12ᐯᔭᒃ ᐎᓚᐗᐤ ᐅᒋ, ᐯᔭᒃ ᑎᐱᓚᐌ ᐅ ᑭᔅᑭᐙᐃᑫᒥᐗᐗ, ᑮ ᐃᑗᐤ, ᐊᓂᑭ ᒃᕇᑖᓇᒃ ᒧᔕᒃ ᑭᓛᔅᑭᔅᑭᐗᒃ, ᒪᒋ ᐊᐌᓯᓴᒃ, ᐁ ᑳᓴᑳᑎᓯᒋᒃ᙮ 13ᑖᐺᒪᑲᓐ ᐅᒪ ᑎᐹᒋᒧᐎᓐ᙮ ᐁᐗᑯ ᐅᒋ ᓱᑲ ᑭᑐᑎᒃ, ᑭᒋ ᒪᔥᑲᐎᓯᒋᒃ ᑖᐺᔦᓕᑕᒧᐎᓂᒃ; 14ᐁᑳ ᐁ ᐹᐱᓯᔅᑫᓕᑕᑭᒃ ᒎᐎ ᐋᑕᓗᑳᓇ, ᓀᔥᑕ ᐅ ᑲᑫᔅᑴᐎᓂᓕᐗ ᐃᓕᓕᐗ ᑳ ᓇᑲᑕᒥᓕᒋ ᑖᐺᐎᓂᓕᐤ᙮ 15ᐊᓂᑭ ᑳ ᐸᓓᑭᓯᒋᒃ ᒥᓯᐌ ᑫᒀᓐ ᐸᓓᑲᓂᓕᐤ: ᒫᑲ ᐊᓂᑭ ᑳ ᐎᓂᓯᒋᒃ ᓀᔥᑕ ᐁᑳ ᑳ ᑖᐺᑕᑭᒃ ᓇᒪᐎᓚ ᑫᒀᓐ ᐸᓓᑲᓂᓕᐤ; ᒫᑲ ᐙᐙᒡ ᐅ ᒥᑐᓀᓕᒋᑲᓂᐗᐤ ᓀᔥᑕ ᐅᑌᐃᐗᐤ ᐎᓕᐸᓕᓕᐤ᙮ 16ᓂ ᑭᔅᑫᓕᒫᓈᓐ ᑭᒋᒪᓂᑐ ᐃᑗᐗᒃ, ᒫᑲ ᐅᑦ ᐊᑑᔅᑫᐎᓂᐙᒃ ᐋᓉᑕᐌᐗᒃ; ᐁ ᓂᐹᓯᓈᑯᓯᒋᒃ ᓀᔥᑕ ᐁ ᔑᐱᑕᑭᒃ, ᓀᔥᑕ ᒥᓯᐌ ᑕᑐ ᒥᓗ ᐊᑑᔅᑫᐎᓂᓕᐤ ᐸᒀᑕᒶᒃ᙮