Search form

Mateo 15

Meje yabara poxonae Jesús yabara paeba xua pebin abe pia peexanae cuiru coyene jʉntʉ coyene webocatsi

(Mr 7.1-23)

1Fariseomonae irʉ pomonae jiwi pecuidubiwi Moisés pia peitorobi coyene tatsi, barapomonae jiwana Jerusalén tomara werendena. Barapomonae Jesús imoxoyo caquita umenarʉcʉpiya yainyabatsi, jeye:

2—¿Eta xua metha jinyamonae jopa exanaeyo xua pocotsiwa wamo susato jiwi pia peitorobi cui coyenewatha itoroba? Barapomonae pomonae jinyamonae barapo cui jopa exanaeyo. Barapomonae jopa matha tsiwanaya nacobe quiateibiyo poxonae beya xaiba xua jopa penataxobinexa tsane pia jʉntʉ coyenewantha, jei daxita fariseomonae, irʉrʉ pomonae jiwi pecuidubiwi Moisés pia peitorobi coyene tatsi.

3Nexata Jesús xuya yainyaba, jeye:

—Irʉrʉ paxamdʉ, ¿eta xua metha jopa paexanaem pocotsiwa Nacom Pejume Diwesitha itoroba? ¿Eta xua metha saya meisa paexaname pocotsiwa painya amo susato jiwi pia peitorobi cui coyenewantha tatsi itoroba? 4Jopa bewa paexanaem tsane painya amo susato jiwi pia peitorobi coyenewa tatsi po peitorobi coyenewa paca tsita ainya cui bichocono beyacaincha xua Nacom Pejume Diwesi. Tsipei Nacom Pejume Diwesitha jeye: ‘Axatha barʉ cui itura jinare, irʉrʉ enatha barʉ cui itura jinare’, jei Nacom. Yawa equeicha Nacom jeye: ‘Pon paxa abe yabara paeba mataʉtano xua pena abe yabara paeba, bapon bewa tʉpaena’, jei Nacom Pejume Diwesitha. 5-6Ichitha paxam ba papaebame xua pinae pebin ba itacʉpatsi xua pepaebiwa xua pejeiwa paxatha yawa penatha: ‘Jopa neitacʉpaeyo xua tapaca cayawenaewatsi bara bequein paacopeibim, tsipei daxita pocotsiwa xeinan baxua yabara tsiwʉnae paeban xua Nacomtha bexa catsin’, xua pejeiwa. Mataʉtano ba pajam: ‘Pon bapocotsiwa paeba, jopa nantawenonaeyo xua paxa yawenaena. Mataʉta jopa nantawenonaeyo xua pena yawenaena bara bequein acopeibi taetha’, ba pajam. Poxonae baxua pacaunutsiya paebame paxam pacana exaname xua painya amo susato jiwi pia peitorobi cui coyenewa tatsi bichocono ainya cui coyene, beyacaincha xua Nacom Pejume Diwesi xua ainya cui coyene. 7¡Itara mexeya pomonae xanepanaeya pepaebi jiwi pam, daichitha apara peajʉntʉcoyenebe jiwi pam! Bara apara Isaías caena bayatha xaniwaicha paca yabara paeba pon Nacom peitorobi jume pepaebin. Bapon paca yabara jeye poxonae tina pejume diwesitha:

8‘Barapomonae itara be xanepanaeya neyabara

paebina jiwitha xua pinae neyabara

barʉ cui itura jina.

Daichitha barapomonae pia jʉntʉ

coyenewatha jopa xaniwaicha neyabara

barʉ cui itura jinae tsane.

9Bequein barapomonae newʉnae jainteibina

poxonae nacaetuteibina, daichitha baxua jopa

yawenae tsaibi tsainchi tsipei barapomonae

peajʉntʉcoyenebewi.

Mataʉtano tsipei po peitorobi coyenewa

cuidubina jiwitha, apara jopa taitorobi

coyenewiyo tsane, apara xua saya jiwi

barompaya pia peitorobi coyenewa tatsi tsane’,

jei Isaías xua paca yabara paeba, jei Jesús.

10Nexata bapoxonae Jesús waba daxita jiwi xua imoxoyo peumendenaenexa. Yawa namchi barapo jiwitha, jeye:

—Pana nejume naitaeware, painya neyaputaenexa pocotsiwa paca tsipaebatsi. 11Pocotsiwa ba pebin pecoiboto deca tsijain jojonecatsi pexaewan, bequein jopa tsiwʉnaeya matha nacobe quiatsiyo poxonae xaiba, barapo coyene apara ba jopa bapana pebin jʉntʉ coyene taxobichi xua poxonae pocotsiwa pexaexae. Jame pocotsiwa ba pebin pecoibototha caunuta, xua peabe jume barapo jume coyene apara pebin jʉntʉ coyene taxobatsi xua poxonae pecueicueijeixae baxua, jei Jesús.

12Nexata Jesús imoxoyo caquita umenarʉcʉpatsi pijimonae. Jesús pijimonae yainyabatsi, jeichichi:

—¿Bara yaputaneme xua fariseomonae cayabara muxu coniquiya anaepana, xua nepaebixae baxuan? jei.

13Jesús jume nota pijimonae, jeye:

—Taxa pon peitabocotha peecaexae xubina pon jopa pejume cowʉntsinchi. Taxa barapocotsi jʉta coyeneya cana ichi tsane jiwitha icha pebin ichi xua poxonae pabitha pona, mataʉta poxonae naeyo tabʉ opina jonta daxita, pexubinexa. 14Bara barabʉ neyabara muxuconacaena, fariseomonae. Jopa payabara jume naitaewatsinde pocotsiwa barapomonae paeba. Tsipei barapomonae jopa xanepanaya peyawenae jiwi ichamonaetha. Barapomonae barapocotsi jʉta coyeneya exana, icha be pon peitata nacʉtsin ichi, xua poxonae matacapona ichʉn xua pon peitata nacʉtsin matacapoinchi. Bapoxonae barapo cae peitata nacʉtsinbe napuna joparecabe mʉthʉtha deca, jei Jesús.

15Nexata Pedro Jesús baraichi, jeye:

—Yabara pana yaputane exande po pecayabara jʉta pepaebi diwesiyo xua pexaewa yabara, jei Pedro.

16Jesús biataeya jume nota pijimonae, jeye:

—¿Paxam bara paichimdʉ icha jiwi ichi? ¿Cataunxuae jopa painya yaputae jiwi pamdʉ? 17Bayatha paxam payaputaneme pocotsiwa pebin tsijain jojonecatsi pexaewa pecoiboto deca baraxua jopa jʉntʉ coyene taxobichi, tsipei barapo pexaewa jopa ponaeyo pia jʉntʉ coyenewatha. Jame barapo pexaewa pecotsorotha pona, bapoxonae nawexacaeca. 18Ichitha pocotsiwa pecoiboto tsina caunuta peabe jume, baxua apara seicaya pejʉntʉ coyene wetsina jume pichapa. Tsipei baxua penanta xeinae coyenewa, daxota pebin abeya paeba. Daxota Nacom tsitatsi xua bapon peajʉntʉcuicoyenebein Nacomtha. 19Tsipei pejʉntʉ coyene wetsina jume pichapa pocotsiwa abeya penanta xeinae coyenewan, pocotsiwe meje: Ichʉn anaya pebexotsi coyenewa, irʉ ichʉn piseuri tatsi pepichi coyene, irʉ peita coxanae coyenewatsi coyene xua poxonae penayaputae jiwi naperʉ nacoyoba, irʉ ichʉn piawa tatsi pecaibi coyene, irʉ ichʉn yabara penaerabiwatsi coyene, irʉ ichʉn yabara peaebiwatsi coyene. 20Nacom tsitatsi xua daxita barapocotsi coyenein pebin ajʉntʉcoyenebe exanatsi xua jʉntʉ coyene taxobatsi xua daxota jopa itacʉpaetsi xua beta exana. Ichitha pocotsiwa pebin nabane mataʉtano xua poxonae bequein tsiwanaya matha jopa nacobe quiatsiyo, barapocotsi coyenein pebin jopa jʉntʉ coyene taxobichi Nacom peitʉtha tatsi, jei Jesús.

Meje yabara poxonae yabʉyo powayo penanapaincha poponaewayo Jesús jume cowʉntatsi

(Mr 7.24-30)

21Nexata bapoxonae Jesús barapo ira weya warapa Genesaret nacua weya. Mataʉtano pona icha nacua beya po nacuatha ichaxota Tiro tomara eca yawa Sidón tomara ecano. 22Yabʉyo, powayo barapo cananeamonaewayo patopa Jesús pia xantha tatsi. Bapoxonae barapowa wawaya Jesustha jeye:

—¡Tanecanamataxeinaem, David pia pemomoxi susato jiwi jiwanam! Neyabara najʉntʉ cui coyene cananta xeinare, xua tana neyawenaenexam tsane. Taxantiyo inta cauri xeina; inta bichocono atene exanatsi, jei bapowa.

23Daichitha Jesús jopa jume notsiyo, saya moya uncua. Nexata bapoxonae Jesús imoxoyo caquita umenarʉcʉpatsi pijimonae. Mataʉtano jume daunweya baraichichi pijimonae, jeye:

—Barapowa itawere, tsipei barapowa waputha jume daunweya wawai, jei.

24Nexata Jesús jume nota pijimonae, jeye:

—Nacom meisa saya neitoroba Israel piamonae susato saineiwitha pomonae judiomonae xua tayawenaenexa barapomonae, tsipei barapomonae Nacom tsitatsi xua barapomonae nacabeta icha be ovejan ichi xua poxonae pipato napuxanompa, jei.

25Ichitha barapowa pentabocotha uncua yawa irabe taeuncuareca Jesús peitabaratha tatsi tsipei bapowa barʉ cui itura jina peauraxae, yaitama tsipei Jesús pon jiwi pepa Pecanamataxeinaein. Bapowa namchi, jeye:

—¡Pon Tanecanamataxeinaem, neyawende! jei.

26Jesús jume nota barapowa, jeye:

—Jopa xanepanaeyo icha matha cayawenatsi powayo nenanapaincha poponaewayom poxonae cataunxuae matha jopa yawenaeinyo pepa tamonae judiomonae. Icha baxua exanaetsipan, bapoxonae be pitan pexui pia pexaewa taapatsinexa aurimonae, jei.

27Barapowa Jesús jume notatsi, jeye:

—Aa, bara barichi xuaunxuae netsipaebame ponxaem Tanecanamataxeinaem. Jopa bewa auri catsibi pexui pia pexaewa tatsi, yaitama auri irʉ xane pocotsiwa pexui sorobaba barapo pepʉrʉwixi pocotsiwa pexaethopaewa pebʉxʉpana tsica. Daxota bara ichiya neichinde: Neyawende, tsipei bara neayapusʉ itorobi coyenewa nawita xeiname jinya axaibi exanaenexa judiomonae. Po neayapusʉ itorobi coyenewa judiomonae jopa canantawenonaeyo barapo neayapusʉ itorobi coyenewatha inta axaibi exande taxantiyo, jei.

28Nexata Jesús jume nota, jeye:

—¡Yabʉyo, maisa bichocono neyabara jume cowʉntame xua bara tana neitacʉpaewa xua tacayawenaewatsi tsainchi! Bara cata exainchi pocotsiwa aunxuae newʉcame, jei Jesús.

Poxonae Jesús baxua paeba, bapoxonae nainya barapo yabʉyo pexantiyo tatsi taaxaibi tsuxubichi.

Meje yabara poxonae Jesús axaibi exana pin bicheitomonae peatenewi

29Nexata bapoxonae Jesús bara weya pona. Galilea pucua itapa iya pona. Bapoxonae demxuwa icha juinya, baxota ecopa. 30Ichaxota Jesús eca baxota pin bicheito jiwi ayei pata. Barapo bicheito jiwi carendena pejayujayujeiwi, irʉ peitata nacʉtsi jiwino, irʉ pemuxusipanaewino, mataʉta pomonae irʉ peacowaebi jiwi xua pomonae jopa xeinaeyo xua xota nacowaeba. Mataʉtano irʉ icha bicheitomonaeno, pomonae peatenewi. Pomonae peatenewi Jesús pexainya tajebarecatsi. Daxita barapomonae Jesús axaibi exana. 31Poxonae daxita jiwi baxua cui tane, pomonae jopa judiomonae naexanaeyo daxita barapo jiwi yabara cui coyene nanthʉthʉ cabenaeca. Bapoxonae Jesús xanepanaya peexanaexae, barapomonae Nacom wʉnae jaintatsi, po Nacom Israel nacuapiwi pia Nacom tatsi. Daxota barapomonae baxua exana, tsipei Jesús equeicha paeba cana exanaeya exana pomonae pemuxusipanaewi. Mataʉta tsipei Jesús taduba exana pomonae bayatha jopa xeinaeyo xua xota nacowaeba. Mataʉtano tsipei pomonae pejayujayujei jiwi equeicha beta pona. Mataʉtano tsipei pomonae peitata nacʉtsi jiwi equeicha beta tane.

Meje yabara poxonae Jesús pexaewa apata cuatro mil pebiwi

(Mr 8.1-10)

32Nexata Jesús waba pijimonae, jeye:

—Yabara cui cananta xeinan barapo pin bicheitomonae tayawenaenexa, tsipei barapomonae acoibi po matacabiyobe jinompa taxantha, maisa ajibi xua barapomonae penabanaewa tsane. Jopa jainbotha bepu itorobinyo pia bon beya tatsi, tsipei icha barapomonae jainbotha pu itorobichipan, metha piyain namtotha xuirabathopaetsipa, jei Jesús.

33Jesús baraichi pijimonae, jeye:

—Xote ira xuepana susato tsurucuae nacua ichaxota jiwi ajibi. ¿Eta beya tsijeitinchi pexaewa barapomonae pomonae pinmonaexae? jei.

34Jesús yainyaba pijimonae jeye:

—¿Eta po panyobe paxeiname? jei.

Barapomonae Jesús jume notatsi, jeye:

—Siete po panyobe paxeinan yawa be conothano duweixi, poxi tsiquirixi, jei.

35Nexata Jesús pijimonae najume caitoroba xua bepa pinae barapo pin bicheito jiwi iratha taenaetsei. 36Jesús pecobetha pita barapo siete panyobe yawa duweixino. Bapoxonae Jesús Paxatha tsipaeba: “Axa, jʉntʉ coyene weiweinan xua pexaewa pata tanecatsiwaxaem”, jei Jesús. Bapoxonae Jesús pijimonae tsicobe epa nantarʉbiya jajanaquiya catsibapona xua xuya pijimonae tatsi pecatsibaponaenexa barapo jiwitha. 37Daxita barapomonae nabane, beya barapomonae bichocono jain cowʉntarʉcʉpatsi. Bapoxonae Jesús pijimonae tatsi siete po cotebe wʉnba pocotsiwa xua barapo jiwi jopa xaeyo petonsanaexae. 38Pomonae xua nabane pexaewa barapomonae cuatro mil pebiwi. Mataʉtano irʉ yabʉxi nanabane mataʉtano irʉ pexui nanabane, daichitha daxita jopa ununaeyo. 39Bapoxonae Jesús pu itoroba xua barapo jiwi penawibiyaenexa pia tomaran beya. Bapoxonae Jesús jeratha nontabiya, peponaenexa Magadán nacua beya.

Nacom Pejume Diwesi po diwesi pena jume diwesi xua Jesucristo yabara tinatsi

© 2010, Wycliffe Bible Translators, Inc. All rights reserved. More Info | Version Index