Search form

Y Salmau 29

SALM XXIX

Afferte Domino.

Erchi i gedyrn gydnabod a’r Arglwydd ei fod yn hollalluog: a dwyn y tarannau a’i nerthoedd eraill, i arwyddo hynny.

1Rhowch i’r Arglwydd, a rhowch yn chwyrn,

chwi blant y cedyrn, foliant:

Cydnabyddwch ei barch, a’i nerth,

mor brydferth, a’i ogoniant.

2Rhowch i enw yr Arglwydd glod,

heb orfod mwy mo’ch cymmell,

Addolwch Arglwydd yr holl fyd:

mor hyfryd yw ei Babell!

3Llais yr Arglwydd sydd uwch dyfroedd,

Duw cryf pair floedd y daran.

Uwch dyfroedd lawer mae ei drwn,

nid yw ei swn ef fychan.

4Llais yr Arglwydd, pan fytho llym,

a ddengys rym a chyffro:

A llais yr Arglwydd a fydd dwys,

fel y bo cymwys gantho.

5Llais yr Arglwydd a dyr yn fân

y Cedrwydd hirlân union,

Yr Arglwydd a dyr, yn uswydd,

y Cedrwydd o Libânon.

6Fel llwdn unicorn neu lo llon

fe wna’i Libanon lammu,

7A Sirion oll: llais ein Ior glân

a wna’i fflam dân wasgaru.

8Llais yr Arglwydd, drwy ddyrys lyn,

a godai ddychryn eres:

Yr Arglwydd a wna ddychryn fflwch

drwy holl anialwch Cades.

9Llais yr Arglwydd y piau’r glod,

pair i’r ewigod lydnu:

Dinoetha goed: iw deml iawn yw

i bob rhyw ei foliannu.

10Yr Arglwydd gynt yn bennaeth oedd,

ar y llif-ddyfroedd cethrin:

Yr Arglwydd fu, ef etto sydd,

ac byth a fydd yn frenin.

11Yr Arglwydd a rydd iw bobl nerth,

drwy brydferth gyfanneddwch.

Yr Arglwydd a rydd ei bobl ymhlith

ei fendith, a hir heddwch.

Salmau Cân 1621

© Cymdeithas y Beibl 2017

More Info | Version Index