Search form

Uro 10

1N yɔɔmine ane n yɔɔpuuli, n poboɔbo ane puoruu N naŋ puoro korɔ Naaŋmen kyaare ne a Gyuumine la, ka ba nyɛ faabo. 2N na baŋ di la ba danseɛ ka ba sereŋ boɔrɔ la Naaŋmen ne ba poɔ zaa, kyɛ ba niŋe ba kyaane. 3Bonso, ba naŋ da be babammo poɔ a kyaare ne a mennoŋ na naŋ yi Naaŋmen zie, a kyɛ da boɔrɔ ka ba biŋ bamenne mennoŋ, ba da ba sigri bamenne ko a Naaŋmen mennoŋ. 4Bonso, a Kirista la a bege baaroo zie ka ka mennoŋ na bebe ko neɛzaa naŋ sage de.

Faabo Waa La Nensaalba Zaa Soobo

5Moozul sɛgɛɛ la a kyaare ne a mennoŋ na naŋ yi a bege poɔ, ka, “a soba na naŋ erɛ a yɛlɛ na tuuro a la o nyɔvore poɔ.” 6Kyɛ a mennoŋ na naŋ yi yeldeebo poɔ yelee la, “Ta yeli fo sukyiri poɔ, ‘Aŋ la na do tenvelaa+ poɔ?’ ” (a te taa a Kirista sigi wa ne). 7“Bee, ‘Aŋ la na sigi a bogzuluŋ naŋ ba taa baaroo poɔ?’ ” (a te taa a Kirista wa yi ne a kuuni poɔ). 8Kyɛ a bege yeli ka boŋ?

“A yelbiri peɛle fo la,

o be la fo nɔgbɛmɛŋ ane fo sukyiri poɔ”

(a lɛ tɛgɛ la, a yeldeebo yelbiri na te naŋ moɔlɔ); 9bonso, ka fõõ yeli ne fo noɔre ka Yeezu e la Daana kyɛ sage de ne fo sukyiri ka Naaŋmen da eɛɛ la ka O leɛ-iri kuuni poɔ, fo na nyɛ la faabo. 10Bonso, neɛ maŋ sage de la ne o sukyiri a leɛ nemmeŋɛ, ka neɛ meŋ yeli ne o noɔre a nyɛ faabo. 11A gansoŋ yelee la, “Neɛzaa kyebe naŋ na sage de O yɛlɛ kyɛ ka vi di o.” 12Bonso, tɛɛtɛɛ ba kye Gyuumine ane a Giriki noba sogɔŋ; a Daana ne O zu la e ba zaa Daana, a korɔ neɛzaa naŋ sɔre bon yi O zie. 13Bonso, “Soba na zaa naŋ boɔle a Daana yuori na nyɛ la faabo.”

14Kyɛ wola ka ba na boɔle soba na ba naŋ ba sage de yuori? Ka wola ka ba na e sage de neɛ na ba naŋ daŋ ba woŋ O yɛlɛ? Ka wola ka ba na e woŋ O yɛlɛ ka neɛ ba kyebe a na moɔle a O yɛlɛ? 15Kyɛ wola ka ba na moɔle O yɛlɛ ka ba naŋ ba toŋ ba? Aŋa ba naŋ da sɛge lɛ, “Nyɛ a noba naŋ moɔlɔ a Ŋmen-yelnoore waabo naŋ veɛlɛ lɛ!” 16Kyɛ ba zaa naane da sage de a Ŋmen-yelnoore; bonso, Azaaya yelee la, “Daana, nembuo la da sage de a te duoro?” 17Azuiŋ, yeldeebo maŋ yi la bonna ba naŋ woŋ zie, ka bonna ba naŋ woŋ meŋ yi a Kirista yelbiri poɔ.

18Kyɛ N soorɔ la, ba mɔɔ ba woŋ a be? Serɛzaa ba woŋee la; bonso:

“A ba kɔkɔre yi ta la a tendaa zaa,

ka ba yelbie ta a andonɛɛ lamboe zaa.”

19N laboreŋ soorɔ la, a Izerayɛl biiri ba baŋ a tɛgɛ be? Moozul da dɛndɛŋ yelee la:

“N na e la ka yɛ taa nyuuri ne a noba na naŋ ba e paaloŋ;

a paaloŋ na deme naŋ waa dambolo ka N na de e ka yɛ suuri iri.”

20Lɛ la ka Azaaya da ba zo dabeɛ̃ kyɛ yeli:

“Banaŋ naŋ da ba bɔ ma la nyɛ ma;

N de la N meŋɛ wuli a banaŋ naŋ ba soore N yɛlɛ.”

21Kyɛ a kyaare ne a Izerayɛl biiri yɛlɛ, O yelee la, “A bebi-gbuli zaa ka N teɛ N nuuri a kyaare ne noba naŋ zagre N yɛlɛ kyɛ leɛ ba kpaare ko ma.”

Naaŋmen Nɔpaalaa Gane 2013

First New Testament in Dagaare Language © The Bible Society of Ghana, 2013.

More Info | Version Index