Search form

Matthew 23

Zezì k'aodèe goghǫnatı̨ı̨ɂǫ

1Eyı tł'axǫǫ̀ Zezì dǫ hazǫǫ̀ eyıts'ǫ edecheekeè ts'ǫ̀ dıı hadı: 2“Nǫ̀htsı̨-yatıì-k'ègedìı-dǫǫ̀ eyıts'ǫ Pharısee gı̨ı̨lı̨ı̨ sìı Moses wenı̨htł'è dahxà gogede. 3Eyıt'à gık'èaht'e eyıts'ǫ dànaxègedı k'ę̀ę̀ eghàlaahda. Hanìkò dànì dǫ hoghàgeehtǫ k'ę̀ę̀ geeda nıìle t'à, dànì k'ehogeɂaa sìı gıxèahɂı̨-le. 4Xeh nedàa dǫ gha gehtsı̨ lanì, hanìkò ededı̨ nagıage ha gı̨ı̨wǫ-le.

5“Dǫ nadąą̀ zǫ nezı̨į̀ k'ehogeɂa. Hòtł'ò-yagehtıı-dǫǫ̀ ats'ı̨ı̨t'e dǫ hagogı̨ı̨hwhǫ ha gı̨ı̨wǫ t'à gıt'à yagehtıı-tǫą edek'e gehłaa sìı nechà agehɂı̨ eyıts'ǫ edeɂeèlǫ wekwè nedè agehɂı̨. 6Nàsı̨ hołè-ı̨dè ı̨daà daèhchı̨ whelaa eyıts'ǫ ełègehdèe-kǫ̀ goyìı dǫ wet'àaɂàa gha daèhchı̨ whelaa sìı k'e geèhkw'e ghageewı. 7Kǫ̀ta k'egedè nı̨dè dǫ gots'ǫ̀ nezı̨į̀ nageɂa xè ‘K'àowo’ gògedı gıgha nezı̨.

8“Hanìkò naxı̨ sìı dǫ ‘K'àowo’ naxègedıì naxegıızı ha-le. K'àowo ı̨łè zǫ naxıts'ǫ hǫt'e, naxı̨ hazǫǫ̀ ełèot'ı̨ aaht'e. 9Eyıts'ǫ dǫ wı̨ı̨zìı ‘setà’ wèahdı ha-le. Gotà ı̨łàet'ee zǫ gǫ̀hłı̨, yak'e wheda hǫt'e. 10Eyıts'ǫ ‘hoghàehtǫǫ-dǫǫ̀’ naxègedıì naxegıızı ha-le. Dǫ ı̨łè zǫ dǫ hoghàgoehtǫǫ elı̨ hǫt'e, eyı sìı Chrıst hǫt'e. 11Naxıta gots'ǫ dǫ denahk'e wet'àaɂàa sìı naxıgha eghàlaedaa-dǫǫ̀ elı̨ ha. 12Amìı edeghǫ xàhodìı sìı edeghǫ į̀į̀zhagı̨ı̨lı̨į̀ agedle ha, eyıts'ǫ amìı k'èeweèt'ı̨ k'ę̀ę̀ edaa sìı weghǫ xàdahodì ha.

13-14“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Nǫ̀htsı̨ Wenàowoò k'ę̀ę̀ hòɂǫǫ sìı dǫ goyageedè ch'à dǫ gıts'ǫǫ̀hk'e enìahchı. Naxı̨ goyaahdè nıìle eyıts'ǫ dǫ goyats'ııdè gı̨ı̨wǫ kò goyageedè agıahłe-le.

15“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Hazǫǫ̀ nèk'e eyıts'ǫ tı sı k'e k'ehoahwho. Dǫ ı̨łàet'ea naxınàowoò k'ę̀ę̀ eda ha dahwhǫǫ sìı hak'eaht'į̀. Eyı dǫ wegòahɂǫ nı̨dè naxınahk'e wehłı̨za weahtsı̨.

16“Naxıdaà goìlee kò dǫ k'egıahɂı̨ t'à naxıgha hoìla nechà ha. Dǫ gıts'ǫ̀ dıı haahdı, ‘Dǫ Nǫ̀htsı̨kǫ̀-gocho wıızì t'à yatı nàtsoo whehtsı̨ nı̨dè wet'àaɂà nıìle. Hanìkò sǫǫ̀mbaekwo Nǫ̀htsı̨kǫ̀-gocho k'e whelaa t'à yatı nàtsoo whehtsı̨ nı̨dè edeyatıì k'èdì ha hǫt'e,’ dahdı. 17Naxı̨ sìı ezhı̨ne laaht'e, ehkw'ı nànıahdè-le. Ayìı denahk'e wet'àaɂà? Nǫ̀htsı̨kǫ̀-gocho hanì-le-ı̨dè sǫǫ̀mbaekwo Nǫ̀htsı̨kǫ̀-gocho k'e whelaa t'à degaı ìhłè? Nǫ̀htsı̨kǫ̀-gocho sìı denahk'e wet'àaɂà hǫt'e. 18Eyıts'ǫ dıı haahdı hǫt'e: ‘Kwe-ladà k'e Nǫ̀htsı̨ ts'ǫ̀ t'asìı k'eek'ǫ̀ǫ sìı eyı ladà wıızì t'à dǫ yatı nàtsoo whehtsı̨ nı̨dè wet'àaɂà nıìle,’ dahdı, ‘Hanìkò Nǫ̀htsı̨ ts'ǫ̀ t'asìı k'eek'ǫ̀ǫ sìı t'à yatı nàtsoo whehtsı̨ nı̨dè edeyatıì k'èdì ha hǫt'e,’ dahdı. 19Ehkw'ı nànıahdè nıìle. Ayìı denahk'e wet'àaɂà? Kwe-ladà, hanì-le-ı̨dè t'asìı kwe-ladà k'e wek'eahk'ǫ̀ t'à degaı ìhłè? Kwe-ladà sìı denahk'e wet'àaɂà hǫt'e. 20Eyıt'à amìı kwe-ladà t'à yatı nàtsoo whehtsı̨ nı̨dè t'asìı hazǫǫ̀ wek'e whelaa sı t'à yatı nàtsoo whehtsı̨ hǫt'e. 21Eyıts'ǫ amìı Nǫ̀htsı̨kǫ̀-gocho t'à yatı nàtsoo whehtsı̨ı̨ sìı eyı kǫ̀-gocho zǫ t'à yèhtsı̨ nıìle hanìkò amìı yeyìı nàdè sı t'à yatı nàtsoo whehtsı̨ hǫt'e. 22Eyıts'ǫ amìı yak'e t'à yatı nàtsoo whehtsı̨ nı̨dè Nǫ̀htsı̨ wedaèhchı̨cho eyıts'ǫ amìı yek'e whedaa sı t'à yatı nàtsoo whehtsı̨ hǫt'e.

23“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı, sıì naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Įt'ǫ̀ hazǫǫ̀ xàɂaa nàahtsį̀ı̨ sìı wets'ǫ hoònǫ ı̨łè Nǫ̀htsı̨ ghàahɂà. Hanìkò nàowo wet'àaɂàa sìı ts'ǫnıahɂà-le. Dıı sìı nàowo wet'àaɂà hǫt'e: ehkw'ı ełesınìyats'ehtıı, etełets'eèɂı̨ı̨ eyıts'ǫ ełets'ǫ̀ ehkw'ı ts'eedaa. Eyı nàowo weghàlaahda ha hǫt'e ı̨lè eyıts'ǫ hòt'a ayìı nezı̨į̀ weghàlaahdaa sìı, wedę aahłe ha-le. 24Naxı̨ sìı naxıdaà goìlee kò dǫ k'egıahɂı̨! T'asìı aahdǫǫ sìı weta ts'o nechà-lea xàahchı, hanìkò ejıe nechàa nałaahtła.

25“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Lıbò eyıts'ǫ kw'à weka zǫ nezı̨į̀ wek'enaahtse, hanìkò naxıdzeè yìı aahdı-le xè t'aahwhǫ k'ę̀ę̀ zǫ aahda. 26Naxı̨ Pharısee yàahłı̨ı̨ sìı naxıdaà goìlee laaht'e. Naxılıbò eyıts'ǫ naxıkw'à nezı̨į̀ weyìı wek'enaahtse ha hǫt'e, hanì-ı̨dè weka sı degoò ade ha.

27“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Kwe yìı dǫkw'ǫǫ̀ whelaa k'è enı̨htł'ètì degoo t'à goatł'èe laaht'e. Mǫ̀ht'a zǫ nezı̨į̀ wègaat'ı̨, hanìkò weyìı dǫkw'ǫǫ̀ ı̨hjıı whela. 28Eyı lanì ehkw'ı aahda k'ę̀ę̀ naxègaat'ı̨, hanìkò naxıdzeè yìı t'aats'ǫǫ̀ hoahts'ì k'ę̀ę̀ aahda eyıts'ǫ hołı̨ı̨-nàowoò k'ę̀ę̀ nànıahdè.

29“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Naxı̨ sìı nakwenàoɂǫǫ gıgha kwe yìı dǫkw'ǫǫ̀ whelaa k'è gòahtsı̨ eyıts'ǫ dǫ ehkw'ı geeda ı̨lèe sìı gıkw'ǫǫ̀ k'è nezı̨į̀ sıìgoahɂı̨. 30Edeghǫ dıı haahdı: ‘Gocho geeda, ekìıyeè k'e ts'ı̨ı̨dà nı̨dè gocho gıxè nakwenàoɂǫǫ ełaàts'ehde ha-le ı̨lè.’ 31Haahdı ghàà naxıcho nakwenàoɂǫǫ ełaàgogį̀ı̨hdèe sìı gıts'ıhɂǫ̀ǫ-dǫǫ̀ aaht'e edèahdı, eyıt'à edek'e nìdahoaht'à hǫt'e. 32Eyıt'à hot'eè, naxıcho gıhołı̨į̀ deghàà weghàlaahda!

33“Naxı̨ sìı wehłı̨ı̨ weza laaht'e! Wehłı̨kǫ̀ ts'ǫ̀ anaxedle ch'à edaxàahdè ha dahwhǫ nì? 34Nakwenàoɂǫǫ, dǫ gogı̨ı̨zǫǫ eyıts'ǫ dǫ-hoghàehtǫǫ-dǫǫ̀ naxıts'ǫ̀ agehłe ha. Mǫ̀hdaa ełaàgìahde xè dechı̨et'aa k'e gıdeàhtsò ha, mǫ̀hdaa ełègehdèe-kǫ̀ goyìı gık'eahkwa ha, eyıts'ǫ kǫ̀ta yàgòlaa gıkaahwhǫ gà dagìahɂa ha. 35Eyıt'à dıı nèk'e dǫ hazǫǫ̀ ehkw'ı geedaa ełaàgogį̀ı̨hdèe sìı eyı hazǫǫ̀ gha naxısınìyaetı ha hǫt'e. Abè ełaàwìgwo gots'ǫ, nakwenàoɂǫǫ Berekıah weza Zecharıah ełaàwìgwo haı̨wa gots'ǫ̀, dǫ nezı̨ı̨ hazǫǫ̀ ełaàgogį̀ı̨hdè ı̨lèe sìı k'èxa naxısınìyaetı ha hǫt'e. (Zecharıah Nǫ̀htsı̨kǫ̀-gocho eyıts'ǫ kwe-ladà wek'e Nǫ̀htsı̨ ts'ǫ̀ t'asìı k'eek'ǫ̀ǫ sìı wege ełaàwèahwho ı̨lè.) 36Ehkw'ı anaxèehsı̨, naxı̨ dǫłı̨ı̨ aaht'ee sìı eyı hazǫǫ̀ naxıts'ǫ̀ hagode ha.

37“Jerusalem got'ı̨į̀, nakwenàoɂǫǫ naxıts'ǫ̀ adlàa sìı naxı̨ kwe t'à ełaàgìahde hǫt'e. K'àba edezaa edı̨ı̨ts'ǫǫ̀ tł'a gòhłaà lanaxehłe ha t'aats'ǫǫ̀ hahwhǫ kò naxı̨ haahwhǫ-le. 38Hotıì aàhkw'ǫ, naxıkǫ̀ gokw'ǫǫ̀ gòɂǫǫ̀ agode ha. 39K'achı̨ seahɂį̀ ha nıìle. ‘Gots'ǫ̀ K'àowo wedahxà nììtłaa sìı wexè sìghà hǫt'e,’ sèahdı gots'ǫ̀ k'achı̨ seahɂį̀ ha-le,” Zezì gòhdı.

Nǫ̀htsı̨̨ Nı̨̨htł'è

Dogrib Genesis and New Testament © 2003, 2008 Canadian Bible Society

More Info | Version Index