Search form

Ovilinga 10

Kornelius ma ithana Petrus

1MoKesarea mwa li omulumentu nguu tiwa oKornelius, omunene wovakwavita wotjilombo tjaItalia. 2Kornelius wa li omuundapeli nomutilikalunga pamo nonganda ye aihe. Ye wa li aa yandja omapopilo kOvajuda ovathona, ye wa kambulithile wo okukumba kuKalunga. 3Etango limo powola ontyatatu yokomatango Kornelius wa mona emoneko, omweengeli waKalunga ame ya kuye, ye he mu ithana ha tyaa: “Kornelius!”

4Kornelius wa tala omweengeli, he mu tongolola, wa li aa tila, ha tyaa: “Muhona, hehi otjitji?”

Omweengeli we mu yaka ha tyaa: “Kalunga wa tee okukumba kwoye, ha mono ovilinga vyoye vyokupopila ovathona, ye he ku thipaluka. 5Iya napano tuma ovalumentu vamo mbamava i koJoppe, va ka ete Simon nguu tiwa oPetrus. 6Ye omuyenda monganda yaSimon omupeli woviyalo, owonganda ndjii li popedhi nelunga.” 7Iya omweengeli ngoka ngwaa li ama popi naye, hiaa i, Kornelius wa ithana ovantu ve vavali nomukwavita umo omuundapelikalunga, owomumboka mbava li puye. 8Iya ye hiee ve hipululile ovipuka avihe mbyoka mbyaa ningwa po, he ve tumu koJoppe.

9Iya ngamuhuka, tainkolo ava li mondjila, popedhi nokuthika motjitungwalongo tjaJoppe, Petrus wa londa kombanda yondjuwo pondatu oku ka kumba. 10Petrus wa li ama hala okulya, mena lyokutya wa li aa t̯i ondjala unene. Iya tainkolo ovikulya vya li amavi telekwa, we lipuulukwa, ha mono emoneko. 11Petrus wa mona eulu alye liyapuka, mo hamu dhi otjipuka himatji ngala otjitopa otjinene hitja t̯itwa kodhontyo dhatjo ne, hatji thothonokethelwa pohi. 12Mutjo mwa li ovipuka mbii na omwenyo, mbii lili nambii lili, mbii na omakulu ane, nambii kokoloka komadhimo, novidhila vyopeulu. 13Iya ondaka ye mu heela hai tyaa: “Petrus kulama, dhipaa ovipuka mbyoka, u lye.”

14Iya Petrus wa yaka ha tyaa: “Aai! Muhona kaatji tjiiwa, ame nkee mba dhile, hí na mpamba lile otjipuka hihatji liwa nokanunu ne hihatji kohokele.”

15Ondaka ye mu popitha otjikando otjityavali hai tyaa: “Atjihe soka Kalunga hiaa dhilika, ove koo ulu okutya otjivi.” 16Iya ondaka hiye mu popitha ovikando vitatu, otjitopa tja ithwa po hatji nanenwa meulu.

17Petrus hiaa mono emoneko ndyoka wa li aa kumwa. Tainkolo a li ame lipula nemoneko ndyoka okutya mali tya vi, ovalumentu mbenya mbava li ava tumwa kuKornelius va yulikilwa onganda yaSimon, wo ve ya hava kulama potjivelo. 18Wo va pula monganda amava wololoka unene hava tyaa: “Monganda muka kamu thikilile omulumentu nguu tiwa oSimon Petrus?”

19Iya Petrus tainkolo a li ame lipula uke nemoneko okutya mali tya vi, Ombepo Ondhilikwa ye mu heela hai tyaa: “Teelela, pomuvelo pe na ovalumentu vatatu mbamave ku pula. 20Iya kulama napano u heluke, ove u ende pamo nawo, hó limbililwa, mena lyokutya aame mbe ve tumu.”

21Petrus wa heluka, ha i pohi kovalumentu, ye he ve heele ha tyaa: “Aame hengu ngumamu hala. Mwe ya okweeta tji?”

22Wo ve mu yaka hava tyaa: “Nt̯e twa tumwa komunene wovakwavita Kornelius. Ye omulumentu omuwa unene omutilikalunga, ngwaa tumbalekwa unene kOvajuda avehe. Wa heelwa komweengeli omudhilikwa memoneko e ku ithane, u ye konganda ye, a tyee soka hiuu na tjo, u mu heele.” 23Iya Petrus wa ithanena ovalumentu monganda, he ve pa omala otjit̯iku soka.

Petrus me thiki monganda yaKornelius

Komuhuka hikwa tji, Petrus wa kulama, ha i pamo nawo. Vamo owomovaitaveli owomoJoppe va ya pamo naye. 24Etango etyavali otjo ve thika moKesarea, Kornelius wa vadhwa ame ve kevelele, wa ithana ovakwawo nomapanga e. 25Iya Petrus tainkolo a li ama ende okuya nokonganda, Kornelius wa wanena naye, ha twike odhongolo kotjipala tje, he mu tumbaleke. 26Iya Petrus we mu heela ha tyaa: “Kulama, mena lyokutya ame naame ndjimuntu vala.” 27Iya Petrus naKornelius va enda amava tompola himava i nomonganda, moka muva vadha ovantu ovengi ava ongana. 28Iya Petrus we ve heela ha tyaa: “N̯e mu tji i nawa okutya kOvajuda tji dhila okulitjinga nokulivalula nomihoko vimo. Iya Kalunga wa ndjulikila okutya hé popi omuntu okutya omuvi ne hamudhilikwa. 29Iya mwa ndjithana, mbe ya, hí anyene. Napano me mu pula okutya mwa ndjithanene tji?”

30Kornelius wa yaka ha tyaa: “Iya hipa piti omatango ane powola nawanawa ngahendji, ame mba vadhwa ame kumbu monganda yandje powola ondatu yokomatango. Dhivadhiva mbe ya okulihaka momulumentu ngwaa kulama komeho yandje, nguu na ovikutu mbimavi ngen̯auka. 31Ye wa ntjeela ha tyaa: ‘Kornelius! Kalunga wa tee okukumba kwoye, ye wa thipaluka ovilinga vyoye vyokupopila ovathona. 32Iya tuma omuntu koJoppe, a ka ete ko omulumentu nguu tiwa oSimon Petrus. Ye we thikila monganda yaSimon, omupeli woviyalo, owonganda ndjii li pontyo yelunga.’ 33Iya ame opo mba dhi oku ku tumina dhiva elaka. Ove wa ningi nawa hiwe ya. Nt̯e atuhe tu li pamo hempa kotjipala tjaKalunga, u tu heele atjihe soka Muhona hiee ku heela.”

Petrus ma teetha monganda yaKornelius

34Petrus wa uta okuteetha ha tyaa: “Otjatjili ame napano mba iwa okutya Kalunga ke na tja okapungulula kovantu avehe. 35Kalunga u tambula omuntu moviwan̯a avihe, nguu mu tila nanguu undapa ouvyuuki. 36Hendji oyo i li ondaka Kalunga ndjaa tuma kotjiwan̯a tjaIsrael noku ve teethela ondaka ombwa yehuluko ndjaa etwa naJesus Kristus, Muhona wovantu avehe. 37N̯e mwa iwa nawa soka hitja ningwa motjilongo atjihe tjaJudea, tjo tja uta moGalilea, Johannes hiaa dha poku ve teethela etjatjo. 38N̯e mwa iwa okutya Jesus waNasaret, Kalunga we mu pa Ombepo Ondhilikwa nodhonkono. Jesus wa endaenda apehe, wa undapa ouwa, ye ha velula avehe mbava li kohi yodhonkono dhaSatana, mena lyokutya Kalunga wa li puye. 39Nt̯e tudhombangi dhovipuka avihe Jesus mbyaa ninga motjilongo tjOvajuda nomoJerusalem, iya wo ve mu dhipaa, hive mu yendjeleleka komuti. 40Iya Kalunga we mu imuna kout̯e etango etyatatu, a moneke. 41Jesus ka monekele kotjiwan̯a atjihe, iya nan̯i okunt̯e vala mboka Kalunga mbaa holowola ae lukulu, tu ninge odhombangi dhe, nt̯e mbatwa lya, hatu nu pamo naye kon̯ima yahiaa imuka kout̯e. 42Kalunga we tu heela tu teethele ovantu avehe ondaka ombwa noku ve hipululila Jesus okutya wa holowolwa kuKalunga, a koye ovanamwenyo novat̯e. 43Ovaprofeti avehe va popile Jesus okutya omuntu auhe nguma itavele muye, ma ithilwa po odhonkali dhe mena lye.”

Ovapaani mava pewa Ombepo Ondhilikwa

44Iya Petrus tainkolo a li ama popi odhondaka ndhoka, Ombepo Ondhilikwa ye ya movantu mboka mbava li amava teelele ondaka ombwa. 45Ovaitaveli vamo Ovajuda mbava dhile naPetrus koJoppe, ve kuminwe hiva mono okutya Ombepo Ondhilikwa ya pewa ovapaani. 46Ovapaani va li amava popi momalaka ngahae iwe, otjo mava hivilike Kalunga. Petrus we ve heela ha tyaa: 47“Ovantu hemba va pewa Ombepo Ondhilikwa ngant̯e hitwa pewa. Pe na nguma anya okutjatja ovantu hemba nomeva?” 48Petrus we ve heela okutya wo ngava tjatjelwe mena lyaJesus Kristus. Wo va pula Petrus, a kale pamo nawo omatango amo.

Etestamende Epe Moludhimba

© 2012 Bible Society of Namibia

More Info | Version Index