Search form

Ovilinga 11

Petrus ma hipululile eongalo lyomoJerusalem

1Ovayapostoli novaitaveli mbava li moJudea atjihe, va tyaa okutya ovapaani nawo va itavela odhondaka dhaKalunga. 2Petrus hiee ya moJerusalem, Ovajuda mbava li amava hala ovapaani va pite etanda, ve mu vela ombedhi, 3hava tyaa: “Ove we thikila ponganda yovapaani mbahava pitile etanda, ove ho li pamo nawo.” 4Petrus wa uta oku ve hipululila ovipuka avihe, ngahi vya enda okudha pomautilo, ha tyaa:

5“Ame himba li mondolopa yaJoppe, ame kumbu, mba mona emoneko. Mba mona eulu alye liyapuka, hamu dhi otjipuka himatji ngala otjitopa otjinene, hitja t̯itwa kodhontyo dhatjo ne, hatji thothonokethelwa pwaame. 6Iya himba tala mo nawa, mba mona mo ovipuka mbii na omwenyo, mbii na omakulu ane vyopovantu novyomokuti, nambii kokoloka komadhimo, novidhila. 7Ame mba tyaa elaka, ndimali popi naame, hali tyaa: ‘Petrus, kulama u dhipae ovipuka mbyoka, u lye.’ 8Iya ame mbe mu yaka he tyaa: ‘Aai Muhona, ame nkee mba dhile, hí na mpamba lile otjipuka hihatji kohokele.’ 9Iya ondaka ya dha meulu hai mpopitha otjikando otjityavali hai tyaa: ‘Atjihe soka Kalunga hiaa dhilika, ove koo ulu okutya katji kohokele.’ 10Otjipuka hehi tainkolo hátjiya tjun̯wa uke meulu tja ningwa ovikando vitatu. 11Iya mowola yatjo tuu ndjoka koKesarea kwa dha ovalumentu vatatu mbava tuminwe kwaame, have ya pondjuwo mpamba li. 12Ombepo Ondhilikwa ya ntjeela okutya hé limbililwa, nge ende dhiva pamo nawo. Iya ovakwetu hemba epandu, va ya wo pamo naame koKesarea, hatu i monganda yaKornelius. 13Kornelius we tu heela okutya wa mona omweengeli, ngwaa kulamene pondjuwo ye, omweengeli we mu heele ha tyaa: ‘Tuma omuntu koJoppe, a ka ete omulumentu nguu tiwa oSimon Petrus. 14Petrus me ku heele ondaka ndjimai ku hupitha pamo nonganda yoye aihe.’ 15Ame ngahi mba utu okupopya, Ombepo Ondhilikwa ye ya kuwo ngahi ye ya kunt̯e pomautilo. 16Iya ame mba thipaluka odhondaka dhaMuhona hiaa popile ha tyaa: ‘Johannes wa tjatja nomeva, iya n̯e mamu ka tjatjwa nOmbepo Ondhilikwa.’ 17Iya Kalunga andaa we ve pa vala otjali hitji lithike ngant̯e hiee tu pa, mbatwa itavela muMuhona Jesus Kristus, ame aame an̯i ngumba thele okukondjetha Kalunga?”

18Iya wo hiva tee odhondaka hendhi, kave na uke hiva popya, va hivilika Kalunga hava tyaa: “Kalunga wa yandja oluvedhe kovapaani, ve liteyulule, opo va kale nomwenyo.”

Eongalo lyomoAntiokia

19Omatatetho ngaa uta, okudha Stefanus hiaa dhipawa, a handjaneka ovaitaveli. Vamo va ya katee koFoinikia nokoKipros nokoAntiokia, amava teetha ondaka ombwa, ve i teethele vala Ovajuda aveika.20Iya ovaitaveli vamo ovalumentu mbava dhile koKipros nokoKireni, ve ya koAntiokia, hava ka teethela ovapaani ondaka ombwa okutya Jesus oye e li Muhona. 21Odhonkono dhaMuhona dha li pamo novaitaveli, ovantu ovengi ve liteyulula, hava itavele muMuhona.

22Ovipuka mbyaa ningwa moAntiokia, hivya teeka momakutwi eongalo lyomuJerusalem, lya tuma ko Barnabas. 23Iya ye hiee thiki koAntiokia, wa li nehuluko, hiaa mona ovilinga vyonkenda, Kalunga mbyaa undapa mokati kovantu. Barnabas we ve ilikin̯a okutya va kale puMuhona nomitima vyawo avihe. 24Barnabas wa li omulumentu omuwa weitavelo, ngwee yulithilwe Ombepo Ondhilikwa. Ovantu ovengi va ninga ovaitaveli vaMuhona.

25Iya Barnabas wa ya koTarso oku ka taendha Saulus. 26Iya hiee mu mono, we mu eta koAntiokia. Barnabas naSaulus va kala pamo meongalo ombula imo, meongalo moka va longa mo ovantu ovengi. MoAntiokia ovaitaveli omo va uta okulukwa ovakriste.

27Iya pomatango atjo ngoka, kwa dha ovaprofeti vamo koJerusalem, hava i koAntiokia. 28Iya Agabus umo owomovaprofeti mboka wa kulama, mepopilo lyOmbepo Ondhilikwa wa popya okutya mouye auhe mamu ke ya ondjala onene. Iya ondjala yatjo ndjoka, ya ningwa potembu ndjoka Klaudius hiaa li omukesari moRoma. 29Ovaitaveli moAntiokia va tokola okutya auhe nga yandje hiee na tjo ngahi ma ulu, tjo tji tuminwe ovaitaveli vakwawo mbave li koJudea. 30Ovaitaveli va onga oviyandjwa, havi yandjwa kooBarnabas naSaulus, ve vi twale kovanene veongalo koJerusalem.

Etestamende Epe Moludhimba

© 2012 Bible Society of Namibia

More Info | Version Index