Search form

Ovilinga 12

Herodes ma tatetha eongalo

1Iya potembu ndjinya, ohamba Herodes wa uta okutatetha ovantu vamo veongalo. 2Ye wa dhipaetha Jakob, omunitjaJohannes nomukonda. 3Herodes hiaa mono okutya otjipuka soka tje hulukitha Ovajuda, wa twikila uke okukambulitha Petrus. (Hehi tja ningwa potembu yotjipito tjomingome mbihavi tuwa ontathi.) 4Hiee mu kambula, we mu twaa mokaliwoso, he mu yandja kovilombo vine, otjilombo atjihe tja li novakwavita vane, va ninge odholenda, himave mu yungu. Herodes we lipula okutya me ke mu eta kovikoya kotjipala tjovantu kon̯ima yetango enene lyOpaasa. 5Petrus wa yungilwa mokaliwoso, iya eongalo lye mu kumbila kuKalunga.

Petrus ma kutululwa, ye ha pitithwa mokaliwoso

6Otjit̯iku soka tainkolo etango ndyoka Herodes ndyaa li aa soko okweeta Petrus movipathi vyovantu avehe, Petrus wa lalele pokati kovakwavita vavali. Ye wa li aa kutwa nomalyenge avali, po pomuvelo wokaliwoso pa li ovakwavita. 7Iya we ke lihaka vala omweengeli waMuhona, we mu kulamene, nelaimo lye hali laimine mokandjuwo hoka kokaliwoso. Omweengeli wa mbambala Petrus kepepe, ha tyaa: “Kulama, kanyauka!” Dhivadhiva omalyenge a wa ko komawoko aPetrus. 8Iya omweengeli we mu heela ha tyaa: “Kuta omuvya woye, ove u tapeke odhongaku dhoye.” Petrus wa ninga ngahi a heelwa. Iya omweengeli we mu heela uke ha tyaa: “Dhala ombaikitha yoye, ove u ndandule.” 9Petrus we mu landula, ha dhi mo mokaliwoso. Iya ye kaa li ae tji i okutya himatji ningi omweengeli otjatjili, wa li ama tya pamo ma loto. 10Va pon̯oka ovakwavita wolutenga novatyavali mbava li amave mu yungu, katee ve ya komuvelo wotjivela wokudha motjitungwalongo. Omuvelo hembu we liyelula owene, wo hava piti mo motjitungwalongo. Va ka enda pamo momuvanda, omweengeli wa henuka po dhivadhiva puPetrus, ha i.

11Iya Petrus wa koneka okutya soka hiaa ningilwa otjatjili, ha tyaa: “Napano mbe tji koneke nawa okutya Muhona wa ntumine omweengeli we, a mpopile momawoko aHerodes nokovipuka avihe, Ovajuda mbimava hala okundingila.”

12Petrus hiaa koneke ovipuka avihe mbimavi ningwa, wa ya koyooMaria ina yaJohannes ena limo u tiwa oMarkus. Ovaitaveli ovengi va vadhwa ava onganene monganda moka, amava kumbu kuKalunga. 13Petrus wa pompola pomuvelo wokomuvanda, omukadhona umo nguu tiwa oRode we ya okutala ngwaa pompola. 14Iya hiaa dhimbuka ondaka yaPetrus, we hulukwa unene, ye ahama yelula omuvelo. Wa ka dhamuka, ha tjuna kumbava li monganda amava kumbu, we ve heela okutya nguu li pomuvelo oPetrus. 15Ovantu ve mu yaka hava tyaa: “Mo yadhuluka.” Omukadhona wa anya ha tya oPetrus e li pondje. Ve mu yaka hava tyaa: “Nkwai omweengeli we.”

16Tainkolo mave mu tetha ombata, Petrus wa twikila okupompola pomuvelo, hiva yelula omuvelo, va mona Petrus, have kumwa. 17Petrus we ve anda nokuwoko kwe, va nyime. We ve hipululila, Muhona hiee mu pititha mokaliwoso. Ye we ve heela ha tyaa: “Otjipuka hehi ke tji hipululilen̯i Jakob novaitaveli ovakwetu avehe.” Hiee ve heele nyahoka, okutya ye ha piti mo ha i.

18Iya komuhuka hikwa tji, ovayungi va li ava tila unene, mena lyokutya kava li ave tji i okutya Petrus wa i pi. 19Iya Herodes wa yandja elaka okutya Petrus nga taendhwe, iya ye ka monekele. Iya Herodes wa twaa ovayungi movikoya. Wa yandja elaka okutya ngava dhipawe. Kon̯ima yovipuka mbyoka, Herodes wa dha moJudea ha i koKesarea, hako a ka kala omatango.

Et̯o lyaHerodes

20Herodes wa yumanekele unene ovantu wokoTiro nowokoSidon. Ovantu mboka va ka tuma ovantu vawo okulihava oupanga naye. Olutenga ve lihava oupanga naBlastus, omuyungi wombala okutya e ve popile. Hiva dhi mpoka va ya kuHerodes oku ke lihava naye oupanga, mena lyokutya otjilongo tjawo tji pewa ovikulya okudha kotjilongo tjohamba Herodes.

21Iya etango limo Herodes ndyaa holowola, wa dhala omidhalo vye vyouhamba, ha kala pohi kotjipunditumino, ha popitha ovantu. 22Iya ovantu va wololoka hava tyaa: “Ondaka hendji ndjimai popi, hayomuntu, oyakalunga.” 23Dhivadhiva omweengeli waMuhona wa yumba Herodes ouvela ounene, mena lyokutya ka tumbalekele Kalunga. Herodes wa tukwa komativa, ha t̯i.

24Iya odhondaka dhaKalunga dha twikila okuhandjana, ovantu ovengi va ninga ovaitaveli.

25Barnabas naSaulus hiva mana otjilinga tjawo moJerusalem, va tjuna koAntiokia, hava twaelele Johannes nguu tiwa oMarkus.

Etestamende Epe Moludhimba

© 2012 Bible Society of Namibia

More Info | Version Index