Search form

Ovilinga 15

Otjoonganene tjomoJerusalem

1KoJudea kwa dha ovantu vamo, have ya koAntiokia, hava utu okulonga ovaitaveli hava tyaa: “Andaa kaamu piti etanda ngahi tja popiwa moveta yaMoses, kaamu ulu okuhupithwa.” 2Paulus naBarnabas va li nombata onene novantu mboka mbava dhile koJudea. Hapa tokolwa okutya Paulus naBarnabas novaitaveli vamo womoAntiokia ngava ende koJerusalem va ka tompole otjipuka hehi pamo novayapostoli novanene veongalo.

3Wo hiva dhi pokulekelwa keongalo, va yatakana moFoinikia nomoSamaria, va ka enda amava hipulula okutya ovapaani ve liteyulule, va itavele muKalunga. Ondaka hendji ya etela ovaitaveli avehe ehuluko. 4Iya wo hive thiki moJerusalem, va yakulwa keongalo nokovayapostoli nokovanene veongalo. Ve ve hipululila ovipuka avihe Kalunga mbyee ve undapetha. 5Ovafarisai vamo mbava ninga ovaitaveli, va popya hava tyaa: “Ovapaani mbava ila ovaitaveli mava tha okupita etanda, va heelwe okutya ngava takamethe oveta yaMoses.”

6Ovayapostoli novanene veongalo va onganene okutompola otjipuka hehi. 7Hive litetha ombata olule, Petrus wa kulama ha tyaa: “Vakwetu, n̯e mu tji i nawa okutya omatango omengi ngaa pita, Kalunga wa ntjolowola mokati ken̯i ndji ka teethele ovapaani ondaka ombwa, Kalunga hehi we tji ningila okutya va tyee, wo va itavele muKalunga. 8Iya Kalunga, nguu iwa hitji li momutima womuntu, wa yulika okutya ovapaani we ve tambula, hiee ve pa Ombepo Ondhilikwa, ngant̯e wo hiee tu pa. 9Kalunga hiee tu ningila, novapaani otjo e ve ningila. Mena lyeitavelo ndive na lyo, Kalunga we ve ithila po odhonkali dhawo. 10Iya napano mamu yumanekethele tji Kalunga, himamu twike omutenge omudheu komapepe ovaitaveli? Omutenge mboka nt̯e nootateombwale katu u ulile oku u tjinda. 11Nt̯e atuhe twa itavela okutya matu ka hupithwa ket̯ilonkenda lyaMuhona Jesus, iya novapaani wo mbamava itavele mava ka hupithwa.”

12Owingi wovantu auhe wa nyima, hau teelele kuBarnabas naPaulus, himava hipulula ovilingatangan̯eko novilingakumithi mbyoka Kalunga mbyee ve undapetha mokati kovapaani. 13Iya hiva mana okupopya, Jakob ha tyaa: “Vakwetu! Nteelela ndjen̯i! 14Simon we tu thitululile Kalunga olutenga hiaa uta okulitaendhela omwene otjiwan̯a movapaani. 15Odhondaka dhovaprofeti madhi i kumo motjipuka hehi, mena lyokutya mwa sonekwa hinyahi haku tiwaa:

16‘Aame Muhona, me ka tjuna kon̯ima yovipuka hembi,

me ke ya okutungulula onganda yaDavid ndjaa han̯auka,

iya ame me ya okutungulula

ndji i imune po uke,

17opo otjihupe tjovantu avehe va taendhe Muhona,

novapaani avehe mbamba ithana,

va ile ovantu vandje. Muhona otjo ma popi.

18Muhona ovipuka hembi we vi ivithila ae ovakulu.’ ”

19Jakob wa twikila okupopya ha tyaa: “Ame me lipula hinyahi okutya andaa ovapaani ve liteyulula, hava itavele muKalunga, hátu ve twike uke oudheu. 20Iya ngava sonekelwe vala omukanda, va heelwe okutya ngave litjaele ovikulya avihe vyovikalunga, háva li onyama yotjipuka hitja pondwa ne ombindhi, wo háva lala novantu. 21Iya Moses u na ovateethi ve nalukulu movitungwalongo avihe, omisonekwa ngahi vi tangwa modhosinagoga Esabati alihe.”

Etokolo lyOtjoonganene

22Ovayapostoli novanene veongalo neongalo alihe va tokola okuholowola ovalumentu vamo, have ve tumu koAntiokia pamo naPaulus naBarnabas. Va holowola Judas nguu tiwa Barsabas naSilas, mbava li ovanakomeho wovaitaveli, 23have ve pa omukanda mbwaa sonekwa hinyahi:

“Nt̯e ovayapostoli novanene veongalo ovakwen̯i, matu mu menekele po n̯e amuhe ovaitaveli ovakwetu owomoAntiokia, nomoSiria nomoKilikia mbamwa dha moupaani. 24Nt̯e twa tyaa okutya ovantu vamo owomunt̯e ve mu pukitha, have mu ngwangwaneke nodhondaka dhawo ovene, iya nt̯e hant̯e twe ve tuma. 25Nt̯e atuhe twa ongana, hatu tokola okuholowola ovalumentu vamo tu ve tume kun̯e pamo novakwetu ovatumbalekwa Barnabas naPaulus, 26mbave liyambela omienyo vyawo mena lyotjilinga tjaMuhona wetu Jesus Kristus. 27Nt̯e napano matu mu tumine Judas naSilas mbamave ya oku mu hipululila nawa ovipuka hembi mbitwa soneka. 28Ombepo Ondhilikwa ye tu yulikila okutya ahamatu mu twike uke omutenge umo kakele vala kovipuka mbimavi landula hempa: 29Hámu li ovikulya vyombaveka, hámu li ombindhi ne onyama yotjipuka hitja pondwa, n̯e hámu lala novantu. Andaa mamu litjaele ovipuka hembi, mamu ningi nawa. Kalen̯i po nawa!”

30Odhontumwa dha lekelwa okudha koJerusalem, hive thiki moAntiokia, va onga ovaitaveli avehe, have ve pa omukanda. 31Ovaitaveli hiva tanga omukanda, omitima vyawo vya li nehuluko enene mena lyondaka ombwa ndjee ve tendeleka. 32Judas naSilas mboka mbava li ovaprofeti va popya otjingi okukoleka nokuvandhipaleka ovaitaveli. 33Judas naSilas va kala ko ovivike vimo, ovaitaveli ve ve lekela nawa va tjune kumbave ve tumine. 34[Iya Silas wa tokola okukala puwo.]

35Paulus naBarnabas va kala omatango moAntiokia, va li amava longo otjo mava teetha ondaka yaMuhona pamo novaitaveli ovakwawo.

Paulus naBarnabas mave liyapuka

36Kon̯ima yomatango Paulus wa heela Barnabas ha tyaa: “Ngatu ende tu ka valulile po ovakwetu kodhondolopa adhihe hutwa teethelele ondaka yaMuhona, nt̯e tu ka tale okutya ve li po vi.” 37Barnabas wa halele okutya va ende pamo naJohannes nguu tiwa oMarkus. 38Paulus kaa li ama hala va ende naMarkus, mena lyokutya we ve thiaa moPamfilia, ha anya okuundapa pamo nawo. 39Pa kala odhombata odhonene pokati kooPaulus naBarnabas, katee ve liyapuka. Barnabas wa ya naMarkus, hava londo mombapolo, hava i koKipros. 40Iya Paulus wa holowola Silas. Ovaitaveli hiva yandja Paulus met̯ilonkenda lyaMuhona, ha i. 41Ye wa yatakana moSiria nomoKilikia ama pameke omaongalo.

Etestamende Epe Moludhimba

© 2012 Bible Society of Namibia

More Info | Version Index