Search form

Ovilinga 18

Paulus moKorinto

1Kon̯ima yovipuka hembi Paulus wa dha moAtena, ha i koKorinto. 2MoKorinto omo a ka vadha Omujuda nguu tiwa oAkula nomukadhe Priskila. Omulumentu hengu wa yumukilwa moPontus, wa vadhwa opo e ya okudha koItalia, mena lyokutya omukesari Klaudius wa heela Ovajuda avehe okutya ngava dhe mo moRoma. Paulus wa ya oku ke ve tala, 3ha kala puwo, hava undapa pamo, mena lyokutya wa li omuundapi wodhotenda ngawo. 4Paulus wa popya mosinagoga mEsabati alihe, ha itaveletha Ovajuda nOvagreka.

5Iya Silas naTimoteus hive thiki, moKorinto okudha koMakedonia, va vadha Paulus ae litwaa mokuteetha odhondaka dhaKalunga nokuyulikila Ovajuda okutya Jesus oye e li Messias. 6Ovajuda hive mu kondjetha, ve mu penya, iya Paulus we lipupula ombuma kovikutu vye, he ve heele ha tyaa: “Andaa mwa ka keka, onkali oyen̯i ovene. Ame hí na mo tja motjipuka hehi. Ame okudha ndino hendi, me i ndji ka teethele ovapaani.” 7Paulus wa dha po, ha ka kala konganda yomulumentu omutilikalunga nguu tiwa oTitius Justus. Onganda ye ya li popedhi nosinagoga. 8Krispus, ngwaa li omunene wosinagoga, wa itavela muMuhona pamo nonganda ye aihe. Ovantu ovengi owomoKorinto mbava teele ondaka yaKalunga, va itavela, hava tjatjwa.

9Out̯iku umo Muhona wa popitha Paulus memoneko ha tyaa: “Hó tila, twikila okuteetha, hó nyimi, 10mena lyokutya ame ndji li pamo naove. Kape na omuntu ngume ku kondjetha, he ku ningile ouvi, mena lyokutya ndji na ovantu ovengi motjitungwalongo hehi.” 11MoKorinto Paulus wa kala mo ombula imo nomiedhi epandu, ama longo ovantu ondaka yaKalunga.

12Iya Gallio hiaa li omutumini moAkaia, Ovajuda ve litwaa kumo, hava kambula Paulus, have mu twala kompela. 13Iya hava tyaa: “Omulumentu hengu u hekela ovantu va undapele Kalunga nonkalo ndjihai i kumo noveta.”

14Iya Paulus hiee tje hala okupopya, Gallio wa heela Ovajuda ha tyaa: “Vajuda n̯e, ngaile pa yonwa ne pa undapwa ovilinga vyouputji, ngai mbe likambulithile oku mu teelela. 15Iya napano himamu litetha ombata ouhunga nodhondaka nomana novitumino vyen̯i ovene, on̯e ovene mwa thele okulipula novipuka hembi. Ame hime ulu okukoya ovipuka mbii li nyahoka.” 16Ye we ve lamba mo mompela. 17Wo avehe va kambula Sostenes, ngwaa li omunene wosinagoga, have mu tonene komeho yompela. Gallio kaa li ae na ko natja nokanunu.

Paulus ma tjuna koAntiokia

18Paulus wa kala moKorinto omatango omengi pamo novaitaveli, he ve lekele, ha i pamo naPriskila naAkula koSiria. Iya tainkolo ahaveya ya nombapolo, wa kululwa moKenkrea mena lyeano ndyaa vadhwa a ana.19Wo ve ya moEfeso, moka Paulus mwaa thiaa Priskila naAkula, ye wa ya kosinagoga hoka huva ka tompola nOvajuda. 20Iya Ovajuda hiva pula Paulus, a kale pamo nawo omatango omengi, ye ka itavelele. 21Iya ye we ve lekela ama tyaa: “Kalunga andaa we tji hala, me tjuna uke.” Paulus moEfeso wa dha mo nombapolo.

22Iya hiee thiki moKesarea, wa ya koJerusalem ha ka popitha eongalo, okudha mpoka ha i koAntiokia. 23Moka omo a kala omatango amo. Kon̯ima ha ka valulila po ovilongo novilongo vyomotjit̯indwalongo tjaGalatia notjaFrigia. Wa popila ovaitaveli vahoka, va kole meitavelo lyawo.

Apollos ma teetha moEfeso nomoKorinto

24Omujuda umo nguu tiwa oApollos ngwaa yumukilwa moAleksandria, we dhile koEfeso. Ye wa li nounongo wokupopya nokwiiwa omisonekwa. 25Apollos wa longelwe ondjila yaMuhona, ha teetha nouvandhi, ha longo ovantu ouhunga naJesus. Iya ye wa ivilwe vala etjatjo lyaJohannes. 26Apollos wa uta okuteetha nouvandhi mosinagoga. Iya Priskila naAkula hive mu teelela, ve mu ithana e ye koyawo. Wo ve mu longa, have mu thitululile nawa ondjila yaKalunga. 27Iya Apollos hiaa li ama hala okuya koAkaia, ovaitaveli womoEfeso ve mu popila mouwa, wo hava soneke omukanda, e u twaelele kovaitaveli mbave li koAkaia, oku ve heela okutya ve mu yakule nawa. Iya ye hiee thiki, wa popila unene ovantu mboka mbava ninga ovaitaveli ket̯ilonkenda lyaKalunga. 28Iya wa suka Ovajuda movipathi vyovantu avehe, ama itha momisonekwa okutya Jesus oye e li Messias.

Etestamende Epe Moludhimba

© 2012 Bible Society of Namibia

More Info | Version Index