Search form

Ovilinga 2

Okuya kwOmbepo Ondhilikwa

1Iya etango lyaPentekoste hilye thiki, ovaitaveli avehe va vadhwa ava ongana poluvedhe lumo. 2Dhivadhiva pa popya ondaka ndjaa dha meulu, ndjaa li amai ngala ombepo amai pepe nodhonkono, hai yula mondjuwo aihe muva li ava kala pohi. 3Iya wo va mona omalaka ngaa ngala omalakulaku omulilo ngae liyapauka, haa wile kombanda yomuntu auhe. 4Wo avehe ve yulithwa Ombepo Ondhilikwa, hava utu okupopya omalaka amo ngae lili, Ombepo Ondhilikwa ngahi ye ve pa va popye.

5MoJerusalem mwa li ovalumentu Ovajuda ovatilikalunga, mbava dha kovilongo novilongo vyomouye. 6Owingi wovantu hiva tee otjihoomo soka, va ongana pamo, wo va kumwa, mena lyokutya ve ve tyaa, auhe wa li ae yuvite melaka lye omwene. 7Wo avehe va tila, hava kumwa hava tyaa: “Talen̯i tuu, avehe nan̯i hemba mbamava popi havaGalilea? 8Ovi, iya nan̯i atuhe hitu ve yuvite amava popi momalaka etu? 9Nt̯e mbatu li hempa, tuVapartia nOvamedia nOvaelam, nahemba mbava kala moMesopotamia nomoJudea nomoKappadokia nowomoPontus nowomoAsia, 10nOvafrigia nOvapamfilia nOvaegipiti nowomovilongo mbyoka vyaLibia mbyaa ama koKireni nOvaroma hemba mbava kala muno nOvajuda mbava yumukilwa moujuda nambave lininga Ovajuda, 11nOvakreta nOvaarabia, nt̯e atuhe tu ve yuvite himava popi ovilinga ovinene vyaKalunga melaka lyetu ovene.” 12Wo avehe va kumwa hava limbililwa, have lipula hava tyaa: “Hika otjipuka patji?”

13Iya vamo ve ve penya hava tyaa: “Ovalumentu hemba va pyaluka.”

Eteetho lyaPetrus

14Petrus wa kulama pamo nomulongo naumo, ha popi nondaka ndjaa yeluka okuheela owingi wovantu ha tyaa: “Vajuda vakwetu, nan̯e amuhe mbamu li moJerusalem, nteelela ndjen̯i nawa, hime mu heele. 15Soka himamu soko okutya ovantu hemba va pyaluka, hatjo. Owola hendji ontyamoovi yomuhuka. 16Iya hehi otjo tja popilwe komuprofeti Joel, hiaa tile:

17‘Kalunga ma tya, omatango opehulilo

ame me ka tila kombanda yovantu avehe Ombepo yandje,

ovanwen̯i ovadhantu novakadhona

mava ka teetha odhondaka dhaKalunga,

omatele novathukona mava ka mona omamoneko,

ovanene ven̯i mava ka lota omalambandjodhi.

18Iinga, momatango ngoka

me ka yandja wo Ombepo yandje

movapika vandje ovalumentu novakadhintu,

nawo mava ka teetha odhondaka dhaKalunga.

19Me ka yulika ovikumithi peulu meulu

nomatangan̯eko pohi kombanda yohi,

maku ka kala ombindhi nomulilo nomwithi mbwaa twiima.

20Etango ndyoka enene lyaMuhona ndyaa tumbala,

tainkolo ahaliye ya,

etango mali ka tjituka et̯iku,

omwedhi mau ka thilaela ngombindhi.

21Iya auhe nguma kumbu mena lyaMuhona,

ma ka hupithwa.’

22“Vantu n̯e Ovaisraeli, teelelen̯i odhondaka hendhi! Jesus Omunasareta wa li omulumentu ngwaa holowolwa kuKalunga. Vaisraeli, Kalunga we mu holololela tjo kovilingankono, kovilingakumithi nokomatangan̯eko ngoka Kalunga ngaa undapetha Jesus mokati ken̯i, n̯e ovene ngahi mu tji i nawa. 23Kalunga omwene we tji soka ae lukulu, ye he tji tokola okutya Jesus ma yandjwa momawoko en̯i, on̯e mwe mu yandja momawoko ovantu mbahave i oveta yaMoses, hamu mu papeletha komutjaakano, hamu mu dhipaetha. 24Kalunga we mu imuna kout̯e, ye we mu kutulula momiihamo vyet̯o, mena lyokutya et̯o kali ulile oku mu kambulila moupika. 25Iya David we mu popya ha tyaa:

‘Ame ndji mona Muhona apehe ae li kotjipala tjandje.

Ye u kala kokulyo kwandje, opo hé putala.

26Iya omutima wandje we hulukwa,

elaka lyandje li na ondolo onene,

nolutu lwandje wo malu ka thuva meliun̯iko,

27mena lyokutya omwenyo wandje koo u yethele motjovat̯e,

ove koo yetha olutu lwomudhilikwa woye lu wole.

28Wa ndonga odhondjila dhomwenyo,

okukala po kwoye kwe ndjulitha ehuluko.’

29“Valumentu vakwetu, ndjetha ndjen̯i, ndji mu heele poluhandja ouhunga natateombwale David okutya wa t̯a, ha pakwa mombila, katee ndino hendi ombila ye tu i mona. 30Iya hiaa li omuprofeti wa ivilwe okutya Kalunga we mu anena eano okutya ontekulona ye imo etango limo mai ka kala ohamba. 31David wa iwa himatji ka ningwa komeho, iya we tu heela okutya Messias ma ka imunwa kout̯e. Ye wa popya ha tyaa:

‘Kalunga ke mu yethelele motjovat̯e

nolutu lwe kalu yethelwe lu wole.’

32Kalunga wa imuna Jesus hengu kout̯e, nt̯e atuhe tudhombangi dheimuko hendi. 33Jesus wa yelulilwa peulu kokulyo kwaKalunga, iya ye wa pewa eudhiko lyOmbepo Ondhilikwa, Ihe ngahi e mu udhikila. Jesus we tu pa Ombepo Ondhilikwa, ndjimu mona napano nandjimu tyaa. 34Iya David haye a londa keulu, iya ye omwene wa popya ama tyaa:

‘Muhona wa heela Muhona wandje ha tyaa:

Kala pohi kokulyo kwandje,

35katee me ningi odhondjedhi dhoye otjilyatelo tjodhompadhi dhoye.’

36Iya Ovaisraeli avehe ngava kale ave tji i nawa okutya Jesus hengu ngumwa papela komutjaakano, Kalunga we mu ninga Muhona, naMessias.”

Ovantu omayovi atatu mava tjatjwa

37Iya ovantu hive tji tee, tje ve ihametha omitima, wo hava heele Petrus novayapostoli ovakwawo hava tyaa: “Valumentu vakwetu, ngatu ninge vi?”

38Petrus we ve yaka ha tyaa: “Liteyululen̯i, omuntu auhe e litjatjethe mena lyaJesus Kristus, mu ithilwe po odhonkali dhen̯i. Iya n̯e mamu ka pewa otjali Ombepo Ondhilikwa. 39Iya eudhiko hendi ndimwa udhikilwa olyen̯i nodhondele dhen̯i novantu avehe mbave li kokule, wo avehe Muhona Kalunga ketu me ke ve ithana.”

40Petrus we ve hipululila odhondaka odhingi, ye he ve ilikin̯a ha tyaa: “Hupithwen̯i mo mekula hendi ndyaa uvalala.” 41Iya mboka mbava tambula odhondaka dhe, va tjatjwa, metango ndyoka mwa wedhwa ovantu mbave lithike pomayovi atatu.

Oukumo wovaitaveli

42Iya wo va kambulitha okukala melongo lyovayapostoli, moukumo, mokulya nomokukumba pamo. 43Ovantu avehe va kala nowoma, novayapostoli va undapele ovilingakumithi nomatangan̯eko omengi. 44Iya avehe hemba mbava itavela va kala pamo, nemona lyawo ve li twaa kumo. 45Iya wo va landetha po ovipuka vyawo nomamona awo, have liyandjele odhombongo, auhe ha pewa ngahi ma hepa. 46Etango alihe va ongana pamo motempeli nomutima umo. Wo va lya pamo modhonganda nodhonganda, have liyandjele ovikulya vyawo nawa nehuluko, 47hava tanga Kalunga. Va li ava hopwa kovantu avehe, etango alihe Muhona wa wedha mo mokati kawo mbava hupithwa.

Etestamende Epe Moludhimba

© 2012 Bible Society of Namibia

More Info | Version Index