Search form

Ovilinga 6

Ovalumentu epanduvali mava holowolwa okupopila ovayapostoli

1Iya momatango ngenya otjihavelo tjovaitaveli tja kala amatji ningi otjin̯ingi unene, pa ka kala omalutangu pokati kOvajuda mbava popya Otjigreka nOvaheberi. Ovajuda mbava popya Otjigreka va tanguna okutya etango alihe ovikulya amavi yandjwa, ovahepe vawo va hupa ko. 2Ovayapostoli va onganeka ovaitaveli avehe, have ve heele hava tyaa: “Nt̯e hanawa okuyetha okuteetha odhondaka dhaKalunga, tu litwee mokuyandja ovikulya. 3Vakwetu, holowolen̯i mokati ken̯i ovalumentu epanduvali, mbave tjiiwa okuliuun̯ikwa, ovanandunge, wo mbave na Ombepo Ondhilikwa. Nt̯e owo matu twaa motjilinga hehi. 4Nt̯e ovene matu hala okulitwaa mealikano nomotjilinga tjeteetho lyodhondaka dhaKalunga.”

5Eongalo alihe lya pandula ondunge yovayapostoli. Iya va holowola Stefanus, omulumentu ngwaa li neitavelo nOmbepo Ondhilikwa naFilippus naProkorus naNikanor naTimon naParmenas naNikolaus lukulu ngwaa li omupaani wokoAntiokia, ngwee lininga Omujuda. 6Eongalo lya eta ovalumentu hemba kotjipala tjovayapostoli, ovayapostoli ve ve tendeka omawoko, have ve kumbile.

7Odhondaka dhaKalunga dha twikila okuhandjana. Otjihavelo tjovaitaveli moJerusalem tja ninga otjingi, nowingi wovayambethi va ninga ovaitaveli.

Stefanus ma kambulwa

8Stefanus wa pelwe elao nodhonkono kuKalunga. Wa undapa ovilingakumithi novilingatangan̯eko ovinene mokati kovantu. 9Iya ovalumentu vamo ve mu t̯ila onki. Ovalumentu mboka va li owomosinagoga ndjii tiwaa: “Osinagoga yovalumentu mbava kutuluka,” moka mumwa li Ovajuda, mboka mbava dha koKireni nokoAleksandria, va uta okutetha Stefanus ombata. Ovantu vamo mbava dha koKilikia nokoAsia, va uta uke oku mu tetha ombata. 10Iya Ombepo ya pa Stefanus odhondunge, iya kava ulile uke oku mu yaka ne oku mu tetha ombata. 11Iya va longa ovalumentu vamo ovimama, opo va kuminine Stefanus va tyee: “Nt̯e twe mu tee ama penye Moses naKalunga.” 12Iya ovakuminini va hongaetha ovantu novanene novalongiveta, wo ve ya, have mu kambula, have mu nanene mOtjoongi tjOvanene. 13Wo va eta po ovantu vamo mbava popya ovithithi, hava kuminine Stefanus hava tyaa: “Omulumentu hengu apehe u penya oluvedhe hendu oludhilikwa noveta yaMoses. 14Nt̯e twe mu tyaa ama tyaa: ‘Jesus Omunasareta ma ka han̯auna po oluvedhe hendu, ye ha ka lundulula odhonteto ndhitwa pewa kuMoses.’ ” 15Avehe mbava li mOtjoongi va tongolola Stefanus hava mono okutya otjipala tje matji ngala otjipala tjomweengeli.

Etestamende Epe Moludhimba

© 2012 Bible Society of Namibia

More Info | Version Index