Search form

Ovilinga 7

Eteetho lyaStefanus

1Omuyambethi omunene wa pula Stefanus ha tyaa: “Himatji popiwa otjatjili?”

2Stefanus we mu yaka ha tyaa: “Valumentu vakwetu nootateombwale, nteelela ndjen̯i! Kalunga ketumbalo we liholololela tateombwale Abraham, hiaa li moMesopotamia, tainkolo héya dhilukila koHaran. 3Kalunga wa heela Abraham ha tyaa: ‘Thiaa po omuhoko woye notjilongo tjen̯i, enda kotjilongo hoka hume ku yulikile.’ 4Abraham wa dhiluka motjilongo tjaKaldea, ha ka tunga koHaran. Ihe yaAbraham hiaa t̯i, Kalunga wa dhilulila Abraham motjilongo hehi mumu li napano. 5Kalunga ka pinganethele Abraham okapambu kohi hendji ka ninge oke omwene nokoholo. Iya Kalunga we mu udhikila vala okutya me mu pa otjilongo, tjo matji ka kala otjoluyumuko lwe kon̯ima yet̯o lye, nandaku tiwa potembu ndjoka Abraham hima pewa omaudhiko henga, kaa li nondele. 6Kalunga wa heela Abraham ha tyaa: ‘Ovanoye mava ka kala odhongendi motjilongo tjambangu, omo mava ka kala ovapika, mava ka monethwa ovihuna kovene wotjilongo soka oule wodhombula omathele ane. 7Iya ame me ka yumaneka otjiwan̯a soka himatji ke ve kambula oupika, kon̯ima yotembu ndjoka mava ka dhiluka motjilongo moka, have ya okuntumbalekela pompuka hempa.’ 8Kalunga wa twaa po ewaneneno pokati ke naAbraham netangan̯eko lyewaneneno hendi, etanda. Iya Isak hiaa yumukwa, Abraham we mu pititha etanda kon̯ima yotjivike tjimo. Isak wa pititha omuna Jakob etanda, Jakob wa pititha ovana omulongo navavali etanda, mboka ootateombwale.

9“Ootateombwale, odhondele dhaJakob ovadhantu, va t̯ila onki omunitjawo Josef, have mu landetha po, ha ka kala omupika koEgipiti. Iya Kalunga wa li pamo naye, 10he mu popile moudheu we auhe. Iya kotjipala tjaFarao, ohamba yaEgipiti, Kalunga wa pele Josef elao nounongo. Ohamba yaEgipiti ya vyaaletha Josef, a ninge elombe lyotjilongo nolyombala aihe yohamba. 11Ondjala hiye ya motjilongo atjihe tjaEgipiti notjaKanana, ya eta oluhepo olunene. Ootateombwale kave na mpava li amava ulu okumona ovikulya. 12Jakob hiaa tee okutya koEgipiti ku na ovilya, wa tuma ko ovana, ootateombwale, otjikando tjolutenga. 13Motjikando tjawo otjityavali, Josef we liholololela ovakulwe, naFarao wa heelwa ovawo vaJosef. 14Iya Josef wa tumina ihe Jakob elaka, e ye koEgipiti pamo nonganda ye aihe, kumo va li ovantu omilongo epanduvali navatano. 15Iya Jakob wa ya koEgipiti, hoka ye omwene novana ootateombwale huva ka t̯ila. 16Iya wo hiva t̯i, va twalwa koSikem, hava ka pakwa mombila hendji Abraham ndjaa landele nodhombongo kodhondele dhaEmmor.

17“Otembu yaKalunga yokuhwithila po omaudhiko e, ngoka ngaa udhikila Abraham, hiye ya popedhi, otjihavelo tjotjiwan̯a tjetu moEgipiti tja ninga otjin̯ingi unene, 18katee kwe ke ya ohamba, ndjee ke ya okutumina Egipiti, ndjoka ndjaa li ahai i Josef nokanunu. 19Otjiwan̯a tjetu ye tji ninga ovineya, yo hai tatetha ootateombwale, hai ve tumin̯in̯a okuyekelahi oupepe wawo, mbwaa dhi pokuyumukwa, u t̯e. 20Iya potembu mpoka Moses opo a yumukwa, ye wa li ondele omuwa, ha hopwa kuKalunga. Moses wa yungilwa monganda yaihe oule womiedhi vitatu. 21Iya hiaa ithwa mo monganda, ondele omukadhona waFarao we mu itha po, he mu tekula, a ninge omuna omudhantu. 22Moses wa longwa ounongo auhe wOvaegipiti, wa li omulumentu ombandhi melaka nomovilinga.

23“Moses hiaa ningi odhombula omilongo vine, wa tokola, a ka valule kOvaisraeli ovakwawo. 24Wa vadha ko Omwiisraeli umo ama tonwa kOmweegipiti. Moses wa amena Omwiisraeli, ye ha kambulile Omweegipiti onkongo, he mu dhipaa. 25Moses wa li ama tya pamo otjiwan̯a tje tja li atji tji i okutya Kalunga ma hala oku mu undapetha, opo e ve kutulule moupika, iya nan̯i mbenya kava li ave tji i. 26Etango limo Moses wa vadhele Ovaisraeli vavali amava lu, ha lolo oku ve anununa, he ve heele ha tyaa: ‘Vantu n̯e, n̯e muvaihe imo, mamu lwile tji?’ 27Iya omulumentu ngoka ngwaa li ama tono omukwawo, wa yundula Moses, he mu pula ha tyaa: ‘Aan̯i ngwee ku twaa po, u kale omutumini nomuvyuululi wetu? 28Mo hala okundhipaa ngahi wa dhipaele Omweegipiti ngunya ongulohi?’ 29Moses hiaa tee odhondaka ndhoka, wa ka inkolela kotjilongo tjaMidian. Hoka oko a ka yumukila ovana ovadhantu vavali.

30“Hipa piti odhombula omilongo vine, omweengeli we liholololela Moses meno ndyaa tema omulilo, mokuti popedhi nondundu yaSinai. 31Moses wa li ae kuminwa emoneko ndyoka, ha hweene popedhi neno, a tale nawa. Iya wa tyaa ondaka yaMuhona, hai mu popitha hai tyaa: 32‘Aame Kalunga kowoihoombwale, Kalunga kaAbraham, Kalunga kaIsak naKalunga kaJakob.’ Moses wa kambulwa kontilo, ha utu okuteketa, nokeno ahama ulu okutala ko. 33Muhona we mu heela ha tyaa: ‘Tapula odhongaku, mena lyokutya oluvedhe hendu mpawa kulama oluvedhe oludhilikwa. 34Ame mba mona nawanawa omatatetho otjiwan̯a tjandje moEgipiti, mba tyaa omikemo vyatjo, mba heluka okuya oku ve kutulula. Iya indjo, me hala oku ku tuma koEgipiti.’

35“Moses hengu oye e li ye ngwaa anywa kOvaisraeli hiva tile: ‘Aan̯i ngwee ku twaa po u kale omutumini nomuvyuululi?’ Ye oye e li ye Kalunga ngwaa tumine, a kale omutumini nomuyowoli wawo kepopilo lyomweengeli ngoka ngwee liholololela ye meno ndyaa tema omulilo. 36Moses wa dhilula Ovaisraeli moEgipiti, ha undapa ovilingakumithi novilingatangan̯eko moEgipiti nomElunga ethilantu nomokuti oule wodhombula omilongo vine. 37Moses oye e li ye tuu ngoka ngwaa heelele Ovaisraeli ha tyaa: ‘Kalunga me ke mu tumina omuprofeti, ngaame hiaa ntumine kun̯e, nguma ka dha motjiwan̯a tjen̯i ovene.’ 38Moses oye e li ngwaa li pamo nOvaisraeli, hiva onganene mokuti. Ye wa kala mokuti pamo nootateombwale nomweengeli ngoka ngwaa popile naye kondundu yaSinai. Ye wa pewa kuKalunga odhondaka ndhoka, ndhimadhi yandja omwenyo, e tu heele dho.

39“Iya ootateombwale kava li amava hala okwiitavela Moses. Va sokele oku mu yetha va tjune koEgipiti. 40Ovaisraeli va heela Aron hava tyaa: ‘Tu ningila ookalunga mbamave tu hongolele komeho, mena lyokutya Moses ngoka ngwee tu dhilula moEgipiti, katu tji i okutya wa vadhwa kutji?’ 41Iya potembu ndjoka Ovaisraeli ve liningila otjikalunga hitji ngala ontana, have tji yamba, hava ningi otjipito tjokuhulukilwa otjikalunga soka hive liningila nomawoko awo ovene. 42Kalunga wa dha po puwo, he ve yetha va tumbaleke odhonyothi dhokeulu, ngahi kwa sonekwa membo lyovaprofeti, hiku tiwaa:

‘Vaisraeli n̯e! Haame mwa dhipaelele,

n̯e haame mwa yambele omayambo mokuti

oule wodhombula omilongo vine.

43N̯e mwa tjinda otenda yotjikalunga Molok,

notjithika tjonyothi tjotjikalunga tjen̯i Refan,

ovikalunga mbimwe liningila oku vi tumbaleka.

Iya ame me mu tumu mounkwatwa

tjikoohehinya tjaBabilon.’

44“Mokuti ootateombwale va li ave na otenda ndjoka ndji yulika okutya Kalunga u li mokati kawo. Otenda ndjoka ya tungilwe nawanawa, Kalunga ngahi a heelele Moses, e i tunge molupe lwethano ndyoka Kalunga ndyee mu yulikila. 45Ootateombwale hive i pewa kowoihe, ve i eta naJosua, hava vyaala otjilongo tjovapaani, mboka Kalunga mbaa lamba movipathi vyawo. Otenda otjo va kala nayo nyahoka katee potembu yaDavid. 46David wa t̯ilwa onkenda kuKalunga, ha kumbu Kalunga e mu yandjele okutungila Kalunga kaJakob otempeli. 47Iya Salomo oye a tungilile Kalunga otempeli.

48“Iya Kalunga Owokombandambanda ka kala modhonganda ndhii tungwa kovantu, omuprofeti ngahi ma popi ha tyaa:

49‘Muhona ma tya, eulu otjipunditumino tjandje,

ohi otjilyatelo tjodhompadhi dhandje.

Mamu ntungile onganda ndjii li vi?

Ne oluvedhe lwandje lwokuthuvila ngaile malu kala pi?

50Ovipuka avihe mbika kavi undapelwe komawoko andje?’ ”

51Stefanus wa twikila ko uke okupopya ha tyaa: “N̯e mwa poloka. Omatwi nomitima vyen̯i vi ngala vala ovyovapaani, ondaka yaKalunga kamu i tee. N̯e mu ngala vala owoihoombwale, apehe mu kondjetha Ombepo Ondhilikwa. 52Aan̯i omuprofeti nguha tatethelwe kowoihoombwale? Owoihoombwale va dhipaa ovatumwa vaKalunga, mboka mbava popya ouhunga nokuya kwOmuvyuuki waKalunga, ngumwa weleleka, hamu mu dhipaa. 53N̯e on̯e mwa pewa ovitumino, oveta yaKalunga ndjaa etelwe kovaengeli, iya nan̯i n̯e kamu i itavelele!”

Stefanus ma dhipawa nomawe

54Ovanene wOtjoongi hiva tee odhondaka dhaStefanus, dhe ve t̯itha outheno, hadhi ve yumanetha. 55Iya Stefanus wa li ae yula Ombepo Ondhilikwa, wa tala peulu keulu, ha mono ko elaimo lyaKalunga naJesus aa kulama kokulyo kwaKalunga. 56Stefanus wa heela ovanene wOtjoongi ha tyaa: “Talen̯i, ndji lwete eulu ndyaa yeluka, nOmuna wOmuntu wa kulama kokulyo kwaKalunga.”

57Iya ovanene wOtjoongi va tona otjuuyila otjinene, have lipata komatwi, okudha mpoka avehe have mu lombokele, 58wo ve mu lamba mo motjitungwalongo, have mu dhipaa nomawe. Odhombangi dha twaa ovikutu vyawo pomudhantu nguu tiwa oSaulus. 59Iya tainkolo va li amava twikile okutona Stefanus nomawe, Stefanus wa kumba kuKalunga ha tyaa: “Muhona Jesus, tambula omwenyo wandje!” 60Iya Stefanus wa twika odhongolo, ha wololoka peulu ha tyaa: “Muhona, hó ve tjun̯ine onkali hendji.” Stefanus hiaa dhi pokupopya nyahoka, ha t̯i.

Etestamende Epe Moludhimba

© 2012 Bible Society of Namibia

More Info | Version Index