Search form

Ovilinga 8

1Saulus wa li ae yuvite nawa Stefanus hiaa dhipawa.

Saulus ma tatetha eongalo

Okudha ketango ndyoka eongalo lyaJerusalem hilya vadhwa komatatetho omanene, ovaitaveli avehe va handjanena movilongo vyaJudea novyaSamaria, kakele vala kovayapostoli. 2Ovalumentu vamo ovatilikalunga va paka Stefanus, wo ve mu lila unene.

3Iya Saulus wa uta okuhan̯auna po eongalo. Ye wa hita modhonganda, ha kokolola mo ovaitaveli, ovalumentu novakadhintu, he ve yedhilile mokaliwoso.

Evaengeli mali teethwa moSamaria

4Ovaitaveli mbava handjanekwa nyahi, va ya akuhe, hava ka teetha odhondaka dhaKalunga. 5Filippus wa ya kotjitungwalongo tjaSamaria, he ve teethele Messias. 6Owingi wovantu hiwa tyaa hitja popiwa kuFilippus, wa mona ovilingatangan̯eko mbyaa undapa, have litwaa mo nawa okuteelela soka hiaa li ama popi. 7Odhombepo odhombi dha dha mo movantu ovengi, amadhi ulu unene. Ovilema novantu ovengi mbava li novinteya, va velulwa. 8Iya ovantu womotjitungwalongo soka tjaSamaria ve hulukilwe unene.

9Iya motjitungwalongo soka mwa vadhwa omulumentu umo nguu tiwa oSimon, wa li ompule ndjii kumitha Ovasamaria, wa li ae lityaa omunene, 10novantu avehe ovanene novanunu ve mu tumbaleka amava tyaa: “Omulumentu hengu oye e li ye nguu tiwaa: ‘Odhonkono odhonene dhaKalunga.’ ” 11Wo ve litwaa mo muye, mena lyokutya we ve kumitha olule noumpule we. 12Iya ovantu hiva itavele ondaka ombwa ndjoka ndjiva teethelwa kuFilippus, ndjimai popi otjilongo tjaKalunga nena lyaJesus Kristus, ovalumentu novakadhintu va tjatjwa. 13Simon omwene naye wo wa itavela Jesus, iya hiaa tjatjwa wa kala puFilippus. Ye wa li aa kuminwa ovilingatangan̯eko novilingankono mbyoka mbyaa li amavi undapwa kuFilippus.

14Ovayapostoli womoJerusalem hiva tee okutya Ovasamaria va itavele odhondaka dhaKalunga, ve ve tumina Petrus naJohannes. 15Wo hive thiki ko, va kumbila ovaitaveli, opo va pewe Ombepo Ondhilikwa, 16mena lyokutya kakwa li aku na noumo muwo ngwaa vadhwa aa pewa Ombepo Ondhilikwa. Wo va tjatjelelwe vala mena lyaMuhona Jesus. 17Petrus naJohannes va tendeka omawoko awo kovaitaveli, ovaitaveli mboka hava pewa Ombepo Ondhilikwa.

18Iya Simon hiaa mono okutya auhe ngwaa tendekwa omawoko kovayapostoli, wa pewa Ombepo Ondhilikwa, wa etela Petrus naJohannes odhombongo ha tyaa: 19“Naame mpa ndjen̯i wo odhonkono, opo auhe ngume tendeke omawoko, a pewe Ombepo Ondhilikwa.”

20Petrus we mu yaka ha tyaa: “Odhombongo dhoye enda nadho mekeko, mena lyokutya koo ulu okulanda otjali tjaKalunga nodhombongo. 21Koo ulu okuundapa pamo nant̯e, mena lyokutya omalipulo oye kotjipala tjaKalunga kaa vyuukile. 22Iya liteyulula, u yethe omalipulo oye omavi, kumba kuMuhona e ku ithile po soka hiwa ombo awe lipula momutima woye. 23Ame mba mono okutya u na onki unene momutima, ove unkwatwa youlundhi.”

24Simon wa yaka ooPetrus naJohannes ha tyaa: “Nkumbila ndjen̯i kuMuhona, opo hé vadhwa kovipuka mbyoka mbimwa popi.”

25Iya Petrus naJohannes hiva dhi pokuhipulula nokuteetha ondaka yaMuhona, va tjuna koJerusalem. Mondjila himava tjuna koJerusalem, va enda amava teethele moulongo owingi wOvasamaria ondaka ombwa.

Filippus nosekulu yokoEtiopia

26Omweengeli waMuhona wa heela Filippus ha tyaa: “Kulama, enda nokut̯a komakumbinda otjilongo kondjila ndjii heluka koJerusalem okweenda koGasa.” Ondjila hendji i enda moluhandja. 27Filippus wa kulama, ha i. Iya omulumentu umo ngwaa tumbala wokoEtiopia, wa vadhwa mondjila, ama tjuna konganda. Omulumentu hengu wa li osekulu onene nomuyungi wemona lyaKandake, omukadhintu ohamba yokoEtiopia. Ye wa ile koJerusalem oku ka kumba kuKalunga. 28Iya napano wa li ama tjuna koyawo, wa li aa kala pohi ketemba lye, ama tanga membo lyomuprofeti Jesaja. 29Iya Ombepo Ondhilikwa ya heela Filippus hai tyaa: “Enda, u ka kale popedhi netemba ndyoka.”

30Iya Filippus wa dhamukila ketemba, hiaa tee osekulu himai tanga membo lyomuprofeti Jesaja, we mu pula ha tyaa: “Himo tanga u tji yuvite?”

31Osekulu ye mu yaka hai tyaa: “Me tee vi, andaa kape na nguma nt̯itululile?” Iya osekulu ya ithana Filippus, a londe metemba, ye a kale pohi naye. 32Osekulu ya li amai tanga pomusonekwa mpamapa tyaa:

“Ye wa li ngondhu ndjimai twalwa, i ka dhipawe,

wa li ngondjona ndjihai wondala, amai heywa,

iya naye otjinyo tje katji popile.

33Ye wa nunupikwa, iya ye ahama koywa nawa.

Aan̯i nguma ulu okuhipulula odhontekulona dhe?

Onkalamwenyo ye kombanda yohi ya andekwa.”

34Osekulu ya pula Filippus hai tyaa: “Alikana ntjeela ndje okutya omuprofeti ma popi an̯i? Me lipopi omwene ne u na nguma popi?” 35Iya Filippus wa uta okuthitululila osekulu okudha kesoneko ndyoka nokuteetha ondaka ombwa ndjimai popi Jesus. 36Iya tainkolo va li amava ende mondjila, ve ya pompuka mpape na omeva. Osekulu ya heela Filippus hai tyaa: “Omeva hoonga! Otjitji himatji ntjaele okutjatjwa?”

37[Filippus we mu yaka ha tyaa: “Kape na himatji ku tjaele, andaa wa itavele nomwenyo woye auhe.” Osekulu ye mu yaka hai tyaa: “Mba itavele okutya Jesus Kristus oye e li OmunwaKalunga.”]

38Osekulu ya kulametha etemba. Filippus nosekulu va ya momeva, iya Filippus he mu tjatja. 39Hiva dhi momeva, Ombepo yaMuhona ya itha po Filippus, osekulu kai mu mwene uke. Osekulu ya twikila ondjila yayo nehuluko enene. 40Filippus wa ka moneka moAsdod, ha ka yatakana movitungwalongo avihe ama teetha ondaka ombwa, katee e ya koKesarea.

Etestamende Epe Moludhimba

© 2012 Bible Society of Namibia

More Info | Version Index