Search form

Johannes 16

Ovalongwa mava ka lambwalambwa

1“Ovipuka hembi mbe mu heela vyo, opo hámu yetha eitavelo. 2Ovanene wOvajuda mave ke mu lamba mo modhosinagoga dhawo. Iya owola mai ke ya, katango auhe ngume mu dhipaa, ma ka soka okutya aa ningi nyahoka, ma undapele Kalunga. 3Ovipuka hembi mave ke mu ningila vyo, mena lyokutya kave ndji i, naTate kave mu i. 4Iya avihe hembi mbe mu heele vyo, owola yatjo aye thiki, mu thipaluke okutya mbe mu heela tjo.

Otjilinga tjOmbepo Ondhilikwa

“Ovipuka hembi hí mu heelele vyo peutilo, mena lyokutya mba li pun̯e. 5Iya napano me i kungwaa ntumine, kape na tja noumo mun̯e nguma mpula ha tyaa: ‘Mo i pi?’ 6Iya mena lyokutya mbe mu heele ovipuka hembi, omitima vyen̯i vya etetha onkenda. 7Iya ame me mu heele otjatjili okutya onawa hime i mena lyen̯i, mena lyokutya andaa híme i, iya Omupopili kee ya kun̯e. Iya andaa me i, okutya me ke mu tuma kun̯e. 8Omupopili hime ke ya, ma ka yulikila ovantu wouye ouhunga noulundhi nouhunga nouvyuuki nekoyo lyaKalunga. 9Ye me ke ve yulikila oulundhi wovantu, mena lyokutya kava itavelele mwaame. 10Ye me ke ve yulikila ouvyuuki, mena lyokutya me i kuTate, n̯e kaamu ka mbona uke. 11Ye me ke ve yulikila ekoyo lyaKalunga, mena lyokutya omutumini wouye hembu wa koywa.

12“Ndji na uke ovipuka ovingi oku mu heela, atjaa kaamu vi ulu oku vi tyaa napano. 13Ombepo yatjatjili himai ya, mai ke mu longa otjatjili atjihe. Yo kaai ka popya muyo oyene, iya mai ke mu heela soka hiya tyaa, mai ke mu hipululila ovipuka mbyoka mbimavi ke ya. 14Yo mai ka ntumbaleka, mena lyokutya mai ke mu hipululila himai ka tambula kwaame. 15Ovipuka avihe vyaTate ovyandje, otjo me tile Ombepo mai ke mu hipululila himai ka tambula kwaame.

Otjinkendeleka nehuluko

16“Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona.”

17Iya vamo owomovalongwa ve ve lipula hava tyaa: “Matji tya vi, hime tu heele hima tyaa: ‘Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona’? He tu heele uke ha tyaa: ‘Hehi matji ningwa, mena lyokutya me i kuTate.’ ” 18Iya wo ve lipula hava tyaa: “Ma hala okutya vi hima tyaa: ‘Okaluvedhe okanunu’? Katu yuvite okutya ma hala okutya vi.”

19Jesus wa iwa okutya mava hala oku mu pula. We ve heela ha tyaa: “Mamu lipula tji? Ame mbe mu heela okutyaa: ‘Andaa pa piti okaluvedhe okanunu, kaamu ka mbona uke, iya andaa pa piti uke okaluvedhe okanunu, mamu ka mbona.’ 20Ame me mu heele otjatjili okutya mamu ka lila, hamu ka etetha onkenda, iya ouye mau ke hulukwa. Mamu ka kala notjinkendeleka, iya otjinkendeleka tjen̯i matji ka tjituka ehuluko. 21Omukadhintu andaa me lipa omwenyo, u etetha onkenda, mena lyokutya owola ye ye thiki. Iya ondele andaa wa yumukwa, ka thipaluka oviihamo vye mena lyehuluko, mena lyokutya omuntu we ya mouye. 22Iya napano nan̯e mwa etetha onkenda, atjaa me ke mu mona uke, nomitima vyen̯i mavi ke hulukwa, ehuluko ndyoka kape na tja ngume ke mu nyeka lyo.

23“Etango ndyoka, kamu na himamu ka mpula. Ame me mu heele otjatjili okutya atjihe soka himamu kumbu kuTate amamu tumbula ena lyandje, me ke mu pa tjo. 24Katee napano kamu na himuya kumba amamu tumbula ena lyandje, kumben̯i, mamu pewa, ehuluko lyen̯i opo li hwithilwe po.

Jesus wa ula ouye odhonkono

25“Ame mbe mu heele ovipuka hembi momaeli. Owola mai ke ya, katango háme ka popya uke momaeli, iya me ke mu heela odhondaka ndhaa thituluka ouhunga naTate. 26Etango ndyoka mamu ka kumba Tate amamu tumbula ena lyandje, haame uke me ke mu kumbila kuTate. 27Iya Tate omwene u mu hole, mena lyokutya mu ntjole, mwa itavela okutya mba dha kuKalunga. 28Ame mba dha kuTate, he ya mouye, iya me thii po uke ouye, he i kuTate.”

29Ovalongwa ve, ve mu heela hava tyaa: “Napano mo popi odhondaka ndhaa thituluka, koo popi uke momaeli. 30Napano tu tji i okutya ovipuka avihe u vi i, koo hepa omuntu ngume ku pula omapulo. Hehi tje tu itaveletha okutya ove wa dha kuKalunga.”

31Jesus we ve yaka ha tyaa: “Napano mwa itavele? 32Taa tuutuu, owola mai ya, yo ye ya ae, mamu ka handjana po, auhe ma ka ya koyawo. N̯e mamu ka nt̯iaa po aika. Iya hí li po aika, mena lyokutya Tate u li pamo naame. 33Ovipuka hembi mbe mu heele vyo, opo mu kale nouwa mwaame. N̯e mu na omaudheu mouye, atjaa hámu tila, ame mba ula ouye odhonkono!”

Etestamende Epe Moludhimba

© 2012 Bible Society of Namibia

More Info | Version Index