Search form

Lukas 1

1Ovasoneki ovengi va uta okutunga otjihipululo tjovipuka mbyoka mbyaa ningwa mokati ketu, 2ngahi twe vi thiilwa kodhombangi dholutenga nokovalongethi wodhondaka dhaKalunga. 3Teofilus omutumbalekwa, himba thongonona ovipuka avihe okudha keutilo, mba mono okutya tji li nawa naame wo ndji ku sonekele vyo mokuliyondja kwavyo, 4opo u iwe nawa otjatjili mumbyoka mbiwa heelwa.

Okuyumukwa kwaJohannes Omutjatji maku ivithwa

5Potembu yaHerodes, ohamba yaJudea, kwa li aku na omuyambethi nguu tiwa oSakaria, owomotjilombo tjovayambethi tjaAbia nomukadhintu we womovana vaAron nguu tiwa oElisabet. 6Wo aveevali va li ov avyuuki kotjipala tjaKalunga, kava li ave na otjipo mokweenda movitumino avihe nomomaheelo aMuhona. 7Iya wo va li ahave na ondele, mena lyokutya Elisabet wa li ompange, wo aveevali va li ava kulupa.

8Etango limo Sakaria hiaa li ama undapa ovilinga vyouyambethi kotjipala tjaKalunga molenda yotjilombo tje, 9wa holowolwa patjiholowoletho ngahi va ninga monteto youyambethi, a ka twiimin̯e motempeli yaMuhona. 10Engundwa lyovantu lya li pondje, amali kumbu powola yetwiimin̯o.

11Omweengeli waMuhona we mu hololokela aa kulama kokulyo kwotjiyambelo tjokutwiimin̯ina. 12Sakaria wa tila hiee mu mono, nowoma we ya muye. 13Iya omweengeli we mu heela ha tyaa: “Sakaria, hó tila, mena lyokutya okukumba kwoye kwa teeka, omukadhintu woye Elisabet me ku yumukile omudhantu, mo ke mu luka Johannes. 14Ove mo kala au na ehuluko nondolo, novengi mave ke hulukilwa eyumuko lye, 15mena lyokutya ma ka kala omunene kotjipala tjaMuhona. Ovinyu novipyalukithi kee vi nu. Me yulithwa Ombepo Ondhilikwa, tainkolo ama dhi medhimo lyaina. 16Ovaisraeli ovengi me ke ve tjun̯a kuMuhona, Kalunga kawo. 17Oye ma tenge kuMuhona ae na ombepo nodhonkono dhaElia, omienyo vyooihe me vi tjun̯a kovana, mbahava itavele me ve tjun̯a kodhondunge dhovavyuuki, opo a longekedhele ovantu okuya kuMuhona.”

18Sakaria wa yaka omweengeli ha tyaa: “Hika me tji iwa vi? Ame mba kulupa, nomukadhintu wandje wa kulupa.”

19Omweengeli we mu yaka ha tyaa: “Aame Gabriel ngundji kulama kotjipala tjaKalunga. Mba tumwa, ndji ku popithe, ndji ku teethele ondaka hendji ombwa. 20Iya taa tuutuu, mo pata ondaka, koo popi tee etango ndyoka ovipuka hembi mavi ningwa, mena lyokutya wa tombo odhondaka dhandje ndhimadhi ka hwithilwa po potembu yadho.”

21Ovantu va li ko okukevelela Sakaria, have kumwa, mena lyokutya wa kala mo olule unene motempeli. 22Iya hiaa dhi mo, kaa li ama popi. Ovantu hava koneke okutya wa mono emoneko motempeli. Sakaria we ve kon̯ona, iya ye wa kala aa pata ondaka.

23Omatango e okuundapa ovilinga vyouyambethi hiaa pu ko, wa tjuna konganda ye. 24Kon̯ima yomatango ngoka, omukadhintu we Elisabet wa ila omut̯imba, we liholeka omiedhi vitano, ha tyaa: 25“Muhona hehi otjo a ndingila momatango henga. Wa nt̯ila onkenda, ha ndjitha omutomba mokati kovantu.”

Okuyumukwa kwaJesus maku ivithwa

26Elisabet hiaa ile omut̯imba womiedhi epandu, Kalunga wa tuma omweengeli Gabriel a ende kondolopa yaGalilea ndjii tiwa oNasaret. 27Gabriel wa tumwa, a ende komuthukona wongendjo nguu tiwa oMaria, ngwaa nepelwe olukupo kuJosef, owomoluyumuko lwohamba David. 28Omweengeli hiee ya puMaria, we mu heela ha tyaa: “Okupopithwa, nguwa t̯ilwa onkenda! Muhona nga kale naove, ye nge ku pe elao.”

29Maria wa li ae ihamenwa kodhondaka ndhoka, ye ha sokolola epopitho ndyoka okutya mali tya vi. 30Omweengeli we mu heela ha tyaa: “Maria, hó tila. Ove wa t̯ilwa onkenda kuKalunga. 31Taa tuutuu ove mo ka ila omut̯imba, ho ka yumuka omudhantu, ke mu luke Jesus. 32Ma ka kala omunene, ha ka ithanwa Omunwa Owokombandambanda. Muhona Kalunga me ke mu pa otjipundi tjouhamba waihe David. 33Ma ka ninga ohamba yeanda lyaJakob tee apehe, nouhamba we kaauya hulu.”

34Maria wa pula omweengeli ha tyaa: “Hehi matji ka ningwa vi, ame andji li omuthukona wongendjo?”

35Omweengeli we mu yaka ha tyaa: “Ombepo Ondhilikwa mai ku wilile, nodhonkono dhahengu Owokombandambanda madhi ku tjikile, iya mena lyanyahoka omuyumukwa ngu omudhilikwa ma ka ithanwa OmunwaKalunga. 36Taa tuutuu, Elisabet owen̯i, ngoka nguu tiwa ompange, wa ila omut̯imba wokadhantu moukulupe we. Omwedhi hembu we omutyapandu, 37mena lyokutya Kalunga kaa anyenwa kutja.”

38Maria wa yaka ha tyaa: “Ame ndjimuntu waMuhona, nge ningwe ngahi wa hee.” Omweengeli wa dha po puye, ha i.

Maria ma ka valula koyooElisabet

39Maria pomatango ngenya wa kulama, ha i ama kanyauka kondolopa imo yomotjilongo tjomaluvanda tjaJudea. 40Iya wa thika monganda yaSakaria, ha popitha Elisabet. 41Elisabet hiaa tee ondaka yaMaria, ompepe medhimo hai nyunguta. Elisabet we yulithwa Ombepo Ondhilikwa, 42ha popi peulu ha tyaa: “Ove wa pewa elao mokati kovakadhintu, nanguma yumukwa kwoove ma ka pewa elao! 43Tja ndhile pi, ina yaMuhona wandje okuya kwaame? 44Mena lyokutya ondaka yoye hiye thiki momatwi andje, edhimo lyandje lya nyunguta kehuluko. 45Omunalao onguma itavele okutya Muhona hiee mu heele, matji ningwa.”

Otjiimbo tjaMaria

46Maria wa popya ha tyaa:

“Omwenyo wandje mau hivilike Muhona,

47nombepo yandje mai hulukilwa Kalunga,

Omuhupithi wandje,

48mena lyokutya wa tala outhupi womuntu we.

Okudha hempa omakula aehe maa ntyaa ndjimunalao,

49mena lyokutya Omunadhonkono wa ndingila ovipuka ovinene.

Ena lye olyo li li edhilikwa,

50net̯ilonkenda lye mali kala koluyumuko

noluyumuko kumboka mbave mu tila.

51Ye wa undapa ovilingankono nokuwoko kwe,

wa han̯auna po mbava li

nomalipulo okulinoma momitima vyawo.

52Ovatumini we ve yundula pomalukalo,

ha nenepetha ovathupi.

53Ovat̯andjala we ve kutitha novipuka oviwa,

ovahona we ve taata po vala.

54Wa tambula Israel, omuntu we,

opo a thipaluke et̯ilonkenda lye

55kuAbraham nokoluyumuko lwe

katee apehe ngahi a heela ootate.”

56Maria we mu valulila po omiedhi vitatu, tjau ha tjuna koyawo.

Okuyumukwa kwaJohannes

57Otembu yaElisabet yokuyumuka hiye thiki, wa yumuka omudhantu. 58Ovalaanganda ve novawo hiva tee, Muhona hiee mu yulikile et̯ilonkenda lye enene, ve hulukwa pamo naye.

59Etango etyapandutatu ve ya, va ka pitithe ondele etanda. Va halele oku mu luka ena lyaihe Sakaria.60Ina wa yaka ha tyaa: “Aai, nga lukwe Johannes.”

61Wo hava tyaa: “Meanda lyen̯i kamu na tja umo nguu na ena hendi.” 62Va kon̯ona ihe Sakaria, have mu pula okutya ondele ma hala oku mu luka an̯i.

63Ye wa kumba okapelende, ha soneke mo hinyahi: “Ena lye oJohannes.” Avehe va li ave kumwa. 64Poluvedhe lwatjo vala mpoka elaka lyaSakaria lya patuluka, ha utu okupopya, ye ha hivilike Kalunga. 65Avehe owomoulaanganda va vadhwa kowoma, otjilongo atjihe tjomaluvanda tjaJudea tja hipululilwa avihe hembi mbyaa ningwa. 66Avehe mbave tji tyaa, ve lipula tjo momitima vyawo hava tyaa: “Iya ondele hengu ma ka ninga omuntu patji?” Iinga, okuwoko kwaMuhona kwa li pamo naye.

Otjiimbo tjaSakaria

67Ihe Sakaria we yulithwa Ombepo Ondhilikwa, wa popya ha tyaa:

68Muhona, Kalunga kaIsrael, nga tumbalekwe,

mena lyokutya we ya okukutulula nokuhupitha otjiwan̯a tje.

69Ye we tu pa Omuhupithi ombandhi

ngwaa dha meanda lyomuntu we David,

70ngahi a popya okupitila movinyo vyovaprofeti ovadhilikwa

potembu youye walukulu

71okutya we tu hupitha kodhondjedhi dhetu

nomomawoko ovantu avehe mboka mbave tu yele,

72opo a yulikile ootateombwale onkenda

nokuthipaluka ewaneneno lye edhilikwa,

73eano ndyoka ndyaa anenene tate Abraham,

74e tu hupithe momawoko odhondjedhi dhetu,

ye e tu pe oluvedhe,

atwa hupithwa tu mu undapele ahatu na owoma.

75Tu mu undapele mouvyuuki

nomoudhilikwa kotjipala tje omatango etu aehe.

76Ndele yandje, mo ka ithanwa

omuprofeti wangoka Owokombandambanda,

mena lyokutya ove mo ka tenga

oku mu undapela odhondjila dhe,

tainkolo Muhona aheye ya,

77u longe ovantu ve okwiiwa ehupitho

okupitila meithepo lyodhonkali dhawo,

78mena lyokutya Kalunga ketu

u na onkenda nolweembya.

Oye me tu tumine otjiten̯i tjehupitho,

79himatji tungatele ovantu mboka

mbave li met̯iku nomotjidhidhimbe tjet̯o,

tji vyuukithe odhompadhi dhetu mondjila youwa.”

80Ondele wa kula, ha kolo pambepo, wa kala mokuti katee etango ndyoka ndyee liholololela Ovaisraeli.

Etestamende Epe Moludhimba

© 2012 Bible Society of Namibia

More Info | Version Index