Search form

Lukas 10

Jesus ma tumu ovalongwa omilongo epanduvali navavali

1Kon̯ima yovipuka mbyoka Muhona wa holowola uke ovalongwa omilongo epanduvali navavali, he ve tumu vavali navavali, va tenge komeho kondolopa aihe nopoluvedhe mpoka omwene mpaa li ama hala okuya. 2Ye we ve heela ha tyaa: “Ovilya ovingi, atjaa ovaundapi ovanunu. Iya kumben̯i omwene wovilya a tume ovaundapi keteyo lye. 3Enden̯i! Me mu tumu ngodhondjona mokati komaungu. 4Hámu tjindi okapapo kodhombongo, handjato, hadhongaku. Hámu popi nomuntu mondjila nokanunu. 5Iya amwa i monganda, olutenga tyen̯ii: ‘Ouwa ngau kale monganda hendji.’ 6Iya andaa mu na omuntu nguu na ouwa, ndino ouwa wen̯i mau tjikile omuntu ngoka, iya andaa kamu na tja, ouwa wen̯i mau mu tjunine n̯e ovene. 7Monganda moka ngamo mu kala, mu lye, n̯e mu nwe soka himave mu pa, mena lyokutya omuundapi wa thele okupewa ondjambi ye. Hámu dhamauka nodhonganda. 8Amwa i mondolopa, wo have mu tambula, lyen̯i soka himave mu pa. 9Velulen̯i ovavedhi motjilongo moka, n̯e mu heele ovantu mu tyee: ‘Otjilongo tjaKalunga tje ya popedhi nan̯e.’ 10Iya mondolopa aihe mumamu ya, ahave mu tambulile, enden̯i momivanda vyayo, mu tyee: 11‘Nan̯i nombuma yomondolopa yen̯i ndjaa kakatele kodhompadhi dhetu, matu mu pupulile yo, iya kalen̯i amu tji i okutya otjilongo tjaKalunga tje ya popedhi.’ 12Ame me mu heele okutya Sodom matji ka kala hahe okupon̯a ondolopa ndjoka metango lyekoyo.

Odhondolopa ndhihadhi liteyululile

(Mat. 11:20-24)

13“Utatyei, ove Korasin! Utatyei, ove Betsaida! Iya ngaile moTiro nomoSidon omo mwa ningilwa ovilingankono mbyoka mbyaa ningilwa moyen̯i, mbenya ngaile ve liteyulula ae lukulu, hava kala pohi modhosaku nomomuto. 14Iya Tiro naSidon mavi ka kala hahe oku mu pon̯a metango ndyoka lyekoyo. 15Naove, Kapernaum, mo tya pamo mo ka yelelwa meulu? Mo ka thothononenwa motjovat̯e.”

16Jesus wa heela ovalongwa ve ha tyaa: “Ngoka ngume mu tee, naame ma ntee; ngume mu tombo, naame ma ntombo; nguma ntombo, ma tombo ngoka ngwaa ntuma.”

Okutjuna kwovalongwa omilongo epanduvali navavali

17Ovalongwa mbenya omilongo epanduvali navavali va tjuna nehuluko, hava tyaa: “Muhona, nyoo odhondemoni dhe tu tee mena lyoye.”

18Jesus we ve heela ha tyaa: “Mba mono Satana ngwaa u meulu ngolukeno. 19N̯e me mu pa odhonkono okulyata odhonyoka nodhonge nokutumina odhonkono adhihe dhaSatana, ko kaku na tja soka himatji mu ihameke. 20Iya hámu hulukilwa odhombepo himadhi mu tee, iya hulukilwen̯i mena lyokutya omana en̯i a sonekwa membo lyomeulu.”

Jesus ma hivilike Ihe

(Mat. 11:25-27; 13:16-17)

21Potembu ndjoka Jesus we hulukithwa unene kOmbepo Ondhilikwa ha tyaa: “Taa, Muhona weulu nowohi, me ku hivilike, mena lyokutya ovipuka hembi we vi holeka ovanongo novanadhondunge, ho vi holololele mboka mbava ngala odhondele. Iinga, Taa, hehi otjo tje ku thevelwa.

22“Ovipuka avihe mbe vi pewa kuTate. Kaku na tja nguu i Omuna kakele vala kaTate, ko kaku na tja nguu i Tate kakele vala kOmuna, nangoka Omuna nguma hala oku mu holololela ye.”

23Iya Jesus wa pilulukila kovalongwa ve, hawo a heela vala ha tyaa: “Omeho ngamaa mono ovipuka hembi mbimamu tala, e na elao. 24Iya me mu heele okutya ovaprofeti ovengi nodhohamba va halele okumona ovipuka mbimu lwete, iya kave vi mwene, nokutyaa ovipuka mbimu tyaa, atjaa kave vi teele.”

Eeli lyOmusamaria wonkenda

25Iya omulongiveta umo wa kulama, ha lolo Jesus ha tyaa: “Mulongethi, nge ninge tji, opo ndji mone omwenyo waapehe?”

26Jesus we mu pula ha tyaa: “Moveta mwa sonekwa tji? U tanga mo vi?”

27Omulumentu we mu yaka ha tyaa: “ ‘Kala au hole Muhona Kalunga koye komutima woye auhe nokomwenyo woye auhe nokodhonkono dhoye adhihe nokodhondunge dhoye adhihe, kala au hole omukwen̯i ngahi u lihole omwene.’ ”

28Jesus we mu yaka ha tyaa: “Wa yaka nawa. Tji hwithila po ove u kale nomwenyo.”

29Ngunya wa li ama hala okulitaletha ouvyuuki, ha pula Jesus ha tyaa: “Omukwetu aan̯i?”

30Jesus we mu yaka ha tyaa: “Kwa li omulumentu umo ngwaa dhile moJerusalem, ha vyuuka koJeriko. Wa wila momawoko ovapundi, ve mu dhula, have mu tono, ha topoka oviwalo. Iya wo ve mu thiaa nokathamwenyo, hava i. 31Omuyambethi umo wa vadhwa ama ende mondjila ndjoka, hiee mu mono, he mu kondoloka. 32Iya nOmulevi hiee ya pompuka mpoka, we mu mona, hiee mu mono, he mu kondoloka. 33Omusamaria umo ngwaa vadhwa ama ende mondjila ndjoka, hiee ya po, we mu mona, he mu t̯ile onkenda. 34Wa ya kuye, ha kutu oviwalo vye, ha tile po omadhi novinyu. We mu kavilitha konkutwa ye, he mu twala kondjuwo yovayenda, he mu hungu. 35Iya ngamuhuka wa itha mo odhondenari mbali, he dhi yandja komwene wondjuwo yovayenda, ha tyaa: ‘Mu hunga, ahadhi hulile, me ya oku ku pa, hime tjuna.’

36“Iya modhondunge dhoye, oun̯i muhemba vatatu ngwaa li omukwawo womulumentu ngoka ngwaa wila momawoko ovapundi?”

37Omulongiveta wa yaka ha tyaa: “Ongwee mu t̯ile onkenda.”

Jesus we mu yaka ha tyaa: “Naove enda, u ka ninge nyahoka.”

Jesus moyooMarta naMaria

38Iya hiva hweene ko uke, Jesus we ya mokalongo kamo mumwa li omukadhintu nguu tiwa oMarta, he mu yakula monganda ye. 39Ye wa li nomunitje Maria, ngoka ngwaa li vala aa kala pohi podhompadhi dhaJesus nokuteelela odhondaka dhe. 40Iya Marta wa li ae ihamenwa okutelekela ovayenda. We ya kuJesus ha tyaa: “Muhona, ku na ko natja nan̯i omunitjandje hihama nteleketha ko? Mu heela, a mpopile!”

41Muhona we mu yaka ha tyaa: “Marta, Marta, mo lipa otjiho nokulingwangwaneka movipuka ovingi. 42Iya himatji halwa itjimo vala hitji na otjilinga. Maria we liholowolela otjipuka otjiwa, hihama nyekwa.”

Etestamende Epe Moludhimba

© 2012 Bible Society of Namibia

More Info | Version Index