Search form

Lukas 13

Jesus ma pula eliteyululo

1Poluvedhe ndoka pa li ovantu vamo mbava hipululila Jesus Ovagalilea mboka Pilatus mbaa lumbalekele ombindhi yawo mumo nomayambo awo. 2Jesus we ve yaka ha tyaa: “Mamu tya pamo Ovagalilea mbenya mbava tatethelwe nyahoka va li ovalundhi okupon̯a Ovagalilea ovakwawo? 3Aai mba tya, iya ndahamu liteyulula, nan̯e wo amuhe otjo mamu ka t̯a. 4Mamu tya pamo omulongo nepandutatu mbenya mbava t̯a, hiva wilwa kondjuwo ndjaa ya pokatangaulu moSiloa, va li ovalundhi okupon̯a ovantu avehe mbava kala moJerusalem? 5Aai mba tya, iya ndahamu liteyulula, nan̯e wo amuhe otjo mamu ka t̯a.”

Eeli lyomukuyu mbuhau ma

6Jesus we ve heela eeli hendi ha tyaa: “Kwa li omulumentu umo ngwaa li nomukuyu mbwaa twikwa motjuundo tje tjomivinyu. Ye we ya okunyanga omakuyu komukuyu, atjaa ke na hiaa mona ko. 7Iya wa heela omuundapi ha tyaa: ‘Taa tuutuu, odhombula indatu ndhimbe ya okunyanga omakuyu komukuyu hembu, atjaa hí na himba mona ko. U teta po, opo háu kundjula otjuundo.’ 8Omuundapi we mu yaka ha tyaa: ‘Muhona, mbula ndjino ngotji u yetha wo, tainkolo me u tengele noku u tutila ombumbi. 9Andaa ombula ndjimai ya, mau ma, onawa. Iya andaa kaau ma, tjau u tetwe po.’ ”

Jesus ma velula omukadhintu otjilema mEsabati

10Jesus wa li ama longo ovantu mosinagoga imo metango lyEsabati. 11Iya mwa li omukadhintu ngwaa li nombepo ombi ndjaa kala muye odhombula omulongo nepandutatu, nguu enda ama wowola, ke tjiiwa okuvyuukilila. 12Jesus hiee mu mono, we mu ithana, he mu heele ha tyaa: “Ove, wa yowoka kouvela woye.” 13Wa tendeka omawoko e kuye, dhivadhiva wa vyuukithwa, ha utu okuhivilika Kalunga.

14Iya omunene wosinagoga wa li aa yumana, Jesus hiaa velula mEsabati. Wa uta okupopya, ha heele owingi wovantu ha tyaa: “Tu na omatango epandu okuundapa. Iya indjen̯i momatango ngoka, mu velulwe, hamEsabati.”

15Iya Muhona we mu yaka ha tyaa: “Valinomi n̯e, kape na nguu pititha ongombe ye ne ombulu ye mEsabati, e ke i nwithe? 16Omukadhintu hengu ontekulona yaAbraham ngwaa tuwa modhonkuto odhombula omulongo nepandutatu kuSatana, nan̯i ka ulu okukutululwa metango lyEsabati?” 17Hiaa mana okupopya, odhondjedhi dhe adhihe dha t̯a ohon̯i, iya owingi wovantu auhe we hulukilwa ovilinga ovikumithi mbyoka mbyaa ningwa kuJesus.

Ombuto yosinapi nontathi

(Mat. 13:31-32; Mark. 4:30-32)

18Jesus we ve heela ha tyaa: “Otjilongo tjaKalunga tji ngala tji, me tji yeleke natji? 19Otjilongo tjaKalunga tji ngala ombuto yotjitho tjosinapi omuntu ndjaa itha, he i yumbu motjuundo tje. Hai kulu, hai ningi omuti omunene, ovidhila havi tungile modhontai dhatjo.”

20We ve heela uke ha tyaa: “Otjilongo tjaKalunga me tji yeleke natji? 21Tji ngala ontathi, omukadhintu ndjaa itha, he i lungile mohenga yodhombwe ndatu katee aihe mai tumbu.”

Otjivelo hitja thin̯a

(Mat. 7:13-14,21-23)

22Jesus wa yatakana modhondolopa nomoulongo, ha longo ovantu, ha vyuuka koJerusalem. 23Umo we mu pula ha tyaa: “Muhona, nan̯i mbamava hupithwa, ovanunu?”

Jesus we ve heela ha tyaa: 24“Kondjen̯i, mu pitile potjivelo hitja thin̯a. Iya me mu heele okutya ovengi mava ka lolokela okuhita mo, atjaa kaave ke tji ula. 25Iya omwene wonganda andaa wa kulama, ha yedhile potjivelo, n̯e mamu utu okukulama kotjila, otjo mamu popitha monganda amamu tyaa: ‘Muhona, tu yelula!’ Ye me mu yaka ama tyaa: ‘Ame hí mu i, nahumamu dhi, hí ku i.’ 26Iya n̯e mamu utu okupopya hamu tyaa: ‘Twa lya naove, hatu nu naove, ove wa longa ovantu momivanda vyetu.’ 27Ye me mu yaka ha tyaa: ‘Ame hí mu i humamu dhi, dhen̯i po pwaame, n̯e amuhe muvaundapi wouvi.’ 28Hoka maku ka kala otjililo nelikweyo lyomayoo, himamu ka mona Abraham, Isak naJakob novaprofeti avehe motjilongo tjaKalunga, iya n̯e ovene mamu ka yundulilwa pondje. 29Ovantu mava ka dha koutjilo nokoutokelo, mava ka dha komakulyo nokomakumbinda otjilongo, hava ka lya pamo motjilongo tjaKalunga. 30Iya owokon̯ima mava ka kala owokomeho, nowokomeho mava ka kala owokon̯ima.”

Jesus ma londolwa

31Powola ndjoka Ovafarisai vamo ve ya po, hava heele Jesus hava tyaa: “Kulama, ove u dhe po hempa, mena lyokutya Herodes ma hala oku ku dhipaa.”

32Ye we ve heela ha tyaa: “Enden̯i mu ka heele omuntu ngoka wovineya ovivi okutyaa: ‘Ame ndino namuhuka me ta mo odhondemoni, he velula ovavedhi, iya etango etyatatu me vadhwa amba mana ovilinga vyandje.’ 33Iya nandaku tiwa otjo nyahoka, ndji tha okukala mondjila ndino namuhuka, namuhuka hendinya, mena lyokutya katji thevelwe omuprofeti okut̯ila pamo mpahape thi moJerusalem.

Jesus ma yumaneke Jerusalem

(Mat. 23:37-39)

34“Jerusalem, Jerusalem, ove nguu dhipaa ovaprofeti, u dhipaa nomawe mboka mbawa tuminwa. Itungapi ndji hala okwoongedha ovanoye ngohuhwa hii ongedha oupiyona wayo kohi yomavava ayo! Iya n̯e kamu tji halele. 35Taa tuutuu, onganda yen̯i mai kala etuntu. Ame me mu heele okutya kaamu ka mbona uke, katee mamu tyaa: ‘Nga tumbalekwe hengu ngume ya mena lyaMuhona!’ ”

Etestamende Epe Moludhimba

© 2012 Bible Society of Namibia

More Info | Version Index