Search form

Lukas 15

Eeli lyondhu ndjaa keka

(Mat. 18:12-14)

1Iya ovathendelethi avehe novalundhi nahi ve ya kuJesus oku mu teelela. 2Iya Ovafarisai novalongiveta va ngongota hava tyaa: “Nguka u tambula ovalundhi, ye ha li pamo nawo.” 3Iya Jesus we ve heela eeli hendi ha tyaa:

4“Aan̯i mun̯e nguu na odhondhu ethele, atjaa ha keketha mo imo, kaa thii po ndhoka omilongo omoovi nomoovi mokuti, ye ha ka taendha ndjaa keka, katee me i mono? 5Iya ae i mono, me hulukwa, me i tjindi komapepe. 6Iya hime thiki konganda, ma ithana omapanga e novalaanganda ve ha tyaa: ‘Tu hulukwen̯i, mena lyokutya ondhu yandje ndjaa kekele, mbe i mono.’ 7Me mu heele okutya iya otjo tji li, nomeulu mamu ka kala ehuluko enene lyokuhulukilwa omulundhi umo ngwee liteyulula okupon̯a okuhulukilwa ovavyuuki omilongo omoovi nomoovi mbahamava hepa okuliteyulula.

Eeli lyombongo ndjaa keka

8“Ne pamo pe na omukadhintu umo nguu na odhombongo omulongo dhotjisilveri, ha keketha po imo. Ma ningi vi? Ma ten̯a olamba, ha kombo monganda, ha taendha katee me i mono. 9Andaa we i mono, ma ithana omapanga e novalaanganda ve ha tyaa: ‘Tu hulukwen̯i, mena lyokutya ombongo ndjaa kekele mbe i mono.’ 10Iya me mu heele okutya otjo tji li wo novaengeli vaKalunga, ve hulukilwa omulundhi umo ngwee liteyulula.”

Eeli lyomudhantu ngwaa keka

11Jesus we ve heela uke ha tyaa: “Kwa li omulumentu umo ngwaa li novana ovadhantu vavali. 12Omunitjomukwawo wa heela ihe ha tyaa: ‘Taa, mpandje epingo lyandje ndimba thele okupewa.’ Iya ihe we ve yandjela emona lye. 13Iya kapa pitile omatango omengi, omuna omununu komukwawo wa ongedha ovipuka vye avihe, ha i kotjilongo tjokokule. Oko a ka han̯aunina emona lye nokukala movihulo. 14Hiaa mana po ovipuka vye avihe, motjilongo hinya mwe ya ondjala onene, nomudhantu ngoka wa uta okuhepa. 15We ke lithitha komuhona umo motjilongo hehinya. Ye we mu tuma kohambo ye oku ka litha ovingulu. 16Iya ye wa li ama hala okukutitha edhimo lye nomatjeketjeke ngaa liwa kovingulu, atjaa kee pelwe komuntu nokanunu.

17“Iya we litjun̯a ha tyaa: ‘Ovapika avehe vatate ve na ovikulya ovingi mbyaa kaka, atjaa ame me t̯ile hempa kondjala. 18Me kulama, he i kutate, he mu heele he tyaa: Taa, mba lundha kuKalunga nokwoove. 19Ame hí thevelwe uke okwiithanwa omunoye. Ntambula ndje ngomupika woye umo.’ 20Iya wa kulama, ha i kwiihe.

“Iya tainkolo aa li kokule, ihe we mu mona, he mu etethele mo onkenda. Wa dhamuka, e ke mu wan̯e, he mu dhingitile mothingo, he mu hupita. 21Omuna we mu heela ha tyaa: ‘Taa, mba lundha kuKalunga nokwoove. Ame hí thevelwe uke okwiithanwa omunoye.’ 22Iya ihe wa heela ovapika ve ha tyaa: ‘Eten̯i dhiva omudhalo hembunya omuwa, mu mu dhaleke, nonela komunwe we nodhongaku kodhompadhi dhe. 23Ka eten̯i ontandona, mu i twele, tu lye, nt̯e tu hulukwe, 24mena lyokutya omunwandje hengu wa t̯ile, napano u na uke omwenyo. Wa kekele, napano wa moneka.’ Wo va uta okuhulukwa.

25“Iya omuna omunene watjo wa vadhwa kotjana. Hiee ya popedhi nonganda, wa tyaa mo otjidhano. 26Wa ithana umo owomovapika, he mu pula otjipuka hitji li monganda. 27Ngunya we mu heela ha tyaa: ‘Omunitjoye wa tjuna, atjaa iho hiee mu mono ae na omwenyo, we mu twelele ontandona.’

28“Omukulwe wa yumana, ye ahama hala okuya mo. Iya ihe wa dha mo monganda, he mu popitha. 29Omuna we mu yaka ha tyaa: ‘Taa tuutuu, mbe ku undapela odhombula odhingi, ame híya anya hiuu ntjeela, iya ove ku mpele nandaku tiwa okakombona, ndji hulukwe nomapanga andje. 30Iya omunoye ngoka ngwaa han̯auna po emona lyoye modhombalethi, hiee ya, we mu twelele ontandona.’ 31Ihe we mu heela ha tyaa: ‘Munwandje, ove u kala pwaame apehe, ovyandje avihe ovyoye. 32Iya napano ngatu hulukwe unene, mena lyokutya omunitjoye ngwaa t̯ile u na omwenyo, nahi wa kekele, napano wa moneka.’ ”

Etestamende Epe Moludhimba

© 2012 Bible Society of Namibia

More Info | Version Index