Search form

Lukas 2

Okuyumukwa kwaJesus

(Mat. 1:18-25)

1Potembu ndjinya pa ningilwe otjitumino hitja dhile komukesari Augustus okutya ouye auhe ngau lisonekethe, u hawe. 2Elisoneketho hendi lya li olyolutenga ndyaa ningilwe, tainkolo Kireneus hiaa li omutumini wotjilongo tjaSiria. 3Ovantu avehe va ya, auhe e ke lisonekethe kondolopa yokoyawo.

4NaJosef wa kulama moGalilea mondolopa yaNasaret, ha i koJudea kondolopa yaDavid ndjii tiwa oBetlehem, mena lyokutya ye wa li owawo yaDavid. 5We ke lisoneketha pamo naMaria ngwaa nepelelwe olukupo, ngoka ngwaa li omut̯imba. 6Tainkolo hiva li hoka, otembu yaMaria yokuyumuka ye thika. 7Ye we livelipa omuna omudhantu. We mu dhingila movitopa, he mu laleke po momutemba wokulila ovipako, mena lyokutya mondjuwo yovayenda kava mwene mo oluvedhe.

Ovaengeli novanahambo

8Kompuka hoka kwa li ovanahambo mbava li amava yungu odhondhu dhawo out̯iku mokuti. 9Omweengeli waMuhona we ya kuwo, elaimo lyaMuhona hali ve laimine, wo hava tila unene. 10Iya omweengeli waMuhona we ve heela ha tyaa: “Hámu tila, ame me mu teethele ondaka ombwa yehuluko enene ndyoka ndimali ningi olyovantu avehe. 11Ndino hendi mwa yumukilwa Omuhupithi mondolopa yaDavid, oye e li Messias, Muhona. 12Iya etangan̯eko humamu mu tangan̯ekele hoolyondi: Mamu ka mona okapepe haka dhingilwa movitopa, ko haka lalekwa po momutemba wokulila ovipako.”

13Iya dhivadhiva pomweengeli ngoka pa li engundwa lyovaengeli womeulu, hava hivilike Kalunga hava tyaa:

14“Etumbalo olyaKalunga Owokombandambanda,

nouwa kombanda yohi movantu mbaa hopa.”

15Iya ovaengeli hiva dhi po puwo, hiva tjuna meulu, ovanahambo ve liheela hava tyaa: “Tu enden̯i iya koBetlehem, tu ka tale hitja ningwa ko, Muhona hiee tu holololele.”

16Ovanahambo va ya amava kanyauka, hava mono Maria naJosef nokapepe haka lalekwa po momutemba wokulila ovipako. 17Iya ovanahambo hive ke mono, va hipululila Josef naMaria odhondaka ndhoka omweengeli ndhaa popya ouhunga nokapepe heha. 18Iya ovantu avehe mboka mbave tji tyaa, ve kuminwa ovipuka mbyoka mbiva hipululilwa kovanahambo. 19Iya Maria ovipuka hembi avihe we vi ungula momutima we. 20Ovanahambo va tjuna amava hivilike nokutumbaleka Kalunga mena lyovipuka mbyoka mbiva tee nambiva mono, ngahi ve vi heelwa.

Jesus ma lukwa

21Iya hipa piti omatango epandutatu, okapepe hoka ka pitithwa etanda, haka lukwa Jesus, ena ndyoka ndika lukwa komweengeli, tainkolo ahakeye ya medhimo lyaina.

Jesus ma twalwa motempeli

22Omatango okulikohola kwawo, ngoveta yaMoses himai popi, hiaa hulu, ondele ve mu twala koJerusalem, kotjipala tjaMuhona, 23ngahi tja sonekwa moveta yaMuhona okutyaa: “Okadhantona akehe hamake livelipwa, ngaka dhilikilwe Muhona.” 24Va ya, ve ke yandjele omayambo odhonguti mbali ne omadhilona odhonguti avali ngoveta yaMuhona himai popi.

Simeon ma hipulula Jesus

25Iya moJerusalem mwa li omuntu nguu tiwa oSimeon, wa li omuvyuuki nomutilikalunga, ngoka ngwaa kevelela ehupitho lyaIsrael. Ombepo Ondhilikwa ya li muye. 26Iya wa heelwa kOmbepo Ondhilikwa okutya kaa t̯i, tainkolo aheya mona Messias yaMuhona. 27Simeon wa etwa motempeli kOmbepo Ondhilikwa. Iya ovanene va eta Jesus va ninge ngoveta yaMoses himai popi. 28Simeon we mu tjiika momawoko e, ha hivilike Kalunga ha tyaa:

29“Muhona, napano iya mo lekele omuntu woye,

a ende nouwa ngahi wa popile,

30mena lyokutya ame mba mono nomeho andje ehupitho lyoye,

31ndiwa longekedhele movipathi vyovantu avehe,

32notjiten̯i okuholololela ovapaani ehalo lyoye

nokweeta etumbalo kotjiwan̯a tjoye Israel.”

33Iya ina naihe ve kuminwa odhondaka ndhoka ndhaa popiwa kuSimeon. 34Simeon we ve pa elao, ha heele ina Maria ha tyaa: “Taa tuutuu, hengu wa tuwa po okuputaletha nokwiimuna po ovengi womoIsrael, netangan̯eko hendi mali ka kondjethwa, 35omalipulo ovengi a holololwe. Naove wo omwene omukonda mau ku twele momutima.”

Anna ma hipulula Jesus

36Iya motempeli mwa li Anna, omuprofeti omuna waFanuel, womeanda lyaAsser. Wa li omunene. Hiaa kupwa, wa vadhwa ae li omuthukona wongendjo, ha kala nomulumentu we odhombula epanduvali. 37Iya potembu ndjoka wa li omuhepe wodhombula omilongo epandutatu nane. Ye ka dhile mo nokoholo motempeli, iya wa undapela Kalunga out̯iku nomutenya ama kumbu, ye he litjaele ovikulya. 38Iya powola yatjo tuu ndjoka, we ya po, ha hivilike Kalunga, ha hipulula okapepe kovantu avehe mboka mbava kevelela eyowoko lyaJerusalem.

Okukula kwaJesus

39Ovanene vaJesus hiva hwithile po ovipuka avihe vyoveta yaMuhona, va tjuna koGalilea, kondolopa yawo koNasaret. 40Ondele wa kula, ha kolo pambepo, he yula ounongo, net̯ilonkenda lyaKalunga lya kala kombanda ye.

Ondele Jesus motempeli

41Ovanene vaJesus nahi va ya koJerusalem ombula aihe kotjipito tjOpaasa. 42Iya hiaa ningi odhombula omulongo nambali, va ya ko uke ngahi va ninga monkalo yawo yotjipito. 43Omatango otjipito hiaa pu ko, va tjuna konganda, Jesus he thiwa moJerusalem, iya ovanene ve kava li ave tji i. 44Iya va li amava tya pamo u li motjeendo tjovantu. Va enda otjikambo tjetango limo, have mu taendha mowoyawo nomovakwawo. 45Iya hihave mu mwene mo, va tjuna koJerusalem oku ke mu taendha. 46Iya hipa piti omatango atatu, ve mu vadha motempeli aa kala pohi mokati kovalongethi, ame ve teelele noku ve pula. 47Iya mboka mbave mu teelela, ve kuminwa ounongo we nokuyaka kwe. 48Ovanene ve hive mu mono, ve kumwa. Ina we mu pula ha tyaa: “Munwandje, otjitji hiwe tu ningile nyahika? Taa tuutuu, nt̯e naiho twe ku taendha, hatu etetha onkenda.”

49Ye we ve yaka ha tyaa: “Mamu ntaendhele tji? Kamu tji i nan̯i okutya ame ndji tha okukala movipuka vyaTate?” 50Iya wo va li ahave yuvite odhondaka ndhoka ndhee ve heela.

51Jesus wa itavela ovanene ve, ha tjuna nawo koNasaret. Ina wa ungula odhondaka ndhoka adhihe momutima we. 52Jesus wa kula molutu nomodhondunge nomounongo, ha hopwa kuKalunga nokovantu.

Etestamende Epe Moludhimba

© 2012 Bible Society of Namibia

More Info | Version Index