Search form

Lukas 22

Ontanto yokukambula Jesus

(Mat. 26:1-5; Mark. 14:1-2; Joh. 11:45-53)

1Iya otjipito tjomingome mbihavi tuwa ontathi, hitji tiwa Opaasa, tja li popedhi.2Ovayambethi ovanene novalongiveta ve lipula okutya Jesus mave mu dhipaa vi, mena lyokutya va li amava tila ovantu.

Judas ma landetha Jesus

(Mat. 26:14-16; Mark. 14:10-11)

3Iya Satana wa hita muJudas nguu tiwa oIskariot, umo owomomulongo navavali. 4Judas wa ya oku ka tompola novayambethi ovanene novanene wovayungi wotempeli okutya ma ulu oku ve welelekela vi Jesus. 5Wo va li ave hulukwa, have mu udhikile oku mu pa odhombongo. 6Judas wa itavela okuyandja Jesus, ahape na tja owingi wovantu.

Otjipito tjOpaasa matji longekedhwa

(Mat. 26:17-25; Mark. 14:12-21; Joh. 13:21-30)

7Iya etango ndyoka lyomingome mbihavi tuwa ontathi lye thika, moka mumu dhipawa ondjona yOpaasa. 8Jesus wa tuma ko Petrus naJohannes ha tyaa: “Enden̯i, mu ke tu longekedhele ondjona yOpaasa ndjimatu ya okulya.”

9Iya wo ve mu pula hava tyaa: “Opi mpamo hala, tu ke ku longekedhele?”

10Iya ye we ve yaka ha tyaa: “Taa tuutuu, himamu ya motjitungwalongo, mamu ka wanena nomulumentu ngwaa tjindi olundingo lwomeva. Mu landulen̯i katee monganda moka muma i. 11Heelen̯i omwene wonganda mu tyee: ‘Omulongethi me ku pula okutya ondjuwo yovayenda i li pi, ndji ka lile mo Opaasa pamo novalongwa vandje?’ 12Iya ye me mu yulikile ondjuwo onene yopeulu ndjaa kombwa nawa. Ngamo mu longekedhela moka.”

13Iya va ya, ovipuka avihe vya li ngahi ve vi heelwa. Iya hava longekedha Opaasa.

Okulya Okudhilikwa maku utwa

(Mat. 26:26-30; Mark. 14:22-26; 1 Kor. 11:23-25)

14Owola yokulya hiye thiki, Jesus we ya okulya novayapostoli. 15We ve heela ha tyaa: “Me hala nehalo enene okulya Opaasa hendji pamo nan̯e, tainkolo aheya tatethwa. 16Iya me mu heele okutya híme ke i lya uke katee mai ka hwithilwa po motjilongo tjaKalunga.”

17Iya wa itha po otjinwino, ha pandula ha tyaa: “Tji tambulen̯i, mu liyandjele. 18Iya me mu heele okutya híme ka nwa uke ovinyu katee otjilongo tjaKalunga matji ya.”

19Wa itha po omungome, ha kumbu, he u nyembula, he ve pa wo, ha tyaa: “Hehi olutu lwandje ndumalu yandjwa mena lyen̯i. Hehi tji ningen̯i amamu nt̯ipaluka.” 20Iya kon̯ima yokulya wa itha po otjinwino, ha tyaa: “Otjinwino hehi ewaneneno epe mombindhi yandje ndjimai tilwahi mena lyen̯i.

21“Iya taa tuutuu, omumbweleleki matu li naye. 22Iya Omuna wOmuntu ma i, ngahi tja hewa, atjaa utatyei omuntu ngoka ngume mu weleleke.”

23Wo va uta okulipula okutya oun̯i ngoka mpaeli mokati kawo ngume tji ningi.

Omunene aan̯i?

24Iya mokati kovalongwa mwa tukuka odhombata okutya aan̯i ngwaa thele okutalwa omunene okupon̯a ovakwawo. 25Iya Jesus we ve heela ha tyaa: “Odhohamba dhoviwan̯a dhi tumina ovantu vadho, namboka mbave ve tumina, va hala okutiwa ovantu ovawa. 26Iya n̯e mokati ken̯i hámu kala nyahoka. Nguma hala a kale omunene mokati ken̯i, nga ngale omununu, nomunakomeho nga kale ngomuundapi. 27Aan̯i ngwaa pon̯a omukwawo, ongwaa kala pohi ne onguma undapa? Haye ngoka ngwaa kala pohi? Iya ame ndji li mokati ken̯i ngomuundapi.

28“N̯e, on̯e mwa kala pwaame momaudheu andje. 29Tate ngahi a mpa odhonkono dhokutumina, otjo naame wo me mu pa etumino lyouhamba, 30opo mu ka lye nokunwa pamo naame motjilongo tjandje, iya mamu ka kala pohi kovipunditumino nokukoya omaanda omulongo naavali aIsrael.

Simon ma ilikin̯wa

(Mat. 26:31-35; Mark. 14:27-31; Joh. 13:36-38)

31“Simon, Simon teelela, Satana wa kumba a pewe oku mu thitha ngovilya. 32Iya ame mbe ku kumbile, eitavelo lyoye ahamali dhimi mwoove. Naove himo tjuna, koleka ovakwen̯i.”

33Petrus wa yaka ha tyaa: “Muhona, ame mbe lilongekedha okuya pamo naove mokaliwoso nomet̯o.”

34Iya Jesus we mu heela ha tyaa: “Petrus, me ku heele okutya ndino hendi, tainkolo onkondombolo háiya popya, ove mo lintendele tutatu okutya ku ndji i.”

Okapapo kodhombongo, ondjato nomukonda

35Jesus we ve heela ha tyaa: “Himbe mu tumine ahamu na tja okapapo kodhombongo, ondjato nodhongaku, mwa hepele?”

Ve mu yaka hava tyaa: “Aai, notjimo.”

36Jesus we ve heela ha tyaa: “Iya napano nguu na okapapo kodhombongo, nga kale nako, nondjato nga kale nayo. Ngoka nguhe na omukonda, nga landethe po ombaikitha ye, nge lilandele omukonda. 37Iya me mu heele okutya mwaame omusonekwa hembu mau tha okuhwithilwa po mbumau tyaa: ‘Wa havelwa mokati kodhomputji.’ Iya avihe mbyoka mbyaa ntjonekelwa, mavi hwithilwa po.”

38Ovalongwa ve mu heele hava tyaa: “Muhona, taa tuutuu, hempa pe na omikonda vivali.”

Jesus we ve heela ha tyaa: “Tjau, tja hulu!”

Jesus ma kumbu

(Mat. 26:36-46; Mark. 14:32-42)

39Jesus wa pita pondje, ha i kOndundu yomiholivi, ngahi a ilila, novalongwa ve wo ve mu landula. 40Hiee thiki koluvedhe hoka, we ve heela ha tyaa: “Kumben̯i, opo hámu pwile momatyoletho.”

41Iya wa yapuka muwo otjikambo hitji lithike pokuyumbwa kwewe, ha twike odhongolo, ha kumbu 42ha tyaa: “Taa, andaa mo hala, ndjeka ndje otjinwino hehi, hangahi me hala, iya ehalo lyoye ngali hwithilwe po.” 43Omweengeli womeulu we mu hololokela, he mu pameke. 44Wa li moviihamo ovinene, ha kumbu aa mana mo. Oupyu we wa tota ngomata ombindhi amai totele pohi.

45Iya hiaa mana okukumba, wa tjuna kovalongwa ve, we ve vadha ava lala, mena lyokutya va li ava pongo. 46Jesus we ve pula ha tyaa: “Mwa lalele tji? Imuken̯i po, n̯e mu kumbe, opo hámu pwile momatyoletho.”

Jesus ma kambulwa

(Mat. 26:47-56; Mark. 14:43-50; Joh. 18:3-11)

47Jesus tainkolo a li ama popi, pe ya engundwa lyovantu ndyaa pitilwa komeho kuJudas, umo owomovalongwa omulongo navavali. Wa hweena kuJesus e mu hupite. 48Iya Jesus we mu pula ha tyaa: “Judas, Omuna wOmuntu mo mu weleleke, amo mu hupita?”

49Iya ovalongwa mboka mbava li pamo naJesus, hiva mono soka himatji hala okuningwa, ve mu heela hava tyaa: “Muhona, ngatu ve twele nomikonda?” 50Umo owomuwo wa tona omupika womuyambethi omunene, he mu kopola okutwi kwokokulyo.

51Iya Jesus wa yaka ha tyaa: “Hámu ningi nyahoka!” Wa t̯in̯a okutwi kwe, he mu velula.

52Iya Jesus wa heela ovayambethi ovanene novanene wovayungi wotempeli novanene mboka mbave ya oku mu kambula ha tyaa: “Mwe ya nomikonda nodhonkunye ngambamamu kambula otjimpulu? 53Omatango aehe ndji kala nan̯e motempeli, n̯e kamu nkambula, iya hendji owola yen̯i nodhonkono dhomutumini wet̯iku lyouye hembu.”

Petrus me litendele Jesus

(Mat. 26:57-58,69-75; Mark. 14:53-54,66-72; Joh. 18:12-18,25-27)

54Iya va kambula Jesus, have mu twala konganda yomuyambethi omunene. Petrus wa landula mo ae li kon̯ima kokule. 55Iya hiva tyavele omulilo pontanga yonganda, va kala pohi, Petrus naye we ya, ha kala pohi puwo. 56Omukadhona umo nguu undapa monganda moka, hiee mu mono ama yoto, we mu tongolola, ha tyaa: “Hengu naye wa li pamo naJesus.”

57Iya Petrus we litendela, ha tyaa: “Mukadhintu ove, ame hengu hí mu i.”

58Kon̯ima yokaluvedhe omuntu umo we mu dhimbuka, ha tyaa: “Naove wo oove umo owomuwo.”

Petrus wa yaka ha tyaa: “Mulumentu ove, ame haame.”

59Kon̯ima yowola imo vala, omuntu umo uke we tji koleka ha tyaa: “Otjatjili nahengu wa li pamo naye, mena lyokutya naye wo Omugalilea.”

60Iya Petrus wa yaka ha tyaa: “Mulumentu ove, hí yuvite soka himo popi.” Iya dhivadhiva tainkolo wa li ama popi, onkondombolo ya popya. 61Muhona wa piluluka ha tala Petrus. Iya Petrus wa thipaluka odhondaka dhaMuhona, ngahi e mu heelele ha tyaa: “Onkondombolo tainkolo háiya popya, ove mo lintendele tutatu.” 62Iya wa pita pondje ama lili unene.

Jesus ma penywa

(Mat. 26:67-68; Mark. 14:65)

63Iya ovalumentu mboka mbava li amava yungu Jesus, ve mu penya, have mu tono. 64Ve mu kuta pomeho, have mu pula hava tyaa: “Thimbila okutya aan̯i ngwee ku tono.” 65Iya ve mu penya, have mu popi ovipuka ovingi.

Otjoonganene tjovanene

(Mat. 26:59-66; Mark. 14:55-64; Joh. 18:19-24)

66Hikwa tji, Otjoongi tjovanene wotjiwan̯a novayambethi ovanene novalongiveta tja ongana, hava eta Jesus mOtjoongi tjawo. 67Va heela Jesus hava tyaa: “Andaa oove Messias, tu heela.”

Iya we ve heela ha tyaa: “Nande mu heele, kaamu ndjitavele, 68nande mu pula, kaamu ndjaka. 69Iya okudha ndino Omuna wOmuntu ma ka kala pohi kokulyo kwaKalunga nguu na odhonkono.”

70Wo avehe ve mu pula hava tyaa: “Oove atjaa MunwaKalunga?”

Jesus we ve yaka ha tyaa: “Mu li mondjila himamu tya aame.”

71Iya wo hava tyaa: “Twa hepa uke oumbangi watji? Odhondaka ndhaa dhi motjinyo tje, nt̯e twe dhi tee.”

Etestamende Epe Moludhimba

© 2012 Bible Society of Namibia

More Info | Version Index