Search form

Lukas 5

Ovalongwa wolutenga

(Mat. 4:18-22; Mark. 1:16-20)

1Etango limo Jesus wa kulama pelunga lyaGenesaret, owingi wovantu we lin̯in̯ikidha puye, u teelele odhondaka dhaKalunga. 2Jesus wa mona omawato avali ngaa li kontyo yelunga, ovahwee va vadhwa ava dhi mo, amava koho omawaanda awo. 3Ye wa londa mowato umo, mbwaa li owaSimon, he mu heele, e u hweenethe ko kanunu, u dhe ko kontyo. Jesus wa kala pohi mowato, ha longo ovantu.

4Iya hiaa mana okupopya, wa heela Simon ha tyaa: “Liyila peiva hempee, n̯e mu ka lunde omawaanda en̯i.”

5Simon we mu yaka ha tyaa: “Muhona, twa undapa out̯iku auhe, nt̯e katu na hitwa kambula mo, iya owaanda me u yumbu mo vala mena lyahiwa ntjeele.” 6Iya hive tji ningi, va kambula odhohi odhingi unene, nomawaanda awo a uthauka. 7Wo va kon̯ona ovakwawo mbava li mowato omukwawo, ve ye, ve ve popile. Wo ve ya, have yulitha omawato aeevali katee omawato maa hala okuhita. 8Simon Petrus hiee tji mono, wa twika odhongolo podhompadhi dhaJesus ha tyaa: “Muhona, dha po pwaame, mena lyokutya ame ndjimulundhi.”

9Iya ye novakwawo mboka mbava li pamo naye, ve kuminwa otjihikutulwa tjodhohi ndhiva hwaa, 10Jakob naJohannes, oomunkwaSebedeus mbava li naSimon, nawo ve kuminwe. Jesus wa heela Simon ha tyaa: “Hó tila. Okudha hempa mo ningi omuhwee wovantu.”

11Wo va eta omawato kontyo, ovipuka avihe have vi thii po, have mu landula.

Jesus ma velula omuvedhi wotjilundu

(Mat. 8:1-4; Mark. 1:40-45)

12Jesus tainkolo a li mondolopa yontumba, mumwa li omulumentu umo ngwaa kambulwa unene kotjilundu, hiaa mono Jesus, we lit̯imika po kotjipala tje, he mu kumbu ha tyaa: “Muhona, andaa mo hala okumbelula, mo tji ulu.”

13Jesus wa yela okuwoko kwe, he mu t̯in̯i ha tyaa: “Ame me hala, veluka.” Iya dhivadhiva ouvela wotjilundu wa dha mo muye. 14Iya Jesus we mu ilikin̯a ha tyaa: “Hó tji heele omuntu noumo. Iya enda, u ke liyulikithe komuyambethi, ove u ka yandje otjali kotempeli ngaMoses hiaa heele, tji ve ningile oumbangi okutya ove wa veluka.”

15Iya omipopyo ouhunga naJesus vya ya kokule, novantu ovengi ve ya oku mu teelela nokuvelulwa komauvela awo. 16Jesus we ke likalela aika mokuti, oko a ka kumbila.

Jesus ma velula omulumentu wotjinteya

(Mat. 9:1-8; Mark. 2:1-12)

17Etango limo Jesus hiaa li ama longo ovantu, pa li apa kala pohi Ovafarisai novalongiveta mbava dhile koulongo auhe womoGalilea nowomoJudea nomoJerusalem. Kodhonkono dhaMuhona, Jesus wa velula ovavedhi. 18Iya taa tuutuu, pe ya ovalumentu mbava tjindi omulumentu kotjintali, nguu na otjinteya. Wo va li amava hala oku mu hititha mo, ve mu laleke po kotjipala tjaJesus. 19Iya mena lyowingi wovantu va anyenenwe oku mu thikitha puJesus, hava londo kombanda yondjuwo, hava uthula ontovi, hapo ve mu thothononena notjintali tje mokati kawo kotjipala tjaJesus. 20Jesus hiaa mono eitavelo lyawo, we mu heela ha tyaa: “Ove, odhonkali dhoye dha ithwa po.”

21Ovalongiveta nOvafarisai va uta okulipula hava tyaa: “Aan̯i ngu, nguma penye Kalunga hinyahi? Aan̯i nguma ulu okwiitha po odhonkali, haKalunga vala aika?”

22Jesus wa iwa soka hiva li amave lipula, we ve pula ha tyaa: “Omena lyatji mamu lipula ovipuka hembi momitima vyen̯i? 23Hitja puvala otjin̯i, okutya: ‘Odhonkali dhoye dha ithwa po,’ ne okutya: ‘Kulama, enda’? 24Iya opo mu kale amu tji i okutya Omuna wOmuntu u na odhonkono kombanda yohi okwiitha po odhonkali,” Jesus wa heela omulumentu wotjinteya ha tyaa: “Ame me ku heele okutya kulama, itha po otjintali tjoye, enda konganda.”

25Ye wa kulama po dhivadhiva movipathi vyawo, ha itha po otjintali hoka hwaa li aa lala po, ha i konganda ama hivilike Kalunga. 26Avehe ve kumwa, hava hivilike Kalunga, wo va li ava tila hava tyaa: “Ndino twa mono ovipuka mbyee tu kumitha!”

Levi ma ithanwa

(Mat. 9:9-13; Mark. 2:13-17)

27Iya kon̯ima yovipuka hembi Jesus wa ya pondje, ha mono po omuthendelethi nguu tiwa oLevi, aa kala pohi pombonge yokuthendelela elilimo. Jesus we mu heela ha tyaa: “Ndandula ndje.” 28Levi wa thiaa po ovipuka avihe, ha landula Jesus.

29Levi wa ningila Jesus otjipito otjinene monganda ye. Iya monganda ye mwa li engundwa enene lyovathendelethi novakwawo mbava li amava li pamo nawo. 30Ovafarisai novalongiveta vawo va tangunitha ovalongwa vaJesus hava tyaa: “Omena lyatji himamu li, n̯e hamu nu pamo novathendelethi novalundhi?”

31Jesus we ve yaka ha tyaa: “Mbave li nawa kava hepa otjimbanda, iya ovavedhi owo vala aveika mava hepa otjimbanda. 32Ame hí dhile okwiithana ovavyuuki, iya mbe ya okwiithana ovalundhi, ve liteyulule.”

Otjikulu notjipe

(Mat. 9:14-17; Mark. 2:18-22)

33Ovantu vamo va heela Jesus hava tyaa: “Ovalongwa vaJohannes va kala amave litjaele ovikulya otwingi, hava kumbu, novalongwa wOvafarisai otjo va ninga, iya ovalongwa woye va kala vala amava li otjo mava nu.”

34Jesus we ve yaka ha tyaa: “Mamu ulu tuu okutumin̯in̯a omapanga omukupi e litjaele ovikulya, tainkolo omukupi ave li naye? 35Iya katango omukupi mave ke mu nyekwa, opo mave ke litjaela ovikulya.”

36Jesus we ve heela eeli hendi ha tyaa: “Kape na tja omuntu nguma tete momudhalo omupe elimendu, he li pampele komudhalo omukulu. Iya andaa me tji ningi, ma yono omudhalo omupe. Elimendu lyomudhalo omupe kaali thevelwa omudhalo omukulu. 37Iya kape na tja omuntu nguma dhili ovinyu ovipe modhosaku dhotjipa odhonkulu. Iya andaa me tji ningi, ovinyu ovipe mavi uthula odhosaku, vyo havi tika mo, nodhosaku madhi nyanyauka. 38Ovinyu ovipe vi dhilwa modhosaku odhompe. 39Kaku na tja omuntu ngwee ilila ovinyu ovikulu, ha hala ovipe, mena lyokutya ma tyaa: ‘Ovikulu oviwa.’ ”

Etestamende Epe Moludhimba

© 2012 Bible Society of Namibia

More Info | Version Index