Search form

Lukas 9

Jesus ma tumu ovalongwa omulongo navavali

(Mat. 10:5-15; Mark. 6:7-13)

1Jesus wa ithanena ovalongwa omulongo navavali pamo, we ve pa odhonkono netumino okutumina odhondemoni adhihe nokuvelula omitjithi. 2We ve tuma oku ka teetha otjilongo tjaKalunga nokuvelula ovavedhi. 3We ve heela ha tyaa: “Hámu i natja mondjila, hatjisawa, handjato, hamungome, hadhombongo, n̯e hámu kala novikutu vivali. 4Amwe ya monganda mumwe thikile, ngamo mu kala moka katee mamu dhi mo. 5Iya mondolopa moka muhamave mu tambula, dhen̯i mo, n̯e mu lipupule ombuma kodhompadhi dhen̯i, tji ve ningile oumbangi okutya mwe ve yetha.”

6Ovalongwa va ya, hava ende moulongo noulongo hava teetha ondaka ombwa, wo hava velula ovavedhi akuhe.

Okungwangwana kwaHerodes

(Mat. 14:1-12; Mark. 6:14-29)

7Iya Herodes, omutumini wotjityane tjotjilongo, hiaa tee ovipuka mbyoka avihe mbyaa ningwa, wa ngwangwana, mena lyokutya vamo va popya okutya Johannes wa imunwa kout̯e. 8Ovakwawo hava tya Elia oye e ya, tainkolo uke vamo mava tya yuumo owomovaprofeti valukulu, oye a imuka kout̯e. 9Herodes ha tyaa: “Johannes ame mbe mu tetetha omutwe, iya nkee ngoka aan̯i ngundji yuvite nguma hewa nyahoka?” Ye wa taendha oluvedhe e mu mone.

Jesus ma kutitha ovalumentu omayovi atano

(Mat. 14:13-21; Mark. 6:30-44; Joh. 6:1-14)

10Ovayapostoli hiva tjuna, va hipululila Jesus ovipuka mbyoka avihe mbiva ninga. Wa ya nawo, have ke likalela kondolopa ndjii tiwa oBetsaida. 11Iya owingi wovantu hiwe tji tee, we mu landula. Jesus we ve tambula, he ve hipululile otjilongo tjaKalunga, ha velula mboka mbava li amava hepa okuvelulwa.

12Iya etango hilya hiti, okawiiwii hika wile pohi, ovalongwa mbenya omulongo navavali ve ya kuJesus, hava tyaa: “Lekela owingi wovantu, u ende moulongo wopopedhi nomodhohambo, va ka taendhe ovikulya nomulalo, mena lyokutya hempa mpatu li opokuti kwanyahinya.”

13Jesus we ve yaka ha tyaa: “Ve pen̯i va lye.”

Ovayapostoli hava tyaa: “Nt̯e katu na tja ovingi, tu na vala omingome vitano nodhohi mbali, ngweendele owingi wovantu hembu auhe matu i, tu ke ve landele ovikulya.”

14Ovalumentu mboka va li omayovi atano.

Iya Jesus wa heela ovalongwa ve ha tyaa: “Ve kalethen̯i pohi movinkopo, otjinkopo atjihe ngatji kale novantu omilongo vitano.”

15Otjo va ninga, hava kaletha pohi ovantu avehe. 16Jesus wa itha po omingome mbyoka vitano nodhohi ndhoka mbali, ha tala peulu, ha pandula. Ye we vi nyembula, he vi pa ovalongwa ve, ve vi yandjele ovantu. 17Wo avehe va lya, have kuta. Ovalongwa va ongedha ovinyembu mbyaa hupu po, have yulitha odhombwe omulongo nambali.

Petrus ma hipulula Jesus

(Mat. 16:13-19; Mark. 8:27-29)

18Etango limo Jesus hiaa li aika ama kumbu, ovalongwa ve va li pamo naye, ye we ve pula ha tyaa: “Ovantu va ntya, aame an̯i?”

19Wo ve mu yaka hava tyaa: “Ovantu vamo va tya oJohannes Omutjatji, iya vamo va tya oElia, navamo uke va tya yuumo owomovaprofeti valukulu a imuka kout̯e.”

20Jesus we ve pula ha tyaa: “Iya n̯e mu ntya, aame an̯i?”

Petrus we mu yaka ha tyaa: “Oove Messias yaKalunga.”

Jesus ma popi omatatetho net̯o lye

(Mat. 16:20-28; Mark. 8:30—9:1)

21Jesus we ve ilikin̯a unene okutya hehi háve tji heele omuntu noumo. 22We ve heela ha tyaa: “Omuna wOmuntu wa thele oku ka tatethwa unene, ha ka yekelwahi kovanene nokovayambethi ovanene nokovalongiveta. Ye ma ka dhipawa, iya etango etyatatu ma ka imunwa kout̯e.”

23Iya Jesus we ve heela avehe ha tyaa: “Andaa pe na nguma hala okundandula, nge lidhimbe ye omwene, ye a tjinde omutjaakano we etango alihe, a ndandule. 24Iya nguma hala okuhupitha omwenyo we, me u keketha, iya nguma keketha omwenyo we mena lyandje, me u hupitha. 25Matji popile tji omuntu okutumba ouye auhe, andaa me likekethele ne he liteya po? 26Iya nguma nt̯a ohon̯i, ye ha t̯a ohon̯i odhondaka dhandje, Omuna wOmuntu me ke mu t̯a ohon̯i, hime ya metumbalo lye nolyaIhe nolyovaengeli ovadhilikwa. 27Ame me mu heele otjatjili okutya pe na vamo muhemba mbava kulama hempa, mbahamava lolo et̯o, tainkolo háveya mona otjilongo tjaKalunga.”

Jesus ma laimithwa

(Mat. 17:1-8; Mark. 9:2-8)

28Jesus wa popya ovipuka hembi, iya ambala kon̯ima yomatango epandutatu wa itha po Petrus naJohannes naJakob, ha i nawo kondundu oku ka kumba. 29Tainkolo a li ama kumbu, olupe lwotjipala tje lwa lunduluka, nomidhalo vye vya pembana, havi laima. 30Iya taa tuutuu, puwo pa li ovalumentu vavali, Moses naElia, hava popi naJesus. 31Wo ve ya melaimo, hava tompola okudha po kwaJesus humaku ka hulithilwa moJerusalem. 32Petrus novakwawo mboka mbava li ava kambulwa kolupot̯i, hiva pathumuka, va mona elaimo lyaJesus novalumentu mboka vavali mbava kulama naye. 33Ovalumentu hemba vavali hive liyapuka naJesus, Petrus wa heela Jesus ha tyaa: “Muhona, hempa pe tu thevelwa okukala. Ngatu tunge po omasase atatu, limo olyoye, limo olyaMoses nalimo olyaElia.” Iya Petrus kaa li ae tji i soka hima popi.

34Petrus tainkolo a li ama popi ovipuka hembi, pe ya ekaka hali ve tjikile. Va li ava tila, hiva tjikilwa kekaka. 35Iya mekaka mwa dha ondaka hai tyaa: “Nguka Omunwandje omuholowolwa, mu tyeen̯i.”

36Ondaka hiya nyimi, pa moneka vala Jesus aika. Ovalongwa ovipuka mbiva mona, kave vi heelele omuntu noumo pomatango ngoka.

Jesus ma velula ondele omudhantu ngwaa li novintonya

(Mat. 17:14-18; Mark. 9:14-27)

37Iya ngamuhuka hiva heluka kondundu, owingi wovantu wa wanena naJesus. 38Mowingi wovantu mwa li omulumentu umo ngwaa wololoka peulu ha tyaa: “Mulongethi, me ku kumbu, u tale omunwandje, mena lyokutya ye ongunga. 39Ombepo aye mu kambula, u yadhauluka, hai mu sata pohi, ha tumbu ondutu kotjinyo. Yo kai hala okudha mo muye, iya ye mu teyaula. 40Ame mba kumbu ovalongwa woye, ve i te mo, atjaa va anyenwa.”

41Jesus we mu yaka ha tyaa: “O, kula n̯e mbahamu na tja eitavelo, n̯e mbahamu tee! Me kala ame likambulithile n̯e katee nalun̯i? Omunoye mu eta huno.”

42Ondele tainkolo mave mu eta, ondemoni ye mu pukutidha unene, hai mu sata pohi. Jesus wa anda ombepo ombi, ha velula ondele ngoka, he mu tjun̯a kwiihe. 43Ovantu avehe ve kuminwa odhonkono odhonene dhaKalunga.

Jesus ma popi uke et̯o lye

(Mat. 17:22-23; Mark. 9:30-32)

Tainkolo avehe va li ave kuminwa ovipuka hembi avihe mbyaa ninga, Jesus wa heela ovalongwa ve ha tyaa: 44“Hámu dhimbi odhondaka hendhi: Omuna wOmuntu ma ka yandjwa momawoko ovantu.” 45Iya odhondaka hendhi ndhiva li amava heelwa, kava li ave dhi yuvite. Odhondaka ndhoka ve dhi holekwa, opo háve dhi tee, atjaa wo va li amava tila oku mu pula.

Omunene aan̯i?

(Mat. 18:1-5; Mark. 9:33-37)

46Movalongwa mwa imuka ombata onene okutya omunene ngwaa pon̯a ovakwawo aan̯i. 47Iya Jesus hiaa iwa omalipulo awo, wa itha po okalele, he ke kulametha pontyo ye, 48ha tyaa: “Nguma tambula okalele heha mena lyandje, oye ma ntambula, iya nguma ntambula, oye ma tambula ngoka ngwaa ntuma, mena lyokutya omununu mun̯e amuhe oye e li omunene.”

Nguhame ku kondjetha wa ama kwoove

(Mark. 9:38-40)

49Johannes wa yaka ha tyaa: “Muhona, twa mono omuntu nguma ta mo odhondemoni mena lyoye. Nt̯e twe mu tjaele, mena lyokutya hawoyetu.”

50Iya Jesus we ve heela ha tyaa: “Hámu mu tjaele, mena lyokutya nguhe na tja onki nan̯e, wa ama kun̯e.”

Ovasamaria kava tambulile Jesus

51Iya omatango hiee thiki popedhi, Jesus a twalwe meulu, wa tokolele okuvyuuka koJerusalem, 52ha tengetha odhontumwa. Va kulama hava i kokalongo kOvasamaria, ve ke mu longekedhele oluvedhe. 53Iya wo kave mu tambulile, mena lyokutya ye wa li ama vyuuka koJerusalem. 54Ovalongwa ve, Jakob naJohannes, hive tji mono, hava tyaa: “Muhona, mo hala tu ithane omulilo meulu u ve lungwinithe po, [ngaElia hiaa ningile]?”

55Jesus wa piluluka, he ve anda [ha tyaa: “Kamu tji i okutya n̯e muwombepo patji? 56Omuna wOmuntu ke dhile okukeketha omienyo vyovantu, iya oku vi hupitha.”] Iya wo hava i kokalongo kamo.

Jesus ma pukulula ovalanduli ve?

(Mat. 8:19-22)

57Jesus novalongwa ve hiva li amava ende mondjila, omulumentu umo we mu heela ha tyaa: “Ame me hala oku ku landula apehe mpamo i.”

58Jesus we mu heela ha tyaa: “Odhombandje dhi na omalungi, novidhila vyokeulu vi na oviyuwo, iya Omuna wOmuntu ke na mpama thuvitha omutwe we.”

59Iya Jesus wa heela omuntu umo ha tyaa: “Ndandula ndje.”

Iya ngunya we mu heela ha tyaa: “[Muhona,] olutenga ndekela ndje ndji ka pake tate.”

60Jesus we mu yaka ha tyaa: “Yetha ovat̯e va pake ovat̯e vawo, iya ove enda, u ka teethe otjilongo tjaKalunga.”

61Umo we mu heela ha tyaa: “Muhona, me hala ndji ku landule, iya mpopila ndje olutenga ndji tji ka lekele owokonganda.”

62Jesus we mu yaka ha tyaa: “Kape na nguu pulula, otjo ma tala kon̯ima, ngume tji ningi, kee thevelwa otjilongo tjaKalunga.”

Etestamende Epe Moludhimba

© 2012 Bible Society of Namibia

More Info | Version Index