Search form

Markus 12

Omaeli otjuundo tjomivinyu

(Mat. 21:33-46; Luk. 20:9-19)

1Jesus wa uta oku ve heela momaeli ha tyaa: “Kwa li omulumentu umo ngwaa twikile omivinyu motjuundo tje. Ye we tji umba olumbo, ha tha mo otjikolelo, ha tungu mo ondjuwo ndjaa ya pokatangaulu, ha undike mo ovantu, tjau ye ha ka valula. 2Otembu yokupya hiye thiki, omwene wotjuundo wa tuma omupika we kumbava undikwa otjuundo, ve mu pe ovinyango mbyaa thele okupewa. 3Iya ovaundikwa ve mu kambula, have mu tono, have mu tjun̯a ae li omawoko anyahinya. 4Iya omwene wotjuundo wa tuma ko uke omupika umo, ve mu tona ombolo, have mu t̯itha ohon̯i navi. 5Iya wa tuma ko uke umo, iya ngoka ve mu dhipaa, ha tumu ko ovakwawo uke ovengi, vamo have ve tono, vamo have ve dhipaa. 6Iya ye wa li ae na po uke umo, omuna omuhivilikwa. Ye kon̯ima we ke mu tuma ko ha tyaa: ‘Omunwandje mave ke mu tumbaleka.’ 7Iya ovaundikwa ve liheela hava tyaa: ‘Hengu oye e li ompinga, tu mu dhipaen̯i, epingo li ninge po olyetu.’ 8Ve mu kambula, have mu dhipaa, have mu yumbu kotjila tjotjuundo.

9“Iya omwene wotjuundo ma ningi vi? Me ke ya, ha han̯auna po ovaundikwa, ye he tji pa vamo. 10Nan̯i kamu tangele omusonekwa hembu mbumau tyaa:

‘Ewe ndyoka ovatungi ndiva yekelahi,

lya ninga ewe ndyaa tumbala okupon̯a omawe aehe.

11Hehi tja ningwa kuMuhona,

tjo otjikumithi momeho etu’?”

12Iya ovanene wOvajuda va li amava hala okukambula Jesus, mena lyokutya va iwa okutya owo a li ama popi meeli hendi. Iya mena lyokutya va li amava tila owingi wovantu, ve mu thiaa po, hava i.

Okuyandja elilimo komukesari

(Mat. 22:15-22; Luk. 20:20-26)

13Iya wo ve mu tumina Ovafarisai vamo namboka mbava ama kuHerodes, ve mu tele modhondaka. 14Iya ve ya, have mu heele hava tyaa: “Mulongethi, tu tji i okutya oove owatjatjili, ku na tja nomuntu, mena lyokutya ove ku tala otjipala tjomuntu, iya u longa ovantu ondjila yaKalunga otjatjili. Tja vyuuka tuu okuyandja elilimo komukesari ne hatjo? Ngatu yandje ne hátu yandja?”

15Jesus hiaa nongonoka okuliningitha kwawo, we ve heela ha tyaa: “Omena lyatji mamu hala okundola? Ndjetela ndjen̯i ondenari ndji i tale.” 16Ve i eta. Iya ye we ve pula ha tyaa: “Ethano nesoneko hendi ndii li ko, olyaan̯i?”

Wo ve mu yaka hava tyaa: “Olyomukesari.”

17Iya okudha mpoka Jesus we ve heela ha tyaa: “Ovipuka vyomukesari vi pen̯i omukesari, ovyaKalunga vi pen̯i Kalunga.” Iya wo ve mu kuminwa.

Olukupo peimuko kout̯e

(Mat. 22:23-33; Luk. 20:27-40)

18Iya Ovasadukai hemba mbava tya kaku na tja eimuko, ve ya kuye, have mu pula hava tyaa: 19“Mulongethi, Moses we tu sonekela hinyahi okutya andaa pe na omulumentu, ngwee thiwa po komukulwe omulumentu ne komunitje omulumentu, ha thii po omuhepe, atjaa omulumentu hengu ahama thii po odhondele, okutya nga kupe omuhepe womukulwe ne womunitje, a yumukile omukulwe ne omunitje oluyumuko. 20Iya kwa li ovalumentu ovalilanduli epanduvali. Owolutenga wa kupile omukadhintu, hiaa t̯i, ka thiile po oluyumuko. 21Omutyavali wa kupa omuhepe, iya naye wa ka t̯a, ahama thii po wo oluyumuko. Nomutyatatu otjo a ninga. 22Avehe epanduvali kava thiile po oluyumuko. Okudha mpoka omuhepe wa ka t̯a kon̯ima. 23Iya peimuko kout̯e, ma ka kala omukadhintu waan̯i, mena lyokutya avehe epanduvali ve mu kupile?”

24Jesus we ve heela ha tyaa: “Kamu pukile mpaeli nyahi, mena lyokutya omisonekwa kamu vi i, nodhonkono dhaKalunga kamu dhi i? 25Iya himava ka imunwa kout̯e, kaava ka kupa, wo kaava ka kupwa, iya mava ka ngala ovaengeli meulu. 26Iya kombinga yeimuko lyovat̯e, kamu tangele nan̯i membo lyaMoses motjihipululo himatji popi eno, Kalunga hiee mu heela ha tyaa: ‘Aame Kalunga kaAbraham naKalunga kaIsak naKalunga kaJakob?’ 27Ye haKalunga kovat̯e, iya okovanamwenyo. N̯e mwa puka unene.”

Otjitumino otjinene

(Mat. 22:34-40; Luk. 10:25-28)

28Iya kwe ya umo owomovalongiveta ngwaa tyaa himave litetha ombata. Wa koneka okutya Jesus we ve yaka nawa. Ye we ya kuye, he mu pula ha tyaa: “Otjitumino hitja tumbala okupon̯a ovikwawo otjin̯i?”

29Jesus we mu yaka ha tyaa: “Otjitumino tjolutengatenga hootjohi: ‘Israel teelela, Muhona Kalunga ketu, oye e li aika Muhona. 30Kala au hole Muhona Kalunga koye komutima woye auhe nokomwenyo woye auhe nokodhondunge dhoye adhihe nokodhonkono dhoye adhihe.’ 31Otjityavali hootjohi: ‘Kala au hole omukwen̯i ngahi u lihole omwene.’ Kape na tja uke otjitumino otjinene hitja pon̯a hembi.”

32Omulongiveta we mu heela ha tyaa: “Iinga, Mulongethi wa popi otjatjili okutya Kalunga yuumo vala, kaku na tja uke omukwawo, oye vala aika. 33Okukala au mu hole komutima auhe nokodhondunge adhihe nokodhonkono adhihe nokukala au hole omukwen̯i ngahi u lihole omwene, tjo tja pon̯a omalungwinithwayambo kuKalunga nomayambo omakwawo.”

34Jesus hiaa mono okutya wa yaka nawa, we mu heela ha tyaa: “Ove ku li kokule notjilongo tjaKalunga.” Okudha mpoka kapa li noumo ngwaa li ama hala oku mu pula uke omapulo.

Kristus omunwaan̯i?

(Mat. 22:41-46; Luk. 20:41-44)

35Iya Jesus hiaa li ama longo ovantu motempeli, we ve pula ha tyaa: “Ovalongiveta mava tile tji Messias omunwaDavid? 36Iya David ye omwene wa viyulwa kOmbepo Ondhilikwa ha tyaa:

Muhona wa heela Muhona wandje ha tyaa:

Kala pohi kokulyo kwandje

katee me twaa odhondjedhi dhoye

kohi yodhompadhi dhoye.’

37David omwene u mu ithana ‘Muhona,’ iya ma ile vi uke omuna?” Iya owingi wovantu wa li amau mu teelele nehuluko.

Lungamenen̯i ovalongiveta

(Mat. 23:1-36; Luk. 20:45-47)

38Jesus hiaa li ama longo ovantu we ve heela ha tyaa: “Lungamenen̯i ovalongiveta mbave hole okudhala omidhalo omile, wo ve hole okupopithilwa pomalandethelo. 39Ve hole kovipundi vyokomeho modhosinagoga nopomalukalo ngaa tumbala movipito. 40Va nyeka ovahepe odhonganda dhawo nokuninga omaalikano omale okulimoneketha vala. Wo mava ka yumanekwa unene.”

Okuyamba komuhepe

(Luk. 21:1-4)

41Jesus wa li a kala pohi, aa pilukile kotjikasa mumu tuwa mbimavi yambwa, ye wa li ama tala ovantu himava twaa mo motjikasa. Ovahona ovengi va twaa mo otjin̯ingi. 42Iya pe ke ya omuhepe umo omuthona ngwaa twaa mo oumbongo uvali, mbuu lithike vala pokapeni kamo. 43Jesus wa ithana ovalongwa ve, ve ye kuye, iya we ve heela ha tyaa: “Me mu heele otjatjili okutya omuhepe hengu omuthona wa twaa mo otjin̯ingi okupon̯a ovantu avehe mboka mbava twaa mo motjikasa. 44Iya avehe va twaa mo mbyoka ovyomovihupe vyawo, iya ye mouthona we wa twaa mo atjihe hiaa li natjo, emona lye alihe.”

Etestamende Epe Moludhimba

© 2012 Bible Society of Namibia

More Info | Version Index