Search form

Markus 15

Jesus kotjipala tjaPilatus

(Mat. 27:1-2,11-14; Luk. 23:1-5; Joh. 18:28-38)

1Iya omuhuka omunene ovayambethi ovanene novanene wotjiwan̯a novalongiveta nOtjoongi atjihe tjovanene tja tompola. Iya wo va kuta Jesus, have mu itha po, have mu yandja kuPilatus. 2Pilatus we mu pula ha tyaa: “Oove ohamba yOvajuda?”

Ye we mu yaka ha tyaa: “Iinga, otjo ngahi wa popi.” 3Ovayambethi ovanene ve mu pa onkali movipuka ovingi. 4Iya Pilatus we mu pula uke ha tyaa: “Ku na tja himo yaka? Taa tuutuu, wo himave ku pa odhonkali movipuka ovingi.”

5Iya Jesus ke mu yakele uke, iya hehi tja kumitha Pilatus.

Jesus ma koyelwa et̯o

(Mat. 27:15-26; Luk. 23:13-25; Joh. 18:39—19:16)

6Pomatango otjipito tjOpaasa pa li onkalo, Pilatus ndjaa kutululila ovantu onkwatwa imo ndjimave mu pula. 7Kwa li omulumentu umo nguu tiwa oBarabas ngwaa kambulilwe pamo nodhomputji odhonkwawo, mbava li notjipopya tjokudhipaa omuntu. 8Iya owingi wovantu we ya, hava utu okupula Pilatus e ve ningile ngahi e ve ningaela. 9Pilatus we ve yaka ha tyaa: “Mamu hala ndji mu kutululile ohamba yOvajuda?” 10Iya ye wa li ae tji i okutya ovayambethi ovanene Jesus ve mu eta kuye mena lyonki.

11Iya ovayambethi ovanene va hongaetha owingi wovantu, va kumbe Pilatus e ve kutululile Barabas. 12Pilatus we ve pula uke ha tyaa: “Omulumentu hengu ngumamu tya ohamba yOvajuda nge mu ninge vi?”

13Wo va wololoka hava tyaa: “Mu papela komutjaakano!” 14Iya Pilatus we ve pula ha tyaa: “Omena lyatji, ouvi mbwaa ningi owatji?”

Iya wo va wololoka vala otjo mava tyaa: “Mu papela komutjaakano!”

15Iya Pilatus hiaa li ama hala okuthevelwa ovantu, we ve kutululila Barabas. Wa tonetha Jesus nodhosokoti, he mu yandja, a ka papelwe komutjaakano.

Ovakwavita mava penye Jesus

(Mat. 27:27-31; Joh. 19:2-3)

16Ovakwavita ve mu twala mombala, hava ithana uke ovakwawo avehe. 17Ve mu dhaleka omudhalo omunene wopurpuri, hava manga ohala yomakuya, have mu dhaleke yo komutwe. 18Iya va uta oku mu popitha hava tyaa: “Lyepeko, ohamba yOvajuda!” 19Iya va kala amave mu tono notjingenge momutwe, otjo mave mu tjakela omate, wo have mu twikile odhongolo ngambamave mu tumbaleke. 20Iya hiva dhi poku mu penya, ve mu dhula omudhalo omunene wopurpuri, have mu dhaleke omidhalo vye. Iya ve mu twala, a ka papelwe komutjaakano.

Jesus ma papelwa komutjaakano

(Mat. 27:32-44; Luk. 23:26-43; Joh. 19:17-27)

21Iya ovakwavita va tumin̯in̯a omulumentu umo, ngwaa li ama dhi kotjana, nguu tiwa oSimon Omukireni, ihe yaAleksander naRufus e mu tjindile ko omutjaakano we. 22Wo va eta Jesus koluvedhe nduu tiwa oGolgata, matji tya Okalundu kOtjoolotwe. 23Iya wo ve mu pa ovinyu mbyaa lumbwalumbwa mumo nomira, iya ye ahame vi nu. 24Iya ve mu papela komutjaakano, have liyandjele omidhalo vye, amava undapetha otjiholowoletho, opo va mone okutya omuntu auhe ma mono tji. 25Owola ndjoka ndjive mu papela komutjaakano ya li omoovi womuhuka. 26Iya esoneko lyonkali ye lya sonekwa hinyahi: “Ohamba yOvajuda.” 27Odhomputji mbali dha papelwa komutjaakano pamo naJesus, imo okokulyo nonkwawo okokumbinda kwe. 28[Otjo hinyahi omisonekwa vi yaukithwe mbimavi tyaa: “Ye wa havelwa modhomputji.”]

29Iya mbava li amava ende po, va penya Jesus, otjo mava pukapuka komitwe, hava tyaa: “Ha-haa! Atjaa oove mo han̯aununa otempeli, ove ho i tungulula moule womatango atatu. 30Lihupitha iya ove omwene, ove u dhe ko komutjaakano.”

31Iya novayambethi ovanene novalongiveta nawo wo ve mu penya hava tyaa: “Nahi oye a hupitha ovantu napano wa anyenwa okulihupitha. 32Messias, ohamba yaIsrael, nga dhe ko napano komutjaakano, tu tji mone, nt̯e tu mu itavele.” Iya nodhomputji ndhaa papelwa pamo naye nadho wo dhe mu penya.

Okut̯a kwaJesus

(Mat. 27:45-56; Luk. 23:44-49; Joh. 19:28-30)

33Iya owola omulongo nambali yokomutenya kwe ya et̯iku motjilongo atjihe, lyo hali kala ko katee owola ontyatatu yokomutenya. 34Mondatu yokomutenya Jesus wa ithana nondaka onene ha tyaa: “Eli, Eli, lama sabakatani?” Matji tyaa: “Kalunga kandje, Kalunga kandje, omena lyatji wa ndjekelehi?”

35Iya vamo owomumboka mbava li ava kulama mpoka, hive tji tee, va popya hava tyaa: “Teelelen̯i, ma ithana Elia.” 36Umo owomuwo wa dhamuka, ha itha po otjitjawo, he tji tjava movinyu mbyaa lula, he tji nwitha Jesus, ha tyaa: “Mu yethen̯i, tu tale, andaa Elia me ya oku mu itha ko.”

37Iya Jesus wa popya nondaka yopeulu, tjau ha t̯i.

38Otjitopa hitji yuvikila motempeli tja tauka okudha peulu katee pohi. 39Iya omunene wovakwavita hengu ngwaa li aa kulama, ae mu vyuukilile, ye hiaa mono et̯o lye, ha tyaa: “Omuntu hengu otjatjili wa li OmunwaKalunga.”

40Iya kwa li ovakadhintu mbava li ava kulama kokule amava tala. Muwo mwa li Maria Magdalena naSalome naMaria, ina yaJakob omununu naJoses.41Wo nahi va kala moGalilea, ve mu landula have mu popile. Ovakadhintu vamo ovengi ve ya pamo naye koJerusalem.

Jesus ma pakwa

(Mat. 27:57-61; Luk. 23:50-56; Joh. 19:38-42)

42Iya hikwa toko, tjo tja li etango lyokulilongekedha, ndyoka ndyaa landulwa kEsabati, 43Josef owokoArimatia, omutumbalekwa womOtjoongi tjovanene, ngoka wo ngwaa li ama kevelele otjilongo tjaKalunga, we ya aa vandhipala, ha i kuPilatus, he mu kumbu otjivimbi tjaJesus. 44Pilatus we kumwa hiaa tee okutya ngunya wa t̯i ae lukulu, wa ithana omunene wovakwavita, he ke mu pula andaa Jesus wa t̯i ae lukulu. 45Hiee tji tee komunene wovakwavita, okutya otjo tji li nyahoka, wa yandja otjivimbi tjaJesus kuJosef. 46Josef wa landa otjitopa tjoliina, ha itha ko otjivimbi, he tji dhingile motjitopa tjoliina, iya he mu paka mombila ndjaa hokolelwe mewe. Iya wa alangatethela po ewe potjivelo tjombila. 47Maria Magdalena naMaria, ina yaJoses va li amava tala mpoka Jesus mpama pakwa.

Etestamende Epe Moludhimba

© 2012 Bible Society of Namibia

More Info | Version Index