Search form

Markus 2

Jesus ma velula omulumentu wotjinteya

(Mat. 9:1-8; Luk. 5:17-26)

1Kon̯ima yomatango amo Jesus wa ya uke koKapernaum. Ovantu hava tee okutya u li ponganda. 2Ovantu ovengi va onganene, katee pomuvelo wondjuwo ahamapa kala uke olukalo. Tainkolo Jesus wa li ame ve teethele odhondaka dhaKalunga, 3pe ya ovalumentu vane mbava tjindi omulumentu nguu na otjinteya, have mu eta kuJesus. 4Iya mena lyowingi wovantu va anyenenwe oku mu thikitha puJesus, hava uthula ontovi kombanda yondjuwo, hai vyuukilile pompuka mpoka mpapa li Jesus, hapo va thothononena otjiyalo moka mumwa li omuvedhi wotjinteya. 5Jesus hiaa mono eitavelo lyawo, wa heela omuvedhi wotjinteya ha tyaa: “Ndele yandje, odhonkali dhoye dha ithwa po.”

6Ovalongiveta vamo, mboka mbava li ava kala pohi mpoka, ve lipopila hava tyaa: 7“Ma popi vi nyahi? Ma penye Kalunga! Aan̯i nguma ulu okwiitha po odhonkali, haKalunga vala aika?”

8Jesus wa iwa dhiva soka hiva li amave lipula momitima vyawo, we ve pula ha tyaa: “Omena lyatji mamu lipula ovipuka hembi momitima vyen̯i? 9Hitja puvala otjin̯i, okuheela omuvedhi wotjinteya okutya: ‘Odhonkali dhoye dha ithwa po,’ ne oku mu heela okutya: ‘Kulama, itha po otjiyalo tjoye, enda’? 10Iya opo mu kale amu tji i okutya Omuna wOmuntu u na odhonkono kombanda yohi okwiitha po odhonkali,” Jesus wa heela omuvedhi wotjinteya ha tyaa: 11“Ame me ku heele okutya kulama, itha po otjiyalo tjoye, enda konganda.”

12Omuvedhi wotjinteya wa kulama, ha itha po otjiyalo tje, ha i pondje movipathi vyawo avehe. Ovantu avehe ve kumwa, hava hivilike Kalunga hava tyaa: “Otjipuka hitji li nyahi, nkee twa dhile katuye tji mona.”

Jesus ma ithana Levi

(Mat. 9:9-13; Luk. 5:27-32)

13Jesus wa ya uke kontyo yelunga. Ovantu avehe ve ya kuye, he ve longo. 14Iya hiaa hweene komeho, wa mona Levi yaAlfeus, aa kala pohi pombonge yokuthendelela elilimo. Jesus we mu heela ha tyaa: “Ndandula ndje!” Levi wa kulama, he mu landula.

15Jesus tainkolo a li monganda yaLevi, ama li, ovathendelethi ovengi novalundhi va lile pamo naye novalongwa ve, mena lyokutya owingi wawo va li ovalanduli vaJesus. 16Ovalongiveta mboka mbava li Ovafarisai hiva mono ama li pamo novalundhi novathendelethi, va pula ovalongwa ve hava tyaa: “Omena lyatji hima li pamo novathendelethi novalundhi?”

17Jesus hiee tji tee, we ve heela ha tyaa: “Mbave li nawa kava hepa otjimbanda, iya ovavedhi owo vala aveika mava hepa otjimbanda. Ame hí dhile okwiithana ovavyuuki, iya mbe ya okwiithana ovalundhi.”

Okulitjaela ovikulya

(Mat. 9:14-17; Luk. 5:33-39)

18Ovalongwa vaJohannes nOvafarisai va li ave litjaela ovikulya. Ovantu vamo ve ya kuJesus hava tyaa: “Ovalongwa vaJohannes nOvafarisai ve litjaela ovikulya, iya omena lyatji ovalongwa woye hihave litjaele ovikulya?”

19Jesus we ve yaka ha tyaa: “Ngundhe ovakongwa womukupi kaava ulu okulitjaela ovikulya, andaa omukupi ve li naye? Tainkolo omukupi ave li naye, kaave litjaele ovikulya. 20Iya katango omukupi mave ke mu nyekwa, opo mave ke litjaela ovikulya.

21“Kape na tja omuntu nguma pampa omudhalo omukulu nelimendu epe ndihaliya kohwa, andaa me tji ningi, elimendu epe mali uthula omudhalo, nontovi mai ningi onene okupon̯a onkulu. 22Iya kape na tja omuntu nguma dhili ovinyu ovipe modhosaku dhotjipa odhonkulu. Iya andaa me tji ningi, ovinyu mavi uthula odhosaku. Ovinyu ovipe vi dhilwa modhosaku odhompe.”

Jesus oye e li Muhona wEsabati

(Mat. 12:1-8; Luk. 6:1-5)

23MEsabati limo Jesus wa yatakana movyana. Ovalongwa ve tainkolo va li amava ende, va uta okupweya otiliku. 24Ovafarisai va heela Jesus hava tyaa: “Taa tuutuu, omena lyatji ovalongwa woye mava ningi soka hitja tjaelwa okuningwa mEsabati?”

25Jesus we ve yaka ha tyaa: “Kamu tangele nan̯i soka David hiaa ningile, hiaa li aa t̯i ondjala, ye hé na hima li, omwene novantu ve? 26Potjikando soka Abiatar hiaa li omuyambethi omunene, David wa hita mondjuwo yaKalunga, ha li omingome mbyaa yambwa Kalunga, mbyoka mbyaa tjaelwa okuliwa kumboka mbahave thi ovayambethi. Iya namboka mbava li naye we ve pa.”

27Jesus ha tyaa: “Esabati lya twiilwa po omuntu, hamuntu a twiilwa po Esabati. 28Iya Omuna wOmuntu oye e li Muhona wEsabati.”

Etestamende Epe Moludhimba

© 2012 Bible Society of Namibia

More Info | Version Index