Search form

Markus 4

Eeli lyomukuni

(Mat. 13:1-9; Luk. 8:4-8)

1Jesus wa utile uke okulonga ovantu pontyo yelunga. Owingi wovantu mbwee mu onganena va li ovengi unene, okutya ha ka londa mowato mbwaa li momeva, hamo a kala pohi. Owingi wovantu wa li awa kala pohi kekomo. 2Ye we ve longa ovipuka ovingi momaeli. We ve longa ama tyaa:

3“Teelelen̯i! Kwa li omuntu umo ngwaa ka kunine. 4Hiaa li ama kunu, dhimo dha wila pontyo yondjila, ovidhila hivye ya, havi dhi tjokola po. 5Dhimo dha wila pontantalahi mpahapa li eheke en̯ingi. Iya dha mena dhivadhiva, mena lyokutya kapa li eheke en̯ingi. 6Iya omutenya hiwa pupyala, ovilya vya lemba, mena lyokutya kavya li nomidhi mbyaa dhika, vya vavala. 7Dhimo dha wila modhohongo. Odhohongo hidha kulu, dha thin̯a ovilya, ahamavi kwata. 8Iya dhimo dha wila pohi ombwa, dha mena, ovilya havi kulu, havi kwata: Vimo omilongo vitatu, vimo omilongo epandu, navimo ethele.”

9Okutya Jesus ha tyaa: “Nguu na omatwi okutyaa, nga tyee.”

Ontanto yokuundapetha omaeli

(Mat. 13:10-17; Luk. 8:9-10)

10Iya Jesus hiaa li po aika, ovalongwa ve omulongo navavali novakwawo ve mu onganena, have mu pula ouhunga nomaeli. 11Ye we ve yaka ha tyaa: “N̯e mwa pewa okwiiwa otjiholekwa tjotjilongo tjaKalunga, iya mboka owopondje, atjihe mave tji pewa momaeli, 12opo omisonekwa vi hwithilwe po mbimavi tyaa:

‘Okutala va tala,

atjaa kave ku mono.

Okutyaa va tyaa,

atjaa kave yuvite,

opo háve liteyulula,

va ithilwe po odhonkali dhawo.’ ”

Jesus ma thitulula eeli lyomukuni

(Mat. 13:18-23; Luk. 8:11-15)

13Jesus we ve pula ha tyaa: “Eeli hendi andaa kamu li yuvite, mamu ulu vi okutyaa omaeli omakwawo? 14Omukuni wa ka kuna odhondaka dhaKalunga. 15Ndhoka ndhaa wila mondjila, dhi ngala ovantu mboka mbava tyaa odhondaka dhaKalunga, iya tainkolo mave dhi teelele, dhivadhiva Satana he ya, ha itha mo odhondaka ndhoka ndhiva kunwa. 16Ndhoka ndhaa wila pontantalahi, dhi ngala ovantu mboka mbamava tee odhondaka dhaKalunga, have dhi tambula nehuluko, 17iya ahamadhi ve hiti, mave dhi kambulitha okaluvedhe okanunu vala, iya andaa pe ke ya oudheu ne okutatethelwa odhondaka dhaKalunga, mave dhi yetha dhiva. 18Ndhoka ndhaa wila modhohongo, dhi ngala ovantu mboka mbamava tee odhondaka dhaKalunga, 19iya otjiho tjouye hembu nokulikembela ouhona nolwiho ndumalu ya muwo, malu thin̯a mo odhondaka dhaKalunga, dho ahamadhi eta po tja. 20Ovantu mboka mbamava tee odhondaka dhaKalunga, wo have dhi tambula, owo va ngala ombuto ndjaa kunwa pohi ombwa, ovilya havi kwata: Vimo omilongo vitatu, vimo omilongo epandu, vimo ethele.”

Olamba kohi yotjihayo

(Luk. 8:16-18)

21Jesus we ve pula ha tyaa: “Pe na nguma ulu okweeta olamba, he i twaa kohi yotjihayo ne kohi yomutala? Ngundhe wa thele oku i tulika kotjituliko. 22Iya kakele kokutya kaku na tja soka hitja holekwa hihamatji ka holololwa, ko kaku na tja soka hitja holama hihamatji ya poluhandja. 23Nguu na omatwi okutyaa, nga tyee!”

24Jesus we ve heela ha tyaa: “Tangan̯eken̯i soka himamu teelele. Himamu yeleke natjo, nan̯e otjo mamu ka yelekwa natjo, hamu wedhelwa ko uke. 25Iya nguu na tja, ma pewa, iya nguhe na tja, nahiee na tjo, me tji nyekwa.”

Eeli lyokukula kwombuto

26Jesus wa popya ha tyaa: “Otjilongo tjaKalunga tji ngala omuntu ngwaa kuna ombuto motjana tje. 27Iya aa ka lala po kout̯iku, komuhuka hima imuka po, ombuto ya mene, yo ya kulu, iya ye ke tji i, hitja ende. 28Mena lyokutya ohi yo oyene oyo i eta ovilya, olutenga havi tete odhongolo, havi manga, okudha mpoka havi yolova. 29Ovilya andaa vya kukuta okutya omuteyi ma itha po onkiki, ha ka teya mena lyokutya eteyo lye thiki.”

Eeli lyombuto yotjitho tjosinapi

(Mat. 13:31-32; Luk. 13:18-19)

30Jesus wa pula ha tyaa: “Otjilongo tjaKalunga matu tji yeleke natji, matu tji yeleke neeli lin̯i? 31Otjilongo tjaKalunga tji ngala ombuto yotjitho tjosinapi. Aya kunwa, onunu kodhombuma adhihe dhokombanda yohi. 32Iya aya kunwa, i mena, hai kulu, hai ningi otjitho otjinene, okupon̯a ovikwawo avihe, hatji kala nodhontai odhonene, ovidhila vyokeulu havi tungile modhontai dhatjo.”

33Jesus wa heela ovantu ondaka, ye ha undapetha omaeli omengi ngahenga, we ve heela otjingi ngahi va li ave yuvite. 34Ke ve heelele tja hihatji li momaeli. Iya hive ke likalela novalongwa ve aveika, he ve thitululile ovipuka avihe.

Jesus ma nyimitha ombepo yomakuthikuthi

(Mat. 8:23-27; Luk. 8:22-25)

35Iya etango ndyoka okawiiwii hika pohi Jesus wa heela ovalongwa ve ha tyaa: “Tu yaukilen̯i tjikoohehinya.” 36Ovalongwa va thiaa po owingi wovantu hava landula Jesus mowato moka mwaa li aa kala pohi. Omawato amo a enda wo pamo naye. 37Ombepo onene yomakuthikuthi ya tukuka, nomakuthikuthi hae ya mowato, katee owato mau hala okuyula omeva. 38Iya ye omwene wa vadhwa mowato kon̯ima aa lala, aa haele kotjihaelo. Ovalongwa ve mu imuna po, hava tyaa: “Mulongethi, nan̯i ku sukilwe nant̯e, himatu i nomeva?”

39Jesus hiaa imuka po, ha anda ombepo, ha heele elunga ha tyaa: “Nyima, u tya thiluu.” Ombepo ya nyima, hai tya thiluu. 40We ve heela ha tyaa: “Mwa tilile tji? Omena lyatji hihamu na tja eitavelo?”

41Wo va tilile unene, have lipula amava tyaa: “Aan̯i ngu, nguu teeka kombepo nokelunga?”

Etestamende Epe Moludhimba

© 2012 Bible Society of Namibia

More Info | Version Index