Search form

Markus 6

Jesus ma tombwa moNasaret

(Mat. 13:53-58; Luk. 4:16-30)

1Jesus wa dha po mpoka, ha i kondolopa yokoyawo, ovalongwa ve have mu landula. 2Metango lyEsabati Jesus wa uta okulonga ovantu mosinagoga. Ovantu ovengi hive mu teelele, have kumwa, have lipula hava tyaa: “Omuntu hengu ovipuka hembi avihe we vi vadha pi? Ounongo hembu mbwee na wo, u li vi? Ovilingankono mbyoka mbyaa undapa, vi lithike pi?”

3Ve mu penya hava tyaa: “Nan̯i hamuhongi wovipilangi? Nan̯i handele yaMaria? Ovanitje haoJakob naJoses naJudas naSimon? Odhompandje hápo tu kala nawo mpa?” Ovantu kave mu itavelele.

4Jesus we ve heela ha tyaa: “Omuprofeti ka tombwa pamo mpape lili, omondolopa yawo vala nokovawo nomonganda yawo.”

5Okutya Jesus ka ningilile ko otjilingankono notjimo, ovavedhi vamovamo vala mbaa tendeka omawoko e, he ve velula. 6Ye we kuminwa mena lyokuhaitavela kwawo.

Jesus ma tumu ovalongwa omulongo navavali

(Mat. 10:5-15; Luk. 9:1-6)

Iya okudha mpoka Jesus wa ka endaenda moulongo noulongo, otjo ma longo ovantu. 7Wa ithana ovalongwa omulongo navavali, ha utu oku ve tuma koovavali noovavali. We ve pa odhonkono dhokutumina odhombepo odhombi. 8Iya we ve ilikin̯a ha tyaa: “Hámu i natja mondjila, kakele vala kotjisawa, hamungome, handjato yokweenda nayo, hadhombongo motjipapo. 9Iya dhalen̯i odhongaku, n̯e hámu kala novikutu vivali.” 10Ye we ve heela uke ha tyaa: “Amwe ya monganda, mumwe thikile, ngamo mu kala moka katee mamu dhi mo. 11Andaa pe na mpoka mpahamamu tambulwa ne mpahamamu teelelwa, dhen̯i po, n̯e mu lipupule ombuma kodhompadhi dhen̯i, opo tji ve ningile oumbangi woku ve pa ombedhi.”

12Wo va ya, hava ka teetha okutya ovantu ngave liteyulule. 13Va ta mo odhondemoni odhingi, hava tohola ovavedhi ovengi nomadhi, wo have ve velula.

Johannes Omutjatji ma dhipawa

(Mat. 14:1-12; Luk. 9:7-9)

14Ohamba Herodes wa tyaa ovipuka hembi avihe, mena lyokutya ena lyaJesus lya teekele apehe. Ovantu vamo va tyaa: “OJohannes Omutjatji oye a imunwa kout̯e, iya odhonkono hendhi odho madhi undapa muye.”

15Ovakwawo hava tya oElia, tainkolo uke vamo mava tya yuumo owomovaprofeti valukulu.

16Herodes hiee tji tee, ha tyaa: “OJohannes ngoka ngumba tetetha omutwe, oye a imunwa kout̯e.” 17Iya Herodes ye omwene oye a tumine ovantu va ka kambule Johannes, a kutwe, a yedhililwe mokaliwoso mena lyaHerodias, omukadhintu womunitje Filippus. Iya Herodes wa kupile Herodias. 18Iya Johannes we mu heela ha tyaa: “Tji huna okukupa omukadhintu womunitjoye.”

19Herodias wa li ondjedhi yaJohannes, wa li ama hala oku mu dhipaa, atjaa ke tji ulile. 20Herodes wa li aa tila Johannes, mena lyokutya wa li ae mu i okutya omulumentu omuvyuuki ye omudhilikwa, iya we mu amena. Wa li ae hole oku mu teelela, nandaku tiwa moku mu teelela u mu kulungitha omutima.

21Iya kwe ke ya etango ewa, Herodes hiaa ningila otjipito odhosekulu dhe nodhondjai dhovita novanenentu moGalilea metango lyokuyumukwa kwe. 22Omuna omukadhona waHerodias hiaa piti montanga, wa dhanena po Herodes novayenda ve, he ve hulukithwa. Ohamba wa heela omukadhona ha tyaa: “Nkumba ndje atjihe himo hala, me ku pa tjo.” 23Ye we mu udhikila, ha ana ha tyaa: “Atjihe soka himo nkumbu, me ku pa tjo, nando nkumbu ombinga imo yotjilongo tjandje.”

24Omukadhona wa ya kwiina, ha tyaa: “Nge kumbe tji?”

Ina we mu heela ha tyaa: “Kumba omutwe waJohannes Omutjatji.”

25Omukadhona wa tjuna dhivadhiva kohamba ama kanyauka, ha tyaa: “Me hala, u mpe napano hinyahi omutwe waJohannes Omutjatji melonga hendi.”

26Iya ohamba ya pongele unene, iya mena lyokwaana kwayo nolyovayenda vayo kai ulile uke oku mu anya. 27Ohamba ya tuma dhivadhiva omukwavita omuyungi wombala, hai mu heele okutya nge mu etele omutwe waJohannes. Omuyungi wombala wa ya ha tete Johannes omutwe mokaliwoso.

28Ye we u eta melonga, he u pa omukadhona. Omukadhona he u pa ina. 29Ovalongwa vaJohannes hive tji tee, ve ya, hava itha po otjivimbi tje, have mu paka.

Jesus ma kutitha ovalumentu omayovi atano

(Mat. 14:13-21; Luk. 9:10-17; Joh. 6:1-14)

30Ovayapostoli va onganena puJesus, have mu hipululile ovipuka mbyoka avihe mbiva ninga, nambiva longa ovantu. 31Jesus wa heela ovalongwa ve ha tyaa: “Indjen̯i tu ke likalele atwiika, opo mu ka thuve po kanunu.” Iya mena lyokutya kwa li ovantu ovengi oombamave ya na mbamava i, okutya kava li ave na oluvedhe lwokulya. 32Iya wo va ya nowato aveika kompuka hukwe likalela.

33Iya ovantu ovengi ve ve mona himava i, have ve dhimbuka, hava ka dhamuka pohi okudha movilongo avihe, hawo va tenga okuthika ko hoka Jesus novalongwa ve huva vadhwa ava vyuuka. 34Iya Jesus hiee thiki kontyo, wa mona engundwa enene lyovantu. Ye wa li ae ve etethele mo onkenda, mena lyokutya va li amava ngala odhondhu ndhihadhi na omut̯ita. Ye wa uta oku ve longa ovipuka ovingi. 35Iya hikwa toko, ovalongwa ve ve ya kuye hava tyaa: “Pompuka hempa opokuti kwanyahinya, netango lya toko. 36Lekela ovantu, va ende kodhohambo dhopopedhi nokoulongo, opo ve ke lilandele ovikulya.”

37Jesus we ve yaka ha tyaa: “Ve pen̯i ovikulya.”

Wo ve mu pula hava tyaa: “Ngatu ende tu ke ve landele omingome nodhondenari omathele avali, tu ye tu ve pe?”

38Jesus we ve pula ha tyaa: “Iya mu na po omingome vingapi? Enden̯i mu ke vi tale.”

Hive vi mono hava tyaa: “Ivitano nodhohi mbali.”

39Iya Jesus wa heela ovalongwa ve, va heele ovantu avehe, va kale pohi mehodhi etalala, wo ve ve yapaule movinkopo. 40Ovantu va kala pohi movinkopo; vimo vya li novantu ethele, vimo omilongo vitano. 41Jesus wa itha po omingome mbyoka vitano nodhohi ndhoka mbali, ha tala peulu, ha pandula. Ye wa nyembula omingome, he vi pa ovalongwa ve, ve vi yandjele ovantu. Otjo e ve yandjela uke odhohi ndhoka mbali. 42Wo avehe va lya, have kuta. 43Ovalongwa va ongedha ovinyembu vyomingome novyodhohi, have yulitha odhombwe omulongo nambali. 44Ovantu mboka mbava lile omingome, va li ovalumentu omayovi atano.

Jesus ma ende kombanda yomeva

(Mat. 14:22-33; Joh. 6:15-21)

45Iya Jesus wa ulumithile dhivadhiva ovalongwa ve, va ka londe mowato, va tenge tjikoohehinya tjelunga koBetsaida, tainkolo ye ma lekele owingi wovantu. 46Kon̯ima yoku ve lekela, wa londa kondundu oku ka kumba. 47Okawiiwii hika wile pohi, owato wa li mokati kelunga, ye wa li aika kombanda. 48Ye wa mona okutya wo va li amava liya noudheu, mena lyokutya ombepo yomakuthikuthi ya li amai ve tono movipala. Momahuka Jesus we ya kuwo ama ende kombanda yomeva. Wa li ama hala oku ve pon̯oka. 49Iya wo hive mu mono ama ende kombanda yomeva, va li amava tya pamo otjilulu, hava kuu. 50Wo avehe va tilile, hive mu mono.

Iya Jesus we ve popitha dhivadhiva ha tyaa: “Koleken̯i, hámu tila, aame!” 51Iya ye wa ya kuwo mowato, ombepo yomakuthikuthi hai nyimi. Ovalongwa va kuminwe unene. 52Iya wo otjipuka tjomingome kave tji konekele nawa, okutya omitima vyawo vya li avya kukuta.

Jesus ma velula ovavedhi moGenesaret

(Mat. 14:34-36)

53Jesus novalongwa ve hiva yauka, ve ya koGenesaret, hava hweenetha owato kontyo. 54Iya hiva dhi mo mowato, ovantu ve mu dhimbuka dhiva. 55Wo va handjana notjit̯indwalongo atjihe, hava ka eta ovavedhi, have ve tjindi kovintali, have ve twala kompuka hoka huva tee okutya Jesus oko e li. 56Iya apehe mpoka mpaa ya, moulongo ne movitungwalongo ne modhohambo, ovantu va eta ovavedhi vawo pomaonganeno. Wo ve mu kumba, e ve itavele nandaku tiwa okut̯in̯a vala kovilyo vyomudhalo we. Avehe mboka mbave u t̯in̯a va veluka.

Etestamende Epe Moludhimba

© 2012 Bible Society of Namibia

More Info | Version Index